ຄ່າຈອດລົດ ໃນຊ່ວງບຸນພະທາດຫຼວງວຽງຈັນ ແພງກວ່າທີ່ທາງການກໍານົດ

ໃນງານບຸນນະມັດສະການພະທາດຫຼວງວຽງຈັນ ປະຈໍາປີ 2024 ທີ່ກໍລັງດໍາເນີນໄປຢູ່ນີ້ ສະຖານທີ່ຮັບຝາກລົດຫຼາຍບ່ອນ ຍັງສວຍໂອກາດ ເກັບເງິນຄ່າຝາກລົດ ເກີນລາຄາທີ່ທາງການກໍານົດ ທີ່ໃຫ້ເກັບ ລົດໃຫຍ່ຄັນລະ 30,000 ກີບ, ລົດຕຸກໆ 15,000 ກີບ ແລະລົດຈັກ 10,000 ກີບ ແຕ່ໄປເກັບນໍາຫຼາຍກວ່ານັ້ນ ເຊັ່ນລົດໃຫຍ່ ເກັບນໍາເຖິງ 50,0000 ກີບ, ລົດຈັກເກັບເຖິງ 20,000 ກີບ, ອີງຕາມຄໍາເວົ້າຂອງປະຊາຊົນ ທີ່ໄປຮ່ວມງານບຸນດັ່ງກ່າວໃນປີນີ້ ຕໍ່ວິທຍຸ ເອເຊັຽເສຣີ ໃນວັນທີ 12 ພະຈິກນີ້…

“50 ພັນ ລົດວີໂກ້ ເຈົ້າເມືອງເພິ່ນແຈ້ງການວ່າ 30,000 ລົດໃຫຍ່ ຫົວໜ້າເພິ່ນບອກເກັບແນວນັ້ນ ແຕ່ບໍ່ຂຽນຫຍັງໃສ່ນີ້ລົດ/ລົດຈັກເຂົາວ່າ 10 ພັນເນາະ ແຕ່ເຂົາຈ່າຍແລ້ວຖາມເຂົາວ່າຄື 20 ພັນວ່າຊັ້ນ.”

ແລະຊາວນະຄອນຫຼວງວຽງຈັນອີກຜູ້ນຶ່ງ ກໍເວົ້າຄືກັນວ່າ ຄ່າຝາກລົດຢູ່ບາງບ່ອນແພງກວ່າທີ່ທາງການກໍານົດ ແມ່ນແຕ່ບ່ອນຈອດລົດ ຊຶ່ງຢູ່ໄກຈາກສະຖານທີ່ງານບຸນ, ສໍາລັບລົດໃຫຍ່ ເພິ່ນກໍຍັງເກັບເອົານໍາເຖິງ 50,000 ກີບ ແທນທີ່ຈະເປັນ 30,000 ກີບທີ່ທາງການກໍານົດ.

ກ່ອນທີ່ງານບຸນພະທາດຫຼວງວຽງຈັນຈະເລີ່ມຂຶ້ນ ຊາວລາວຫຼາຍຄົນ ກໍຄາດວ່າ ຄ່າຝາກລົດໃນປີນີ້ ຈະມີການສວຍໂອກາດ ຂຶ້ນຄ່າຝາກລົດ ເກີນກວ່າທີ່ທາງການກໍານົດ ຄືປີທີ່ຜ່ານໆມາ ຊຶ່ງມັນກາເປັນຄືກັນ ກັບທີ່ຄາດການໄວ້ນັ້ນແທ້ ຍ້ອນຕົ້ນທຶນຄ່າເຊົ່າສະຖານທີ່ຈອດລົດນັ້ນ ຂ້ອນຂ້າງສູງ ບໍ່ສອດຄ່ອງກັບຄ່າຝາກລົດ ທີ່ທາງການກໍານົດ. ດັ່ງນັ້ນຈຶ່ງເຮັດໃຫ້ ມີການເກັບຄ່າຝາກລົດ ເກີນທີ່ທາງການກໍານົດໄວ້ ດັ່ງປະຊາຊົນອີກຜູ້ນຶ່ງເວົ້າວ່າ:

“ຄັນນຶ່ງ 30 ພັນລົດໃຫຍ່ ລົດກະບ໋ະລົດເກ໋ງ ບ່ອນຕ້ອງຍ່າງອອກໄປ ມັນໄກກໍ 30 ມັນໃກ້ກໍ 50 ມັນເປັນບໍ່ໄດ້ດອກ ລາວນີ້ແຈ້ງການກໍແຈ້ງການ ຄ່າເຊົ່າມັນແພງເດ້ ຖ້າເຂົສບໍ່ເຮັດເຂົາກໍບໍ່ໄດ້ກໍາໄລ ຄ່າເຊົ່າທີ່ແພງ ໄລ່ນັ້ນໄລ່ນີ້ມັນກໍບໍ່ໄດ້.”

ບໍ່ສະເພາະແຕ່ຄ່າຝາກລົດເທົ່ານັ້ນແພງ, ຄ່າເຊົ່າສະຖານທີ່ຂາຍເຄື່ອງ ໃນເຂດງານບຸນປີນີ້ ກໍແພງຂຶ້ນເຊັ່ນກັນ. ສະເພາະຮ້ານຄ້າ ທີ່ຢູ່ໃນບໍລິເວນພະທາດຫຼວງວຽງຈັນ ຊຶ່ງຄ່າເຊົ່າຢູ່ທີ່ປະມານ 17 ຫາ 20 ລ້ານກີບ, ສ່ວນຄ່າສະຖານ ທີ່ອ້ອມຂ້າງ ຢູ່ທີ່ປະມານ 10 ລ້ານກີບ ຄືແພງກວ່າຄ່າເຊົ່າປີກາຍຫຼາຍກວ່າ 2 ເທົ່າຕົວ. ຍ້ອນຄ່າເຊົ່າແພງ ຈຶ່ງເຮັດໃຫ້ພວກພໍ່ຄ້າແມ່ຄ້າຂາຍເຄື່ອງ ຂາຍອາ ຫານໃນງານບຸນ ຂາຍສິນຄ້າໃນລາຄາແພງຂຶ້ນ ເພື່ອບໍ່ໃຫ້ຂາດທຶນ, ອີງຕາມຄໍາເວົ້າຂອງແມ່ຄ້າຂາຍອາຫານໃນງານບຸນປີນີ້.

“ສະຖານທີ່ທັງນອກທັງໃນ ບ່ອນໃດທີ່ວ່າຄົນຍ່າງຫລາຍກໍແພງຢູ່ ຮ້່ານຂ້ອຍຫັ້ນຂ້ອຍເຊົ່າ 9,500,000 ຫັ້ນນ່າ ບໍ່ໄດ້ລວມເຕັ້ນ ລວມເຕັ້ນ 700,000 ອີກ ຄືຂອງຂ້ອຍມັນເປັນອ້ອມຂ້າງ ທາງຫລັງມັນກໍຊິລາຄາຊອບໜ້ອຍນຶ່ງ ຄັນທາງໃນມັນຈະ 17 ລ້ານຂຶ້ນ ຊຸມຂ້ອຍເນາະ ເຄີຍຂາຍໄມ້ 5,000 ປີກາຍນີ້ປີນີ້ກໍ ອັນ ຂຶ້ນ 10 ພັນຊິໄດ້ຄູນ 2.”

ເລື່ອງຄ່າຝາກລົດແພງ ເຈົ້າໜ້າທີ່ຫ້ອງການ ຖະແຫຼງຂ່າວ ວັດທະນາທໍາ ແລະທ່ອງທ່ຽວ ເມືອງໄຊເສດຖາ ກ່າວວ່າ ທາງຄະນະກໍາມະການ ຈັດງານບຸນນະ ມັດສະການພະທາດຫຼວງ ກໍຫາແນວທາງແກ້ໄຂຢູ່, ຫາກປະຊາຊົນເຫັນການສວຍໂອກາດ ເກັບຄ່າຝາກລົດ ແພງເກີນກໍານົດ ໃຫ້ນໍາຮູບປີ້ຝາກລົດ ທີ່ຂຽນຄ່າຝາກລົດໄວ້ ແລະບ່ອນຝາກລົດນັ້ນ ແຈ້ງໃຫ້ຫ້ອງການ ຂອງຄະນະກໍາມະການພາຍໃນງານບຸນ ເພື່ອຈະໃຫ້ເຈົ້າໜ້າທີ່ໄປກວດກາ ແລະແກ້ໄຂ ດັ່ງທີ່ທ່ານກ່າວວ່າ:

“ແຈກຈຸດມາ ຖ່າຍຮູບໜ້າຄອກເຂົາຫັ້ນສົ່ງມາ ແລ້ວຈຸດນີ້ເຂົາລັກຂຶ້ນລາຄາເທົ່າໃດໆ ຄັນເຂົາບໍ່ຍອມປ່ຽນ ໄທເຮົາກໍສິໃຫ້ສາຍຂອງເຮົາລົງໄປຕິດຕາມ ການປັບໃໝເບື້ອງຕົ້ນເຂົາຈະດໍາເນີນຢູ່ໃນຫ້ອງການເນາະ.”

ມີລາຍງານວ່າ ໃນງານບຸນພະທາດຫຼວງປີນີ້ ມີຫຼາຍບັນຫາ ຮວມທັງການລັກຊັບນັກທ່ອງທ່ຽວ ແລະການຖິ້ມຂີ້ເຫຍື້ອຊະຊາຍ.

ງານບຸນນະມັດສະການພະທາດຫຼວງວຽງຈັນ ແລະງານສະແດງສິນຄ້າ ປີນີ້ ຈັດຂຶ້ນແຕ່ວັນ 11 ຫາ 15 ພະຈິກ, ມີຮ້ານວາງສະແດງ ແລະຮ້ານຂາຍສິນຄ້າທັງໝົດ​ 1,625 ຮ້ານ ແລະ​ຄາດວ່າ ຈະມີຜູ້ຄົນມາຮ່ວມງານ 200,000​ ປາຍຄົນ​ ແລະ​ຈະມີເງິນໝູນວຽນ 11​ ຕື້ປາຍກີບ.​