ຄົນຈີນ ສືບຕໍ່ເຮັດ ທຸລະກິດທ່ອງທ່ຽວ ຜິດກົດໝາຍ ໃນແຂວງຫຼວງພຣະບາງ.

ປັດຈຸບັນ ຢູ່ແຂວງຫຼວງພຣະບາງ ມີຄົນຈີນ ຈໍານວນຫຼາຍ ເຂົ້າມາເຮັດ ທຸລະກິດດ້ານການທ່ອງທ່ຽວ ແບບຜິດກົດໝາຍ ໃນລັກສະນະ ເຊົ່າເຮືອນພັກ ຕໍ່ຈາກຄົນລາວ ແລ້ວເປີດໃຫ້ບໍລິການເອງ ແບບບໍ່ໄດ້ຮັບອະນຸຍາດ, ແຕ່ຍັງບໍ່ສາມາດລະບຸໄດ້ວ່າ ມີຈັກແຫ່ງ ລວມທັງມີ ພະນັກງານ ນໍາທ່ຽວຊາວຈີນ ອີກຈໍານວນໜຶ່ງ ທີ່ນໍາພານັກທ່ອງທ່ຽວຈີນ ເຂົ້າມາທ່ຽວ ໃນລັກສະນະພະນັກງານ ນໍາທ່ຽວເຖື່ອນ. ດັ່ງເຈົ້າໜ້າທີ່ ດ້ານການທ່ອງທ່ຽວ ໃນແຂວງຫຼວງພຣະບາງ ທ່ານໜຶ່ງກ່າວຕໍ່ ວິທຍຸ ເອເຊັຽ ເສຣີ ໃນວັນທີ 5 ພະຈິກາ ນີ້ວ່າ:

"ດຽວນີ້ ບັນຫາ ມັນຢູ່ບ່ອນວ່າ ສ່ວນຫຼາຍ ມັນເຮືອນພັກ ທີ່ເປັນຂອງຄົນລາວ ສ່ວນຫຼາຍ ຈໍານວນໜຶ່ງ ແລ້ວເຂົາເຈົ້າ ລະໄປໃຫ້ຄົນຈີນ ຄົນຫວຽດ ເຊົ່າຫັ້ນແລ້ວ ກະໃບອະນຸຍາດ ຂອງຄົນລາວຫັ້ນ ແທ້ໆ ຜູ້ບໍລິຫານ ເປັນຄົນຕ່າງປະເທດແລ້ວອອກໜ້າຄົນລາວ ແລະ ກໍເວົ້າ ອັນເລື່ອງນໍາທ່ຽວ ສ່ວນຫຼາຍ ແມ່ນຈີນຫັ້ນແລ້ວ ຕາມລະບຽບ ຕ້ອງແມ່ນ ຄົນລາວ ເປັນຜູ້ນໍາທ່ຽວ ກະທົບກະເທືອນຫຼາຍ ອັນຫຼາຍແນວເດີ້ ເພິ່ນກໍຫັນເຂົ້າສູ່ ລະບຽບ ກໍຄ່ອຍເຮັດໄປ ຫັ້ນແຫຼະ."

ທ່ານກ່າວຕື່ມວ່າ ນອກຈາກ ບັນຫາທີ່ກ່າວມາຂ້າງຕົ້ນ ກໍຍັງມີບັນຫາ ຄົນຕ່າງຊາດ ມາເຮັດອາຊີບ ສະຫງວນ ຂອງຄົນລາວອີກນໍາ ໂດຍສະເພາະ ຫວຽດນາມ ຄົນຈີນ ທີ່ເຂົ້າມາ ເຮັດທຸລະກິດ ປະເພດ ຮ້ານເສີມສວຍ, ຮ້ານຕັດເລັບ, ຮ້ານເກັບເສດເຫຼັກ ໂດຍເຈົ້າໜ້າທີ່ ຈະມີການປາບປາມ ແລະ ເຮັດໃຫ້ຖືກຕ້ອງ ເພາະເປັນ ການຍາດແຍ່ງອາຊີບ ຄົນລາວ ຂະນະທີ່ ຊາວລາວ ໃນແຂວງຫຼວງພຣະບາງ ນາງໜຶ່ງ ຢືນຢັນວ່າ ພາຍໃນ ເມືອງມໍລະດົກໂລກ ເຕັມໄປດ້ວຍ ຄົນຈີນແລະ ຄົນຫວຽດ ທີ່ເຂົ້າມາເຮັດ ອາຊີບສະຫງວນ ຂອງຄົນລາວ ແຕ່ບໍ່ຮູ້ວ່າ ເຈົ້າໜ້າທີ່ ເຮັດແນວໃດ ຈຶ່ງປ່ອຍໃຫ້ ພວກເຂົາເຈົ້າ ມາເຮັດແນວນັ້ນໄດ້.

"ເຫັນຕາມທົ່ວໄປ ນີ້ແຫຼະ ເຂົາກໍມາເຮັດ ຮ້ານເສີມສວຍ ຮ້ານຕັດເລັບ ຮ້ານອີ່ຫຍັງ ເຂົາກໍມາເຮັດໝົດແຫຼະ ຫວຽດ ຈີນ ກໍມີຫຼາຍ ຫັ້ນແຫຼະ ລະບຽບນັ້ນນີ້ ເພິ່ນກໍມີ ປະກາດຕະຫຼອດຫັ້ນແຫຼະ ແຕ່ວ່າ ມັນກໍມີຢູ່ ທຸກບ່ອນທຸກແຂວງເຕັມໝົດແຫຼະ."

ຂະນະດຽວກັນ ຊາວລາວ ຢູ່ແຂວງຍຫຼວງພຣະບາງ ອີກທ່ານໜຶ່ງ ກໍໄດ້ກ່າວວ່າ ຄົນຕ່າງຊາດ ທີ່ເຂົ້າມາເຮັດ ທຸລະກິດ ໃນແຂວງຫຼວງພຣະບາງ ສ່ວນໃຫຍ່ ແມ່ນຄົນຈີນ ທີ່ເຂົ້າມາເຮັດ ຮ້ານອາຫານ ແລະ ຄ້າຂາຍ ສ່ວນເລື່ອງ ການສວຍໂອກາດ ເຂົ້າມາເຄື່ອນໄຫວ ທຸລະກິດ ແບບບໍ່ຖືກຕ້ອງນັ້ນ ທາງການເພິ່ນ ກໍພະຍາຍາມ ປາບປາມ ຢູ່ແຕ່ເຫັນວ່າ ແກ້ໄຂບໍ່ໄດ້ 100%:

"ສ່ວນຫຼາຍ ແມ່ນຄົນຈີນ ມາລົງທຶນ ຢູ່ຫຼວງພຣະບາງ ໂອ້ຫຼາຍໆໆ ສ່ວນຫຼາຍ ໃນປັດຈຸບັນນີ້ ເຂົາເຈົ້າ ມາເຮັດ ຮ້ານອາຫານ ກໍມາເຮັດຄ້າຂາຍ ນີ້ແຫຼະ ເຂົາເຈົ້າ ກໍເອົາເຄື່ອງເຂົາເຈົ້າ ມາໂຕນີ້ ແມ່ນວຽກຂັ້ນເທິງ ເພິ່ນກໍພະຍາຍາມ ປາບປາມພາກສ່ວນທີ່ວ່າ ເຮັດຜິດກົດໝາຍນີ້ນາ ແຕ່ວ່າ ຊິໃຫ້ມັນຮ້ອຍແທ້ ມັນກໍບໍ່ຮ້ອຍແລ້ວເນາະ ມີນັກສວຍໂອກາດ ຈໍານວນໃດ ຈໍານວນໜຶ່ງ ຫັ້ນນ່າ.”

ສ່ວນກ່ຽວກັບ ບັນຫາພະນັກງານ ນໍາທ່ຽວເຖື່ອນນັ້ນ, ຊາວລາວອີກທ່ານໜຶ່ງ ກໍເຫັນວ່າ ທີ່ຜ່ານມາ ກໍເຄີຍເຫັນພະນັກງານ ນໍາທ່ຽວເຖື່ອນ ທີ່ເປັນຊາວຈີນ ເປັນຄົນນໍາທ່ຽວ ໃຫ້ຄົນຈີນ ນໍາກັນເອງ ແທນຄົນລາວ ເຊິ່ງຕາມປົກກະຕິແລ້ວກຸ່ມນັກທ່ອງທ່ຽວ ຕ່າງປະເທດ ທີ່ເຂົ້າມາທ່ຽວໃນລາວ ຈະຕ້ອງຈ້າງ ພະນັກງານ ນໍາທ່ຽວຄົນລາວ ເປັນຜູ້ນໍາພາທ່ອງທ່ຽວ:

“ແມ່ນຄົນຈີນ ຫາກເຂົາ ເອົາເປັນໄກ້ ຂອງເຂົາເລີຍຫັ້ນນາ ເຂົາກໍເອົາໄກ້ ຂອງເຂົາມາເອງ ຄົນຈີນ ກໍມາຫຼາຍຊ່ວງນີ້ ກໍເພາະວ່າ ມັນມີສະດວກລົດໄຟ ແລ້ວເດີ້."

ເຖິງຢ່າງໃດກໍຕາມ, ເມື່ອບໍ່ດົນມານີ້ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພຣະບາງ ໄດ້ມີການປະຊຸມ ປຶກສາຫາລື ເພື່ອຊອກຫາ ວິທີທາງແກ້ໄຂ ປະກົດການຫຍໍ້ທໍ້ ໃນຂະແໜງ ການທ່ອງທ່ຽວ ຢູ່ແຂວງຫຼວງພຣະບາງ ໂດຍສະເພາະ ການຫາແນວທາງ ຄຸ້ມຄອງ ຫົວໜ່ວຍທຸລະກິດ ນໍາທ່ຽວ ໃຫ້ມີປະສິດທິພາບດີຂຶ້ນ, ພະນັກງານ ນໍາທ່ຽວ ທີ່ເຄື່ອນໄຫວ ບໍ່ສອດຄ່ອງ ກັບລະບຽບກົດໝາຍ. ລວມເຖິງ ການແກ້ໄຂ ບັນຫາ ຊາວຕ່າງຊາດ ເຄື່ອນໄຫວເຮັດທຸລະກິດ ທີ່ເປັນອາຊີບສະຫງວນ ໃຫ້ຄົນລາວ, ສິ່ງຮອງຮັບ ນັກທ່ອງທ່ຽວ ບໍ່ພຽງພໍ, ສະຖານທີ່ທ່ອງທ່ຽວ ແລະ ເສັ້ນທາງ ໃນຕົວເມືອງ ມີຄວາມແອອັດ, ການເກັບເງິນກອງທຶນ ສົ່ງເສີມ ການທ່ອງທ່ຽວ ຢູ່ກັບ ດ່ານສາກົນ ຍັງບໍ່ທັນມີຄວາມເປັນເອກະພາບ ແລະ ບັນຫາອື່ນໆ.