ຈີນ, ວຽດນາມ ລຸກລານ ກະສິກອນລາວ

ໄຊຍາ
2020-06-17
ອີແມວລ໌
ຄໍາເຫັນ
Share
ພິມ
ກະຊັງລ້ຽງປາ ເຂດບ້ານທ່າງ່ອນ ເມືອງໄຊທານີ ນະຄອນຫລວງວຽງຈັນ
ກະຊັງລ້ຽງປາ ເຂດບ້ານທ່າງ່ອນ ເມືອງໄຊທານີ ນະຄອນຫລວງວຽງຈັນ
ນັກຂ່າວພົລເມືອງ

ຊາວກະສິກອນລາວ ໂດຍສະເພາະແມ່ນຜູ້ຜລິດປ້ອນຕລາດ ພາຍໃນປະເທດ ແມ່ນປະສົບກັບ ຄວາມລຳບາກ ໃນການສົ່ງຜົລຜລິດອອກ ໄປຂາຍເພື່ອລ້ຽງຊີບ ໂດຍສະເພາະ ໃນໄລຍະພຍາດ ໂຄວິດ-19 ຣະບາດ ເຊິ່ງຣັຖບານລາວ ໄດ້ໃຊ້ມາຕການ ກັກໂຕ ໂດຍບໍ່ໃຫ້ມີ ການໄປ-ມາ ຫາສູ່ກັນ ໃນຣະຫວ່າງ ເດືອນມົກຣາ ຈົນມາເຖິງເດືອນພຶສພາ 2020 ຣັຖບານລາວ ຈຶ່ງໄດ້ອອກ ມາຕການຜ່ອນຜັນ ປົດລ໊ອກ ໃຫ້ປະຊາຊົນ ໃຊ້ຊີວິດປົກກະຕິ.

ໃນຂນະທີ່ ຄວາມເດືອດຮ້ອນ ຂອງຊາວກະສິກອນລາວ ໃນໄລຍະ ການຣະບາດ ຂອງພຍາດໂຄ ວິດ-19 ຕລອດເວລາເກືອບຫ້າເດືອນ ຜົລຜລິດ ທີ່ຜລິດອອກມາ ກັບຂາຍບໍ່ໄດ້ຫລາຍ ຕ້ອງຂາດທືນ. ພ້ອມກັນນີ້ ກໍຍັງປະເຊີນກັບ ຜັກຣາຄາຕົກຕໍ່າ ຍ້ອນວ່ານັກລົງທຶນຈີນ ແລະ ວຽດນາມ ເຂົ້າມາລົງທຶນ ປູກຝັງ-ລ້ຽງສັດ ແຂ່ງກັບ ຄົນລາວ ເຮັດໃຫ້ຜູ້ປະກອບການລາວ ຕ້ອງປະເຊີນກັບ ຄວາມລຳບາກ ໃນການຂາຍ ເພາະກຸ່ມນາຍທຶນນັ້ນ ຂາຍຕັດຣາຄາ, ກໍຄືວ່າຣາຄາຖືກກວ່າຄົນລາວ.

ດັ່ງຊາວກະສິກອນ ຜູ້ລ້ຽງເປັດ ເພື່ອອອກມາປ້ອນຕລາດ ພາຍໃນນະຄອນຫລວງວຽງຈັນ ໄດ້ກ່າວຕໍ່ເອເຊັຽເສຣີ ເມື່ອວັນທີ 13 ມິຖຸນາ ວ່າ: ກ່ອນໜ້ານັ້ນ ກໍຂາຍບໍ່ໄດ້ແຖມປັດຈຸບັນ ຍັງປະເຊີນ ກັບຄົນວຽດມາເຊົ່າດິນ ຄົນທ້ອງຖິ່ນລ້ຽງເປັດ ແລ້ວຂາຍຕັດຣາຄາຕໍ່າ:

"ສ່ວນຫລາຍ ເຂົາເຮັດເປັດປອກ ເອົາໄປສົ່ງຕາມຮ້ານປີ້ງເປັດຫັ້ນ, ຄົນລ້ຽງເປັດບ້ານເນາະ ມັນສົ່ງໃຫ້ຮ້ານອາຫານບໍ່ໄດ້ ແບບຣາຄາມັນ ຕໍ່າເກີນ ຄວາມເປັນຈິງຊິ້ນ່າ ພໍ່ຄ້າມັນກໍຕ້ອງການໄດ້ກຳໄລ ຫລາຍຂຶ້ນເດ້."

ທາງດ້ານຜູ້ປະກອບການລ້ຽງປາກະຊັງ ຢູ່ບ້ານໄຮ່ ເມືອງໄຊທານີ ນະຄອນຫລວງວຽງຈັນ ກໍໄດ້ຮັບຜົລກະທົບ ຈາກຄົນຈີນທີ່ລ້ຽງປານິນ ໃນກະຊັງຢູ່ນໍ້າງື່ມ ກໍມາຂາຍແຂ່ງກັບຄົນທ້ອງຖິ່ນ ໃນຣາຄາ ຕໍ່າເຊັ່ນກັນ. ເຮັດໃຫ້ຄົນ ລາວຂາຍບລໍາບາກ ຈຶ່ງຢາກຮຽກຮ້ອງໄປຍັງ ພາກສ່ວນກ່ຽວຂ້ອງ ລົງມາກວດກາຊ່ອຍແດ່. ດັ່ງຜູ້ປະກອບການລ້ຽງປານີນ ຢູ່ບ້ານໄຮ່ໄດ້ກ່າວຕໍ່ ເອເຊັຽເສຣີວ່າ:

"ສະພາບຄົນຈີນມັນເອົາມາຂາຍຢູ່ຕລາດມັນກໍຂາຍໃຫ້ຄົນລາວນີ້ແຫລະ ຄົນຈີນມັກມີສານລັ່ງຂອງມັນນາ ແບບໂຕໄວຊີ້ນມັນ ຫົວມັນ ຄືແຕ່ນໍ້າມັນ ຄືກັບຄົນຕຸ້ຍ ນີ້ແຫລະເຮົາປີ່ງໃສ່ນີ້ມັນ ໂຢດລົງໄປ ໝົດຂອງລາວເຮົາມີແຕ່ຊີ້ນ ໂອ້ກໍຢາກໃຫ້ຊ່ຽວຊານລົງມາເບິ່ງ."

ປັດຈຸບັນຊາວກະສິກອນລາວ ສ່ວນຫລາຍແມ່ນຜລິດສົ່ງຂາຍໃຫ້ຈີນ ໂດຍອີງໃສ່ສັນຍາ ຫລາຍຮູບແບບບໍ່ວ່າຈະເປັນນາຍທຶນຈີນ ມາສັມປະທານຜລິດເອງ ຫລື ອອກທຶນໃຫ້ຊາວກະສິກອນລາວກ່ອນ ໂດຍມີສັນຍາຊື້-ຂາຍ ນຳກັນ.

ດັ່ງຊາວສວນໝາກອຶ ຢູ່ເມືອງນາໝໍ້ ແຂວງອຸດົມໄຊ ໄດ້ປະສົບກັບບັນຫາສົ່ງອອກໄປຈີນ ບໍ່ໄດ້ເນື່ອງຈາກໄລຍະເດືອນ ພຶສພາ ພໍດີເປັນ ເດືອນທີ່ ເກັບກ່ຽວຜົລຜລິດ ແຕ່ດ່ານຊາຍແດນປິດລົງ ຂົນສົ່ງ ບໍ່ສາມາດເຂົ້າມາຮັບ ສີນຄ້າໄດ້ ຈຶ່ງເຮັດໃຫ້ໝາກອຶ ຕົກຄ້າງເກືອບ 06 ພັນຕັນ.

ຕໍ່ບັນຫາດັ່ງກ່າວ ສື່ທ້ອງຖິ່ນໄດ້ຣາຍງານເມື່ອວັນທີ 19 ພຶສພາ ວ່າທາງການເມືອງໄດ້ປົດລ໊ອກ ໂດຍການຜ່ອນຜັນໃຫ້ ພໍ່ຄ້າຊາວຈີນ ເຂົ້າມາເກັບຊື້ໝາກອຶ ຈາກສວນເມືອງນາໝໍ້ ແຂວງອຸດົມໄຊ ເກີນເຄິ່ງນຶ່ງຂອງຈຳນວນ 06 ຕັນ ສ່ວນທີ່ເຫລືອແມ່ນແບ່ງຂາຍຕາມຕລາດ ແລະ ມີໝາກອຶເສັຍຫາຍເນົ່າເປື່ອຍເຖິງ 10%.

ທາງດ້ານຊາວສວນປູກໝາກໂມຂາຍ ທີ່ເມືອງວຽງພູຄາ ແຂວງນໍ້າທາ ກໍເປັນນຶ່ງໃນຜູ້ໄດ້ ຮັບຜົລກະທົບ ຈາກກໍຣະນີດັ່ງກ່າວນີ້ ຊາຍແດນ ລາວ ບໍ່ເຕັນ-ບໍ່ຫານປິດ ໝາກໂມທີ່ປູກຮອດ ຍາມເກັບກູ້ ໃນເດືອນພຶສພາ ແລ້ວກຽມຈະສົ່ງໄປຈີນ ແຕ່ສົ່ງໄປບໍ່ໄດ້ ຊຶ່ງຜູ້ກ່ຽວໄດ້ກ່າວຕໍ່ ເອເຊັຽເສຣີວ່າ ຂາດທຶນແຕ່ບໍ່ຫລາຍ ເນື່ອງຈາກນາຍທຶນຈີນລົງທຶນ ເປັນເມັດພັນ ປຸຍ ແລະ ເງິນທຶນ ໃນການປັບໜ້າດິນ.

"ເມື່ອໝາກໂມສຸກແລ້ວ ບໍ່ມີພໍ່ຄ້າມາຮັບຊື້ ເອົາໄວ້ກໍ່ເໜົ່າເລີຍຕ້ອງໃຫ້ປະຊາຊົນ ມາເອົາໄປກິນ."

ໃນໄລຍະການຣະບາດຂອງພຍາດໂຄວິດ-19 ຊາວກະສິກອນລາວ ຍີ່ງພົບກັບ ຄວາມລຳບາກໜັກເຂົ້າໄປອີກ ບາງຣາຍ ເຖິງກັບຢຸດເຊົາ ການຜລິດພືດຜັກ ຍ້ອນຂາຍບໍ່ໄດ້ ເຮັດໃຫ້ເກີດມີໜີ້ສິນ ເພີ່ມຂຶ້ນ. ດັ່ງກອງເລຂາເຄືອຂ່າຍຊາວກະສິກອນລາວ ໄດ້ກ່າວຜ່ານສື່ມວນຊົນ ໃນຕົ້ນເດືອນພຶສພາ 2020 ວ່າ, ດັ່ງເຊັ່ນແຂວງຊຽງຂວາງປູກພືດຜັກສົ່ງໄປ ແຂວງຫຼວງພຣະບາງ ແລະ ແຂວງ ບໍຣິຄຳໄຊ ມື້ລະຫຼາຍ ຄັນຣົດ ແຕ່ດ້ວຍພຍາດໂຄ ວິດ-19 ຣະບາດ ບໍ່ໄດ້ຂາຍເລີຍ.

ນອກຈາກນັ້ນເຄືອຂ່າຍຊາວກະສິກອນ ເກັບກັມຂໍ້ມູນການຜລິດ ຢູ່ແຂວງຕ່າງໆ ທົ່ວປະເທດຕ່າງ ກໍໄດ້ຮັບຜົລກະທົບກັນທົ່ວໜ້າຕາມ ປົກກະຕິ ພືດຜັກທີ່ຜລິດໄດ້ສ່ວນຫລາຍຈະສົ່ງມາຂາຍ ນະຄອນຫລວງວຽງຈັນ ແຕ່ໄລຍະນັ້ນຕ້ອງໄດ້ຖີ້ມຜັກ ໄປເຖີງ 07-08 ຕັນ.

ພ້ອມກັນນັ້ນອີກບັນຫາຫລັກ ໃນກຸ່ມຊາວກະສິກອນລາວ ກໍ່ຄືການຂົນສົ່ງ ທີ່ມີຄວາມຫຍຸ້ງຍາກ ບໍ່ວ່າຈະເປັນຖນົນຫົນທາງ, ການຮັກສາ, ຣາຄາຂົນສົ່ງ ເຊິ່ງເຮັດໃຫ້ການຂົນສົ່ງຈາກ ບ່ອນຜລິດໄປຫາ ຕລາດນັ້ນພົບກັບອຸປສັກ ເຮັດໃຫ້ຣາຄາຕ້ອງມີຕົ້ນທຶນສູງຂຶ້ນ.

ບັນຫາການນໍາເຂົ້າສິນຄ້າ ອຸປໂພກ-ບໍຣິໂພກ ຈາກຕ່າງປະເທດ ເປັນບັນໃຫຍ່ເຮັດໃຫ້ເງິນ ກີບລາວ ອ່ອນຄ່າລົງ ນັບແຕ່ປີ 2019 ຈົນ ເຖິງປັດຈຸບັນ ອັນສົ່ງຜົລຕໍ່ການຜລິດກະສິກັມພາຍໃນ ເມື່ອປຽບທຽບກັບການນໍາເຂົ້າແລ້ວ ເຫັນວ່າຣາຄາຖືກກວ່າ

ທ່ານ ສົມຈິດ ອິນທະມິດ ຮອງຣັຖມົນຕຼຮ ກະຊວງອຸດສາຫະກັມ ແລະ ການຄ້າ ໄດ້ກ່າວຕໍ່ສື່ມວນຊົນ ວ່າ ຣັຖບານ ເລັ່ງໃສ່ໂຄງການ ຜລິດພາຍໃນ ໂດຍເຣີ້ມຈາກ ນະຄອນຫລວງວຽງຈັນ ເພື່ອແກ້ໄຂບັນ ຫາ ຜົລຜລິດກະສິກັມ ຣາຄາຕໍ່າ ແລະ ແກ້ໄຂການຂາຍບໍ່ອອກ.

"ສະພາບການຜລິດຢູ່ບ້ານເຮົາເຫັນວ່າສະງັກງັນ ບໍ່ຕໍ່ເນື່ອງຢຸດເຊົາ ແລະ ຈະມີ ການນຳເຂົ້າສິນຄ້າ ຂ້ອນຂ້າງເປັນຈຳນວນຫລວງຫລາຍ ຣັຖບານຈື່ງບອກວ່າໃຫ້ກະຊວງ ຂແນງການຕົ້ນຕໍຫລັກ ກະມີກະຊວງການເງິນ ທີ່ເປັນປະທານຫົວເຮືອໃຫຍ່ ແລະ ກະມີກະຊວງ ອຸດສາຫະກັມ ແລະ ການຄ້າ ແລະ ກະຊວງກະສິກັມ-ປ່າໄມ້ ເພື່ອເຮັດຈັ່ງໃດລົງຊ່ອຍນະຄອນຫລວງ ເອົານະຄອນຫລວງ ດີກ່ອນວ່າເຮົາ ຈະຊຸກຍູ້ການຜລິດ ໃຫ້ມັນໄດ້ແນວໃດ ທ່ານ ອາດຈະເຫັນ ຫລືວ່າມີຂ່າວລົງໃນຢູ່ທູບ ກ່ຽວກັບເຮົານໍາເຂົ້າຜັກ ສະບຽງອາຫານ ສີນຄ້້າຕ່າງໆ ມາແຕ່ປະເທດເພື່ອນບ້ານ ແລະ ບາງອັນ ເຮົາກະປູກໄດ້ ແຕ່ວ່າປະຊາຊົນກະອ່ອນແອ ຍ້ອນວ່າຊື້ເຂົ້າມາມັນ ກະຖືກກ່ອນ ແລະ ເຮົາກະ ຊາບມາວ່າ ການນໍາໃຊ້ເຄື່ອງອຸປໂພກ ບໍຣິໂພກ ສ່ວນຫລາຍກະມີການນໍາເຂົ້າ."

ເຖິງແນວໃດກໍ່ຕາມ ກ່ອນພຍາດໂຄວິດ-19 ຣະບາດ ລາວກໍປະເຊີນພັຍແລ້ງ, ບັນຫາບົ້ງ , ຕັກກະແຕນ ຣະບາດ, ຄ່າໄຟຟ້າຜລິດ ກະສິກັມແພງ, ບັນຫາສານເຄມີ ແລະ ບັນຫາ ການສົ່ງອອກ ລ້ວນແລ້ວແຕ່ເປັນອຸປສັກ ເຮັດໃຫ້ຊາວກະສິກອນ ຕ້ອງແບກຫາບພາລະ ຕົ້ນທຶນສູງ ຢ່າງຫລີກລ້ຽງບໍ່ໄດ້.

ເຊິ່ງປັດຈຸບັນກໍຄືເຫັນຜົລຜລິດກະສິກັມ ຂາຍບໍ່ໄດ້ຫລາຍຄືແຕ່ກ່ອນ ຕໍ່ບັນຫາດັ່ງກ່າວ ຊາວກະສິກອນ ຍັງລໍຖ້າມາຕການ ທີ່ຈະມາອຸ້ມ ເພື່ອຊາວກະສິກອນລາວ ຢູ່ລອດໃນພາວະ ທີ່ບໍ່ເປັນປົກກະຕິ ພາຍຫລັງພຍາດໂຄວິດ-19 ຢຸດເຊົາການຣະບາດ ແຕ່ກໍຄາດການ ບໍ່ໄດ້ ວ່າເມື່ອໃດ ເຊິ່ງຊາວກະສີກອນລາວ ກໍຕ້ອງປະເຊີນໜ້າກັບວິກິດນີ້ ອີກຍາວກວ່າຟື້ນໂຕ ໄດ້.

ເຕັມຫນ້າ