ຄົນງານລາວ 50 ຄົນ ຖືກສົ່ງ ຮອດລາວແລ້ວ

ອຸ່ນແກ້ວ ສຸກສະຫວັນ
2020-08-10
Share
F-Lao-workers-Nongkhai ຄົນງານລາວ ທີ່ເດີນທາງມາຈາກແຂວງຕ່າງໆ ຂອງໄທຍ ເພື່ອລໍຖ້າຂ້າມຂົວ ກັບເມືອເຮືອນທີ່ຝັ່ງລາວ ຕ້ອງມາລໍຖ້າ ເປັນເວລາ 2 ສັປດາ ເນື່ອງຈາກດ່ານສາກົລ ວຽງຈັນ-ໜອງຄາຍ ຍັງປິດ ແລະ ສູນກັກບໍຣິເວນ ທີ່ຫຼັກ 27 ນະຄອນຫຼວງວຽງຈັນ ຍັງເຕັມ
ຮູບຖ່າຍເມື່ອຕົ້ນເດືອນສິງຫາ 2020. ນັກຂ່າວພົລເມືອງໄທຍ

ຄົນ​ງານ​ລາວ 50 ຄົນ ທີ່​ຕິດ​ຄ້າງ​ຢູ່​ ດ່ານ​ສາ​ກົລ​ ຂົວ​ມິຕ​ພາບ ລາວ-ໄທຍ ຢູ່​ແຂວງ​ໜອງ​ຄາຍ ເປັນ​ເວ​ລາ 2 ອາ​ທິດ ໄດ້​ຖືກ​ສົ່ງກັບ​ມາ ​ປະ​ເທດ​ລາວແລ້ວ ແລະ ຖືກ​ສົ່ງ​ໄປ ສູນ​​ກັກ​ໂຕ ຫຼັກ 27 ນະ​ຄອນ​ຫຼວງວຽງຈັນ ເພື່ອ​ເຝົ້າ​ຕິດ​ຕາມ ເຊື້ອ​ໂຄວິດ19 ເປັນ​ເວ​ລາ 14 ມື້. ເຈົ້າ​ໜ້າ​ທີ່ ​ຜ​ແນກ​ສາ​ທາ​ຣະນະ​ສຸຂ ນະ​ຄອນ​ຫຼວງວຽງ​ຈັນ ໄດ້​ກ່າວໃນ​ວັນ​ທີ 7 ສິງ​ຫາ ວ່າ:

"ຮັບ​ມາມື້ວ​ານນີ້ ໜອງ​ຄາຍ 50 ຄົນ. ເຮົາ​ຮັບ​ເຂົາ​ເຈົ້າເຂົ້າ​ ແລ້ວເຮົາ​ກໍ​ໄດ້​ເກັບ​ໂຕຢ່າງ ໄປ​ກວດ​ຫາ​ ເຊື້ອ​ໂຄວິດ19 ບໍ່​ມີ​ອາ​ການ​ຢູ່​ຜູ້​ໃດ. ຖ້າ​ວ່າ ຄົນ​ນະ​ຄອນ​ຫຼວງ ກໍ​ແມ່ນ​ກັກ​ໂຕ 14 ວັນ ຢູ່​ໃນ​ສູນ. ຖ້າ​ວ່າ​ຄົນ​ຕ່າງ​ແຂວງກັກ​ໂຕ ຖ້າ​ກວດຫາ​ເຊື້ອ​ໂຄວິດ ບໍ່​ພົບ​ແລ້ວ ກໍ​ສົ່ງ​ໄປ​ແຂວງ."

ສາ​ເຫດ​ ທີ່​ຮັບ​ຄົນ​ງານ 50 ຄົນ ຊັກ​ຊ້າ ຍ້ອນ​ວ່າ ສູນ​ກັກ​ໂຕ​ຫຼັກ 27 ເຕັມ ແລະ ທີ່​ພັກ​ບໍ່​ພຽງ​ພໍ ແລະ ຕ້ອງ​ຖ້າ​ໃຫ້ ຜູ້​ທີ່​ກັກ​ໂຕ​ຢູ່​ສູນ ​ອອກ​ໄປ​ກ່ອນ, ເຈົ້າ​ໜ້າ​ທີ່ ຈຶ່ງ​ສາ​ມາດ ຮັບ​ເອົາ​ຄົນ​ງານ​ລາວ ຊຸດ​ໃໝ່​ເຂົ້າ​ມາໄດ້, ເຈົ້າ​ໜ້າ​ທີ່​ ປກ​ສ ປະ​ຈຳ​ສູນຫລັກ 27 ໄດ້​ກ່າວ​ວ່າ:

"ຊຸດ​ແລ້ວນີ້ ສູນ​ເຕັມ​ເດີ້. ສູນ​ເຮົາ​ຮັບ​ບໍ່​ໄດ້ ເພາະ​ວ່າ ຫ້ອງ​ມັນ​ຫຼາຍຫ້ອ​ງ​ ມັນ​ກໍ​ເພ​ນ່າ. ບາງ​ຄົນ ບາງ​ເທື່ອ​ມາ ໄຟ​ມັນ​ບໍ່​ໄດ້​ໄດ໋ ມັນ​ກໍ​ຢູ່ບໍ່​ໄດ້ ມັນ​ຮ້ອນ​ມັນ​ ມິ​ຫຍັງ​ເນາະ. ເຮົາ​ປ່ອຍ​ຊຸດ​ເກົ່າ ​ໄປ​ແລ້ວ ກໍ​ຊຸດ​ໃໝ່​ມາ ມັນ​ມາ​ເປັນ​ງວດ​ເນາະ 6 ມື້ 5 ມື້. ເຮົາ​ຈະ​ມາ​ເທື່ອ​ນຶ່ງ ຄັນ​ວ່າ​ສູນ​ເຮົາ​ຮັບ​ຮອງ​ໄດ້."

ນຶ່ງ​ໃນ​ຄົນ​ງານ​ລາວ 50 ຄົນ ກ່າວ​ວ່າ ​ຮູ້​ສຶກ​ດີ​ໃຈ ທີ່​ໄດ້​ກັບ​ມາ ຫຼັງ​ຈາກ​ຕິດ​ຄ້າງ​ ຢູ່​ດ່ານ​ໜອງ​ຄາຍ ເປັນ​ເວ​ລາ ເຄິ່ງ​ເດືອນ.

"ກໍ​ດີ​ໃຈ​ແຫຼະ ຫາ​ຊິ​ມາ .ໄປ​ຕິດ​ຢູ່​ໜອງ​ຄາຍ ເປັນ​ເຄິ່ງ​ເດືອນ ກໍ​ຕ້ອງ​ກັບ​ບ້ານ. ຫຼັງ​ຈາກຖືກ​ກັກ​ໂຕແລ້ວ ກໍ​ຕ້ອງ​ກັບ​ບ້ານ ແລ້ວ​ຢາກ​ໄປ​ໃສຕໍ່ ​ກໍ​ໄດ້."

ເຈົ້າ​ໜ້າ​ທີ່​ຕຳ​ຣວດ ກວດ​ຄົນ​ເຂົ້າ​ເມືອງ ແຂວງ​ໜອງ​ຄາຍ ກ່າວ​ໃນ​ວັນ​ທີ 6 ສິງ​ຫາ ​ວ່າ ບໍ່​ມີ​ຄົນ​ງານ​ລາວ ​ຕິດ​ຄ້າງ​ຢູ່​ດ່ານ ​ໜອງ​ຄາຍ​ແລ້ວ ແລະ ໄດ້​ສົ່ງ ຜູ້​ທີ່​ຄ້າງ​ຢູ່​ນັ້ນ ​ກັບ​ຄືນ​ປະ​ເທດ​ແລ້ວ. ປັດ​ຈຸ​ບັນ ມີ​ຄົນ​ງານ​ 250 ຄົນ ທີ່​ເດີນ​ທາງ ​ມາ​ຈາກ​ຕ່າງ​ປະ​ເທດ ​ກັກ​ໂຕ​ຢູ່​ໃນ​ສູນຫຼັກ 27 ແລະ ເຈົ້າ​ໜ້າ​ທີ່ ​ມີ​ອາ​ຫານ​ໃຫ້​ກິນ 3 ຄາບ ຕໍ່​ມື້, ແຕ່​ງົບ​ປະ​ມານ ​ກໍ​ຍັງ​ບໍ່​ພຽງ​ພໍ. ເຈົ້າ​ໜ້າ​ທີ່ ​ຄຸ້ມ​ຄອງ​ ກໍ​ລະ​ນີ​ກັກ​ກັນ ແລະ ອະ​ນາ​ມັຍ​ກັນ​ພ​ຍາດ ປະ​ຈຳ​ສູນ​ຫຼັກ 27 ໄດ້​ກ່າວ​ວ່າ:

"ດຽວນີ້ ຍັງ​ເຫຼືອ 250 ຕົວ​ເລຂ ທີ່​ຄ້າງ​ປັດ​ຈຸ​ບັນ, ຜູ້​ໃດ​ມາ ເຮົາ​ຕ້ອງ​ໄດ້ ​ເກັບ​ໂຕ​ຢ່າງ​ກ່ອນ ເກັບ​ໂຕ​ຢ່າງ​ທຸກ​ຄົນ. ສ່ວນ​ຫຼາຍ ​ກໍ​ງົບ​ປະ​ມານ​ແຫຼະ ເພິ່ນ​ຊ່ວຍ​ແຫຼະ ເພິ່ນ​ຊ່ວຍ ຄັນ​ວ່າ​ ຈະ​ໃຫ້​ພຽງ​ພໍ ກໍ​ບໍ່​ພຽງ​ພໍ,  ແຕ່​ວ່າ ​ຕ້ອງ​ໄດ້​ເຮັດ ​ຕາມ​ໜ້າ​ທີ່."

ເຈົ້າ​ໜ້າ​ທີ່ ​ທ່ານນີ້ ກ່າວ​ຕື່ມ​ອີກວ່າ ​ຢູ່​ສູນກັກ​ໂຕຫຼັກ 27 ໄດ​ກັກ​ໂຕ​ ຄົນ​ງານ​ລາວ ​ທີ່​ມາ​ຈ​າກ​ຕ່າງ​ປະ​ເທດ ທັງ​ໝົດ ປະ​ມານ 3,000 ຄົນ ນັບ​ແຕ່ມີ​ ການ​ດຳ​ເນີນ​ການ​​ມາ ແລະ ປັດ​ຈຸ​ບັນ, ຍັງມີຄົນ​ງານ 250 ຄົນ​ ທີ່​ຖືກ​ກັກ​ໂຕ ​ຢູ່​ໃນ​ສູນ ເພື່ອ​ເຝົ້າ​ຕິດ​ຕາມ ​ອາ​ການໂຄວິດ19.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.