ລາວອາຈຍັງດ້ອຍພັທນາ ໃນປີ 2024

ສະຖາບັນຄົ້ນຄວ້າເສຖກິດແຫ່ງຊາດລາວ ໄດ້ຮັບຣາຍງານຜລົການຄົ້ນຄວ້າໄລຍະສັ້ນໃນວັນທີ 19 ເມສາ 2020 ວ່າຜົລກະທົບການຣະບາດ ຂອງເຊື້ອໄວຣັສໂຄວິດ-19 ເຮັດໃຫ້ເສຖກິດລາວຂຍາຍໂຕ ໃນຣະດັບທີ່ຊ້າທີ່ສຸດໃນຮອບ 10 ປີ ແລະ 4 ປີຜ່ານມານີ້ເສຖກິດແຫ່ງຊາດກໍ ຂຍາຍໂຕຊ້າລົງຫລຸດຄາດໝາຍມາຕລອດຈຶ່ງເຮັດໃຫ້ ມີຄວາມຊ່ຽງສູງທີ່ ລາວ ອາດຈະບໍ່ບັນລຸເປົ້າໝາຍ ໃນການຫລຸດພົ້ນ ຈາກສະຖານະ ພາບ ປະເທດດ້ອຍພັທນາ ຫລື LDC ໃນປີ 2024 ໄດ້ ແລະ ອາດຈະບໍ່ບັນລຸວິໃສທັສໃນປີ 2030 ເພື່ອກ້າວ ໄປຊູ່ເປັນປະເທດຣາຍຮັບ ປານກາງຫາສູງ.

ປັດຈຸບັນການຣະບາດຂອງເຊື້ອໄວຣັດໂຄວິດ-19 ສົ່ງຜົລຕໍ່ຣະບົບເສຖກິດພາຍໃນລາວ ຢ່າງໜັກທັງໂຄງການພັທນາ ຂອງຣັຖບານແລະ ຫົວໜ່ວຍທຸຣະກິດຂນາດນ້ອຍ ຂນາດກາງ ແລະ ຂນາດໃຫຍ່ໃນຂອບ ເຂດທົ່ວປະເທດແມ່ນຖືກຢຸດການເຄື່ອນໄຫວ ເຮັດໃຫ້ກຸ່ມຄົນງານ ຈຳນວນຫລາຍເຣີ້ມຫວ່າງງານ.

ດັ່ງປະຊາຊົນໃນນະຄອນຫລວງວຽງຈັນ ກ່າວຕໍ່ເອເຊັຽເສຣີໃນວັນທີ 21 ເມສາວ່າ ກໍຍັງຈະຫລຸດພົ້ນຈາກ ປະເທດດ້ອຍພັທນາໄດ້ຍາກຄືກັນ ເພາະໄລຍະຜ່ານມາປະຊາຊົນສ່ວນຫຼາຍຍັງບໍ່ມີທີ່ິດິນ ທຳມາຫາກິນ ບາງຄົນໄປອອກແຮງງານໄດ້ຄ່າຈ້າງ 35-40 ພັນກີບຕໍ່ມື້ບໍ່ກຸ້ມກິນ.

"ຄັນເວົ້າແທ້ເຣື່ອງປະຊາຊົນຍັງຄືເກົ່າຫັ້ນແຫຼະໄປເຮັດງານຫັ້ນໄດ້ເງີນແຕ່ 35 ພັນກີບ 40 ພັນກີບ ການອອກແຮງງານຫັ້ນນ່າມັນພັດສິຫຼຸດ ຄວາມທຸກຍາກໄດ້ແນວໃດ ອັນນີ້ປະຊາຊົນບໍ່ມີສວນທຳການ ຜລິດມັນຫາຊິຍາກ."

ປະຊາຊົນຜູ້ນີ້ໄດ້ກ່າວວ່າຢາກໃຫ້ຣັຖບານລາວ ຫັນມາສົ່ງເສີມປະຊາຊົນລາວ ໃນເຂດຊົນນະບົດ ປູກຝັງແລະ ສົ່ງເສີມການຄ້າ ການຂາຍ ເພື່ອໃຫ້ເຂົາມີຣາຍໄດ້ ບໍ່ແມ່ນເອົາທີ່ດິນຂອງປະຊາຊົນ ໄປໃຫ້ນັກລົງ ທຶນສັມປະທານເຮັດໂຮງຈັກໂຮງງານ ແລ້ວໃຫ້ປະຊາຊົນໄປເປັນ ຄົນງານໄດ້ເງິນຄ່າຈ້າງບໍ່ກຸ້ມກິນ.

ເຈົ້າຂອງເຮືອນພັກໃນເມືອງວັງວຽງ ແຂວງວຽງຈັນກ່າວຕໍ່ເອເຊັຽເສຣີ ວ່າກໍມີຄວາມເປັນຫ່ວງຄືກັນເມື່ອການ ຣະບາດຂອງໄວຣັສ ພຍາດ ໂຄວິດ-19 ໝົດໄປຈາກປະເທດລາວແລ້ວ ຣັຖຈະວາງຍຸທສາດຟື້ນຟູ ເສຖກິດ ໃນຮູບແບບໃດແລະຂແນງໃດ ທີ່ຣັຖຄວນຈະຊຸກຍູ້ກ່ອນ.

"ມັນເປັນຄວາມເປັນຫ່ວງຍຸທສາດໃນຕໍ່ໜ້າ ອີກຊິຫັ້ນນ່າ ຄວນຊິເບີ່ງຄືນຂແນງໃດ ຄວນຊິຊຸກຍູ້ເພີ່ມຕື່ມເບາະ."

ເຈົ້າໜ້າທີ່ວິຊາການກະຊວງກະສິກຳ ແລະປ່າໄມ້ ໄດ້ກ່າວຕໍ່ເອເຊັຽເສຣີ ວ່າດຽວນີ້ປະຊາຊົນລາວ ກໍປຽບສະເໝືອນຄົນປ່ວຍສະນັ້ນຣັຖບານ ລາວ ຕ້ອງອອກນະໂຍບາຍຊ່ອຍເຫລືອ ຜູ້ທີ່ໄດ້ຮັບຜົລກະທົບ ຈາກ ການຣະບາດໄວຣັສ ໂຄວິດ-19 ໃຫ້ເປັນຮູປທັມ ແລະຈະແຈ້ງໂດຍ ສະເພາະ ມາຕການຊ່ອຍເຫລືອປະຊາຊົນແລະ ກຸ່ມຄົນງານທົ່ວໄປ ທີ່ບໍ່ມີລາຍໄດ້ຄົງທີ່ ເພື່ອໃຫ້ກຸ່ມຄົນເຫລົ່ານັ້ນ ກັບມາເຄື່ອນໄຫວ ວຽກງານ ແລະດຳເນີນ ກິຈການເຄື່ອນໄຫວ ທາງເສຖກິດໃຫ້ໄວທີ່ສຸດ.

"ຣັຖບານຕ້ອງມີນະໂຍບາຍ ລົງໄປໃຫ້ຂະເຈົ້າຟື້ນໂຕກ່ອນຄ້າຍຄື ກັບຄົນປ່ວຍນີ້ນ່າ ໃຫ້ຂະເຈົ້າແຂງແຮງຂື້ນມານ້ອຍນຶ່ງ ຫລັງຈາກນັ້ນຈື່ງ ຊ່ອຍໃຫ້ເຂົາເຈົ້າເຮັດວຽກບາດນີ້ນ່າ. ທີ່ມັນທຸກແທ້ໆ ລະແມ່ນພວກ ສວັດດີການສັງຄົມ ປະກັນສັງຄົມ ພວກແຮງງານພວກສົງເຄາະນີ້ ບ່ອນໃດທີ່ມີການພັທນາ ຂື້ນມາຣະດັບນຶ່ງ ລະແມ່ນເອົາກະສິກຳ ເອົາການຜລິດເປັນສິນຄ້າເຂົ້າໄປ."

ກ່ຽວກັບເຣື່ອງນີ້, ນັກເສຖສາຕລາວທ່ານນຶ່ງ ໄດ້ແບ່ງປັນທັສນະຂອງທ່ານ ຕໍ່ຜູ້ສື່ຂ່າວວິທຍຸເອເຊັຽເສຣີ ໃນມື້ດຽວກັນນີ້ວ່າ ເຖິງວ່າການແຜ່ ຣະບາດຂອງເຊື້ອໄວຣັສໂຄວິດ-19 ຈະມີຜົລກະທົບ ຕໍ່ເສຖກິຈລາວ ຢ່າງຮຸນແຮງ, ແຕ່ທ່ານກໍຍັງເຊື່ອວ່າ ໃນປີ 2024 ລາວກໍຍັງຢູ່ໃນ ເສັ້ນທາງ ທີ່ຈະສາມາດບັນລຸເປົ້າໝາຍ ອອກຈາກສະຖາະນະພາບ ປະເທດດ້ອຍພັທນາ ຫຼື LDC ໄດ້ຢູ່.

“ມັນເປັນຄວາມສ່ຽງ ແຕ່ບໍ່ໝາຍຄວາມວ່າ ລາວຈະບໍ່ຫຼຸດພົ້ນໄດ້ ທີ່ຂ້ອຍເຫັນນິດຽວນີ້ ເຮົາບໍ່ຮູ້ວ່າມັນຊິຮ້າຍແຮງປານໃດວິກິຈການໂຄວິດນິ. ເຮົາຮູ້ແຕ່ວ່າຄັນບໍ່ມີຢາປົວພຍາດໂຄວິດນີ້ ຄວາມສ່ຽງນີ້ກໍຈະມີ ແລະການຜລິຕນີ້ມັນຈະບໍ່ເຕັມສ່ວນ ລະມັນກະຊິມີຜົລກະທົບຕໍ່ເສຖກິຈ.”

ເມື່ອປີ 2018 ທີ່ຜ່ານມາ, ຄນະມົນຕຣີດ້ານເສຖກິຈ-ສັງຄົມ ແຫ່ງອົງການສະຫະປະຊາຊາຕ ຫຼື UN ECOSOC ໄດ້ປະເມີນແລ້ວວ່າ ລາວອາຈສາມາດ ບັນລຸຈາກສະຖານະພາບ ປະເທດດ້ອຍພັທນາໄດ້ ໃນປີ 2024 ຖ້າຫາກຍັງຮັກສາຣະດັບ 2 ໃນ 3 ໂຕຊີ້ວັດ ຄື ດັຊນີດ້ານຣາຍຮັບແຫ່ງຊາຕ (GNI) ແລະ ດັຊນີດ້ານຊັພສິນມະນຸດ (HAI) ໄດ້ຢ່າງໝັ້ນຄົງ. ສ່ວນດັຊນີຄວາມບອບບາງທາງເສຖກິຈ (EVI) ຍັງຕ້ອງສືບຕໍ່ ປັບປຸງ, ແຕ່ໂດຍລວມ ກໍຖືວ່າປະເທດລາວ ຢູ່ໃນເສັ້ນທາງທີ່ຈະຫຼຸດພົ້ນ ອອກຈາກປະເທດດ້ອຍພັທນາໄດ້.

ໃນປີ 2021 ນີ້, ຄນະມົນຕຣີດ້ານເສຖກິຈ-ສັງຄົມ ແຫ່ງອົງການສະຫະປະຊາຊາຕ ມີກຳນົດ ຈະປະເມີນສະຖານະພາບດ້ອຍພັທນາ ຂອງ ປະເທດລາວອີກເທື່ອ 1 ແລະຖ້າຜົລປະເມີນອອກມາວ່າ ລາວຍັງຮັກສາ ຣະດັບ 2 ໃນ 3 ໂຕຊີ້ວັດໄດ້ ກໍອາຈປະກາດໃຫ້ປະເທດລາວ ສາມາດບັນລຸຈາກສະຖານະພາບ ປະເທດດ້ອຍພັທນາໄດ້ ໃນປີ 2024.