ສະໜາມໄຊເລີ້ມກໍ່ສ້າງ ເສັ້ນທາງ

ໄຊຍາ
2019-04-18
ອີແມວລ໌
ຄໍາເຫັນ
Share
ພິມ
ການກໍ່ສ້າງເສັ້ນທາງ ໃນເມືອງສະໜາມໄຊ ແຂວງ ອັດຕະປື
ການກໍ່ສ້າງເສັ້ນທາງ ໃນເມືອງສະໜາມໄຊ ແຂວງ ອັດຕະປື
ຮູບພາບຈາກ : ນັກຂ່າວອັດຕະປື

ປັດຈຸບັນທາງການ ແຂວງອັດຕະປື ໄດ້ສຳເຣັດການປະມູນ ຊອກຫາ ບໍຣິສັດ ເອກກະຊົນ ເຂົ້າມາເຮັດໂຄງການກໍ່ສ້າງ ເສັ້ນທາງຫຼວງ ແລະ ເສັ້ນທາງທ້ອງຖິ່ນ ທັງໝົດ 17 ໂຄງການ ຢູ່ເມືອງສະໜາມໄຊ ເຊິ່ງຈະແຈ້ງຜົລປະມູນ ຢ່າງເປັນທາງການ ໃນໄວໆ ນີ້. ນອກຈາກນີ້ຍັງ ຈະໃຫ້ແຕ່ລະບໍຣິສັດ ທີ່ໄດ້ຊນະການປະມູນ ເຣີ້ມລົງທຶນສ້າງ ແຕ່ລະໂຄງການ. ອີງຕາມຄຳເວົ້າຂອງຜແນກໂຍທາທິການ ແລະຂົນສົ່ງ ແຂວງອັດຕະປື ເມື່ອວັນທີ 29 ມີນາ ຜ່ານມາວ່າ:

"ເປີດຊອງປະມູນແລ້ວເດ້ ມີແຜນວ່າສິປະກາດການປະມູນ ເຮົາຍັງບໍ່ໄດ້ຣາຍລະອຽດ ທ່ານຮອງປະທານປະມູນເພິ່ນເວົ້າ."

ທ່ານກ່າວຕື່ມວ່າສຳລັບບໍຣິສັດ ທີ່ເຂົ້າຮ່ວມການປະມູນ ທີ່ຜ່ານມາມີທັງໝົດ 110 ບໍຣິສັດ ເຊິ່ງແມ່ນຂອງຄົນລາວທັງໝົດ ແຕ່ຍັງບໍ່ສາມາດ ເປີດເຜີຍໄດ້ວ່າບໍຣິສັດ ທີ່ຊນະການປະມູນ ມີຈັກບໍຣິສັດ ແລະ ຊື່ບໍຣິສັດໃດແດ່.

ທ່ານຊີ້ແຈງວ່າໂຄງການສ້າງເສັ້ນທາງ ທັງ 17 ໂຄງການເດັ່ນທີ່ສຸດ ຢູ່ເມືອງສະໜາມໄຊ ກໍ່ແມ່ນໂຄງການສ້າງເສັ້ນທາງຫລວງ ແຫ່ງຊາດ ເລກທີ 18A ທັງໝົດ 5 ຕອນ ຄວາມຍາວ 47 ກິໂລແມັດ, ໂຄງການເສັ້ນທາງຫລວງທ້ອງຖິ່ນ ເລກທີ 9004 ທັງໝົດ 4 ຕອນ ຄວາມ ຍາວ 48,8 ກິໂລແມັດ.

ສ່ວນໂຄງການທີ່ເຫຼືອແມ່ນ ໂຄງການເສັ້ນທາງທ້ອງຖິ່ນ ໂຄງການສ້າງທາງດິນແດງ ແລະ ກໍ່ສ້າງຄອງຣະບາຍນໍ້າ. ສາເຫດທີ່ທາງການ ແຂວງອັດຕະປື ຕ້ອງສ້າງໂຄງການ ເສັ້ນທາງຂື້ນໃໝ່ ຢູ່ເມືອງສະໜາມໄຊ ຍ້ອນປີ 2018 ເສັ້ນທາງຫລາຍສາຍ ທັງເສັ້ນຫລວງ ເລກທີ 18A ແລະ ເສັ້ນທາງທ້ອງຖິ່ນ ໄດ້ຮັບຄວາມເສັຽຫາຍ ຈາກເຫດເຂື່ອນເຊປຽນ-ເຊນໍ້ານ້ອຍ ແຕກ ເຮັດໃຫ້ບາງເສັ້ນທາງຖືກຕັດຂາດ ເຮັດໃຫ້ການເດີນທາງ ຂອງປະຊາຊົນ ພົບຄວາມລຳບາກ.

ເຕັມຫນ້າ