ໄຟໄໝ້ໂຮງງານປະກອບ ຣົດຈັກ ຂອງຈີນ

ອຸ່ນແກ້ວ ສຸກສະຫວັນ
2021-08-19
Share
ໄຟໄໝ້ໂຮງງານປະກອບ ຣົດຈັກ ຂອງຈີນ ເຫດການໄຟໄໝ້ ໂຮງງານ ປະກອບຣົດຈັກ ຍີ່ຫໍ້ ຍິ່ນຊິ່ນ ຂອງນັກ ລົງທຶນຈີນ ຢູ່ເຂດເຂດ 5 ແຍກ ດົງຈອງ ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ.
ພາບຈາກ: ວີດີໂອ ພົລເມືອງ

ເມື່ອວັນທີ 18 ສິງຫາ 2021 ເວລາປະມານ 20:00 ໂມງ, ໄດ້ເກີດເຫດໄຟໄໝ້ ໂຮງງານປະກອບຣົດຈັກ ຍີ່ຫໍ້ ຍິ່ນຊິ່ນ ຂອງນັກ ລົງທຶນຈີນ ຢູ່ເຂດເຂດ 5 ແຍກ ດົງຈອງ ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ.

ເຈົ້າໜ້າທີ່ສາມາດຄວບຄຸມໄຟໄດ້ ແລະ ບໍ່ມີໃຜໄດ້ຮັບບາດເຈັບ ຫຼືເສັຽຊີວິດ ແລະເຈົ້າໜ້າທີ່ກຳລັງສືບສວນ ສອບສວນຫາສາເຫດ ໄຟໄໝ້ໃນຄັ້ງນີ້. ເຈົ້າໜ້າທີ່ອາສາກູ້ພັຍ ຢູ່ ນະຄອນ ຫຼວງວຽງຈັນ ໄດ້ກ່າວຕໍ່ ເອເຊັຽເສຣີ ວ່າ:

"ໜ້າຈະເປັນຂອງຈີນ ຈີນເປັນຄົນລົງທຶນ ຍັງບໍ່ທັນໄດ້ຕິດຕໍ່ເທື່ອ ເພາະວ່າ ມື້ວານນີ້ ກໍວຸ້ນວາຍກັນ ລະມີແຕ່ພວກຕຳຣວດ ເພິ່ນໄປ ລົມກັນ."

ພາຍໃນເວລາປະມານ 30 ນາທີ ເຈົ້າໜ້າທີ່ດັບເພິງ ກໍເດີນທາງມາຈຸດເກີດເຫດ ແລະ ບໍ່ອະນຸຍາດໃຫ້ປະຊາຊົນເຂົ້າໄປໃນເຂດ ພື້ນທີ່ໄຟໄໝ້ ໃນຂນະທີ່ເຈົ້າໜ້າທີ່ ກຳລັງຊ່ວຍ ປະຊາຊົນ ຂົນຍ້າຍເຄື່ອງຂອງ ພ້ອມທັງຂົນຍ້າຍຣົດຈັກ ບາງສ່ວນ ອອກຈາກ ພື້ນທີ່ໄຟໄໝ້.

ເຈົ້າໜ້າທີ່ອາສາກູ້ພັຍ ກ່າວວ່າ ໄດ້ປະສານໄປຫາຫ້ອງການ ໄຟຟ້າ ເມືອງໄຊເສດຖາ ເພື່ອໃຫ້ຕັດໄຟຟ້າໃນບໍຣິເວນໃກ້ຄຽງເປັນ ການຊົ່ວຄາວ. ໃນເບື້ອງຕົ້ນ ເຈົ້າໜ້າທີ່ສັນນິຖານວ່າ ສາເຫດເກີດຈາກສານເຄມີ ປະເພດທິນເນີ ນ້ຳມັນ ແລະ ຢາງຕີນຣົດ. ເຈົ້າໜ້າທີ່ດັບເພີງ ຢູ່ນະຄອນຫຼວງວຽງຈັນ ໄດ້ກ່າວວ່າ:

"ເຈົ້າໄດ້ຫຼັງຈາກນັ້ນ ພວກເຮົາກໍຄຸມເພິງໄດ້ ເພາະວ່າ ມັນມີວັດຖຸທີ່ວ່າ ຕິດໄຟເນາະ ພວກເຮົາສຸມກຳລັງໃສ່ ແລ້ວກໍສາມາດຄວບຄຸມ ເພີງຢູ່."

ເຈົ້າໜ້າທີ່ ທ່ານນີ້ ກ່າວຕື່ມວ່າ: ໄຟໄໝ້ຄັ້ງນີ້ ໄດ້ເກີດຂຶ້ນພາຍຫຼັງ ພະນັກງານເລີກການແລ້ວ ແລະ ເຈົ້າໜ້າທີ່ໃຊ້ເວລາ 50 ນາທີ ກໍສາມາດຄວບຄຸມໄຟ ເອົາໄວ້ໄດ້, ແຕ່ກໍມີເຄື່ອງ ປະກອບຣົດຈັກ ຢູ່ໃນສາງໂຮງງານ ດັ່ງກ່າວ ໄດ້ຮັບຄວາມເສັຽຫາຍ.

ທີ່ຜ່ານມາ ໂຮງງານປະກອບຣົດດັ່ງກ່າວ ເຄີຍຖືກໄຟໄໝ້ມາແລ້ວຄັ້ງນຶ່ງ ໃນປີ 2019. ເມື່ອເກີດເຫດໄຟໄໝ້ໃນຄັ້ງນີ້ ປະຊາຊົນກໍໄດ້ ໂທຣະສັບ ແຈ້ງໜ່ວຍກູ້ພັຍ. ຊາວບ້ານແສງ ສະຫວ່າງ ໄດ້ກ່າວຕໍ່ເອເຊັຽເສຣີ ວ່າ:

"ອ່າ, ມີເບີທີ່ວ່າແຈ້ງເຫດດ່ວນ ຂອງມອດໄຟຫັ້ນນ່າ ດັບເພີງເຂດໃກ້ຂະເຈົ້າໂທ ເຂົ້າກູ້ພັຍກ່ອນລະກະ ໂທຫາກູ້ພັຍ ຫຼືວ່າສາຍດ່ວນ ຊີ້ນ່າ."

ຊາວບ້ານບາງຄົນທີ່ມີທຸຣະກິດ ຮ້ານຂາຍເຄື່ອງ ຢູ່ໃກ້ກັບໂຮງງານດັ່ງກ່າວ ກໍໄດ້ຊື້ປະກັນພັຍ ເພື່ອຂໍຄ່າຊົດເຊີຍໃນເວລາເກີດຄວາມ ເສັຽຫາຍຈາກເກີດໄຟໄໝ້. ຊາວບ້ານທີ່ມີຮ້ານ ຂາຍເຄື່ອງຢູ່ໃກ້ໂຮງງານ ໄດ້ກ່າວຕໍ່ເອເຊັຽເສຣີ ວ່າ:

"ເຮືອນເຮົານີ້ ຕັ້ງແຕ່ເຮົາມີຮ້ານຂາຍເຄື່ອງ ເຮົາກໍເຮັດປະກັນພັຍ ຄັນມີຫຍັງເກີດຂຶ້ນ ກໍບອກປະກັນພັຍ ໃຫ້ເຂົ້າມາເບິ່ງວ່າມັນເກີດ ຈາກຫຍັງ."

ຫຼັງຈາກໄຟໄໝ້ຕອນກາງຄືນ ແຕ່ຕອນເຊົ້າມາ ຝົນກໍຕົກເຮັດໃຫ້ ຄວັນຈາງຫາຍໄປ. ໂຮງງານປະກອບຣົດຈັກ ຂອງຈີນ ແຫ່ງນີ້ ເຄີຍຖືກໄຟຟ້າມາແລ້ວຄັ້ງນຶ່ງ ໃນປີ 2019 ທີ່ຜ່ານມາ ແລະ ໃນເວລານັ້ນ ເຈົ້າໜ້າທີ່ເຄີຍແຈ້ງ ໃຫ້ເຈົ້າຂອງໂຮງງານ ປັບປຸງ ມາຕຖານໂຮງງານ ເພື່ອປ້ອງກັນ ບໍ່ໃຫ້ເກີດໄຟໄໝ້ ແຕ່ເຈົ້າຂອງໂຮງງານ ກໍຍັງບໍ່ມີການປັບປຸງ ຣະບົບ ຄວາມປອດພັຍ ຂອງ ໂຮງງານ.

ນອກຈາກນີ້ ໃນເດືອນມົກກະຣາ 2019 ໂຮງງານແຫ່ງນີ້ ເຄີຍເຮັດໃຫ້ເກີດບັນຫາ ກິ່ນຂິວ ຈາກການພົ່ນສີຣົດ ເຮັດໃຫ້ສົ່ງຜົລກະທົບ ຕໍ່ຊາວບ້ານ ທີ່ຢູ່ເຂດໃກ້ຄຽງ ແລະ ເຈົ້າໜ້າທີ່ ກ່ຽວຂ້ອງໄດ້ລົງໄປແກ້ໄຂ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ