ການຊື້ຂາຍດິນບຶງທາຕຫລວງ ຫ້າມ ບໍ່ໄດ້

2013-11-04
ອີແມວລ໌
ຄໍາເຫັນ
Share
ພິມ
ເຂດພື້ນທີ່ບຶງທາດຫຼວງ ທີ່ຖືກສັມປະທານ ໃນຈີນແລ້ວແລະຈະ ສ້າງເປັນເມືອງໃໝ່
ເຂດພື້ນທີ່ບຶງທາດຫຼວງ ທີ່ຖືກສັມປະທານ ໃນຈີນແລ້ວແລະຈະ ສ້າງເປັນເມືອງໃໝ່
RFA

 

ເຈົ້າໜ້າທີ່ຂັ້ນສູງ ໃນສໍານັກງານນາຍົກຣັຖມົນຕຣີ ທີ່ບໍ່ປະສົງອອກຊື່ ກ່າວວ່າ ການທີ່ເຈົ້າຄອງນະຄອນຫລວງວຽງຈັນ ໄດ້ມີຄໍາສັ່ງຫ້າມບໍ່ ໃຫ້ ປະຊາຊົນ ມີການຊື້-ຂາຍ ແລະ ໂອນສິດທິຕ່າງໆກ່ຽວກັບທີ່ດິນ ໃນໂຄງການພັທນາ ເຂດເສຖກິດ ບຶງທາດຫລວງ ທີ່ທາງການອະນຸ ມັດໃຫ້ ບໍຣິສັດຈີນ ສັມປະທານນັ້ນ ປາກົດວ່າປະຊາຊົນຈໍານວນນຶ່ງ ບໍ່ມີຄວາມຢໍາເກງໃດໆເລີຍ ແລະ ເຂົາເຈົ້າບໍ່ເຫັນນໍາທີ່ທາງການໃຊ້ ອໍານາດ ກົດດັນ ໃຫ້ເຂົາເຈົ້າຍ້າຍອອກໄປ ແລະ ໂອນທີ່ດິນໃຫ້ແກ່ ບໍຣິສັດຂອງຈີນ ໂດຍທີ່ໄດ້ຮັບຄ່າຊົດເຊີຽ ທີ່ບໍ່ເໝາະສົມ ດັ່ງເຈົ້າໜ້າ ທີ່ໄດ້ກ່າວໃນ ຕອນນຶ່ງວ່າ:

"ຜ່ານມານີ້ ກໍຖືວ່າພວກເຮົາ ມັນບໍ່ໄປຕາມລະບົບ ເລີຽເກີດມີບັນຫາ ຄວາມຫຍຸ້ງຍາກເພາະວ່າບໍຣິສັດ ນີ້ໄປກວມເອົາດິນຂອງປະຊາຊົນ ໂຕນີ້ ຄັນມັນໄປກວມເອົາປະຊາຊົນຕ້ອງໄດ້ແກ້ ໃຫ້ບໍຣິສັດ ເປັນຜູ້ ແກ້ບາງເທື່ອນີ້ໃຫ້ທົດແທນ ຫລືວ່າຄັນປະຊາຊົນບໍ່ໃຫ້ ບາງເທື່ອ ກໍ ບໍ່ໄດ້ ເພາະ ວ່າມັນແມ່ນບ່ອນທໍາມາຫາກິນ ຂອງເຂົາເຈົ້າເດ້".

ໂຄງການດັ່ງກ່າວ ໄປກວມເອົາດິນຊາວບ້ານ ບ້ານຫົວຂົວ ບ້ານໂນນ ສະວ່າງ ບ້ານວັງໄຊ ບ້ານໂນນສງ່າ ບ້ານໜອງໜ່ຽງ ບ້ານຈອມມະນີ ບ້ານວຽງຈເຣີນ ແລະບ້ານໂພນພະເນົາ ທັງໝົດຢູ່ໃນເຂດເມືອງໄຊເສດຖາ ອັນປະກອບດ້ວຍ 435 ຄອບຄົວ. ປະຊາຊົນ ທີ່ບໍ່ທັນຍ້າຍອອກ ຈາກທີ່ດິນທີ່ຣັຖບານວຽນຄືນນັ້ນ ມີປະມານ 100 ກວ່າຄອບຄົວ.

ໂຄງການພັທນາເຂດເສຖກິດບຶງທາດຫລວງ ຈະໃຊ້ເງິນລົງທຶນປະມານ 1,600 ລ້ານ ໂດລາສະຫະຣັຖ ໂດຍຈະພັທນາພື້ນທີ່ 365 ເຮັກຕາ ໃຫ້ ເປັນເມືອງທ່ອງທ່ຽວ ສູນການຄ້າ ສວນສາທາຣະນະ ບ້ານພັກອາສັຍ ແລະການບໍຣິການ ອື່ນໆ ແບບຄົບວົງຈອນ. ເຂດພັທນາແຫ່ງນີ້ ຈະສາມາດຮອງຮັບນັກທຸຣະກິດຈາກຈີນ ແລະຈາກປະເທອື່ນໆບໍ່ຕໍ່າກວ່າ 55,000 ຄົນ ແລະຈະສ້າງໃຫ້ສໍາເຣັດພາຍໃນປີ 2030. ປັດຈຸບັນ ວຽກງານດຸດໜ້າດິນ ແລະ ສ້າງຖນົນບາງເສັ້ນ ໄດ້ເລີ້ມ ລົງມືແດ່ແລ້ວ ແຕ່ປາກົດວ່າເປັນໄປແບບຊ້າໆ.

ຄໍາເຫັນ (2)
Share

ຊາວບ້ານ ຫັດສະດີ ເມືອງຈັນທະບູລີ

ຈາກ ເມືອງຈັນທະບູລີ ນະຄອນຫຼວງວຽງຈັນ

ບໍ່ເຂົ້າໃຈນຳເພີ່ນ ບໍ່ຈັກວ່າເຮັດແນວໃດ ດີນລາວ ມີຢ່າງກວ້າງຂວາງ ກະບໍ່ໄປເອົາໃຫ້ເຂົາ ບາດວ່າ ຢູ່ບ້ານຫັດສະດີ ເມືອງຈັນທະບູລີ ເຮັດໃຫ້ ປະຊາຊົນເດືອດຮ້ອນ ແນວເຂົາຢູ່ສືບທອດກັນມາ 2 ເຊັນຄົນແລ້ວ ພວກເພີ່ນ ປະຕິວັດມາ 1975 ລະຊິເອົາມາຂາຍ ໃຫ້ຈີນ ໃຫ້ວຽດໝົດ ລະຊິໃຫ້ເຂົາໄປຢູ່ ກອງຂີ້ເຫຍື້ອ ຫລັກ 36 ພຸ້ນ ກະຊິເປັນບໍ່? ບາດພວກເພີ່ນລະດຸທ່າງ ມີເຮືອນງາມ ມີລົດໃຫຍ່ຂີ່ ກະແມ່ນເກັບພາສີ ກັບປະຊາຊົນ ອັນນີ້ເອີ້ນວ່າ ພວກໂຈນເຂົ້າບ້ານ ລະເດີ້ ພີ່ນ້ອງ ຊ່ວຍອອກເຜີຍແຜ່ ໃຫ້ແດ່ ຫລືມາສຳພາດ ກັບປະຊາຊົນກະໄດ້ ທ່ານ

ຂອບໃຈຫລາຍໆ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 06, 2013 12:11 PM

ເຜົ່າລາວ

ຈາກ ແຜ່ນດີນລ້ານຊ້າງ

ເມື່ອຄນະພັກແລະຣັຖບານ ມີຄວາມຢາກໃນເຣື່ອງເງີນ ປະຊາຊົນ ກໍມີຄວາມຢາກ ເຊັ່ນດຽວກັນ. ເມື່ອພັກ ແລະຣັຖຂາຍດີນດອນ ຕອນຫຍ້າໄດ້ ໂດຍບໍ່ສົນໃຈ ທີ່ຈະຟັງຄຳເຫັນ ຂອງປະຊາຊົນ ປະຊາຊົນກໍສົມຄວນ ທີ່ຈະມີສິດ ຂາຍທີ່ດິນທີ່ ພວກຕົນມີຢູ່ເຊັ່ນກັນ. ດັ່ງນັ້ນຖ້າຈະໂທດ ກໍຄວນໂທດທີ່ພັກແລະຣັຖ ແຕ່ພຽງຝ່າຍດຽວ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 05, 2013 10:29 AM

ເຕັມຫນ້າ