ການກໍ່ສ້າງສນາມບິນສາກົນ ຂ.ບໍ່ແກ້ວ ເຣີ່ມແລ້ວ

ຈໍາປາທອງ
2021-06-22
Share
ການກໍ່ສ້າງສນາມບິນສາກົນ ຂ.ບໍ່ແກ້ວ ເຣີ່ມແລ້ວ ໂຄງການກໍ່ສ້າງ ສນາມບິນສາກົນ ເຂດເສຖກິດ ພິເສດ ສາມຫຼ່ຽມຄຳ ( ຮູບຖ່າຍ ວັນທີ 11 ພຶສພາ 2021 )
ນັກຂ່າວພົລເມືອງ

ໂຄງການກໍ່ສ້າງ ສນາມບິນສາກົນ ໃນພື້ນທີ່ ເຂດເສຖກິຈພິເສດ ສາມຫຸ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ເຣິ່ມບຸກເບີກຫນ້າດິນ ແລ້ວພາຍຫຼັງທີ່ກຸ່ມ ບໍຣິສັດດອກງິ້ວຄຳ ໄດ້ຕຽມສ້າງສນາມບິນແຫ່ງນີ້ ມາເປັນເວລາດົນນານ ເພຶ່ອຮອງຮັບນັກທ່ຽວທ່ຽວເຂົ້າມາໃນ ເຂດເສຖກິດພິເສດ ແລະກາຊິໂນຄິງໂຣມັນ ໃນອະນາຄົດ, ແຕ່ຊາວລາວຫລາຍຄົນ ເຫັນວ່າມັນຈະສ້າງຜົລປໂຍດ ໃຫ້ນັກລົງທຶນ ບໍຣິສັດດອກງິ້ວຄຳ ຫຼາຍກວ່າ.

ກ່ຽວກັບເຣື້ອງນີ້ ຊາວບ້ານເມືອງຕົ້ນເຜິ້ງ ນາງນຶ່ງທີ່ຢູ່ໃກ້ກັບບ່ອນຈະສ້າງສນາມບິນສາກົນ ດັ່ງກ່າວເວົ້າວ່າ ປັດຈຸບັນວຽກງານບຸກ ເບີກທີ່ດິນມີຄວາມຄືບໜ້າ ຫຼາຍສົມຄວນ ຊຶ່ງ ກ່ອນໜ້ານີ້ ບໍຣິສັດໄດ້ຈ່າຍຄ່າຊົດເຊີຍ ໃຫ້ຊາວບ້ານໝົດແລ້ວ ຈຶ່ງບໍ່ມີຊາວບ້ານ ອອກມາຄັດຄ້ານ ດັ່ງນາງກ່າວຕໍ່ເອເຊັຽເສຣີ ໃນວັນທີ 22 ມິຖຸນາ ນີ້ວ່າ:

“ກໍຢູ່ໃກ້ກັນຢູ່ເຈົ້າ ກໍມີແຕ່ວ່າເຂົາກໍຍອມໆໄປໝົດແລ້ວ ໃຫ້ຄ່າຊົດເຊີຍແມ່ນຫຍັງໃຫ້ແລ້ວແມ່ນກໍ.”

ເຈົ້າຫນ້າທີ່ຂັ້ນບ້ານ ທີ່ບ້ານສີເມືອງງາມ ໃກ້ກັບບ່ອນທີ່ຈະສ້າງສນາມບິນ ເວົ້າວ່າ ຊາວບ້ານຫລາຍຄົນ ທີ່ຖືກສນາມບິນກວມເອົາ ດິນຂະເຈົ້ານັ້ນ ກໍໄດ້ຮັບຄ່າຊົດເຊີຍໝົດທຸກ ຄອບຄົວແລ້ວ ຕັ້ງແຕ່ ປີ 2019 ແຕ່ບໍ່ໄດ້ຈື່ວ່າ ມີຈັກຄອບຄົວ ແລະ ໄດ້ຮັບຄ່າຊົດເຊີຍ ຄອບຄົວລະຫລາຍປານໃດ.

ເຈົ້າຫນ້າທີ່ປະຈຳເຂດເສຖກິຈພິເສດ ສາມຫຼ່ຽມຄຳ ທ່ານນຶ່ງເວົ້າວ່າກ່ອນທີ່ໂຄງການ ຈະໄດ້ບຸກເບີນທີ່ດິນ ກໍມີການໄກ່ເກັ່ຽຄ່າຊົດເຊີຍ ກັບຊາວບ້ານໝົດທຸກຄອບຄົວແລ້ວ ແລະຊາວບ້ານທີ່ໄດ້ຮັບຄ່າຊົດເຊີຍ ກໍເຫັນດີ ບໍ່ມີໃຜຄັດຄ້ານຫຍັງ.

“ມັນກໍບໍ່ມີບັນຫາຫຍັງ ເພາະວ່າ ຊາວບ້ານກະຖືວ່າເຫັນດີ ຕົກລົງເຫັນດີໝົດ ການເຄລັຽທາງດ້ານພຶ້ນທີ່ ເພິ່ນກະຖືວ່າຊາວບ້ານເຫັນ ດີຕາມການຊົດເຊີຍຂອງຜູ້ພັທນາເນາະ.”

ທ່ານກ່າວຕຶ່ມວ່າ ຕາມແຜນການໃນເບຶ້ອງຕົ້ນ ໂຄງການກໍ່ສ້າງສນາມບິນສາກົນ ແຫ່ງນີ້ມີກຳນົດສ້າງໃຫ້ສຳເຣັດໃນຕົ້ນປີ 2022 ເພື່ອຮອງຮັບນັກທ່ອງທ່ຽວ ເຂົ້າມາທ່ຽວໃນເຂດ ເສຖກິດພິເສດ ໂດຍສະເພາະ, ສ່ວນຣາຍລະອຽດກ່ຽວກັບການກໍ່ສ້າງ ນັ້ນຍັງບໍ່ ສາມາດຮູ້ໄດ້ຫຼາຍກວ່ານີ້.

ເຖິງຢ່າງໃດກໍຕາມ ຊາວບ້ານຢູ່ແຂວງບໍ່ແກ້ວ ນາງນຶ່ງເວົ້າວ່າ ໂຄງການກໍ່ສ້າງສນາມບິນສາກົນ ເຂດເສຖກິດສາມຫຼ່ຽມຄຳ ເປັນສິ່ງທີ່ ເກີນຄວາມເປັນຈິງ ຢູ່ແຂວງບໍ່ແກ້ວກໍມີ ສນາມບິິນ ທີ່່ເມືອງຫ້ວຍຊາຍແລ້ວ ນາງຄິດວ່າໂຄງການນີ້ ຈະເອຶ້ອອຳນວນຄວາມສະດວກ ໃຫ້ແກ່ນັກລົງທຶນຫລາຍກວ່າ ປະຊາຊົນຈະບໍ່ໄດ້ຮັບຜົລປໂຍດຫຼາຍ.

“ຕົ້ນເຜິ້ງ ເປັນສນາມບິນໃຫຍ່ເນາະ ມັນຈະຕ້ອງເນັ້ນໃສ່ ຜູ້ທີ່ມີເງິນເນາະ ຫລືວ່າ ພວກທີ່ຕ້ອງການເຂົ້າໄປທ່ຽວຫຼິ້ນ ໃນຕົ້ນເຜິ້ງ ໃນກາຊິໂນພຸ້ນແຫລະ ຈະລົງໂຕນັ້ນ ການເດີນທາງ ຈະໄປຕົ້ນເຜິ້ງໃນເວລາເປັນຊົ່ວໂມງເດ້.”

ຊາວບ້ານຢູ່ເມືອງຫ້ວຍຊາຍ ແຂວງບໍ່ແກ້ວ ນາງນຶ່ງກ່າວແບບດຽວກັນວ່າ ການສ້າງສນາມບິນສາກົນ ຈະອຳນວຍຄວາມສະດວກໃຫ້ ແກ່ນັກທ່ອງທ່ຽວ ທີ່ຈະເຂົ້າມາຫຼິ້ນ ກາຊິໂນ ຄິງໂຣມັນເປັນຫຼັກ ເພາະສ້າງໂດຍບໍຣິສັດ ດອກງິ້ວຄຳເອງ.

“ເອີ ອັນນີ້ ພວກເຈົ້າເຫວີຍ ພວກກາຊີໂນ ເຂົ້າສ້າງເອງຕິ ເພາະວ່າ ສນາມບິນແຂວງເຮົາມັນຢູ່ພີ້ ພວກນີ້ຂະເຈົ້າສ້າງຕຣອດເດ້ ໂຄວິດ ເຂົາກໍສ້າງເພາະວ່າມັນພວກນີ້ຕ່າງຫາກ.”

ຊາວບ້ານຢູ່ແຂວງຫຼວງພຣະບາງ ທ່ານນຶ່ງ ກໍກ່າວວ່າ ໂຄງການສ້າງສນາມບິນສາກົນ ຢູ່ແຂວງບໍ່ແກ້ວ ຈະສ້າງຜົລປໂຍດໃຫ້ແກ່ ບໍຣິສັດດອກງິ້ວຄຳສ່ວນໃຫຍ່ ໂດຍຊາວບ້ານທ້ອງຖິ່ນ ຈະບໍ່ໄດ້ຮັບຜົລປໂຍດ ຫຼາຍປານໃດ.

“ໜ້າຈະເປັນໃນເຊີງທີ່ວ່າ ທາງກາຊີໂນຫຼາຍກວ່າຫັ້ນນ່າ ຕາມທີ່ຄິດຄົນພາຍໃນກະ ຊິມີຜົລປໂຍດແດ່ ແຕ່ກໍບໍ່ຫຼາຍດອກ ເຖົ້າແກ່ ຄົນລວຍຂະເຈົ້າມາເອງ ກໍບໍ່ແນ່ໃຈບາງທີ ກໍຈະຊ່ອຍເຫຼືອລາວ ທາງດ້ານເສຖກິດ ອາດມີພວກນັກທ່ອງທ່ຽວ ເຂົ້າມາລາວຫຼາຍຂຶ້ນ.”

ກ່ຽວກັບເຣື່ອງນີ້ ສາສດາຈານ ອະດິສອນ ເສມແຍ້ມ ນັກຊ່ຽວຊານກ່ຽວກັບປະເທດລາວ ຈາກ ສະຖາບັນເອເຊັຽສຶກສາ ມະຫາ ວິທຍາລັຍຈຸລາລົງກອນ ປະເທດໄທຍ ກ່າວວ່ານອກຈາກ ຈະເປັນການຮອງຮັບນັກພະນັນແລ້ວ ຍັງເປັນແຜນການສ້າງໂຕເມຶອງ ໃໝ່ໃນເຂດສເຖກິດພິເສດ ສາມຫຼ່ຽມຄຳ ນຳອີກ ເພື່ອຕອນຮັບນັກທຸຣະກິດ ແລະ ນັກທ່ອງທ່ຽວ ເຂົ້າມາທ່ຽວໃນເຂດ ດັ່ງກ່າວ ຈຳນວນຫຼາຍ.

“ໂຄງການນີ້ຈະສນັບສນູນ ເຂດເສຖກິດພິເສດ ສາມຫຼ່ຽມຄຳ ເປັນຕົ້ນຮອງຮັບຜູ້ໂດຍສານຕ່າງໆ ທີ່ຈະເຂົ້າມາ ຊຶ່ງຜູ້ລົງທຶນມີແຜນ ທີ່ຈະຂຍາຍເຂດເສຖກິດພິເສດ ສາມຫຼ່ຽມຄຳ ທີ່ຈະໃຫ້ຄົນຈີນເຂົ້າມາ ມັນຂ້ອນຂ້າງທີ່ຈະໃຫຍ່ຫຼາຍ ສນາມບິນແຫ່ງນີ້ບໍ່ໄດ້ມີເອົາໄວ້ ສຳລັບຂົນສົ່ງໂດຍສານ ພາຍໃນປະເທດ ແຕ່ຈະສນັບສນູນແຜນການສ້າງ ໂຕເມືອງໃຫຍ່ ຫັ້ນແຫລະ.”

ທ່ານກ່າວຕຶ່ມວ່າ ຖ້າສນາມບິນແຫ່ງນີ້ ຫາກສ້າງສຳເຣັດ ກໍອາດຈະພາໃຫັ້ເກີດຫຼາຍບັນຫາ ເປັນຕົ້ນ ອາດເປັນຊ່ອງທາງນຶ່ງທີ່ເຮັດ ໃຫ້ນັກຄ້າຢາເສບຕິດ ສວຍໂອກາດໃນການຂົນສົ່ງ ຢາເສບຕິດຂ້າມຊາດ ຫລື ບັນຫາອຶ່ນໆ ຈຶ່ງເປັນໜ້າທີ່ ຂອງທາງການລາວ ທີ່ຈະຕ້ອງສົ່ງເຈົ້າໜ້າທີ່ ໄປປະຈຳຢູ່ສນາມບິນ ແຫ່ງນີ້ ເພຶ່ອຮັກສາຄວາມສງົບຮຽບຮ້ອຍ ໃນຖານະເຈົ້າຂອງປະເທດ.

ກ່ອນໜ້ານີ້ ເມຶ່ອປີ 2014 ຊາວບ້ານຢູ່ບ້ານສີເມືອງງາມ ແລະ ບ້ານໃກ້ຄຽງຫຼາຍຄົນ ໄດ້ຄັດຄ້ານໂຄງການດັ່ງກ່າວ ພາໃຫ້ເກີດຂໍ້ ຂັດແຍ່ງ ກັບພະນັກງານກໍ່ສ້າງ ຂອງບໍຣິສັດ ໃນການບຸກເບີນທີ່ດິນ ໃນເວລານັ້ນ ຈົນມາຮອດປີ 2017 ກໍໄດ້ຢຸດເຊົາໂຄງການ ໂດຍໃຫ້ເຫດຜົລວ່າ ຈະໄປປັບປຸງສນາມບິນ ທີ່ເມືອງຫ້ວຍຊາຍແທນ ແຕ່ມາຮອດປີ 2019 ໂຄງການນີ້ ກໍຖືກກັບມາມີ ການກໍ່ສ້າງ ຄືນໃຫມ່ ໂດຍໄດ້ໃຫ້ຄ່າຊົດເຊີຍຊາວບ້ານ ຈົນບໍ່ມີຜູ້ໃດອອກມາຄັດຄ້ານ.

ໃນເບຶ້ອງຕົ້ນໂຄງການກໍ່ສ້າງສນາມບິນສາກົນ ແຫ່ງນີ້ຈະໃຊ້ມູນຄ່າການກໍ່ສ້າງທັງໝົດ 150 ລ້ານໂດລາສະຫະະຣັດ ໂດຍສນາມບິນ ຖືກອອກແບບ ໃຫ້ມີທາງແລ່ນ ຍາວ 2,500 ແມັດ ແລະ ສາມາດຮອງຮັບເຮືອບິນ ຂນາດນ້ອຍ ແລະ ຂນາດກາງໄດ້ ແຕ່ຍັງບໍ່ໄດ້ ຣະບຸວ່າຢ່າງຄັກແນ່ວ່າ ຈະສ້າງແລ້ວເມື່ອໃດ ແລະບໍຣິສັດໃດ ເປັນຜູ້ຮັບເໝົາກໍ່ສ້່າງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ