ການເຂົ້າ-ອອກດ່ານຊາຍແດນນ້ອຍ ຂອງແຂວງຜົ້ງສາລີ ຍັງຖືກຈໍາກັດ

ການເຂົ້າ-ອອກ ລະຫວ່າງດ່ານສາກົນ ລານຕຸ້ຍ ເມືອງຍອດອູ ແຂວງຜົ້ງສາລີ ແລະດ່ານເມືອງຄໍາ  ເມືອງຈຽງເຊິນ ນະຄອນພູເອີ້ ແຂວງຍຸນນານ ຂອງຈີນ ຍັງມີຂໍ້ຈໍາກັດ, ມີການກວດກາຫລາຍຢ່າງ ຈາກເຈົ້າໜ້າທີ່ ປະຈໍາດ່ານຂອງຈີນ ຍ້ອນດ່ານເມືອງຄໍາ ຍັງເປັນດ່ານທ້ອງຖິ່ນ ທີ່ບໍ່ສາມາດ ໃຊ້ວີຊາຜ່ານດ່ານໄດ້, ຍັງຕ້ອງໄດ້ໃຊ້ໜັງສືຜ່ານແດນ ແລະເອກກະ ສານຢັ້ງຢືນຕ່າງໆ ແລະທັງກວດຄົນລາວ ທີ່ຜ່ານດ່ານນີ້ເຂົ້າໄປຈີນ ຢ່າງເຂັ້ມງວດ, ອີງຕາມຄໍາເວົ້າ ຂອງຊາວ ບ້ານຜູ້ນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 12 ສິງຫານີ້.

“ແມ່ນໆ ສ່ວນຫລາຍບາງເທື່ອກໍມີໃບຢັ້ງຢືນ ຈາກຜູ້ປົກຄອງ ບໍ່ມີໃບຢັ້ງຢືນຈາກຫ້ອງການທີ່ກ່ຽວຂ້ອງ ຖ້າເປັນຜູ້ຍິງ ຂະເຈົ້າສິບໍ່ໃຫ້ໄປຊະຊາຍເນາະ ຖ້າໄປກະຕ້ອງມີໃບຢັ້ງຢືນຈາກຜູ້ຄຸ້ມຄອງ ລະກະໃບແຈ້ງໂທດ.”

ແລະປະຊາຊົນ ຢູ່ແຂວງຜົ້ງສາລີ ອີກຜູ້ນຶ່ງ ກໍເວົ້າແບບດຽວກັນ ເຖິງການເຂົ້າ-ອອກ ດ່ານລາວ-ຈີນ ແຫ່ງນີ້ ໂດຍສະເພາະຢູ່ເບື້ອງດ່ານເມືອງຄໍາຂອງຈີນ ວ່າ ຕ້ອງໄດ້ຜ່ານການກວດກາເອກກະສານຢ່າງເຂັ້ມງວດທີ່ສຸດ. ຖ້າເອກະສານ ບໍ່ຄົບຖ້ວນ ກໍຈະຖືກປະຕິເສດ ບໍ່ໃຫ້ເຂົ້າໄປຈີນ, ດ່ານເບື້ອງຈີນ ໄດ້ລະວັງຄົນລາວຫລາຍທີ່ສຸດ ເພື່ອສະກັດກັ້ນ ທັງບັນຫາການຄ້າມະນຸດ, ການລັກລອບຂົນ ສົ່ງສິ່ງຜິດກົດໝາຍ, ການເຂົ້າເມືອງແບບບໍ່ຖືກຕ້ອງ ແລະອື່ນໆ ດັ່ງທີ່ທ່ານກ່າວວ່າ:

“ມັນກະຈະມີບັດພາດສະພັອດ ແລະເອກກະສານການເດີນທາງ ແລ້ວກໍມີໃບບັດປະຈໍາຕົວຈັ່ງຊີ້ນ່າ ຂໍ້ມູນຮັດກຸມມັນກໍບໍ່ຍາກດອກ ເອກກະສານບໍ່ຄົນຊຸດນີ້ ທາງການຈີນເພິ່ນບໍ່ອະນຸຍາດ ບໍ່ອະນຸມັດ ຄັນແມ່ນຄົນລາວນີ້ ໄປຈີນໄປກັບນີ້ໄດ້.”

ພ້ອມດຽວກັນນັ້ນ ພະນັກງານນໍາທ່ຽວ ຢູ່ແຂວງຜົ້ງສາລີ ຜູ້ນຶ່ງ ກໍເວົ້າຕໍ່ວິທຍຸເອເຊັຽເສຣີໃນມື້ດຽວກັນນີ້ ເຖິງປະຊາຊົນລາວ ທີ່ເຂົ້າໄປປະເທດຈີນ ຜ່ານດ່ານສາກົນ ລານຕຸ້ຍ-ດ່ານເມືອງຄໍາ ວ່າ ກໍມີຂໍ້ຈໍາກັດ ເລື້ອງການເດີນທາງ ຊຶ່ງສາ ມາດເຂົ້າໄປໄດ້ ແຕ່ໃນເຂດນະຄອນພູເອີ້ ເທົ່ານັ້ນ ແລະຫ້າມໄປກາຍເຂດນັ້ນເດັດຂາດ, ບໍ່ດັ່ງນັ້ນ ຈະຖືກເຈົ້າໜ້າທີ່ຈີນຈັບໄປດໍາເນີນຄະດີ.

“ຄັນວ່າປຶ້ມຜ່ານແດນຊັ້ນນ່າ ໃຫ້ເຂົ້າໄປຮອດແຕ່ເມືອງຈຽງເຊິນ ຄັນມີພາດສະພັອດກໍໃຊ້ພາດສະພັອດ ບໍ່ມີພາດສະພັອດແລ້ວກໍມີແຕ່ບັດປະຈໍາຕົວ ແລ້ວເມືອຮອດພຸ້ນແລ້ວກໍເພິ່ນໃຫ້ອອກປຶ້ມຜ່ານແດນໃຫ້.”

ແລະຜູ້ປະກອບການລົດຂົນສົ່ງສິນຄ້າ ຢູ່ແຂວງຜົ້ງສາລີ ນາງນຶ່ງ ກໍເວົ້າເຖິງເລື້ອງລົດຂົນສົ່ງສິນຄ້າ ທີ່ຜ່ານເຂົ້າ-ອອກດ່ານລາວ-ຈີນແຫ່ງນີ້ວ່າ ຕ້ອງໄດ້ຜ່ານການກວດກາ ເອກະສານຢ່າງເຂັ້ມງວດຄືກັນ ທັງຢູ່ດ່ານລາວ ແລະດ່ານຈີນ ໂດຍສະເພາະລົດຂອງຄົນລາວ ຈະຖືກກວດກາຫລາຍທີ່ສຸດ.

“ໄດ້ຄັນວ່າເອກກະສານຄົບ ບໍ່ມີຫຍັງແລ້ວກະໄປໄດ້ປົກກະຕິ ເອກກະສານກໍເຄື່ອງເຮົາຄົບຖ້ວນແລ້ວກໍເອກກະສານລົດເຮົາຄົບຖ້ວນລະກໍຜ່ານໄດ້ ໂອ໋ ແຕ່ວ່າມັນບໍ່ເປັນດ່ານໃຫຍ່ ລານຕຸ້ຍນ່າ ມັນເປັນດ່ານນ້ອຍ.”

ກ່ຽວກັບການເດີນທາງເຂົ້າ-ອອກລະຫວ່າງ ດ່ານສາກົນລານຕຸ້ຍ ແລະດ່ານເມືອງຄໍາ ຂອງຈີນ ທີ່ຍັງເປັນດ່ານທ້ອງຖິ່ນຢູ່ນັ້ນ ເຈົ້າໜ້າທີ່ຜະແນກຖະແຫລງຂ່າວ, ວັດທະນະທໍາ ແລະທ່ອງທ່ຽວ ແຂວງຜົ້ງສາລີ ທ່ານນຶ່ງ ກ່າວຕໍ່ວິທຍຸເອເຊັຽເສຣີໃນມື້ວັນທີ 12 ສິງຫານີ້ວ່າ ແມ່ນມີຂໍ້ຈໍາກັດແທ້ ໂດຍສະເພາະຄົນລາວທີ່ເຂົ້າໄປຜ່ານດ່ານຈີນ ແມ່ນຍັງຖືກຈໍາກັດ ໃຫ້ຢູ່ໄດ້ແຕ່ພາຍໃນເຂດ ນະຄອນພູເອີ້ເທົ່ານັ້ນ. ແຕ່ສໍາລັບຄົນຈີນ ທີ່ເຂົ້າມາຜ່ານດ່ານສາກົນລານຕຸ້ຍ ແມ່ນໄດ້ຮັບຄວາມສະດວກຫລາຍກວ່າ, ບໍ່ໄດ້ຖືກກວດກາເຂັ້ມງວດ. ແລະວ່າ ສໍາລັບນັກທ່ອງທ່ຽວ ທີ່ມາຈາກປະເທດອຶ່ນໆ ນອກຈາກລາວ ແລະຈີນແລ້ວ ແມ່ນບໍ່ສາ ມາດເຂົ້າ-ອອກດ່ານແຫ່ງນີ້ໄດ້ ດັ່ງທີ່ທ່ານກ່າວວ່າ:

“ແມ່ນແຫລະຄົນລາວໄປຮອດແຕ່ພູເອີ້ ຈີນນີ້ງ່າຍ ບໍ່ມີບັນຫາແຫລະ ເບື້ອງລາວເປັນດ່ານສາກົນ ແຕ່ເບື້ອງຈີນນີ້ເປັນດ່ານທ້ອງຖິ່ນ ເຂົາຍັງບໍ່ຮັບພາສພ້ອດຄົນປະເທດທີ 3 ເທື່ອ ຄົນໄທແລ້ວກໍຄົນສາກົນ ຍັງເຂົ້າບໍ່ໄດ້ເທື່ອ.”

ກ່ຽວກັບບັນຫາທີ່ວ່ານີ້ ໃນໂອກາດທີ່ ທ່ານ ຈັ່ງ ເສີ ຜິງ ຫົວໜ້າກົງສູນໃຫຍ່ຈີນ ປະຈຳພາກເໜືອຂອງລາວ ໄດ້ເດີນທາງໄປຢ້ຽມຢາມແຂວງຜົ້ງສາລີ ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງແຂວງຜົ້ງສາລີ ກໍໄດ້ພົບພໍ້ກັບທ່ານ ຈັ່ງ ເສີ ຜິງ ແລະໄດ້ສະເໜີໃຫ້ຝ່າຍຈີນ ອໍານວຍຄວາມສະດວກ ໃນການເຂົ້າ-ອອກ ລະຫວ່າງດ່ານສາກົນ ລານຕຸ້ຍ ແລະດ່ານເມືອງຄໍາ ທັງຄົນ, ພາຫານະ ແລະສິນຄ້າ ຍ້ອນໃນໄລຍະນີ້ ພົບຄວາມຫຍູ້ງຍາກຫລາຍ.

ດ່ານສາກົນ ລານຕຸ້ຍ ແລະດ່ານເມືອງຄໍາ ໄດ້ກັບມາເປີດຄືນອີກ ນັບແຕ່ວັນທີ 20 ກຸມພາ 2023 ເປັນຕົ້ນມາ ຫລັງຈາກໄດ້ປິດໄປຊົ່ວຄາວ ໃນໄລຍະການແຜ່ລະ ບາດຂອງໂຄວິດ-19. ແຕ່ດ່ານເມືອງຄໍາຂອງຈີນ ກໍຍັງເປັນດ່ານທ້ອງຖິ່ນຢູ່ຄື ເກົ່າ.