ຄະດີ ລັກຊັບ ໃນ ນະຄອນຫລວງ ວຽງຈັນ ນັບມື້ ນັບມີ ຫລາຍຂືຶ້ນ
ປັຈຈຸບັນ ຄະດີລັກຊັບ ຕາມເຮືອນ ຂອງ ປະຊາຊົນ ໃນ ນະຄອນຫລວງ ວຽງຈັນ ມີນັບມື້ນັບ ຫລາຍຂືຶ້ນ ເນື່ອງຈາກ ປະຊາຊົນ ຕ່າງແຂວງ ພາກັນ ຫລັ່ງໄຫລ ເຂົ້າມາຢູ່ ໃນຕົວເມືອງ ຫລາຍຣາຍ ເມື່ອບໍ່ມີ ວຽກເຮັດ ງານທຳ ກໍພາກັນ ຫາລັກຊັບ ເພື່ອ ຄວາມຢູ່ລອດ ຕາມຄຳເວົ້າ ຂອງ ເຈົ້າໜ້າທີ່ ປ້ອງກັນຄວາມ ສງົບ ທ່ານນຶ່ງ ໃນມື້ວັນທີ່ 7 ພືສພາ ນີ້:
" ຄະ ດີ ສ່ວນ ຫລາຍ ແມ່ນ ຂີ້ ລັກ ນີ້ ລະ ແມ່ນ ອັນ ດັບ ນຶ່ງ ຫລາຍ ກ່ ວາ ທຸກ ຄະ ດີ ວ່າ ຊັ້ນ ຊະ ຄົນ ທີ່ ບໍ່ ມີ ວຽກ ເຮັດ ງານ ທຳ ເຂົ້າ ມາ ຢູ່ ນະ ຄອນ ຫລວງ ນັບ ມື້ ນັບ ຫລາຍ ຂຶ້ນ ເຮັດ ໃຫ້ ສະ ພາບ ປະ ກົດ ການ ຫ ຍໍ້ທໍ້ ທາງ ດ້ານ ຂີ້ ລັກ ນີ້ ເກີດ ຂືຶ້ນ ຖ້າ ທຽບ ໃສ່ ຊຸມ ປີ ຜ່ານ ມາ ກັບ ປີນີ້ ກໍ ຖື ວ່າ ຄ່ອນ ຂ້າງ ຫລາຍ "
ເຈົ້າໜ້າທີ່ ທ່ານນີ້ ເວົ້າຕໍ່ໄປວ່າ ນັບຕັ້ງແຕ່ ເດືອນ ມົກກະຣາ ປີ 2013 ຈົນຮອດເດືອນ ພຶສພາ ນີ້ ມີການຮ້ອງຮຽນ ກໍຮະນີ ລັກຊັບ ແລ້ວ ຫລາຍກ່ວາ 100 ຄະດີ ແລະວ່າ ໃນຊ່ວງ ເດືອນ ມົກກະຣາ ຫາເດືອນ ພຶສພາ ປີ 2012 ມີຢູ່ ປະມານ 30 ເທົ່ານັ້ນ ຊຶ່ງທາງເຈົ້າໜ້າທີ່ ກໍໄດ້ເພີ້ມການ ກວດກາ ຕາມ ສຖານທີ່ຕ່າງໆ ຫລາຍຂຶ້ນ ແລະ ກໍສາມາດ ຈັບ ຜູ້ກໍເຫດ ໄດ້ ເກືອບທຸກ ຄະດີ ທີ່ມີການ ຮ້ອງຮຽນ.
ນອກຈາກ ຄົນລາວ ທີ່ເປັນຜູ້ ກໍ່ເຫດການ ແລ້ວ ຍັງພົບວ່າ ພວກຊາວຈີນ ແລະ ວຽດນາມ ທີ່ຢູ່ໃນ ນະຄອນຫລວງ ວຽງຈັນ ກໍລັກຊັບ ຕາມເຮືອນ ປະຊາຊົນ ນຳອີກ ໂດຍສ່ວນໃຫ່ຍ ຈະແຝງຕົວ ເປັນພໍ່ຄ້າ ເລາະຊື້ ເສດເຫລັກ ແລະ ຂອງເກົ່າ ຕາມເຮືອນຄົນ ຖ້າເຮືອນໃດບໍ່ ມີຄົນ ຢູ່ ກໍຈະເຂົ້າໄປ ງັດແງະ ລັກຊັບທັນທີ ຊຶ່ງທີ່ຜ່ານມາ ເມື່ອເຈົ້າໜ້າທີ່ ຈັບໄດ້ ກໍສົ່ງກັບຄືນ ປະເທດຂອງ ເຂົາເຈົ້າ ໄປແລ້ວ ຈຳນວນນຶ່ງ.
ບັນຫາ ການຕິດ ຢາເສບຕິດ ຂອງ ກຸ່ມວັຍລຸ້ນ ກໍເປັນອີກ ສາເຫດ ສຳຄັນ ທີ່ເຮັດໃຫ້ເກີດ ການລັກຊັບ ຫຼືປຸ້ນຈີ້ ເກິດຂຶ້ນ ຜ່ານມາ ຊາວບ້ານ ເຄີຍໃຫ້ ຂໍ້ມູນວ່າ ຢູ່ຕາມ ຖນົນ ສາຍ 450 ປີ ພວກວັຍຣຸ້ນ ຂີ່ຣົຖຈັກ ມັກ ປຸ້ນຈີ້ເອົາເງິນ ຊາວບ້ານ ທີ່ ຂີ່ຣົຖ ໄປມາ ຢູ່ຕາມທາງຕ່າງໆ ທີ່ບໍ່ມີເສົາໄຟຟ້າ ຢູ່ເລື້ອຍມາ.