ຜູ້ປະກອບການ ຮຽກຮ້ອງ ພາກຣັຖ ຊ່ອຍ ຍາມເສຖກິຈ ພົບຄວາມຫຍຸ້ງຍາກ: ມາຟັງ ນຳກັນ

ຜູ້ປະກອບການ ຜລິດສິນຄ້າ ສນອງພາຍໃນ ຕ່າງກໍຮຽກຮ້ອງໃຫ້ ຣັຖບານ ເອົາໃຈໃສ່ຄຸ້ມຄອງ ແລະ ສົ່ງເສີມ ໃຫ້ມີຊ່ອງທາງ ໃນການຄ້າຂາຍ. ຜ່ານມາ ຖືກສິນຄ້າ ນຳເຂົ້າ ມາກະທົບໃສ່ ທັງທີ່ວ່າ ຄົນລາວຜລິດໄດ້ ແຕ່ຣັຖ ບໍ່ມາຕການຄຸ້ມຄອງ ເພື່ອໃຫ້ສິນຄ້າເຫລົ່ານີ້ ສາມາດສ້າງຜົລກຳໄລໄດ້.

ໄມຊູລີ: ສະບາຍດີ ທ່ານຜູ້ຟັງທີ່ເຄົາຣົບ... ຂໍຕ້ອນຮັບ ທ່ານຜູ້ຟັງ ເຂົ້າມາສຸູ່ຣາຍການ “ມາຟັງນຳກັນ”. ສັປດານີ້ ມາລົມກັນເຣື່ອງ ບັນຫາເສຖກິຈ ທີ່ລາວ ປະສົບກັບ ຄວາມຫຍຸ້ງຍາກ ໃນປັດຈຸບັນ. ທັງເງິນເຟີ້, ຄ່າຄອງຊີບສູງ, ສິນຄ້າລາຄາແພງ ສົ່ງຜົລກະທົບ ຕໍ່ຊີວິຕການເປັນຢູ່ ຂອງປະຊາຊົນ, ໂດຍຫົວຂໍ້ ໃນຣາຍການ ມື້ນີ້ ແມ່ນຜູ້ປະກອບການ ພາຍໃນ ຮຽກຮ້ອງ ໃຫ້ພາກຣັຖ ຊ່ອຍໃນຍາມເສຖກິຈ ພົບຄວາມຫຍຸ້ງຍາກ.

ທ່ານຜູ້ຟັງ ສະພາບອັຕຣາແລກປ່ຽນ ທີ່ເປັນໂຕສໍາຄັນ ເຮັດໃຫ້ປະຊາຊົນ ໃຊ້ຊີວິຕ ລໍາບາກຫຼາຍ ເພາະລາວ ຕ້ອງເພີ່ງພາ ການນຳສິນຄ້າເຂົ້າ, ຊຶ່ງເປັນສິນຄ້າ ທີ່ໃຊ້ໃນຊີວິຕປະຈຳວັນ. ເຖິງແມ່ນວ່າ ຣັຖບານຈະໃຊ້ ຫຼາຍມາຕການ ເຂົ້າມາຄຸມ ແຕ່ອັຕຣາແລກປ່ຽນ ຍັງເໜັງຕີງຂຶ້ນໄປ ເລື້ອຍໆ ຈົນປະຊາຊົນອອກປາກວ່າ “ບໍ່ໄຫວແລ້ວ” ເພາະອາຫານການກິນ ແພງເກີນໄປ ຈົນບໍ່ຮູ້ວ່າ ຊິຫາເງິນ ມາໃຊ້ແນວໃດ ຈຶ່ງຈະກຸ້ມຄອບຄົວ.

ທ່ານ ຜູ້ຟັງທ່ານໃດ ທີ່ຮັບຟັງຣາຍການ ຂອງພວກເຮົາ ຖ້າຕ້ອງການ ເຂົ້າຮ່ວມ ໃນຣາຍການ ເພື່ອສົນທະນາກັນ ກະຣຸນາ ສົ່ງເບີໂທຣະສັບ ໃສ່ຊ່ອງຄອມເມັ້ນ, ແລ້ວທິມງານ ຈະໂທຫາ. ເພື່ອສັມພາດໃຫ້ໄດ້ຄວາມຈິງ ນຳມາເປີດເຜີຍ ສູ່ງສັງຄົມ. ສຳລັບມື້ນີ້ ດຳເນີນຣາຍການໂດຍ ໄມຊູລີ ແລະ ໄຊຍາ.

ໄຊຍາ: ສະບາຍດີ ທ່ານຜູ້ຟັງທີ່ເຄົາຣົບ... ທ່າມກາງ ການຜະເຊີນກັບ ເສຖກິຈທົດຖອຍ ແຕ່ຣັຖບານລາວໄດ້ປະກາດວາງ 8 ເປົ້າໝາຍ ເພື່ອຜັກດັນໃຫ້ ເສຖກິຈ ໃນປີ 2023 ຂຍາຍໂຕ ໃຫ້ໄດ້ 4.5%. ເປົ້າໝາຍນີ້ ແມ່ນກຳລັງ ເປັນສິ່ງທ້າທາຍ ທີ່ຣັຖບານລາວ ກຳລັງຜະເຊີນຢູ່ ທັງເຣື່ອງອັຕຣາແລກປ່ຽນ ເໜັງຕີງຂຶ້ນສູງ ເປັນປວັດການ ອັນນຳຜົລກະທົບ ມາສູ່ ປະຊາຊົນໂດຍກົງ. ໂດຍສະເພາະ ສິນຄ້າອຸປໂພກ-ບໍຣິໂພກ ຂຶ້ນລາຄາ ນຳທຸກມື້ ແຕ່ລາຍໄດ້ ພັດຕໍ່າ. ຫຍິ່ງໄປກ່ວານັ້ນ ພາກທຸຣະກິຈ ຂອງຄົນລາວເອງ ກໍຖືກກະທົບ ຊໍ້າເຂົ້າໄປອີກ.

ສະພາບປັດຈຸບັນ, ນອກຈາກ ທຸຣະກິຈ ຂອງຄົນຈີນ, ຄົນວຽດນາມ ທີ່ເຂົ້າມາ ຍາດແຍ່ງຄົນລາວ ໄປແລ້ວ. ເວົ້າງ່າຍໆວ່າ ໄປໃສກໍເຫັນ ແຕ່ຮ້ານຈີນ ຮ້ານວຽດນາມ, ແຕ່ຮ້ານ ຂອງຄົນລາວ ກໍມີຢູ່ ແຕ່ວ່າ ກໍບໍ່ຫຼາຍ ຊໍ້າບໍ່ໜໍາ ຕອນນີ້ ກໍປະສົບບັນຫາ ທີ່ວ່າ ອັຕຣາແລກປ່ຽນ ເໜັງຕີງຂຶ້ນສູງ ແບບນີ້ ກໍຫຍິ່ງຊໍ້າເຂົ້າໄປອີກ. ຜ່ານມາ ຫຼາຍທຸຣະກິຈ ຂອງຄົນລາວ ກໍດັນໄປແຂ່ງກັບ ທຸຣະກິຈຈີນ ວຽດນາມ ພາຍໃນປະເທດຂອງຕົນເອງ ມັນກໍພົບກັບ ຄວາມຫຍຸ້ງຍາກຫຼາຍ.

ເຖິງແມ່ນວ່າ ຣັຖບານ ບໍ່ມີມາຕການແຈ່ມແຈ້ງ ແຕ່ຕອນນີ້ ກໍຕ້ອງຊອກຫາ ທາງອອກ ຮ່ວມກັນກັບ ທຸຣະກິຈລາວ ທີ່ປະສົບບັນຫາເຣື່ອງ ການແຂ່ງຂັນ ແລະ ການນຳເຂົ້າ. ແນວໃດຄົນລາວ ກໍສູ້ບໍ່ໄດ້ ແຕ່ຮຽກຮ້ອງ ໃຫ້ຣັຖບານ ຊ່ອຍເຫຼືອ ຄຸ້ມຄອງ ແລະ ສົ່ງເສີມ ເພາະທຸຣະກິຈ ຂອງຄົນລາວ ໃຫ້ມີຊ່ອງທາງຫາກຳໄລ ເພື່ອການຄົງຢູ່ ຂອງເສຖກິຈລາວ ໃນໄລຍະຍາວ.

(ເຊີນທ່ານ ຟັງຣາຍລະອຽດ ຈາກສຽງ ທີ່ໄດ້ບັນທຶກໄວ້ ຂ້າງເທິງນັ້ນ)