ເກີດເຫດການຄົນງານລາວ ຈຳນວນນຶ່ງທີ່ເຮັດວຽກຢູ່ໂຄງການ ກໍ່ສ້າງສະຖານີຣົດໄຟ ລາວ-ຈີນ ເຂດວຽງຈັນໃຕ້-ທ່ານາແລ້ງ ບ້ານດົງໂພນແຮ່ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ປະທະກັບກຸ່ມນາຍຈ້າງຊາວຈີນ ແລະຖືກຊາວຈີນທຳຮ້າຍຮ່າງກາຍ ແຕ່ມີກຸ່ມຄົນງານລາວມາຫ້າມເອົາໄວ້. ສາເຫດຍ້ອນຄົນງານລາວ ພາກັນຢຸດວຽກ ແລ້ວໄປຂໍທວງເອົາເງິນ ນຳນາຍຈ້າງຈົນເກີດເຫດການດັ່ງກ່າວ ເມື່ອວັນທີ 22 ພຶສຈິກາ ທີ່ຜ່ານມາ. ດັ່ງຄົນງານລາວ ທີ່ເຫັນເຫດການກ່າວຕໍ່ ວິທຍຸເອເຊັຽເສຣີ ໃນວັນທີ 26 ພຶສຈິກາ ນີ້ວ່າ:
" ກໍ ເຫັນ ຫຼາຍ ຄົນ ຢູ່ ບ່ອນ ເຮັດ ວຽກ ມື້ ນັ້ນ ເຮົາ ກາ ເຫັນ ເຂົາ ຕີ ກັນ ເຮັດ ນຳ ຄົນ ຈີນ ແລ້ວ ຄົນ ຈີນ ເຂົາ ນ່າ ເຂົາ ຕີ ກັນ ເຮົາ ກາ ເບີ່ງ ສື່ໆ ."
ຍານາງກ່າວຕື່ມວ່າ ກ່ອນໜ້ານີ້ກໍເຄີຍເກີດເຫດການ ຕີກັນຫຼາຍເທື່ອ ທັງລະຫວ່າງນາຍຈ້າງຊາວຈີນກັບຄົນງານລາວ ຫຼືລະຫວ່າງຄົນຈີນດ້ວຍກັນເອງ ຊຶ່ງສາເຫດຫຼັກໆ ກໍເກີດຈາກເຣື່ອງຄ່າຈ້າງ ແຕ່ຕົນບໍ່ໄດ້ຮູ້ຢ່າງຄັກແນ່ວ່າ ເປັນຫຍັງຈຶ່ງເກີດເຫດການບໍ່ຈ່າຍຄ່າຈ້າງ ຫຼືໃຫ້ຄ່າຈ້າງຊັກຊ້າ ແລະບໍ່ເຫັນພາກສ່ວນໃດລົງພື້ນທີ່ ມາແກ້ໄຂບັນຫາແຕ່ຢ່າງໃດ.
ໃນຂນະທີ່ຫົວໜ້າ ຄົນງານລາວອີກທ່ານນຶ່ງ ທີ່ເຮັດວຽກໃນໂຄງການ ກໍ່ສ້າງສະຖານີຣົດໄຟ ລາວ-ຈີນ ຢູ່ເຂດບ້ານດົງໂພນແຮ່ ກ່າວວ່າ ສຳລັບເຫດການທີ່ຄົນງານລາວ ບໍ່ໄດ້ຄ່າຈ້າງນັ້ນ ຍ້ອນຖືກຫົວໜ້າຄົນງານຊາວລາວຈຳນວນນຶ່ງ ທີ່ເປັນຫົວໜ້າຄຸມວຽກບໍ່ຈ່າຍຄ່າຈ້າງ ໃຫ້ແກ່ຄົນງານທີ່ເປັນລູກນ້ອງ ທັນທີພາຍຫຼັງຈາກທີ່ໄປເບີກເງິນ ຈາກນາຍຈ້າງຊາວຈີນມາແລ້ວ ແຕ່ຄົນງານລາວພັດບໍ່ຮູ້ ສາເຫດແທ້ຈິງຈຶ່ງໄປທວງຖາມເງິນ ຈາກນາຍຈ້າງຊາວຈີນ, ດັ່ງທ່ານໄດ້ກ່າວວ່າ:
" ເຂົາ ຈ່າຍ ເງິນ ໝົດ ແລ້ວ ບໍ່ ແມ່ນບໍ່ ຈ່າຍ ຄົນ ທີ່ ວ່າ ເຂົາ ວ່າ ເອີ ແມ່ນ ຈີນ ບໍ່ ຈ່າຍ ຈັ່ງ ຊັ້ນ ຈັ່ງ ຊິ ນ່າ ຍ້ອນ ວ່າ ມີ ຫົວ ໜ້າ ຮັບ ເໝົາ ກັນ ຫຼາຍ ຄົນ ແຄ່ ນັ້ນ ຈົບ ຮັບ ຄົນ ດຽວ ເລີຍ ນຳ ຫົວ ໜ້າ ເຖົ້າ ແກ່ ຈີນ ຮັບ ລະ ຂ້ອຍ ເຮັດ ແລ້ວ ຂ້ອຍ ກາ ມາ ຈ່າຍ ລູກ ນ້ອງ ຂ້ອຍ ."
ທ່ານກ່າວອີກວ່າ ສະເພາະເຂດທີ່ລາວເຮັດວຽກ ມີຫົວໜ້າທີ່ເປັນຄົນລາວ ຈຳນວນຫຼາຍຄົນເປັນ ລັກສະນະໃນຮູບແບບຜູ້ຮັບເໝົາ ລາຍຫຍ່ອຍຊຶ່ງມີຄົນງານ ຂອງໃຜມັນໂດຍຫຼັງຈາກແລ້ວໜ້າວຽກ ຕາມກຳນົດ ແລະຜ່ານການກວດໜ້າວຽກ ວ່າໄດ້ມາຕຖານແລ້ວ ນາຍຈ້າງຊາວຈີນກໍເອົາເງິນ ກ້ອນໃຫຍ່ໃຫ້ເພື່ອໃຫ້ຫົວໜ້າຄົນງານ ເອົາໄປຈ່າຍໃຫ້ແກ່ຄົນງານລາວ ໃນສັງກັດ ແຕ່ກໍມີຫົວໜ້າງານ ຈຳນວນນຶ່ງທີ່ເບີກເງິນມາແລ້ວ ໄດ້ນຳເງິນໜີໄປ ຫຼືເອົາເງິນໄປໃຊ້ເອງກ່ອນ ຍ້ອນຄວາມໂລບ.
ທາງດ້ານຫົວໜ້າ ຄົນງານລາວອີກນາງນຶ່ງ ທີ່ເຄີຍເຮັດວຽກຢູ່ເຂດດັ່ງກ່າວ ກໍຢືນຢັນວ່າສາເຫດ ທີ່ເຮັດໃຫ້ເກີດເຫດການດັ່ງກ່າວ ກໍຍ້ອນຫົວໜ້າຄົນງານຊາວລາວ ໂກງຄ່າຈ້າງຄົນງານລາວນຳກັນເອງ ຊຶ່ງທາງນາຍຈ້າງຊາວຈີນ ກໍໄດ້ຊີ້ແຈງວ່າໄດ້ໃຫ້ເງິນ ແກ່ຫົວໜ້າຄົນງານຊາວລາວໄປແລ້ວ ແຕ່ບໍ່ໄດ້ນຳໄປເບີກຈ່າຍໃຫ້ຄົນງານ ດັ່ງຍານາງໄດ້ກ່າວວ່າ:
" ເຮົາ ກາ ມາ ເບີກ ເງິນ ຮັບ ເງິນ ນຳ ເຖົ້າ ແກ່ ຈີນ ບາດ ນີ້ ລະ ຮັບ ເງິນ ໄດ້ ແລ້ວ ແລ້ວ ກາ ມື້ ອື່ນ ຊິ ເອົາ ມາ ໃຫ້ ເດີ້ ເວົ້າ ນຳ ກັມ ມະ ກອນ ເຂົາ ກາ ລໍ ຖ້າ ຢູ່ ລໍ ຖ້າ ຢູ່ ກາບໍ່ ເຫັນ ເອົາ ມາ ກາ ໄປເວົ້າ ນຳ ເຖົ້າ ແກ່ ຈີນ ເນາະ ເປັນ ຫຍັງ ບໍ່ ເອົາ ເງິນ ໃຫ້ ຂ້ອຍ ວ່າ ຊັ້ນ ຈີນ ວ່າ ຂ້ອຍ ໃຫ້ ຫົວ ໜ້າ ເຈົ້າ ແລ້ວ ເອົາ ບັນ ຊີ ມາ ໃຫ້ ເບິ່ງ ກັມ ມະ ກອນ ວ່າ ເວົ້າ ສູ່ ຟັງ ຫັ້ນ ເນາະ ."
ຄົນງານອີກນາງນຶ່ງ ທີ່ເຄີຍເຮັດວຽກສ້າງສະຖານີຣົດໄຟ ລາວ-ຈີນຢູ່ເຂດດັ່ງກ່າວ ກໍວ່າສາເຫດທີ່ຄົນງານລາວ ບໍ່ໄດ້ເງິນຄ່າຈ້າງບາງເທື່ອອາດເກີດຈາກ ຫົວໜ້າຜູ້ຮັບເໝົາຮັບເງິນ ຄ່າຈ້າງຕໍ່ກັນຫຼາຍຄົນຫຼາຍມື ຈຶ່ງເຮັດໃຫ້ເງິນບໍ່ຮອດຄົນງານ, ດັ່ງຍານາງກ່າວວ່າ:
" ບໍ່ ແມ່ນ ແທ້ ຫົວ ໜ້າ ຮັບ ເໝົາ ມັນ ຮັບ ຕໍ່ ພ່ວງ ຫຼາຍ ຄົນ ຫຼາຍ ມື ແລ້ວ ເງິນ ບໍ່ ເຖີງ ກັມ ມະ ກອນ ເຮົາ ເຊົາ ເຮັດ ແລ້ວ ເດ ."
ກ່ຽວກັບເຣື່ອງນີ້ ວິທຍຸເອເຊັຽເສຣີໄດ້ຕິດຕໍ່ ຫາຫ້ອງການແຮງງານ ແລະສວັສດີການສັງຄົມ ເມືອງຫາດຊາຍຟອງ ແລະຫ້ອງການ ປກສ ເມືອງຫາດຊາຍຟອງ ເພື່ອຖາມລາຍຣະອຽດ ເພີ່ມຕື່ມ ແຕ່ເຈົ້າໜ້າທີ່ ທີ່ກ່ຽວຂ້ອງ ບໍ່ສະດວກໃຫັສັມພາດ. ໃນຂນະທີ່ທາງເຈົ້າໜ້າທີ່ ບໍຣິສັດ ທາງຣົດໄຟ ລາວ-ຈີນ ຈຳກັດ ກໍຊີ້ແຈງວ່າ ທາງບໍຣິສັດ ບໍ່ໄດ້ມີສ່ວນໃນການຮັບຜິດຊອບ ຕໍ່ເຫດການນີ້.
ເຖິງຢ່າງໃດກໍຕາມ ເຈົ້າໜ້າທີ່ກະຊວງແຮງງານ ແລະສວັສດີການສັງຄົມ ຜູ້ຂໍສງວນຊື່ແລະສຽງທ່ານນຶ່ງກ່າວວ່າ ກ່ຽວກັບຂໍ້ຂັດແຍ່ງທີ່ເກີດຂື້ນ ຫຼ້າສຸດນີ້ ທາງກະຊວງ ບໍ່ທັນໄດ້ຂໍ້ມູນເທື່ອ ແຕ່ຫາກກຸ່ມຄົນງານ ຜູ້ທີ່ໄດ້ຮັບຜົລກະທົບ ໄດ້ຮ້ອງຮຽນມາຍັງ ກະຊວງກໍຈະມີການກວດກາຄືນ ແລະ ສົ່ງເຈົ້າໜ້າທີ່ໄປກວດສອບ.
ກ່ອນໜ້ານີ້ ໃນທ້າຍເດືອນກັນຍາ ທີ່ຜ່ານມາຄົນງານລາວປະມານ 20 ປາຍຄົນ ຮວມທັງຫົວໜ້າຄົນງານລາວ ທີ່ເຮັດວຽກກໍ່ສ້າງ ທາງຣົດໄຟ ລາວ-ຈີນ ຢູ່ເຂດບ້ານດົງໂພນແຮ່ ກໍໄດ້ໄປໂຮມໂຕ ຮຽກຮ້ອງຄ່າຈ້າງ ຈາກນາຍຈ້າງຊາວຈີນ ຈົນເຖິງຂັ້ນຜິດຖຽງກັນ ແລະຕໍ່ມານາຍຈ້າງຊາວຈີນ ກໍຍອມຈ່າຍເງິນ ໃຫ້ພາຍຫຼັງທີ່ຄົນງານດັ່ງກ່າວ ໄດ້ປະທ້ວງໂດຍການປິດລະບົບໄຟຟ້າ ໃນພື້ນທີ່ກໍ່ສ້າງ.
ມາຮອດປັຈຈຸບັນ ໂຄງການກໍ່ສ້າງ ທາງຣົດ ແລະສະຖານີຣົດໄຟ ລາວ-ຈີນ ຫຼາຍແຫ່ງໃກ້ຈະສຳເຣັດ 100% ແລ້ວ ແລະຈະມີພິທີການເປີດໃຊ້ ໂຄງການດັ່ງກ່າວ ໃນວັນທີ 2 ທັນວາ 2021 ນີ້, ກ່ອນທີ່ຈະເປີດໃຊ້ຣົດໄຟ ລາວ-ຈີນ ແບບເປັນທາງການ ໃນວັນທີ 3 ທັນວາ 2021 ນີ້.