ຂ​ແນງທ່ອງທ່ຽວ ບໍ່​ທັນ​ມີ​ແຜນຫາປໂຍດ ຈາກຣົດໄຟ

ຈໍາປາທອງ
2021-04-05
Share
ຂ​ແນງທ່ອງທ່ຽວ ບໍ່​ທັນ​ມີ​ແຜນຫາປໂຍດ ຈາກຣົດໄຟ ສະຖານທີ່ທ່ອງທ່ຽວ ເມືອງວັງວຽງ ແຂວງວຽງຈັນ
ຮູບຈາກ : ນັກຂ່າວພົລເມືອງ

ພວກນັກທຸຣະກິຈທ່ອງທ່ຽວ ໃນລາວ ຫຼາຍຄົນ ຍັງບໍ່ມີແຜນ ທີ່ຈະໃຊ້ປໂຍດ ຈາກທາງຣົດໄຟ ລາວ-ຈີນ ຊຶ່ງຈະເປີດໃຊ້ ໃນເດືອນທັນວາ ທີ່ຈະມາເຖິງນີ້ ເປັນຕົ້ນ ແມ່ນຍັງບໍ່ມີ ແຜນທີ່ຈະເອົາຣົດ ໄປລໍຮັບຜູ້ໂດຍສານ ຢູ່ສະຖານີຣົດໄຟ ແລະ ຍັງບໍ່ມີແຜນ ທີ່ພານັກທ່ອງທ່ຽວ ໂດຍໃຊ້ຣົດໄຟ ເປັນຫລັກ ຍ້ອນວ່າ ຍັງບໍ່ໍ່ທັນໄດ້ສຶກສາລະອຽດ ກ່ຽວກັບຄ່າບໍຣິການ ຂອງຣົດໄຟ ນັ້ນເທື່ອ, ດັ່ງເຈົ້າຂອງ ບໍຣິສັດທ່ອງທ່ຽວ ທ່ານນຶ່ງ ກ່າວຕໍ່ວິທຍຸເອເຊັຽ ເສຣີ ໃນມື້ວັນທີ 2 ເມສາ ນີ້ວ່າ:

“ໂອ໋ ຣົດໄຟລາວ-ຈີນ ເຮົາຍັງບໍ່ທັນໄດ້ມີແຜນເທື່ອ ເພາະວ່າ ຊ່ວງນີ້ ໂຄວິດທົ່ວປະເທດ. ນອກປະເທດ ມັນກະຂ້ອນຂ້າງຢາກຍາກແນ່ ເບິ່ງໂຕຈິງ ຕ້ອງເບິ່ງຣາຍຈ່າຍ ເພາະເຮົາ ບໍ່ທັນໄດ້ຮູ້ວ່າ ຣາຄາຣົດໄຟ ລາວ-ຈີນ ຄ່າມັນອອກນອກປະເທດ ຣາຄາເທົ່າໃດ.”

ທ່ານກ່າວຕື່ມອີກວ່າ ຖ້າວ່າ ການທ່ອງທ່ຽວ ໃນລາວ ກັບຄືນມາຫຼາຍ ຫຼື ທາງການອະນຸຍາດ ໃຫ້ນັກທ່ອງທ່ຽວ ຕ່າງປະເທດ ເຂົ້າມາທ່ຽວ ລາວ ໄດ້ຕາມປົກກະຕິ ບໍຣິສັດຂອງຕົນ ກໍອາຈວາງແຜນ ນໍາໃຊ້ເສັ້ນທາງຣົດໄຟ ໃຫ້ເປັນປໂຍດ ຕໍ່ທຸຣະກິຈ ຂອງຕົນ. ແຕ່ກໍຄາດວ່າ ຄົງຍັງອີກດົນ, ຕ້ອງລໍຖ້າເບິ່ງ ສະຖານະການຕໍ່ໄປ.

ພະນັກງານ ບໍຣິສັດ ທ່ອງທ່ຽວທ່ານນຶ່ງເວົ້າວ່າ ບໍຣິສັດຂອງຕົນ ກໍຍັງບໍ່ທັນມີແຜນ ທີ່ຈະໃຊ້ປໂຍດ ຈາກທາງຣົດໄຟນັ້ນຄືກັນ ຍ້ອນວ່າ ຍັງຂາດຣາຍໄດ້ ແລະ ຍັງມີລູກຄ້າ ໜ້ອຍຢູ່:

“ຣົດໄຟເບາະ ຍັງບໍ່ທັນອັນນັ້ນເທື່ອນະ ຊ່ວງນີ້ ຫ້ອງການບໍຣິສັດ ຂອງພວກນ້ອງກະປິດຢູ່ນະເຈົ້າ ຍັງບໍ່ທັນໄດ້ເປີດເທື່ອ ເພາະວ່າ ຍັງບໍ່ໄດ້ມີອອກນອກປະເທດ ແລ້ວພວກນ້ອງກະປິດ ພາຍໃນ ກະບໍ່ຄ່ອຍມີລູກຄ້ານະ. ”

ໃນຂນະດຽວກັນ ກໍມີນັກທຸຣະກິຈ ທ່ອງທ່ຽວບາງສ່ວນ ເປັນຕົ້ນ ຜູ້ປະກອບການຣົດຕູ້ນໍາທ່ຽວ ທີ່ໄດ້ວາງແຜນໃຊ້ປໂຍດ ຈາກທາງ ຣົດໄຟລາວ-ຈີນ ເປັນຕົ້ນ ເມື່ອເປີດໃຊ້ ທາງແລ້ວ ກໍຈະເອົາຣົດໄປຈອດ ຢູ່ຕາມສະຖານີ ຣົດໄຟ ບ່ອນຕ່າງໆ ເພື່ອລໍຮັບນັກທ່ອງທ່ຽວ ເຂົ້າຕົວເມືອງ ຫຼືໄປເຂດອື່ນໆ:

“ມີປໂຍດ ແບບວ່າ ໄດ້ຮັບລູກຄ້າ ຈາກນັກທ່ອງທ່ຽວ ແບບວ່າ ຂະເຈົ້າ ຈະມາລົງ ແບບວ່າ ສະຖານີຕ່າງໆ ເພາະວ່າ ມັນຈະຈອດ ເປັນສະຖານີ ແລ້ວເຮົາໄປຮັບຕາມ ສາຍທາງນັ້ນ ແລ້ວມັນສິໄດ້ຂຶ້ນນະເຈົ້າ ໄປທ່ອງທ່ຽວຫັ້ນ ທ່ອງທ່ຽວນີ໋ ເພາະວ່າ ມັນຕ້ອງໄດ້ ໃຊ້ ຣົດຢູ່ວັນຢ່າງຄໍ່າ ເພິ່ນຕ້ອງໄດ້ເຊົ່າຣົດ ຂອງເຮົາໄປ.”

ແຕ່ເຖິງຢ່າງໃດກໍຕາມ, ເຈົ້າຂອງທຸຣະກິຈນໍາທ່ຽວ ຢູ່ນະຄອນຫຼວງວຽງຈັນ ທ່ານນຶ່ງ ກໍຍັງເຊື່ອວ່າ ເຖິງຣົດໄຟ ລາວ-ຈີນ ເປີດໃຊ້ແລ້ວ ແຕ່ທຸຣະກິຈທ່ອງທ່ຽວ ກໍອາຈ ບໍ່ໄດ້ຮັບຜົລປໂຍດຫຼາຍ ຍ້ອນຜູ້ໂດຍສານ ທີ່ໃຊ້ຣົດໄຟເປັນຫຼັກ ອາຈແມ່ນພວກນັກທຸຣະກິຈ ຫຼາຍກວ່າ ພວກນັກທ່ອງທ່ຽວ ກຸ່ມໃຫຍ່ໆ:

“ຄັນສິເວົ້າ ກະບໍ່ໄດ້ມາເປັນແບບກຣຸ໊ບໃຫຍ່ນະ ມາໃນນາມແບບວ່າ ນັກທຸຣະກິຈ ມາຊື່ໆນະ ມາຊົມສິນຄ້າ ໄປຈັ່ງຊີ້ຫັ້ນນະ ເຮົາກະໄດ້ ຮັບຢູ່ ຄັນແບບມາ ລົງຢູ່ແຖວໃກ້ໆ ເພາະມັນ ຫ່າງຈາກ ຂົວມິດຕະພາບ ຢູ່ປະມານ 20 ໂລເດ໋.”

ແຕ່ເຈົ້າໜ້າທີ່ ຂແນງທ່ອງທ່ຽວໃນລາວ ທ່ານນຶ່ງ ກ່າວວ່າ ເມື່ອສະຖານີຣົດໄຟ ເປີດໃຊ້ແລ້ວ ພາກສ່ວນທຸຣະກິຈທ່ອງທ່ຽວ ກໍຈະໄດ້ ດໍາເນີນການທຸຣະກິຈຂອງຕົນ ຕາມສະຖານີຕ່າງໆ ພາຍໃຕ້ ການຄວບຄຸມ ຂອງສະມາຄົມ ທຸຣະກິຈທ່ອງທ່ຽວ ໃນແຕ່ລະເຂດ ໂດຍຈະ ໄດ້ເສັຍພັນທະອາກອນ ຕາມປົກກະຕິ ແຕ່ຈະບໍ່ໄດ້ເສັຍອາກອນເພິ່ມ ໃຫ້ບໍຣິສັດ ທາງຣົດໄຟ ລາວ-ຈີນຈໍາກັດ ດັ່ງທີ່ທ່ານກ່າວວ່າ:

“ມັນເປັນສະມາຄົມເຂົາ ທຸຣະກິຈທ່ອງທ່ຽວ ເຂົາຫັ້ນເດ໋ເນາະ ທັມມະດາແລ້ວສະມາຄົມ ທຸຣະກິຈທ່ອງທ່ຽວ ເຂົາຈະຮັບແຂກ ມັນກະ ພັນທະອາກອນ ຢູ່ພຸ້ນແລ້ວເດ໋ ພວກອັນນັ້ນ ເຂົາເສັຍຕາມບໍຣິສັດ ເຂົາເສັຍນໍາອີກ ມັນກະຄືກັນ ເຮົາໄປຮັບຢູ່ເດີ່ນບິນຫັ້ນແລ້ວ ມັນ ຈະໄປເສັຍຕື່ມອີກ ມັນກະບໍ່ແມ່ນແຫຼະເນາະ ທົວໃຜທົວມັນ ແບບຢູ່ເດີ່ນບິນຫັ້ນແຫຼະ.”

ມາເຖິງປັດຈຸບັນ ມີຣາຍງານວ່າ ການວາງລາງຣົດໄຟ ຈາກນະຄອນຫຼວງວຽງຈັນ ໄປຫາແຂວງ ຫຼວງພຣະບາງ ແລະຕໍ່ໃສ່ ແຂວງອຸດົມໄຊ ຄືບໜ້າໄປໄດ້ 80% ແລະຄາດວ່າ ການວາງລາງ ແຕ່ນະຄອນຫຼວງວຽງຈັນ ໄປເຖິງດ່ານ ສະຖານີບໍ່ເຕັນ ແຂວງຫຼວງນໍ້າທາ ຈະສໍາເຣັດ ພາຍໃນ ເດືອນພຶສພາ ປີນີ້ ແລະ ຈະເປີດໃຊ້ຕາມແຜນ ໃນທ້າຍປີ 2021 ນີ້.

ອີງຕາມການລາຍງານ ຂອງທ່ານ ຫູປິ່ນ ຫົວໜ້າບັນຊາການ ແລະວິສະວະກອນຣະດັບສູງ ຂອງກຸ່ມບໍຣິສັດ ທາງຣົດໄຟ ລາວ-ຈີນ ຈໍາກັດ ຕໍ່ສື່ມວນຊົນລາວ ໃນວັນທີ 30 ມິນາ ທີ່ຜ່ານມາ, ໃນຂນະທີ່ ປະຊາຊົນລາວ ຜູ້ໄດ້ຮັບຜົລກະທົບ ຈາກໂຄງການສ້າງ ທາງຣົດໄຟນັ້ນ ຈໍານວນນຶ່ງ ຍັງບໍ່ທັນໄດ້ຮັບຄ່າຊົດເຊີຍ ຄວາມເສັຍຫາຍເທື່ອ ແຕ່ພາກສ່ວນ ທີ່ກ່ຽວຂ້ອງກັບເຣື່ອງນີ້ ບໍ່ສາມາດເປີດເຜີຍ ຈໍານວນ ໃຫ້ທາງວິທຍຸເອເຊັຽເສຣີຮູ້ໄດ້.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ