ຫຼາຍອາຊີບໃນລາວ ຖືກຄົນຈີນ-ວຽດນາມຍຶດຄອງ

ປັດຈຸບັນ ຊາວຕ່າງປະເທດ ໂດຍສະເພາະຄົນຈີນ ແລະຄົນວຽດນາມ ພາກັນເຂົ້າມາເຮັດວຽກ ທີ່ທາງການສງວນໄວ້ໃຫ້ຄົນລາວຫລາຍ ເປັນຕົ້ນວຽກຕັດຜົມ, ເສີມສວຍ, ຊ້ອມແປງຣົຖຈັກ ແລະຂາຍເຄື່ອງຍ່ອຍ ເຖິງແມ່ນວ່າອາຊີບດັ່ງກ່າວ ກະຊວງອຸດສາຫະກໍາ ແລະການຄ້າ ຈະໄດ້ອອກກົດລະບຽບ ໄວ້ຢູ່ໃນບັນຊີປະເພດອາຊີບສງວນໄວ້ໃຫ້ພົລເມືອງລາວ ສະບັບເລກທີ 1328/ອກ.ທຄວ ລົງວັນທີ 13 ກໍຣະກະດາ 2015 ນັ້ນແລ້ວກໍຕາມ ດັ່ງປະຊາຊົນຢູ່ເມືອງອຸທຸມພອນ ແຂວງສວັນນະເຂດນາງນຶ່ງ ກ່າວຕໍ່ວິທຍຸເອເຊັຍເສຣີໃນມື້ວັນທີ 30 ທັນວານີ້ວ່າ:

“ສ່ວນຫລາຍແບບທີ່ຄົນລາວ ຣັຖບານອີ່ຫຍັງສງວນໄວ້ກໍຈະເປັນແບບວ່າຮ້ານຕັດຜົມ ຮ້ານເສີມສວຍອີ່ຫຍັງ ແຕ່ວ່າປັດຈຸບັນນີ້ກໍເຫັນແບບມີຊາວຕ່າງຊາດຄືຄົນວຽດນາມ ຄົນຈີນເຂົ້າມາອີ່ຫຍັງ ເຂົ້າມາຫລາຍຫັ້ນນະ ກໍສ່ວນຫລາຍກໍຢູ່ໃນໂຕເມືອງຫັ້ນແຫລະ.”  

ຍ້ອນຄົນຈີນ ແລະຄົນວຽດນາມ ເຂົ້າມາປະກອບອາຊີບທີ່ວ່ານັ້ນຫລາຍ ຈຶ່ງເຮັດໃຫ້ຄົນລາວຈໍານວນນຶ່ງຖືກຍາດແຍ່ງອາຊີບໄປ ແລະໄດ້ຮັບຄວາມຫຍຸ້ງຍາກໃນການທໍາມາຫາລ້ຽງຊີບ ດັ່ງຊາວນະຄອນຫລວງວຽງຈັນຜູ້ນຶ່ງເວົ້າໃນມື້ດຽວກັນນີ້ວ່າ:

“ມາເຮັດນັ້ນເຮັດນີ້ ຢູ່ລາວຫັ້ນນ່າ ເອີ໋ ກໍບາດເຣື່ອງການແປງຣົຖແປງລາງອີ່ຫຍັງຕ່າງໆ ຫັ້ນແຫລະ ເຣື່ອງອາຊີບທີ່ວ່າແປງຣົຖນີ້ນ່າ ໂອ໋ມັນກະທົບຄົນລາວທີ່ຜູ້ເຂົາມີທຶນໜ້ອຍ ບໍ່ມີທຶນຫລາຍຄືຄົນຕ່າງດ້າວເນາະ ເຂົາກໍເຮັດພໍໄດ້ຢູ່ໄດ້ກິນ.”

ພວກຄົນຕ່າງປະເທດ ທີ່ເຂົ້າມາປະກອບອາຊີບຢູ່ລາວນັ້ນ ມັກນໍາສິນຄ້າທີ່ບໍ່ມີຄຸນນະພາບເຂົ້າມາຂາຍດຫລຸດລາຄາ ເຮັດໃຫ້ຄົນລາວທີ່ຂາຍເຄື່ອງຍ່ອຍເສັຍລູກຄ້າໄປ ດັ່ງຄົນຂັບຣົຖຢູ່ເມືອງໂພນທອງ ແຂວງຫລວງພຣະບາງຜູ້ນຶ່ງເວົ້າວ່າ:

“ສ່ວນຫລາຍກໍເຂົ້າມາ ກໍມີວຽດນາມ ມີຈີນ ຄົນຄື ຕັດຜົມ ຄົນລາວກໍຕັດໄດ້ເນາະ. ແປງຣົຖຄົນລາວກໍແປງໄດ້ເນາະ. ຂາຍເຄື່ອງຍ່ອຍຄົນລາວ ກໍຂາຍໄດ້ເນາະ. ແຕ່ບາດນີ້ຄົນຕ່າງປະເທດເຂົ້າມາຂາຍເບິດ ຖ້າວ່າມີຄົນລາວຊາຍນໍາ ເຂົາຈະຂາຍຫລຸດຄົນລາວອີກ ໃນຮ້ານທີ່ເຂົາຂາຍຫລຸດລາຄາ ເຂົາຈະເອົາຂອງປອມເຂົ້າມາຂາຍຫລາຍ ຄົນທີ່ລູກຄ້າທີ່ຊື້ເຂົາບໍ່ຮູ້ວ່າ ຂອງແທ້ຂອງປອມ ເຂົາຂໍແຕ່ລາຄາຖືກເນາະ.”

ເພື່ອແກ້ໄຂບັນຫາດັ່ງກ່າວ ປະຊາຊົນລາວຫລາຍຄົນຢາກໃຫ້ທາງການທີ່ກ່ຽວ ຂ້ອງຄຸ້ມຄອງອາຊີບສງວນນັ້ນໄວ້ໃຫ້ຄົນລາວຕາມລະບຽບກົດໝາຍ ເພື່ອໃຫ້ຄົນລາວມີວຽກເຮັດງານທໍາ ບໍ່ດີ້ນຮົນໄປຊອກຫາວຽກເຮັດຢູ່ຕ່າງປະເທດ ດັ່ງຊ່າງ ຕັດຜົມຢູ່ເມືອງໄກສອນ ພົມວິຫານ ແຂວງສວັນນະເຂດຜູ້ນຶ່ງເວົ້າວ່າ:

“ມັນກໍຄວນສງວນໄວ້ໃຫ້ຄົນລາວຫັ້ນນ່າ ບາງຄົນຢາກເຮັດທຸຣະກິດນີ້ ແຕ່ວ່າເຫັນຄົນວຽດນາມເຮັດແລ້ວ ຄືພວກນີ້ເນາະ ເຂົາເຂົ້າມາດ້ວຍບັດທ່ອງທ່ຽວຫລາຍ ສງວນຮັບ ແຕ່ປະຕິບັດບໍ່ໄດ້ຫັ້ນນະ ຄົນລາວເຮົາກໍເຫັນບ໋ ສ່ວນຫລາຍກໍດີ້ນຮົນໄປໄທອີ່ຫຍັງ ກໍໄປຫລາຍຫັ້ນນ່າ ບໍ່ມີວຽກເຮັດ ແລ້ວກໍອີກຢ່າງນຶ່ງ ບາດຄົນລາວເຮົາສິເຮັດ ບາງເທື່ອຄົນວຽດເຮັດກ່ອນ ເຂົາກໍມີລູກຄ້າປະຈໍາກ່ອນ ຄົນລາວເຮົາຕັດສິນໃຈເຮັດ ມັນກໍມີສິດທີ່ຈະເຈັ້ງໄດ້ຫັ້ນນະ.”

ໃນໄລຍະທີ່ຜ່ານມາ ໜ່ວຍງານທາງການທີ່ກ່ຽວຂ້ອງ ໄດ້ກວດພົບວ່າ ມີຄົນຕ່າງ ປະເທດຈໍານວນນຶ່ງເຂົ້າມາລາວ ໂດຍໃຊ້ວິຊາທ່ອງທ່ຽວ ແລ້ວສວຍໂອກາດປະ ກອບອາຊີບໃນຂແນງທີ່ສງວນໄວ້ໃຫ້ແຕ່ຄົນລາວ ດັ່ງເຈົ້າໜ້າທີ່ສະເພາະກິດ ຜແນກອຸດສາຫະກໍາ ແລະການຄ້າ ຜູ້ຂໍສງວນຊື່ ແລະຕໍາແໜ່ງທ່ານນຶ່ງເວົ້າວ່າ:

“ອາຊີບທີ່ເຫັນຄົນຕ່າງປະເທດ ເຂົ້າມາເຮັດຫລາຍບໍ໋ ມັນກໍມີ ພວກຊູບເປີມາກແກັດກໍມີ ກໍສ້ອມແປງເນາະ ແປງຣົຖບໍ່ ຄົນລາວເຮັດບໍ່ທັນໄດ້ດີຫັ້ນນະ ບໍຣິສັດຂົນສົ່ງກໍມີ ທີ່ເຫັນຂະເຈົ້າເຂົ້າມາເຮັດ ມັນກໍມີຫລາຍເງື່ອນໄຂຢູ່ ແມ່ນແຫລະ.”

ການທີ່ມີບັນຫາຄືແນວນັ້ນ ເຈົ້າໜ້າທີ່ຜແນກຄຸ້ມຄອງແຮງງານ ແລະສວັດດິການສັງຄົມທ່ານນຶ່ງເວົ້າວ່າ ເປັນຍ້ອນຄົນລາວຍັງບໍ່ທັນມີຄວາມຮູ້ ຄວາມສາມາດ ກ່ຽວກັບວຽກງານໃນຂແນງການດັ່ງກ່າວພຽງພໍ ຊຶ່ງສ່ວນນຶ່ງກໍເປັນຍ້ອນການຝຶກອົບຮົມວິຊາຊີບໃຫ້ຄົນລາວ ຍັງບໍ່ທັນເປີດກວ້າງໄດ້ປານໃດ.

“ຂະເຈົ້າຈະມີເຕັກນິກດ້ານການກໍ່ສ້າງ ຫລືວ່າດ້ານວິຊາການ ດຽວນີ້ກໍອາສັຍຂະເຈົ້າຢູ່ ເພາະວ່າຄົນເຮົາຍັງບໍ່ທັນມີຫລາຍດອກ ການຮໍ່າຮຽນວິຊາຊີບກໍຍັງບໍ່ທັນເປີດກວ້າງທີ່ຮຽນໄດ້ ແຕ່ບາງເທື່ອມັນກໍບໍ່ມີວຽກນໍ ໂຮງງານກໍຍັງມີໜ້ອຍຢູ່ ມັນຢູ່ແຖວໆວຽງຈັນ ຢູ່ບ້ານນອກຄົນມັນກໍບໍ່ມີໂຮງງານໃຫຍ່ ທີ່ຕ້ອງການຄົນເຂົ້າໄປສມັກເຮັດວຽກ.”

ໃນປີນີ້ ກະຊວງແຮງງານ ແລະສວັດດິການສັງຄົມ ໄດ້ສົ່ງເສີມວຽກງານພັທນາສີມືແຮງງານໃນຂແນງການຕ່າງໆໄດ້ທັງໝົດ 21,025 ຄົນ. ໃນນັ້ນຂແນງກະສິກໍາ 6,550 ຄົນ, ອຸດສາຫະກໍາ 10,590 ຄົນ ແລະຂແນງບໍຣິການ 3,885 ຄົນ. ໄດ້ທົດສອບສີມືແຮງງານຕາມມາຕຖານແຫ່ງຊາດ 32 ສາຂາອາຊີບ, ໄດ້ສົ່ງເສີມການຈັດຫາງານຢູ່ໃນປະເທດໃຫ້ຄົນງານໄດ້ 20,244 ຄົນ ໃນຂະນະທີ່ປັດຈຸບັນ ຄົນງານບໍ່ມີວຽກເຮັດຈໍານວນ 439,082 ຄົນ ອີງຕາມການຣາຍງານຂອງທ່ານ ວິໄລພົງ ສີສົມຫວັງ ຫົວໜ້າກົມແຜນການ ແລະການຮ່ວມມືສາກົນ ຕໍ່ກອງປະຊຸມວິຊາການແຮງງານ ແລະສວັດດິການສັງຄົມທົ່ວປະເທດຜ່ານລະບົບທາງໄກ ໃນມື້ວັນທີ 28 ທັນວານີ້.

ໃນບັນຊີປະເພດທຸຣະກິດທີ່ສງວນໄວ້ໃຫ້ພົລເມືອງລາວປີ 2015 ວຽກທີ່ສງວນໄວ້ໃຫ້ມີ 37 ອາຊີບ ຊຶ່ງໃນນັ້ນມີທັງທຸຣະກິດຊ້ອມແປງເກີບ ແລະເຄື່ອງໜັງ, ຕັດຜົມ, ເສີມສວຍ ໄປເຖິງການເກັບເຄື່ອງປ່າຂອງດົງ ຫລືພືດຜົນຈາກປ່າ, ຜລິຕພັນຈາກໄມ້ ແລະການຈັດສານຕ່າງໆ.

ນັກລົງທຶນຕ່າງປະເທດ ທີ່ເຂົ້າມາເຮັດທຸຣະກິດໃນລາວ ໂດຍບໍ່ໄດ້ຮັບອະນຸຍາດ ຈະຖືກປັບໄໝ 10 ລ້ານກີບ ແລະໂຈະການເຮັດທຸຣະກິດນັ້ນ ແລະຄົນຕ່າງປະເທດທີ່ເຂົ້າມາປະກອບອາຊີບຊຶ່ງສງວນໄວ້ໃຫ້ຄົນລາວ ຈະຖືກໃຫ້ເຮັດບົດບັນທຶກລະອຽດໃຫ້ພາກສ່ວນທາງການກ່ຽວຂ້ອງ ເພື່ອສົ່ງຕົວກັບຄືນປະເທດ ແລະສໍາລັບຄົນລາວ ທີ່ໃຫ້ຄົນຕ່າງປະເທດເຊົ່າສະຖານທີ່ເຮັດທຸຣະກິດ ໂດຍບໍ່ໄດ້ຮັບອະນຸຍາດ ຈະຖືກມາຕການທາງວິນັຍ ແລະຖືກດໍາເນີນຄະດີຕາມລະບຽບກົດໝາຍ ອີງຕາມຄໍາແນະນໍາຂອງກະຊວງອຸດສາຫະກໍາ ແລະການຄ້າ ເລກທີ 0651/ອຄ.ກຄພນ ລົງວັນທີ 12 ມິຖຸນາ 2019.