ຈີນ ກຽມຂຸດຄຳ ຢູ່ອຸດົມໄຊ

ໄຊຍາ
2018.10.03
Share on WhatsApp
Share on WhatsApp
f-oudomxay ສະຖານທີ່ ຂຸດຄົ້ນແຮ່ຫີນ ຢູ່ ເມືອງຫລ້າ ແຂວງອຸດົມໄຊ
RFA

ປະຊາຊົນ ບ້ານຕົ້ນໄຫ ເມືອງປາກແບງ ແຂວງອຸດົມໄຊ ເວົ້າວ່າ ຈະມີບໍຣິສັດ ຈາກຈີນ ເຂົ້າມາຂຸດຄົ້ນຄຳ ຈາກບໍ່ຄຳ ຢູ່ເຂດນົກແຫວນ ເຮັດໃຫ້ຊາວບ້ານ ກັງວົນວ່າ ຢ້ານການຂຸດຄຳນີ້ ມາແບບບໍ່ຖືກຕ້ອງ ແລະ ບໍ່ມີເອກະສານ ຈາກທາງການ ເພາະບໍ່ເຫັນ ເຈົ້າໜ້າທີ່ ມາແຈ້ງ ໃຫ້ປະຊາຊົນ ໄດ້ຮັບຊາບ ດັ່ງປະຊາຊົນ ທ່ານນີ້ກ່າວວ່າ:

“ເພີ່ນຊ່າ ກໍໄດ້ຍີນຢູ່ ວ່າມີບໍ່ຄຳນີ້ບໍ່ຄຳນັ້ນ ແຕ່ວ່າ ບໍ່ໄດ້ໄປນຳເພີ່ນດຸໄປໆ ມາໆ ຕາມບ້ານເຮົາເມືອງເຮົານີ້ ບໍ່ເຫັນນ່າ.”

ແຕ່ເຈົ້າໜ້າທີ່ ຜແນກພະລັງງານ ແລະ ບໍ່ແຮ່ ເວົ້າວ່າ ມີບໍຣິສັດ ຈາກປະເທດຈີນ ເຂົ້າມາລົງທຶນແລ້ວ ແລະ ໄດ້ເຮັດສັນຍາ ກັບທາງການ ຢ່າງຖືກຕ້ອງແລ້ວ.

“ມັນມີ ບໍຣິສັດ ໄດ້ຮັບອະນຸຍາດແລ້ວ ມັນເປັນບໍຣິສັດ ລາວອິນທີເລັຍ ບໍ່ທີ່ວ່າ ທາງຣັຖບານລາວ ເຊັນສັນຍາ ໃຫ້ຂະເຈົ້າ ປະຕິບັດຕາມ ຣະບຽບຕາມຣະບຽບ ຂອງຂະເຈົ້າ ໂຕນີ້ ຕາມສັນຍາສັມປະທານ ປະມານ 12 ປີ ຢູ່ໃນເຂດ ນົກແຫວນນັ້ນ ມັນສິມີບ້ານ ຕົ້ນໄຫ ໝາຍເຖິງບ້ານ ຈົມຊາງນໍ້າເຢັນ, ພູຫຼວງ, ບ້ານຕອງ ສາມບ້ານ ຜົລກະທົບ ສ່ວນຫຼາຍ ທາງດ້ານດິນທຳການຜລິດ ແຕ່ວ່າ ຄວາມເປັນຈິງ ມັນຈະໄດ້ກວມຖືກເທົ່າໃດ ເສັຽຫາຍເທົ່າໃດ ຕ້ອງໄດ້ເບິ່ງ ຫັ້ນແຫລະ.”

ທ່ານກ່າວຕື່ມວ່າ ຢູ່ໃນສັນຍາ ແມ່ນເວົ້າເຖິງ ການຟື້ນຟູ ຊີວິດການເປັນຢູ່ ຂອງປະຊາຊົນ ແຕ່ຍັງບໍ່ໄດ້ຈັດຕັ້ງ ປະຕິບັດ ຮອດຂັ້ນຕອນນັ້ນເທື່ອ ເພາະຈະຕ້ອງໄດ້ເຮັດວຽກ ໄປຕາມຂັ້ນຕອນ ເຊີ່ງຂັ້ນຕອນປະຈຸບັນ ຍັງບໍ່ໄດ້ຂຸດຄົ້ນ ພຽງແຕ່ ກຳລັງກຽມກໍ່ສ້າງໂຄງຮ່າງພື້ນ​ຖານ ຂອງແຮ່ ອາຈເປັນການປັບໜ້າດິນ, ປຸກສ້າງ ທີ່ພັກອາໃສ ຂອງບໍຣິສັດ ໃຊ້ເວລາ ໃນໄລຍະ 3 ປີ ນັບຕັ້ງແຕ່ ປີ 2016 – 2018 ແລະ ໄລຍະຕໍ່ໄປ ປີ 2019 ຈະເຣີ້ມການຂຸດຄົ້ນ ໄປອີກ 6 ປີ ແລະ ຫລັງຈາກນັ້ນ ຈະຟື້ນຟູສະພາບດິນຄືນ 3 ປີ ຮວມທັງໝົດ ຕາມສັນຍາ 12 ປີ.

ສ່ວນສັນຍາ ສັມປະທານນັ້ນ, ມີມູນຄ່າເທົ່າໃດ ເປັນເຣື່ອງ ຂອງຣັຖບານ ເຈົ້າໜ້າທີ່ ບໍ່ສາມາດ ຮູ້ຣາຍລະອຽດໄດ້. ສຳລັບ ປະຊາຊົນ ຜູ້ທີ່ ບໍ່ເຂົ້າໃຈນັ້ນ, ທ່ານເຈົ້າເມືອງ ເພິ່ນກໍໄດ້ ລົງໄປແຈ້ງ ໃຫ້ກັບປະຊາຊົນ ໃນ 3 ບ້ານ ຮັບຊາບແລ້ວ. ປັດຈຸບັນ ບໍຣິສັດ ໄດ້ດໍາເນີນໜ້າວຽກ ໄປແລ້ວ ປະມານ 20 ປາຍກິໂລແມັດ ໃນເຂດບໍ່ຄຳ ນົກແຫວນ ສຳລັບເນື້ອທີ່ ທັງໝົດນັ້ນ ຍັງບໍ່ສາມາດກຳນົດ ໄດ້ວ່າ ຈັກເຮັກຕາຣ໌.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ