ກຸ່ມທຸລະກິດຈີນ ຈະພັດທະນາ ແຫຼ່ງທ່ອງທ່ຽວ ຢູ່ເຂດສະງວນຄອງນໍ້າວຽງຈັນ

ອໍານາດການປົກຄອງ ນະຄອນຫລວງວຽງຈັນ ອະນຸຍາດໃຫ້ບໍລິສັດ ອຸດສາຫະກໍາ ເຕັກໂນໂລຈີ ກະສິກັມ ຈໍາກັດ ຂອງຄົນຈີນ ສືກສາຄວາມເປັນໄປໄດ້ ໂຄງການພັດທະນາ ແຫລ່ງທ່ອງທ່ຽວ ດ້ານກະສິກໍາ ມູນຄ່າການລົງທຶນ 10 ລ້ານໂດລ້າສະຫະລັດ ຢູ່ເຂດສະງວນ ຄອງນ້ໍາວຽງຈັນ ແຕ່ສະນາມກັອບ ເລ໊ກວີວ (Lake View) ໄປຫາບ້ານນາຄວາຍ ເຊິ່ງມີຄວາມຍາວ ປະມານ 4,858 ແມັດ ໂດຍຕັດຜ່ານ ເຂດບ້ານທັງໝົດ 9 ບ້ານ ໃນເມືອງໄຊເສດຖາ ນະຄອນຫລວງວຽງຈັນ. 

ກ່ຽວກັບເລື້ອງນີ້ ຊາວບ້ານ ທ່ານໜຶ່ງ ໃນເມືອງໄຊເສດຖາ ນະຄອນຫລວງ ວຽງຈັນ ທີ່ຮູ້ຂ່າວດັ່ງກ່າວ ກ່າວວ່າ ຫາກໂຄງການດັ່ງກ່າວ ກວມເອົາດິນເປົ່າຫວ່າງ ຫລື ດິນປຸກສ້າງ ຂອງປະຊາຊົນ ຈະຕ້ອງມີການຊົດເຊີຍເງິນ ຢ່າງເໝາະສົມ ຫາກບໍ່ໄດ້ຕາມ ປະຊາຊົນຮຽກຮ້ອງ ກໍຈະຍັງບໍ່ຍອມ ມອບດິນໃຫ້ໂຄງການ ຢ່າງເດັດຂາດ. ດັ່ງ ຊາວບ້ານ ທ່ານນີ້ ກ່າວຕໍ່ ວິທຍຸ ເອເຊັຍເສຣີ ໃນມື້ວັນທີ 1 ສິງຫາ ນີ້ວ່າ:

“ຢູ່ແຖວນີ້ນີ່ ມີແຕ່ເຮືອນປະຊາຊົນຫລາຍເນາະ ຂະເຈົ້າກໍເວົ້າຢູ່ຫລາຍຄົນ ຢູ່ນາຄວາຍ ແຖວປາຍໆພຸ້ນເນາະ ກະຖືກໝົດ ແຖວນີ້ກະຖືກໝົດນ່າ ຄັນວ່າ ເພິ່ນໄດ້ລາຄາ (ຊົດເຊີຍ) ຂະເຈົ້າກະຊິຍອມ ຫັ້ນແຫລະ ຄັນບໍ່ໄດ້ລາຄາ ຂະເຈົ້າກະຊິບໍ່ຍິນຍອມ.”

ຊາວບ້ານທ່ານນີ້ ຍັງກ່າວອີກວ່າ ຫາກເປັນການຊື້-ຂາຍດິນ ແບບປົກກະຕິ ລາຄາຈະຢູ່ປະມານ 700 ລ້ານກີບ ໄປເຖິງ 1 ຕື້ກີບ ຕໍ່ທີ່ດິນ 1 ໄຮ່ ຫລື ປະມານ 1,600 ຕາຕະລາງແມັດ. ຫາກຊາວບ້ານຜູ້ທີ່ໄດ້ຮັບຜົນກະທົບ ບໍ່ໄດ້ຮັບເງິນຊົດເຊີຍ ທີ່ເໝາະສົມ ຫລື ໃຫ້ລາຄາ ຕ່ໍາກວ່າລາຄາຊື້-ຂາຍໃນຕະຫລາດ ກໍຈະບໍ່ຍອມຮັບເອົາ ເງິນຊົດເຊີຍ ຢ່າງເດັດຂາດ ເພາະ ຊາວບ້ານ ເປັນຜູ້ເສັຍປຽບ ແລະ ຈະບໍ່ໄດ້ປະໂຍດຫຍັງເລີຍ.

ຊາວບ້ານນາງໜຶ່ງ ໃນເມືອງໄຊເສດຖາ ນະຄອນຫລວງວຽງຈັນ ກ່າວວ່າ ດຽວນີ້ ດິນເປົ່າຫວ່າງ, ດິນປຸກສ້າງ ຂອງປະຊາຊົນ ໃນເຂດເມືອງໄຊເສດຖາ ຕິດກັບເສັ້ນທາງລົດໄຟລາວ-ຈີນ, ເຂດເສດຖະກິດກວມລວມ ໄຊເສດຖາ ແລະເຂດເສດຖກິດພິເສດ ບຶງທາດຫລວງ ສ່ວນຫລາຍ ແມ່ນຖືກສໍາປະທານ ໄປກັບໂຄງການຈີນ ໄປເກືອບໝົດແລ້ວ ສ່ວນທີ່ຍັງເຫລືອຢູ່ ກະຖືກນາຍທຶນຊື້ເອົາໄປ ເຮັດດິນຈັດສັນ ແລ້ວ ນໍາໄປແບ່ງຂາຍ.

ເຖິງຢ່າງໃດກໍຕາມ ຫາກມີຊາວບ້ານ ຕ້ອງສູນເສັຍດິນ ໃຫ້ກັບໂຄງການພັດທະນາ ຂອງນັກລົງທຶນຈີນ ກະຕ້ອງໄດ້ຮັບເງິນຊົດເຊີຍ ທີ່ເໝາະສົມ ບໍ່ເສັຍປຽບ ໃຫ້ກັບໂຄງການຈົນເກີນໄປ ເພາະຫລາຍໂຄງການ ທີ່ຜ່ານມາ ຊາວບ້ານຈໍານວນຫລາຍ ຈະໄດ້ຮັບເງິນຊົດເຊີຍຕ່ໍາຫລາຍ ປະມານ 1 ແສນປາຍກີບ ຕໍ່ຕາລາງແມັດ. ດັ່ງ ຊາວບ້ານ ນາງນີ້ ກ່າວຕໍ່ ວິທຍຸ ເອເຊັຍເສຣີ  ໃນມື້ດຽວກັນນີ້ວ່າ:

“ມັນມີບ່ອນຖືກແລ້ວ ກະບໍ່ຖືກເດີ້ ແຕ່ວ່າຂະເຈົ້າຊື້ ເອົາໝົດແລ້ວໄດ໋ ແຖວບ້ານນ້ອງຢູ່ນີ້ໄດ໋ ແບບວ່າແປະຄອງນ້ໍານີ້ນ່າ ຈີນຫັ້ນ ຂະເຈົ້າເອົາໝົດແລ້ວ ຄັນຖືກໂຄງການຂະເຈົ້າ ແບບວ່າ ຊົດເຊີຍຖືກໆໄດ໋ ແມັດໜຶ່ງແຕ່ ແສນປາຍກີບ ຖືກໂຄງການ.” 

ຜູ້ປະກອບການ ຮ້ານອາຫານ ແຫ່ງໜຶ່ງໃນເມືອງໄຊເສດຖາ ນະຄອນຫລວງວຽງຈັນ ກ່າວວ່າ ຍັງບໍ່ທັນຮັບຮູ້ເທື່ອວ່າ ຈະມີນັກລົງທຶນຈີນ ເຂົ້າມາພັດທະນາ ໂຄງການທ່ອງທ່ຽວ ດ້ານກະສິກໍາ ຢູ່ເຂດສະງວນ ຄອງນ້ໍາວຽງຈັນ ແຕ່ໄລຍະທີ່ຜ່ານມາ ກະເຄີຍໄດ້ຍິນຂ່າວວ່າ ດິນໃນເຂດນີ້ ຈະຖືກສໍາປະທານ ໄປພັດທະນາ ໂຄງການທັງໝົດ. ດັ່ງ ຜູ້ປະກອບການ ຮ້ານອາຫານ ນາງນີ້ ກ່າວຕໍ່ ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ບໍ່ນ່າ ເພາະວ່າຍັງບໍ່ເຫັນ ຂະເຈົ້າແຈ້ງອີ່ຫຍັງມາໄດ໋ ຕອນນັ້ນຫັ້ນກະເຄີຍໄດ້ຍິນຢູ່ ແຕ່ວ່າ ດຽວນີ້ກະຍັງບໍ່ເຫັນ ມີຫຍັງ ວ່າຈັ່ງໃດ ແລ້ວກະນາຍບ້ານ ກະບໍ່ໄດ້ເວົ້າອິຫຍັງເທື່ອນ່າ ຍັງບໍ່ທັນໄດ້ເອີ້ນລວມອິຫຍັງເທື່ອໄດ໋.” 

ທາງດ້ານເຈົ້າໝ້າທີ່ ຜູ້ທີ່ຮູ້ຈັກວຽກງານ ດັ່ງກ່າວ ກ່າວວ່າ ໂຄງການດັ່ງກ່າວນີ້ ບໍລິສັດ ຜູ້ລົງທຶນ ຈະເຂົ້າມາສໍາລວດ, ສືກສາຄວາມເປັນໄປໄດ້ ເປັນໄລຍະເວລາ 12 ເດືອນ ນັບແຕ່ມື້ລົງນາມ ສ່ວນຜົນກະທົບ ທາງດ້ານສິ່ງແວດລ້ອມ-ສັງຄົມ ທີ່ອາດຈະເກີດຂຶ້ນນັ້ນ ພາກສ່ວນທີ່ກ່ຽວຂ້ອງ ຈະປະຊຸມຕື່ມ ໂດຍສະເພາະ ກໍລະນີ ທີ່ມີຊາວບ້ານ ໃນເຂດດັ່ງກ່າວ ຕ້ອງສູນເສັຍດິນ ໃຫ້ກັບໂຄງການດັ່ງກ່າວ. ແຕ່ໃນເຂດດັ່ງກ່າວ ສ່ວນຫລາຍ ຈະເປັນດິນເປົ່າຫວ່າງ ຂອງລັດ ທີ່ສະງວນເອົາໄວ້ຢູ່ແລ້ວ. ດັ່ງ ເຈົ້າໝ້າທີ່ ທ່ານນີ້ ກ່າວຕໍ່ ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ເພາະວ່າພວກເຮົາ ກະຊິປະຊຸມກັນຕື່ມເນາະ ແລະ ເຂດນີ້ ມັນກະໃກ້ກັບ ຢູ່ສາງຂອງທາງລົດໄຟຫັ້ນ ລາວ-ຈີນ ຫັ້ນ ເພິ່ນກໍາລັງເຄັ່ຍກັນຢູ່ຫັ້ນນ່າ ບາດຍາມນີ້ເພິ່ນກະຊິ ພັດທະນາຫັ້ນແຫລະ ເພາະມັນເປັນເຂດ ເສດຖະກິດໝົດແຫລະ ດຽວນີ້ເນາະ.” 

ສໍາລັບໂຄງການພັດທະນາ ແຫລ່ງທ່ອງທ່ຽວ ດ້ານກະສິກັມ ຢູ່ເຂດສະງວນ ຄອງນ້ໍາວຽງຈັນ ແຫ່ງນີ້ ໄດ້ມີພິທີລົງນາມ ບົດບັນທຶກ ຄວາມເຂົ້າໃຈ ໃນມື້ວັນທີ 26 ກໍລະກົດ 2024 ທີ່ຜ່ານມານີ້ ຢູ່ຜະແນກແຜນການ ແລະ ການລົງທຶນ ນະຄອນຫລວງວຽງຈັນ. ແຕ່ຍັງບໍ່ມີລາຍງານວ່າ ບໍລິສັດຜູ້ລົງທຶນ ຈະພັດທະນາໄປໃນຮູບແບບໃດ ແລະ ຈະມີຜົນກະທົບ ທາງດ້ານສິ່ງແວດລ້ອມ-ສັງຄົມ ຫລາຍໜ້ອຍເທົ່າໃດ? ແຕ່ເບື້ອງຕົ້ນ ໂຄງການຈະພັດທະນາ ໃນເຂດບ້ານໂຊກນ້ອຍ, ບ້ານຊໍາເຄ້, ບ້ານໂພນທອງ, ບ້ານນາບຽນ, ບ້ານຂາມງອຍ, ບ້ານດຸງ, ບ້ານນາສ້າງໄພ, ບ້ານໄຮ່ຄໍາ ແລະ ບ້ານນາຄວາຍ ທັງໝົດ ແມ່ນຢູ່ໃນເຂດເມືອງ ໄຊເສດຖາ ນະຄອນຫລວງວຽງຈັນ.