ໂຮງງານຫຼອມເຫຼັກຂອງຈີນ ເອົາປຽບ ຄົນງານ

ໄມຊູລີ
2019-05-29
ອີແມວລ໌
ຄໍາເຫັນ
Share
ພິມ
ຄົນງານທີ່ເຮັດວຽກ ຢູ່ໂຮງງານຫຼອມເຫຼັກ ຂອງຈີນ ແຂວງ ສະຫວັນນະເຂດ
ຄົນງານທີ່ເຮັດວຽກ ຢູ່ໂຮງງານຫຼອມເຫຼັກ ຂອງຈີນ ແຂວງ ສະຫວັນນະເຂດ
ຮູບພາບຈາກ : ນັກຂ່າວພົລເມືອງ

ກັມມະກອນລາວ ທີ່ເຮັດວຽກ ໃນໂຮງງານຂຸນເພັງ ຊຶ່ງເປັນໂຮງງານຕົ້ມເຫລັກຂອງຄົນຈີນ ໃນເມືອງໄກສອນ ພົມວິຫານ ແຂວງສະຫວັນ ນະເຂດ ຖືກເອົາປຽບຫລາຍເຣື້ອງ ທັ້ງບໍ່ຈ່າຍເງິນໃຫ້ ໃນວັນພັກປີໃໝ່ລາວ, ຈ່າຍເງິນເດືອນລ່າຊ້າ ແລະ ໃນກໍຣະນີ ທີ່ຄົນງານລາວ ໄປ ຮຽກຮ້ອງ ກໍຖືກໄລ່ອອກ, ອິງຕາມຄໍາເວົ້າ ຂອງຄົນງານລາວ ໃນໂຮງງານດັ່ງກ່າວ ທ່ານນື່ງ ຕໍ່ວິທຍຸ ເອເຊັຽເສຣີ ໃນວັນທີ່ 27 ພຶສພາ ນີ້:

”ການຈ່າຍເງິນກໍຊັກຊ້າ ໜອ້ຍນື່ງເພາະວ່າ ເຂົາເຈົ້າຕັດນີ້ວັນທີ 30 ເນາະ ວັນທີ 30 ແລ້ວເຂົາເຈົ້າ ຈະຈ່າຍວັນທີ່ 15 ຂອງ ເດືອນໃໝ່ ມັນຊ້າ ພະນັກງານຢູ່ໃນໂຮງງານ ຫັ້ນກໍເວົ້າຫຍັງບໍ່ໄດ້ ເນາະ ເວົ້າຫຍັງນ້ອຍນື່ງ ເຂົາເຈົ້າກໍເອົາອອກ ໂດຍທີ່ວ່າບໍ່ມີການຕັກເຕືອນ ບໍ່ມີ ການຂຽນ ໃບສໍາຣວດ.”

ໂຮງງານຕົ້ມເຫລັກຂອງຈີນ ຕັ້ງຂຶ້ນມາ 10 ປາຍປີແລ້ວ, ມີຢູ່ນະຄອນຫລວງວຽງຈັນ ແລະຫລັກ 13 ເມືອງໄກສອນ ພົມວິຫານ, ໂຮງງານ ຢູ່ເມືອງໄກສອນ ມີຄົນງານລາວປະມານ 300 ຄົນ ຍ້ອນເປັນໂຮງງານຂນາດໃຫຍ່.

ຄົນງານລາວທ່ານນີ້ເວົ້າວ່າ, ຄົນງານລາວໃນໂຮງງານ ບໍ່ວ່າຜແນກໃດ ກໍ່ພາກັນຈົ່ມຄືກັນວ່າ ນອກຈາກບັນຫາການຈ່າຍເງິນ ໃຫ້ລ່າຊ້າແລ້ວ ໃນວັນພັກບຸນ ສໍາຄັນຕ່າງໆເປັນຕົ້ນ ວັນແມ່ຍິງສາກົນ, ວັນກັມມະກອນ ແລະ ປີໃໝ່ລາວ ທາງໂຮງງານ ກໍຈະບໍ່ຈ່າຍເງິນໃຫ້, ສ່ວນເຣື້ອງ ເງິນສວັດດິການ ກໍໄລ່ໃຫ້ວັນລະ 10 ພັນກິບ ໂດຍບໍ່ຣະບຸວ່າ ແມ່ນຄ່າສວັດດິການ ອັນໃດ ແລະ ອີກຢ່າງນື່ງ ກໍຣະນີຄົນງານເຈັບປ່ວຍ ໄປໂຮງໝໍ ກໍຕ້ອງເສັຍເງິນເອງ ແລະວ່າໃນບາງຜແນກ ເປັນຕົ້ນ ຜແນກຕົ້ມເຫລັກ ກໍຕ້ອງເຮັດວຽກ ຈົນກວ່າຈະໄດ້ຕາມ ທີ່ໂຮງງານ ຕ້ອງການ ຫາກເຮັດບໍ່ໄດ້ ກໍບໍ່ໄດ້ເມືອບ້ານ ແລະໃບບິນຮັບເງິນ ຂອງຄົນງານ ເຈົ້າຂອງໂຮງງານ ເກັບເອົາຄືນໝົດ ດັ່ງຄົນງານລາວ ຢູ່ໃນໂຮງງານແຫ່ງດຽວກັນນີ້ ອີກທ່ານນຶ່ງ ກ່າວໃນມື້ດຽວກັນນັ້ນວ່າ:

”ທິມພວກນ້ອງນີ້ ບໍ່ໄດ້ພັກເລີຍໃດ ເຣີ້ມເຮັດວຽກຕັ້ງແຕ່ 7 ໂມງເຄ່ີງເນາະ ກິນເຂົ້າທ່ຽງແລ້ວ ເຮັດຕໍ່ເລີຍຫັ້ນນະ ຈົນແລ້ວເລີຍເນາະ ອ້າຍເນາະ ຖ້າວ່າເຮົາບໍ່ແລ້ວ ວຽກກໍເຮັດໄປຮອດ 5 ໂມງປາຍ 6 ໂມງແລງ ກໍຍັງມີບາງມື້ ຄືກັນໝົດ ແລ້ວກໍບິນເງິນເນາະ ບິນຮັບເງິນ ເຂົາເຈົ້າເກັບຄືນໝົດ ເຂົາເຈົ້າຈະບໍ່ໃຫ້ພະນັກງານ ເອົາອອກໄປ.”

ກ່ຽວກັບເຣື້ອງນີ້ ເຈົ້າໜ້າທີ່ ຫ້ອງການແຮງງານ ແລະ ສວັດດິການ ສັງຄົມ ແຂວງສະຫວັນນະເຂດ ຍັງບໍ່ສາມາດ ໃຫ້ຄໍາເຫັນໄດ້ຍ້ອນ ບໍ່ທັນຮູ້ບັນຫານີ້, ແຕ່ເມື່ອເດືອນເມສາ ທີ່ຜ່ານມາ ເຈົ້າໜ້າທີ່ ຜແນກຄຸ້ມຄອງແຮງງານ ກະຊວງແຮງງານ ແລະ ສວັດດີການ ສັງຄົມ ໄດ້ເວົ້າຕໍ່ ວິທຍຸ ເອເຊັຽເສຣີວ່າ:

ຕາມກົດໝາຍວ່າດ້ວຍແຮງງານ ມາດຕຣາ 115 ນັ້ນ, ໃນວັນຢຸດ ຕາມເທສການ ເຈົ້າຂອງທຸຣະກິດ ທຸກພາກສ່ວນ ໃນທົ່ວປະເທດ ຕ້ອງໄລ່ເງິນ ໃຫ້ຄົນງານ ຕາມປົກກະຕິ ຫ້າມຫັກເງິນ ແລະ ຫາກວ່າ ຄົນງານຄົນ ນັ້ນມາເຮັດວຽກ ຕ້ອງໃຫ້ເງິນ 2 ເທົ່າ ຫາກມີ ການຫັກເງິນ ຫຼື ບັງຄັບໃຫ້ເຮັດວຽກ ໃນມື້ດັ່ງກ່າວ ແມ່ນຜິດກົດໝາຍ:

"ຄືບຸນປີໃໝ່ນີ້ມັນເປັນວັນພັກ ທາງຣັຖການແລ້ວ ແລະຜູ້ໃດເຮັດໂຕຢ່າງວ່າ ເພິ່ນເຮັດວັນພັກ ປະຈໍາອາທິດ ຈະໄດ້ເທົ່າ 250 ສ່ວນຮ້ອຍ ຂອງຄ່າແຮງງານ ປົກກະຕິ ໃນກໍຣະນີເຂົາເຈົ້າ ເຮັດຜິດໃດ ມັນຈະເວົ້າໄວ້ຢູ້ຫັ້ນວ່າ ມື້ບຸນປິໃໝ່ ປີໃໝ່ນີ້ມັນເປັນວັນພັກ ທາງຣັຖການແລ້ວ".

ກັມມະກອນໃນໂຮງງານແຫ່ງນີ້ ກ່າວວ່າ ຫາກພາກສ່ວນກ່ຽວຂ້ອງ ລົງມາກວດກາ ສະພາບການເຮັດວຽກຂອງຄົນງານ ທີ່ ໂຮງງານຂຸນເພີງ ແຫ່ງນີ້ ພວກເຂົາເຈົ້າຢາກໃຫ້ ເຈົ້າໜ້າທີ່ ກວດສອບ ແລະ ສອບຖາມ ກັມມະກອນໂດຍກົງກ່ຽວກັບ ສະພາບການເຮັດວຽກ ຂອງພວກ ເຂົາເຈົ້າ ເພື່ອຈະໄດ້ຮູ້ຄວາມຈິງ ບໍ່ຢາກໃຫ້ໄປສອບຖາມ ນໍາເຈົ້າຂອງໂຮງງານ ຫຼື ພາກສ່ວນບໍຣິຫານ ຝ່າຍດຽວ.

ເຕັມຫນ້າ