ບໍລິສັດ-ອົງການຈັດຕັ້ງ ໃນລາວ ຈະຕ້ອງຈ່າຍເງິນໃຫ້ຄົນງານ ເປັນເງິນກີບ

ທາງການລາວ ແລະພາກສ່ວນທີ່ກ່ຽວຂ້ອງ ໄດ້ກໍານົດໃຫ້ບໍລິສັດ ແລະອົງການ ຈັດຕັ້ງຕ່າງໆ ຢູ່ປະເທດລາວ ທີ່ປົກກະຕິຈ່າຍເງິນເດືອນ ແລະຄ່າແຮງງານ ໃຫ້ພະນັກງານ ເປັນເງິນຕາຕ່າງປະເທດນັ້ນ ຕ້ອງໄດ້ຄິດໄລ່ຈ່າຍເປັນເງິນກີບ ຕາມອັດຕາແລກປ່ຽນຂອງທາງການ ໃນແຕ່ລະໄລຍະ ແຕ່ຄົນງານລາວຈໍານວນນຶ່ງ ກໍຍັງຢາກໄດ້ຄ່າແຮງງານຂອງພວກຕົນ ເປັນເງິນຕາຕ່າງປະເທດຢູ່ ຍ້ອນເງິນກີບ ນັບມື້ຫລຸດຄ່າລົງ, ອີງຕາມຄໍາເວົ້າ ຂອງພະນັກງານໂຮງ ແຮມຈີນ ຢູ່ນະຄອນຫລວງວຽງຈັນ ນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 4 ກັນຍາ 2024 ນີ້.

“ຄັນເງິນກີບເຮົານີ້ ກໍເງິນຄ່າ ແຕ່ວ່າຄ່າຄອງຊີບສູງ ແຕ່ວ່າທາງບໍລິສັດບໍ່ ຫລືວ່າທາງອັນນັ້ນ ຄື ໂຮງແຮມນ້ອງເຮັດນີ້ຫັ້ນນ່າ ຂະເຈົ້າສິປັບເງິນເດືອນໃຫ້ພະນັກ ງານເລີຍ ຄັນເຮົາເອົາເງິນຕ່າງປະເທດໄປ ແລກມັນກໍສິໄດ້ຫລາຍກວ່າຊີ້ນ່າ ແຕ່ວ່າເພິ່ນກໍປັບຂຶ້ນໃຫ້ ແຕ່ວ່າກໍຫລຸດເງິນຕາຕ່າງ ປະເທດຈັກ ແສນນຶ່ງບໍ່ ຈາກເງິນເດືອນ 6.5 ລ້ານກີບ ຈັ່ງຊີ້ ແມ່ນເພາະວ່າມັນ ເພາະວ່າຄ່າຄອງຊີບເຮົາມັນສູງເດ້.”

ນາງເວົ້າຕື່ມວ່າ ໃນຮອບຫລາຍປີມານີ້ ເງິນກີບອ່ອນຄ່າລົງເລື້ອຍໆ ເຮັດໃຫ້ຄົນງານລາວ ຢູ່ຫຼາຍເມືອງ ຫຼາຍແຂວງທົ່ວປະເທດ ສົນໃຈໄປເຮັດວຽກຢູ່ປະເທດໄທ ແລະເກົາຫລີໃຕ້ ເພີ້ມຫຼາຍຂຶ້ນ ຍ້ອນໄດ້ຮັບຄ່າແຮງງານ ເປັນເງິນບາດ ແລະເງິນວອນ ທີ່ມີຄ່າສູງ ເມື່ອນໍາມາແລກປ່ຽນເປັນເງິນກີບ.

ທີ່ຜ່ານມາ ຫົວໜ່ວຍທຸລະກິດ ຂອງນັກລົງທຶນຈີນ ແລະຊາວຕ່າງປະເທດອື່ນໆ ຈໍານວນນຶ່ງ ໄດ້ເຮັດສັນຍາ ກັບລູກຈ້າງ ທີ່ເປັນຄົນງານລາວ ແລະຈ່າຍເງິນຄ່າຈ້າງ ໃຫ້ພວກເຂົາເຈົ້າ ເປັນເງິນຕາຕ່າງປະເທດ ເປັນຕົ້ນ ເງິນຢັວນ ແລະເງິນໂດລາສະຫະຣັດ ຍ້ອນວ່າມັນສະດວກກວ່າ ເນື່ອງຈາກພວກເຂົາເຈົ້າ ບໍ່ຈໍາເປັນທີ່ຈະຕ້ອງໄດ້ໄປແລກປ່ຽນເປັນເງິນກີບ ດັ່ງພະນັກງານ ຝ່າຍບຸກຄະລາກອນ ຢູ່ບໍລິສັດ ຂອງນັກລົງທຶນຈີນຜູ້ນຶ່ງ ເວົ້າໃນມື້ດຽວກັນນີ້ວ່າ:

“ອໍ ໂຕນີ້ກໍເປັນເງິນກີບຫັ້ນແຫລະເນາະ ອໍ ແຕ່ຕາມທີ່ເຫັນນ່າ ຈະຈ່າຍເປັນເງິນກີບຫັ້ນແຫລະ ມີບາງບໍລິສັດ ແມ່ນ ບາງບໍລິສັດກໍໄດ້ຈ່າຍເປັນເງິນຢັວນ ບາງບໍລິສັດກໍໄດ້ຈ່າຍເປັນເງິນໂດລ້າ ແມ່ນໆ ມັນຂຶ້ນກັບຂັ້ນຕອນອີ່ສັງ ກໍມີແຕ່ຈ່າຍເປັນເງິນຢັວນ ກັບເງິນໂດລາ ບໍລິສັດອັນແຕ່ລະບໍລິສັດຂະເຈົ້າໃຫ້ ມັນຂຶ້ນກັບບໍລິສັດທີ່ວ່າ ຂະເຈົ້າອອກມາລົມກັນ...ສໍ່າໃດ.”

ພ້ອມດຽວກັນນັ້ນ ພະນັກງານ ຝ່າຍພັດທະນາຊັບພະຍາກອນມະນຸດ ຢູ່ບໍລິສັດຂອງນັກລົງທຶນຈີນ ນາງນຶ່ງ ກໍເວົ້າຕໍ່ວິທຍຸເອເຊັຽເສຣີວ່າ ເຖິງແມ່ນວ່າ ທາງການລາວ ແລະພາກສ່ວນທີ່ກ່ຽວຂ້ອງ ຈະກໍານົດ ໃຫ້ຄ່າຈ້າງ ແລະເງິນເດືອນ ໃຫ້ຄົນງານ ແລະພະນັກງານ ທີ່ເຮັດວຽກນໍາຕ່າງປະເທດນັ້ນ ເປັນເງິນກີບ, ແຕ່ຢູ່ແຕ່ລະຫົວໜ່ວທຸລະກິດນັ້ນ ພັດມີຄົນງານ ແລະພະນັກງານ ທັງເປັນຄົນງານລາວ ແລະຄົນງານຕ່າງປະເທດ ຫຼາຍປະເທດ ເປັນຕົ້ນ ຄົນງານຈີນ ກໍໄດ້ເຮັດສັນຍາ ແລະມີຄວາມຕ້ອງການເງິນເດືອນ ເປັນເງິນຕາສະກຸນຕ່າງໆ ທີ່ແຕກຕ່າງກັນ, ມັນກໍຂື້ນກັບແຕ່ລະບໍລິສັດ ດັ່ງທີ່ນາງເວົ້າວ່າ:

“ມັນແລ້ວແຕ່ເງື່ອນໄຂຂອງແຕ່ລະບຸກຄົນ ໄປ ມັນຂຶ້ນກັບແຕ່ລະບໍລິສັດ ມັນບໍ່ຕາຍໂຕນ່າໂຕນີ້ນ່າ ມັນຂຶ້ນກັບເຮົາລົມກັບເຂົາ ລົມກັບຜູ້ມາສະໝັກ ຄັນເປັນຄົນລາວເນາະ ຂະເຈົ້າສິຈ່າຍເປັນເງິນລາວ ແຕ່ວ່າຄັນຈ່າຍເປັນເງິນຢັວນເງິນໂດລາກໍມີຄືກັນ ຄັນວ່າບໍລິສັດສະດວກໃຫ້ເປັນເງິນກີບ ກໍໃຫ້ເປັນເງິນກີບກໍໄດ້ ຄັນວ່າເປັນບໍລິສັດຈີນ ແລ້ວພະນັກງານທີ່ເຮັດວຽກຢູ່ຫັ້ນເປັນຄົນຈີນ ຫລືຄົນລາວ ເພິ່ນກໍຍັງຈ່າຍປົກກະຕິ ແຕ່ວ່າຄັນຖືກລະບຽບແທ້ກໍ ເພິ່ນກໍບໍ່ຢາກໃຫ້ຈ່າຍຫັ້ນແຫລະ ຄັນວ່າເຮັດວຽກຢູ່ລາວຫັ້ນນ່າ.”

ອີງຕາມແຈ້ງການ ຂອງຄະນະກໍາມະການ ແຮງງານແຫ່ງຊາດ ກະຊວງແຮງງານແລະສະວັດດິການສັງຄົມ, ຫົວໜ່ວຍທຸລະກິດ ທີ່ກໍານົດການເບີກຈ່າຍເງິນເດືອນ ຫລືຄ່າແຮງງານ ໃຫ້ຄົນງານຂອງຕົນ ເປັນເງິນຕາຕ່າງປະເທດ ແລ້ວຈ່າຍເປັນເງິນກີບນັ້ນ ຈະຕ້ອງຄິດໄລ່ເງິນ ບໍ່ໃຫ້ຫລຸດ ຕາມອັດຕາແລກ ປ່ຽນຂອງທະນາຄານ ທີ່ກໍານົດອອກຫລ້າສຸດ ພາຍໃນ 3 ວັນລັດຖະການ ກ່ອນວັນຄິດໄລ່ເງິນເດືອນພື້ນຖານໃຫ້.

ໃນຂະນະດຽວກັນ ຜູ້ປະກອບການ ກໍຈໍາເປັນຕ້ອງຈ່າຍເງິນຄ່າຈ້າງ ຫລືເງິນ ເດືອນ ໃຫ້ຄົນງານ ແລະພະນັກງານ ໃນອັດຕາຄ່າແຮງງານຂັ້ນຕໍ່າ ຕາມທີ່ທາງການລາວ ກໍານົດໄວ້. ແລະຖ້າຫາກຄ່າແຮງງານ ທີ່ຕັ້ງໄວ້ເປັນເງິນຕາຕ່າງປະເທດ ກໍຕ້ອງຄິດໄລ່ເປັນເງິນກີບ ໂດຍອີງໃສ່ອັດຕາແລກປ່ຽນ ທີ່ທາງການກໍານົດ ດັ່ງເຈົ້າໜ້າທີ່ ຜະແນກແຮງງານ ແລະສະວັດດິການສັງຄົມ ຢູ່ແຂວງທາງພາກເໜືອຂອງລາວ ທ່ານນຶ່ງເວົ້າວ່າ:

“ອໍ ເພິ່ນກໍຕ້ອງຈ່າຍເປັນເງິນລາວຫັ້ນແຫລະ ເຈົ້າ ກໍຂຶ້ນກັບນາຍຈ້າງເພິ່ນເລີຍຫັ້ນນ່າ ວ່າເພິ່ນກໍານົດມາແບບໃດຫັ້ນນ່າ ສ່ວນຫລາຍກໍເປັນເງິນກີບ ຖ້າເຮົາມາເຮັດທຸລະກິດຢູ່ລາວຫັ້ນນ່າ ເຈົ້າ ໂຕນີ້ມັນອັນມັນຕ້ອງການເງິນ ເດືອນພື້ນຖານຂັ້ນຕໍ່າຢູ່ແລ້ວ ເຈົ້າ ແລ້ວກໍຂຶ້ນກັບບໍລິສັດເພິ່ນກໍານົດມາເອງວ່າ ເພິ່ນຢາກໃຫ້ເງິນ ເດືອນພະນັກງານເທົ່າ ໃດຫັ້ນນ່າ ເລດເງິນນີ້ແຫລະ ເຈົ້າ ຄັນອີງຕາມເລດເງິນ ວ່າ ນອກເລີຍກໍໄດ້ ເພາະວ່າເປັນທຸລະກິດເພິ່ນເອງເດ້ ບໍ່ຕ້ອງຕາມອັນນັ້ນ ເພິ່ນຈັດການເອງເລີຍ ໂຕນີ້ນ່າ.”

ກະຊວງແຮງງານ ແລະສະວັດດິການສັງຄົມ ໄດ້ກໍານົດໃຫ້ອົງການຈັດຕັ້ງ ແລະບໍລິສັດຕ່າງປະເທດ ຢູ່ປະເທດລາວ ຈ່າຍເງິນເດືອນ ແລະຄ່າແຮງງານ ໃຫ້ຄົນງານ ແລະພະນັກງານຂອງພວກຕົນ ເປັນເງິນກີບ ແທນການຈ່າຍ ເປັນເງິນຕາຕ່າງປະເທດ ນັບຕັ້ງແຕ່ມື້ວັນທີ 1 ຕຸລາ 2024 ເປັນຕົ້ນໄປ.

ຂໍ້ກໍານົດດັ່ງກ່າວນີ້ ແມ່ນປະຕິບັດຕາມຄໍາສັ່ງ ຂອງນາຍົກລັດຖະມົນຕີ ວ່າດ້ວຍການຄຸ້ມຄອງເງິນຕາຕ່າງປະເທດ ທີ່ໄດ້ປະກາດໃຊ້ ໃນມື້ວັນທີ  24 ມັງກອນ2024 ພາຍຫລັງກອງປະຊຸມ ຂອງຄະນະກໍາມາທິການ ແຮງງານແຫ່ງຊາດ ແລະເພື່ອໃຫ້ສອດຄ່ອງ ກັບກົດໝາຍວ່າດ້ວຍແຮງງານ ທີ່ກ່ຽວຂ້ອງກັບການເບີກຈ່າຍເງິນເດືອນໃຫ້ຄົນງານ.