ໂຄງການສີທັນດອນ ຢຸດກໍ່ສ້າງ ປະກາດຂາຍລົດ ເອົາເງິນໃຊ້ຄ່າກໍາມະກອນ

ເຈົ້າຂອງໂຄງການພັດທະນາເຂດເສດຖະກິດໃໝ່ ສີທັນດອນ ຢູ່ເມືອງໂຂງ ແຂວງຈໍາປາສັກ ໄດ້ຢຸດກິດວຽກງານການກໍ່ສ້າງທຸກຈຸດ ຍ້ອນວ່າ ບໍ່ມີເງິນມາສືບຕໍ່ໂຄງການ. ວຽກງານກໍ່ສ້າງຢູ່ເຂດດັ່ງກ່າວ ທີ່ຢຸດໄປ ລວມມື ການກໍ່ສ້າງຕຶກກະຕິບເຂົ້າ, ຣີສອດ ແລະ ໜອງປາ ຊຶ່ງບໍ່ມີກໍາມະກອນຈັກຄົນທີ່ຍັງຄົງເຮັດວຽກຢູ່ທີ່ນັ້ນ. ເຈົ້າຂອງໂຄງການໄດ້ປະກາດຂາຍລົດຈົກ ເພື່ອຈະເອົາເງິນມາໃຫ້ຄ່າແຮງງານກໍາມະກອນ.

ຊາວບ້ານຜູ້ທີ່ໄປເຮັດວຽກຢູ່ໃນເຂດດັ່ງກ່າວ ໄດ້ໃຫ້ສໍພາດຕໍ່ເອເຊັຽເສຣີວ່າ:

“ໂຄງການຫັ້ນດຽວນີ້ນິ ມັນຊິຂາຍລົດແມັກໂຄຼ ມາໃຊ້ໜີ້ ບາດນີ້ ນ້ອງຊິໄປເອົາລົດມາ ເຂົາຊິຂາຍລະ ເຂົາຊິເອົາມາໃຊ້ໜີ້ ເງິນມັນບໍ່ມີ ມັນຍັງຊິຂາຍລົດແມັກ ໂຄຼ ຢູ່ດຽວນີ້ ລົດມັນ 2 ຄັນ ມັນບໍ່ພໍດອກ.”

ຊາວບ້ານ ທ່ານນີ້ ກ່າວຕື່ມວ່າ:

“ດຽວນີ້ ຍັງ 0 ຄົນ ບໍ່ມີຄົນໄປເຮັດລະຕອນນີ້ ງຽບຢູ່ແຕ່ມັນຊິຟ້ອງກັນໄດ໋ ບາດນີ້.”

ອີງຕາມຂໍ້ມູນຈາກຊາວບ້ານ ທີ່ເຄີຍເຮັດວຽກຢູ່ເຂດດັ່ງກ່າວ, ໃນເບື້ອງຕົ້ນ ມີກໍາມະກອນ ປະມານ 300-400 ຄົນ ແລະ ປະມານ 2 ເດືອນຜ່ານມາ ເຫຼືອກໍາມະກອນປະມານ 40 ຄົນ, ແລະ ປັດຈຸບັນ ບໍ່ມີກໍາກະກອນຈັກຄົນທີ່ເຮັດວຽກຢູ່ເຂດດັ່ງກ່າວ. 

ນັກທຸລະກິດ ທີ່ຕິດຕາມເລື່ອງນີ້ ຕີລາຄາວ່າ ໂຄງການດັ່ງກ່າວ ຂາດເງິນທຶນໝູນວຽກທີ່ຈະມາດໍາເນີນກໍ່ສ້າງ:

“ເຂົາຢຸດໝົດລະນ່າ ໂຄງການກໍ່ສ້າງ ເຂົາຢຸດໝົດແລ້ວ ແນວຈີນມັນບໍ່ມີເງິນ ທາດຫລວງ ທາດຫລຽງ ມັນກະຢຸດມົດ ທາງຫຍັງເພ ມັນຍັງບໍ່ແປງຊໍ້າຢູ່ບຶງທາດຫລວງຫັ້ນ ຢຸດສະງັກ ອ້າວ ອະສັງຫາລິມະຊັບມັນຫຼົ້ມ.”

ນັກທຸລະກິດ ອີກທ່ານນຶ່ງ ໄດ້ກ່າວວ່າ:

“ມັນບໍ່ມີລາຍຮັບ ມັນບໍ່ມີລາຍຮັບ ບັນຫາສອງບໍລິສັດ ມັນກະບໍ່ມີເງິນ ບໍ່ເຫັນມັນເຮັດຫຍັງ ມະຫານະທີສີທັນດອນ.”

ເອເຊັຽເສຣີ ພະຍາຍາມ ຕິດຕໍ່ຫາ ທ່ານ ບຸນຍົງ ຫົວໜ້າ ໂຄງການພັດທະນາເຂດເສດຖະກິດໃໝ່ ສີທັນດອນ​, ແຕ່ ທ່ານ ປິດສາຍໂທລະສັບ ຫຼັງຈາກທີ່ຮູ້ວ່າ ນັກຂ່າວໂທໄປຫາທ່ານ.

ເຖິງຢ່າງໃດກໍຕາມ, ທີ່ຜ່ານມາ ເຈົ້າໜ້າທີ່ພະແນກແຮງງານ ແລະ ສະຫວັດດີການສັງຄົມ ແຂວງຈໍາປາສັກ ເຄີຍແນະນໍາວ່າ ກໍາມະກອນທີ່ບໍ່ໄດ້ເງິນ ກໍສາມາດ ຂຽນຄໍາຮ້ອງໄປເຖິງພະແນກແຮງງານ ແລະ ສະຫວັດດີການສັງຄົມແຂວງ.

ອີງຕາມຂໍ້ມູນຈາກຜູ້ທີ່ເຮັດວຽກຢູ່ເຂດດັ່ງກ່າວ, ໂຄງການຍັງຄ້າງຈ່າຍເງິນກໍາມະກອນ ບາງຄົນ 3 ລ້ານ ກີບ, 4 ລ້ານ ກີບ, 5 ລ້ານ ກີບ, 6 ລ້ານ ກີບ, 7 ລ້ານ ກີບ ສ່ວນວ່າ ບໍລິສັດຮັບເໝົາບາງບໍລິສັດ ກໍຍັງບໍ່ໄດ້ເງິນເຈົ້າຂອງໂຄງການ ເປັນຈໍານວນເງິນຫຼາຍຕື້ກິີບ.

ໂຄງການພັດທະນາ ເຂດເສດຖະກິດໃໝ່ ສີທັນດອນ ແມ່ນຢູ່ລະຫວ່າງໄລຍະ ທີ່ 1 ຈາກທັງໝົດ 6 ໄລຍະ. ໃນໄລຍະທໍາອິດນີ້ ໄດ້ເລີ່ມຕັ້ງແຕ່ເດືອນ ພະຈິກ ປີ 2019 ເປັນຕົ້ນມາ ໂດຍມີການກໍ່ສ້າງເສັ້ນທາງ, ນ້ໍາປະປາ, ສາຍໄຟຟ້າ ແລະ ສ້າງໂຮງຮຽນປະຖົມສົມບູນ ບ້ານຂີ້ນາກ ສໍາເຣັດໄປແລ້ວ. ໂຄງການພັດທະນາເຂດເສດຖະກິດໃໝ່ ສີທັນດອນ ປະກອບດ້ວຍ ສະໜາມ ກັອຟ, ຕຶກແຄນຄູ່ ທີ່ລວມເອົາ ແຫລ່ງທ່ອງທ່ຽງ ແລະ ແຫລ່ງບັນເທີງ, ກາສິໂນ, ທະນາຄານ, ສະຖາບັນການເງິນ, ໂຄງສ້າງພື້ນຖານດ້ານການສຶກສາ, ໂຄງການກະສິກໍາ ແລະ ສາທາລະນະສຸກ.

ໂຄງການດັ່ງກ່າວ ມີເນື້ອທີ່ດິນເກືອບ 10,000 ເຮັກຕ້າຣ໌ ທີ່ຄອບຄຸມ ທັງດິນ, ດອນ ແລະ ແມ່ນ້ໍາຂອງ ມູນຄ່າການລົງທຶນປະມານ 9 ຕື້ໂດລ້າຣ໌, ມີອາຍຸສຳປະທານ 50 ປີ ແລະ ສາມາດຕໍ່ສັນຍາ ສຳປະທານໄດ້, ຊຶ່ງກວມເອົາປະມານ 30 ປາຍບ້ານ ໃນເມືອງໂຂງ ແຂວງຈໍາປາສັກ ອີງຕາມຂໍ້ມູນຈາກທາງການລາວ.

ບໍລິສັດ Laos Maha Nathi Sithandone (Hong Kong) Investment ຊຶ່ງເປັນຂອງນັກລົງທຶນຈີນ ແລະ ບໍຣິສັດ LTV Road and Bridge Construction Sole ເປັນເຈົ້າຂອງໂຄງການ.