ການກໍ່ສ້າງເຂື່ອນນໍ້າງື່ມ 4 ເລີ້ມແລ້ວ

ໄມຊູລີ
2018.01.30
f-Nam-Gnum4 ເມື່ອວັນທີ 25 ມົກຣາ 2018 ສປປລາວ ຈັດພິທີເປິດການກໍ່ສ້າງ ໂຄງການເຂື່ອນໄຟຟ້ານໍ້າງຶ່ມ 4 ຢູ່ເມືອງພູກູດ ແຂວງຊຽງຂວາງ
Screen captured from FB friend page

ເມື່ອວັນທີ 25 ມົກຣາ ຜ່ານມາ ສປປລາວ ຈັດພິທີເປິດການກໍ່ສ້າງໂຄງການເຂື່ອນໄຟຟ້ານໍ້າງຶ່ມ 4 ຢູ່ເມືອງພູກູດ ແຂວງຊຽງຂວາງ ທີ່ມີ ກໍາລັງການຜລິດ 240 ເມກາວັດ ໃຊ້ງົບປະມານ ການລົງທຶນ 700 ກວ່າລ້ານດອນລາ ສະຫະຣັຖ ໂດຍບໍຣິສັດ CHMC ຂອງຈີນເປັນ ຜູ້ຮັບເຫມົາ ໃນການກໍ່ສ້າງ. ດັ່ງເຈົ້າໜ້າທີ່ ພລັງງານແລະບໍ່ແຮ່ ແຂວງຊຽງຂວາງ ກ່າວຕໍ່ວິທຍຸເອເຊັຍເສຣີ ໃນວັນທີ 29 ມົກຣາ ນີ້ວ່າ:

“ໂອ! ນໍ້າງຶ່ມ 4 ແມ່ນເຂົາເຈົ້າວາງສີລາເລີກ ແລ້ວເຈົ້າ ເບິ່ງນະມັນຄືວ່າ ກໍຍັງກໍາບໍ່ໄດ້ ຣະອຽດປານໃດ ຫາສິເປິດ ມື້ວານມື້ຊືນນີ້ ເປັນ ໂຄງການເນາະ ເຈົ້າ ບ້ານນີ້ເບີ່ງເດີ ມັນກໍບໍ່ຣະອຽດ ມີຈັກຄອບຄົວ ຈັກເຮືອນ ຈັກຫັລງແທ້ໆ.”

ທ່ານວ່າ ໂຄງການເຂື່ອນໄຟຟ້ານໍ້າງຶ່ມ 4 ແມ່ນເປັນເຂື່ອນປະເພດ ຄອນກຣິດອັດແໜ້ນ ໃຊ້ປູນຊິເມນນ້ອຍ ລວງສູງ 74 ແມັດ ລວງຍາວ 252 ແມັດ ທີ່ສໍາຄັນເປັນ 1 ໃນ 5 ໂຄງການ ພັທນາເຂື່ອນໄຟຟ້າ ຕາມສາຍນໍ້າງຶ່ມ ຊຶ່ງຣັຖບານ ໃຫ້ຣັຖວິສະຫະກິດ ໄຟຟ້າລາວ ເປັນຜູ້ ພັທນາ ໂດຍຄາດວ່າ ໂຄງການເຂື່ອນໄຟຟ້ານໍ້າງຶ່ມ 4 ນີ້ເປັນໂຄງການ ຈະຊ່ວຍ ຍົກຣະດັບ ໃນດ້ານໂຄງລ່າງພື້ນຖານແລະແກ້ໄຂຄວາມ ທຸກຍາກຂອງປະຊາຊົນລາວ ແລະບັນດາຊົນເຜົ່າ.

ເຈົ້າໜ້າທີ່ ຣັຖວິສາຫະກິດໄຟຟ້າລາວ ແຂວງຊຽງຂວາງ ກ່າວວ່າ ສໍາລັບການສໍາຣວດບ້ານ ທີ່ຈະໄດ້ຮັບຜົນກະທົບ ຈາກການສ້າງເຂື່ອນ ໄຟຟ້ານໍ້າງຶ່ມ 4 ນີ້ເຈົ້າໜ້າທີ່ ກໍາລັງເກັບກໍາ ຂໍ້ມູນຢູ່ ໂດຍບໍ່ທັນຮູ້ວ່າ ມີຈັກບ້ານຈັກຄອບຄົວ ໂດຍອາດຈະມີ ປະຊາຊົນ ໃນບາງບ້ານ ທີ່ ຈະຕ້ອງໂຍກຍ້າຍ ອອກຈາກບ້ານເກົ່າ ຊຶ່ງພາກສ່ວນກ່ຽວຂ້ອງພວມດໍາເນີນການ ແລະສເນີແນວທາງໃນການຊົດເຊີຍ ຮວມທັງເຣື້ອງເງິນ ຊົດເຊີຍ ແລະທີ່ຢູອາສັຍບ່ອນໃໝ່.

ທ່ານກ່າວເນັ້ນວ່າ ໂຄງການ ເຂື່ອນໄຟຟ້ານໍ້າງຶ່ມ 4 ນີ້ຈະໃຊ້ເວລາ ໃນການກໍ່ສ້າງ 5 ປີ ນັບແຕ່ປີ 2018 ນີ້ໄປຫາ ປີ 2022 ຈຶ່ງຈະ ສໍາເຣັດ ແລະເປິດໃຊ້ ຢ່າງເປັນທາງການ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.