ເຂື່ອນປາກແບງຄວນສຶກສາ ຕື່ມອີກ

ອົງການແມ່ນໍ້າສາກົລ ທີ່ມີສໍານັກງານໃຫຍ່ ຢູ່ ສະຫະຣັຖ ອະເມຣິກາ ແນະນໍາໃຫ້ ຣັຖບານລາວ ແລະ ຄນະກັມມາທິການ ແມ່ນໍ້າຂອງ ສາກົລ ແກ້ໄຂບັນຫາ ແລະ ສຶກສາ ຜົລກະທົບ ຂອງ ໂຄງການ ເຂື່ອນປາກແບງ ເພີ້ມຕື່ມ, ຫລັງຈາກທີ່ ທາງຄນະ ກັມມາທິການຮ່ວມ ຂອງຄນະ ກັມມາທິການ ແມ່ນໍ້າຂອງ ສາກົລ MRC ໄດ້ອອກ ຖແລງການ ຮຽກຮ້ອງໃຫ້ ຣັຖບານລາວ ແກ້ໄຂບັນຫາ ຜົລກະທົບ ຂ້າມ ຊາດ ທີ່ຈະເກີດຂຶ້ນ ຫລັງຈາກ ການກໍ່ສ້າງ ເຂື່ອນ ປາກແບງ. ຕາມຄໍາເວົ້າ ຂອງຍານາງ Maureen Harris ຜູ້ ອໍານວຍການ ອົງການ ແມ່ນໍ້າສາກົລ ປະຈໍາເຂດ ເອເຊັຽ ຕາເວັນອອກ ສ່ຽງໃຕ້ ໃນວັນທີ 21 ມິຖຸນາ ນີ້:

"ຍານາງເວົ້າວ່າ ພວກເຮົາ ຄິດວ່າຣັຖບານລາວ ແລະ MRC ຄວນຈະເກັບຂໍ້ມູນ ເພີ່ມຕື່ມ ກ່ຽວກັບ ການປະມົງ, ດິນຝຸ່ນ ແລະກະແສນໍ້າ ເພາະໃນບາງ ກໍຣະນີ ຕ້ອງໃຊ້ເວລາ ສຶກສາ ຜົລກະທົບ ນານເຖິງ 10 ປີປາຍ. ຣັຖບານລາວ ຄວນແກ້ໄຂບັນຫາ ຜົລກະທົບ ທີ່ຈະເກີດ ແກ່ ປະເທດ ເພື່ອນບ້ານ. ຣັຖບານລາວ ແລະ MRC ຄວນຈະຮຽກຮ້ອງ ໃຫ້ ຜູ້ພັທນາ ໂຄງການ ມີສ່ວນຮ່ວມ ຮັບຜິດຊອບ ຕໍ່ສິ່ງທີ່ຈະ ເກີດຂຶ້ນ ແລະແກ້ໄຂ ບັນຫາ ເຫລົ່ານີ້ ກ່ອນທີ່ຈະມີ ການເຊັນສັນຍາ ກໍ່ສ້າງ ໂຄງການ ດັ່ງກ່າວ"

ຕໍ່ຄໍາຮຽກຮ້ອງເຫລົ່ານີ້ ຈົນເຖິງປັດຈຸບັນ ທາງການລາວ ຍັງບໍ່ຕອບວ່າ ຈະຮັບ ພິຈາຣະນາ ຫລືບໍ່, ນັກຂ່າວ RFA ໄດ້ໂທຣະສັບຫາ ທ່ານ ດາວວົງ ພອນແກ້ວ ຫົວໜ້າ ຫ້ອງການ ກະຊວງ ພລັງງານ ແລະບໍ່ແຮ່ ແຕ່ທ່ານ ບໍ່ສະດວກ ທີ່ຈະໃຫ້ ຂໍ້ມູນ ໃນຕອນນີ້. ແຕ່ເມື່ອຕົ້ນປີນີ້ ທ່ານ ໄດ້ກ່າວກ່ຽວກັບ ການຂຍາຍເວລາ ເພື່ອຫາຣື ເຣື່ອງ ຜົລກະທົບ ຈາກ ເຂື່ອນປາກແບງ ວ່າ:

"ຕາມທັສນະຂອງພວກເຮົາແລ້ວ ກໍຄິດວ່າ ຄືສິບໍ່ຍືດເຍື້ອ ເພາະວ່າ ຫລັງຈາກ ການປຶກສາຫາຣື ໄດ້ຄວາມເຫັນ ແຕ່ລະຝ່າຍແລ້ວ ພວກເຮົາ ກໍເອົາຄວາມເຫັນ ມາເບິ່ງວ່າ ຍັງມີ ຈຸດໃດແດ່ ທີ່ພວກເຮົາຄວນ ປັບປຸງ ແລ້ວກໍມີການສຶກສາ ຂ້ອນຂ້າງ ລະອຽດແລ້ວ ແຕ່ວ່າຕົວໃດທີ່ຍັງ ບໍ່ທັນ ຄົບຖ້ວນນັ້ນ ພວກເຮົາ ກໍຈະໃຊ້ເວລາ ຕື່ີມອີກ ແຕ່ວ່າຈະຢູ່ນອກ ຂະບວນການ ປຶກສາຫາຣື ນີ້".

ຣັຖບານລາວ ຖືວ່າການສ້າງ ເຂື່ອນປາກແບງ ເປັນການຜລິດ ພລັງງານ ຢ່າງຍືນຍົງ -ທ່ານກ່າວຕໍ່ໄປວ່າ:

"ເຖິງວ່າການຜລິດໄຟຟ້າ ຈາກເຂື່ອນໄຟຟ້າ ນໍ້າຕົກນີ້ ກໍເປັນການສ້າງ ພລັງງານ ສະອາດ ສະນັ້ນແລ້ວ ຈະເປັນການ ຊ່ວຍຫລຸດຜ່ອນ ພາວະໂລກຮ້ອນ ອັນນີ້ ກໍເປັນດ້ານດີ ທີ່ເຮົາຈຶ່ງສ້າງ ເຂື່ອນໄຟຟ້າ ນໍ້າຕົກ ຢູ່ລາວນັ້ນ".

ນອກນັ້ນ ທ່ານ ດາວວົງ ຍັງໄດ້ຕອບຄໍາຖາມ ໜັງສືພິມ PhnomPenh Post ກ່ຽວກັບ ເຂື່ອນປາກແບງ ວ່າການກໍ່ສ້າງ ເຂື່ອນນັ້ນ ເປັນນຶ່ງ ໃນແຜນການ ພັທນາ ປະເທດລາວ ຊຶ່ງລາວ ຕ້ອງການໃຫ້ ປະຊາຊົນ ມີໄຟຟ້າໃຊ້ ເຖິງ 95 ສ່ວນຮ້ອຍ ໃນປີ 2020 ແລະ ເຂື່ອນປາກແບງ ກໍເປັນນຶ່ງ ໃນໂຄງການ ພັທນາ ຂອງ ຣັຖບານລາວ.

ໂຄງການ ກໍ່ສ້າງເຂື່ອນ ປາກແບງ ໄດ້ສໍາເຣັດ ຂັ້ນຕອນ ຂະບວນການ ປຶກສາ ຫາຣືແລ້ວ ແຕ່ທາງຄນະ ກັມມາທິການຮ່ວມ ຍັງບໍ່ມີ ຖແລງການ ລາຍລະອຽດ ກ່ຽວກັບຜົລ ການສຶກສາ ໂຄງການ ດັ່ງກ່າວ ແລະຍັງບໍ່ມີ ຖແລງການ ຂອງຣັຖບານລາວ ກ່ຽວກັບຜົລການ ສຶກສາ ແລະ ການພັທນາ ໂຄງການນັ້ນເທື່ອ.