ລາວ ຈະສືບຕໍ່ວຽກງານເຂື່ອນ ປາກແບງ

ທາງການລາວ ກ່າວວ່າ ຈະເດີນຫນ້າ ໃນໂຄງການ ເຂື່ອນປາກແບງ ຫລັງຈາກ ກອງປະຊຸມ ກັບ ປະເທດ ສະມາຊິກ ແມ່ນ້ຳຂອງ ທີ່ ນະຄອນ ຫຼວງພຣະບາງ ໃນອາທິດ ຜ່ານມານີ້.

ໂຄງການ 2.3 ຕື້ໂດລາ ເຂື່ອນປາກແບງ ເປັນເຂື່ອນ ແມ່ນ້ຳຂອງ ແຫ່ງທີສາມ ໃນລາວ ເປັນໂຄງການ ທີ່ສ້າງ ຄວາມກັງວົນ ຕໍ່ກຸ່ມ ອະນຸຮັກ ສີ່ງແວດລ້ອມ ແລະ ປະຊາຊົນ ໃຕ້ເຂືື່ອນ ຜູ້ທີ່ຈະໄດ້ ຮັບຜົລກະທົບ ໂດຍກົງ. ເຂື່ອນດັ່ງກ່າວ ຄາດວ່າ ຈະສ້າງ ສຳເຣັດ ໃນປີ 2024.

ທ່ານ ຟາມທວນຟານ ຜູ້ບໍຣິຫານ ອົງການ ແມ່ນ້ຳຂອງ ກ່າວ ໃນຖແລງການວ່າ ພວກເຮົາຈະໃຊ້ ຄວາມພຍາຍາມ ຢ່າງສຸດຂີດ ໃນການ ສນັບສນູນ ປະເທດ ແມ່ນ້ຳຂອງ ໃນການພັທນາ ແຕ່ຕ້ອງ ໃຫ້ມີຄວາມສົມດູນ ທາງດ້ານ ຜົລປະໂຫຍດ ແລະ ຄວາມຕ້ອງການ ໃນການ ພັທນາ ທີ່ຍືນຍົງ ແລະ ການບໍຣິການ ຈັດການອ່າງ ແມ່ນ້ຳຂອງ ໃຫ້ມີ ປະສີດທິພາບ ເພື່ອ ຄ້ຳປະກັນ ຊີວິດ ການເປັນຢູ່ ຂອງ ປະຊາຊົນ ທ້ອງຖິ່ນ. ອົງການ ແມ່ນ້ຳຂອງ ຈະທຳຫນ້າທີ່ ໃຫ້ດີທີ່ສຸດ ໃນການແລກປ່ຽນ ຂໍ້ມູນ ການສ້າງເຂື່ອນ ໃສ່ ແມ່ນ້ຳຂອງ ເພື່ອ ຜົລປະໂຫຍດ ຂອງທຸກຝ່າຍ.

ໃນຂນະດຽວກັນ ທ່ານ ດາວ ວົງ ພອນແກ້ວ ເອກອະທິບໍດີ ກະຊວງ ພລັງງານ ແລະບໍ່ແຮ່ ໃນນາມ ຕົວແທນ ສປປລາວ ກໍກ່າວວ່າ ຣັຖບານລາວ ຍິນດີ ໃນ ຄວາມຄິດ ຄວາມເຫັນ ຈາກ ປະເທດ ສະມາຊິກ ແຕ່ຄວາມຄິດເຫັນ ສ່ວນຫຼາຍ ຖືກແກ້ໄຂ ໄປແລ້ວ. ທ່ານວ່າ ການສຶກສາ ຜົລກະທົບ ຕໍ່ສິ່ງແວດລ້ອມ ໃນໂຄງການນີ້ ກໍໄດ້ລົງມື ໄປແລ້ວ ແລະ ກໍບໍ່ພົບເຫັນ ບັນຫາຫຍັງ ທີ່ຫນ້າເປັນຫວ່ງ.