ທາງການລາວວ່າວາງໃຈ ເຣື້ອງ ເຂື່ອນ ໃນນໍ້າຂອງ

ໄຊຍາ
2018-06-18
ອີແມວລ໌
ຄໍາເຫັນ
Share
ພິມ
ດຣ. ດາວວົງ ພອນແກ້ວ ຫົວໜ້າກົມນະໂຍບາຍ ແລະ ແຜນພລັງງານ ກະຊວງພລັງງານ ແລະບໍ່ແຮ່ ສປປ ລາວ
ດຣ. ດາວວົງ ພອນແກ້ວ ຫົວໜ້າກົມນະໂຍບາຍ ແລະ ແຜນພລັງງານ ກະຊວງພລັງງານ ແລະບໍ່ແຮ່ ສປປ ລາວ
RFA/PN

ທາງການລາວ ວ່າບໍ່ກັງວົນ ເຣື່ອງຜົລກະທົບ ໃນການສ້າງເຂື່ອນ ໃສ່ແມ່ນໍ້າຂອງ ເພາະຜ່ານມາກໍ່ມີການສ້າງເຂື່ອນ ໄປແລ້ວ 2 ແຫ່ງ ຄືເຂື່ອນ ໄຊຍະບູລີ ແລະ ເຂື່ອນດອນສະໂຮງ ແຂວງຈຳປາສັກ ແຕ່ຍັງບໍ່ເຫັນຜົນກະທົບ ທີ່ຮ້າຍແຮງ ໂດຍສະເພາະ ສັນນໍ້າ ແລະ ດີນຕົມຍັງອຸດົມສົມບູນ.

ດັ່ງ ດຣ.ດາວວົງ ພອນແກ້ວ ຫົວໜ້າກົມນະໂຍບາຍ ແລະແຜນພລັງງານ ກະຊວງພລັງງານ ແລະບໍ່ແຮ່ ສປປ ລາວ ກ່າວຕໍ່ວິທຍຸເອເຊັຽ ເສຣີ ໃນກອງປະຊຸມ ສຸດຍອດຜູ້ນຳ ເອັກແມັກສ ( ACMECS ) ທີ່ບາງກອກປະເທດໄທ ນີ້ວ່າ:

"ຄິດວ່າຄືສິບໍ່ຖືກຕ້ອງກັບຕົວຈິງປານໃດເນາະ ເພາະວ່າເຮົາເຫັນຜ່ານມາວ່າ ມີການກໍ່ສ້າງ 2 ເຂື່ອນ ໂດຍສະເພາະ ເຂື່ອນໄຊຍະບູລີ ແລະກໍ່ເຂື່ອນດອນສະໂຮງ ຢູ່ທາງຕອນໃຕ້ແລ້ວກໍມີການຕັນນໍ້າມາຫຼາຍປີແລ້ວ ກໍເຫັນວ່າທຸກສີ່ງທຸກຢ່າງຍັງເໝືອນເດີມ ຢ່າງເຊັ່ນເຣື່ອງປາ ເຣື່ອງດີນຕົມ ກໍ່ຍັງຢູ່ໃນສະພາບ ທີ່ວ່າບໍ່ມີຫຍັງແຕກຕ່າງ."

ທ່ານກ່າວຕື່ມວ່າ ເຖິງແມ່ນວ່າການສ້າງເຂື່ອນ ຈະເປັນການຕັນທາງນໍ້າໃນປະຣິມານຫຼາຍ ແຕ່ 2 ໂຄງການດັ່ງກ່າວກໍໄດ້ສຶກສາໂຄງການ ສ້າງເຂື່ອນ ມາເປັນຢ່າງດີ ເພື່ອບໍ່ໃຫ້ເປັນຜົລກະທົບ ດ້ານສີ່ງແວດລ້ອມ ແລະພາກປະຊາຊົນ ໃນລຸ່ມແມ່ນໍ້າຂອງ.

ສ່ວນເຣື່ອງພັນປາຊນິດຕ່າງໆ ທີ່ມີການຣາຍງານວ່າ ຈະຖືກຜົນກະທົບຈາການສ້າງເຂື່ອນ ຈົນເຮັດໃຫ້ປາບໍ່ມີບ່ອນອາໃສ ຫຼືປະສົມພັນ ແລະວາງໄຂ່ ການສຳຣວດ ກໍບໍ່ພົບຄວາມຜິດປົກກະຕິ ມີແຕ່ປາຈະເພີ່ມຂຶ້ນເລື້ອຍໆ ເພາະວ່າເຂື່ອນທັງສອງແຫ່ງ ທີ່ສ້າງນັ້ນ ເຮັດຮູ ຫຼື ຊ່ອງທາງສຳລັບໃຫ້ເຮືອແລ່ນ ຜ່ານເຂື່ອນ ແລະໃຫ້ປາຜ່ານໄປໄດ້ ໂດຍບໍ່ມີສີ່ງກີດຂວາງ ສ່ວນປາທີ່ບໍ່ແຂງແຮງ ອົພຍົບໄປຢູ່ຕົ້ນນໍ້າບໍ່ໄດ້ ກໍມີການສ້າງທາງນໍ້າ ເປັນຂັ້ນໃດ ໃຫ້ປາໂຕນຜ່ານຂຶ້ນໄປ ຣະຍະຍາວ 2 ກິໂລແມັດ.

ຄນະກັມມາທິການແມ່ນໍ້າຂອງ ຫຼື MRC ຣາຍງານວ່າ ຣັຖບານລາວໄດ້ແຈ້ງຢ່າງເປັນທາງການ ຕໍ່ຄນະກັມມາທິການແມ່ນໍ້າຂອງ ເຖິງ ເຈຕນາໃນການສ້າງເຂື່ອນປາກລາຍ ເຊິ່ງນັບວ່າເປັນແຜນໂຄງການເຂື່ອນແຫ່ງທີ 4 ທີ່ຣັຖບານລາວ ຈະສ້າງ.

ແຕ່ເຖິງຢ່າງໃດກໍຕາມ ໂຄງການເຂື່ອນປາກລາຍ ນີ້ຍັງບໍ່ໄດ້ນຳເຂົ້າຂັ້ນຕອນ ໃນຂະບວນການຕາມຣະບຽບ ປະຕິບັດເຣື່ອງການແຈ້ງການ ປຶກສາຫາລືລ່ວງໜ້າ ແລະຂໍ້ຕົກລົງຂອງຄນະກັມມາທິການ ແມ່ນໍ້າຂອງຫຼື PNPCA ເພື່ອສຶກສາຜົນກະທົບ. ດັ່ງ ດຣ.ດາວວົງ ກ່າວຕື່ມວ່າ:

"ເຂື່ອນປາກລາຍນີ້ຍັງບໍ່ໄດ້ເຂົ້າຂະບວນການ PNPCA ເທື່ອເນາະແຕ່ວ່າກໍ່ອາດສິເປັນໂຄງການຕໍ່ໄປ ແຕ່ວ່າຍັງບໍ່ຮູ້ວ່າພາຍໃນປີໃດເນາະ ອັນນີ້ກໍ່ເປັນແຜນແມ່ແຜນ ວ່າຊັ້ນສະ ຢູ່ໃນແຜນ."

ສ່ວນ ຍານາງ ພຽນພອນ ດີເທດ ຜູ້ປະສານງານອົງການແມ່ນໍ້າ ຂອງປະຈຳປະເທດໄທ ຫຼື International Rivers ກ່າວຕໍ່ກໍຣະນີ ທີ່ຣັຖບານ ໄດ້ແຈ້ງເຖິງເຈດຕະນາ ໃນການສ້າງເຂື່ອນປາກລາຍວ່າ; ຄາດວ່າໂຄງການນີ້ ກໍໃຫ້ເກີດຜົນກະທົບ ຂ້າມຊາຍແດນ ແລະ ຕລອດຮອດປະຊາຊົນ ໃນລຸ່ມແມ່ນໍ້າຂອງ ນອກຈາກຜົນກະທົບ ຕໍ່ຊຸມຊົນໃນຝັ່ງລາວ ທີ່ຜ່ານມາຍັງບໍ່ໄດ້ ຮັບການແກ້ໄຂແຕ່ຢ່າງໃດ.

ເຂື່ອນປາກລາຍ ຈະມີກຳລັງການຜລິດ 770 ເມກາວັດ ຈະສ້າງຂຶ້ນຢູ່ແຂວງ ໄຊຍະບູລີ ເຂື່ອນແຫ່ງນີ້ ຈະຕັ້ງຢຸ່ຕອນທ້າຍນໍ້າ ຕໍ່ຈາກ ເຂື່ອນໄຊຍະບູຣີ ເຊິ່ງປະຈຸບັນໄດ້ກໍ່ສ້າງໃກ້ຈະສຳເຣັດສົມບູນແລ້ວ ແລະຢູ່ຫ່າງຈາກຊາຍແດນໄທ ປະມານ 1 ກິໂລແມັດ.

ຄໍາເຫັນ (2)
Share

(

How much the dams builders paid you ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 21, 2018 06:02 AM

ປູເຕີ

ຈາກ ຂະເມັນ

ເຂື່ອນຫຼາຍຊໍ່າໃດຄ່າໄຟກໍ່ຍີ້ງເພີ້ນຂື້ນບໍ່ເຂົ້າໃຈ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 21, 2018 06:02 AM

ເຕັມຫນ້າ