ເພື່ອນບ້ານກັງວົນເຂື່ອນ ປາກແບງ

ໃນກອງປະຊຸມຂັ້ນຕອນ ການປຶກສາຫາລືກັນ ລ່ວງຫນ້າ ໃນໂຄງການ ກໍ່ສ້າງ ເຂື່ອນປາກແບງ ທີ່ ນະຄອນຫລວງ ວຽງຈັນ ໃນມື້ວັນທີ 5 ພຶສພາ ຜ່ານມາຕົວແທນ ຈາກອົງການຈັດຕັ້ງ ທາງສັງຄົມຈາກປະເທດ ໄທແລະວຽດນາມ ສະແດງຄວາມກັງວົນ ກ່ຽວກັບ ຜົລກະທົບ ທີ່ຈະເກີດຂື້ນ ຈາກໂຄງການ ເຂື່ອນປາກແບງ ຕໍ່ຊິວິດການເປັນຢູ່, ສີ່ງແວດລ້ອມ ນ້ຳຖ້ວມ ແລະຝຸງປາ ໃນແມ່ນ້ຳຂອງ. ດັ່ງຕົວແທນ ອົງກອນ ຊາວໄທ ທ່ານນຶ່ງ ຜູ້ທີ່ໄປຮ່ວມ ກອງປະຊຸມ ກ່າວວ່າ:

"ເຂຶ່ອນປາກແບງ ມີຜົລກະທົບ ຕໍ່ປະເທດໄທ ຖ້ານ້ຳໃນອ່າງ ຫົວເຂື່ອນສຸງຂຶ້ນ 50 ເຊັນຫລື 1 ແມັດ ນ້ຳຈະຖ້ວມໄທ ແຂວງຊຽງຮາຍ. ພີ່ນ້ອງທັງ ແຂວງຊຽງຮາຍ ມີຄວາມເປັນຫວ່ງ ກັງວົນວ່າ ຈະຖືກນ້ຳຖ້ວມ ໃນເວລາມີ ເຂື່ອນປາກແບງ ຫລື ເວລາຈີນປ່ອຍນ້ຳລົງມາ".

ທ່ານກ່າວຕື່ມວ່າ ຜູ້ທີ່ໄດ້ຮັບຜົລກະທົບ ຫລາຍກວ່າຫມູ່ ຈາກການສ້າງເຂື່ອນ ນີ້ກໍຄື ປະຊາຊົນ ຜູ້ທີ່ອາສັຍ ຢູ່ຕາມແຄມຂອງ ທັງຫມົດ, ດັ່ງນັ້ນ ຢາກໃຫ້ມີຂັ້ນຕອນ ການປຶກສາ ຫາລືກັນລ່ວງຫນ້າ ສຳລັບ ພາກປະຊາຊົນ ໃຫ້ມີຣາຍລະອຽດ ຫລາຍກວ່ານີ້ ເພາະທີ່ຜ່ານມາ ມີແຕ່ການສເນີ ໃນພາບກວ້າງ ເທົ່ານັ້ນ.

ໃນຂນະດຽວກັນຕົວແທນ ຈາກອົງກອນຈັດຕັ້ງ ທາງສັງຄົມ ຈາກປະເທດວຽດນາມ ກໍກ່າວວ່າ ພວກຕົນກັງວົນ ກ່ຽວກັບການປ່ຽນແປງ ທາງພູມີສາດ ແລະ ສະພາບການໄຫຼ ຂອງແມ່ນ້ຳຂອງ ທີ່ຈະສົ່ງຜົລກະທົບ ຕໍ່ຊີວີດການເປັນຢູ່ ຂອງ ປະຊາຊົນ ວຸ່ມນ້ຳຂອງ:

"ກັງວົນຫລາຍທີ່ສຸດ ກໍຄືປະເດັ່ນເຣື້ອງ ການປ່ຽນແປງບ ຂອງສະພາບອາກາດ ບໍ່ພຽງແຕ່ການໄຫລ ຂອງນ້ຳ ໃນຣະດູແລ້ງ ເທົ່ານັ້ນ ແຕ່ຍັງເຣື້ອງຂອງ ນ້ຳຖ້ວມ ນຳອີກ ແລະ ຍັງລວມໄປເຖີງ ເຣື້ອງຜົລກະທົບ ຂອງການອະນຸລັກ ນານາຊີວະພັນ ໃນລຸ່ມແມ່ນ້່ຳຂອງ ຈະສົ່ງຜົລຕໍ່ ປະຊາຊົນ ທີ່ອາສັຍຢູ່ ບໍຣິເວນ ນັ້ນດ້ວຍ".

ກອງປະຊຸມຂັ້ນຕອນ ການປືກສາຫາລືກັນລ່ວງຫນ້າ ໃນໂຄງການເຂື່ອນປາກແບງ ຄັ້ງນີ້ ເປັນຄັ້ງທີສອງ ໄດ້ສຸມໃສ່ 5 ບັນຫາໃຫຍ່ໆ ທາງດ້ານເທັກນິກ ໃນນັ້ນກໍມີການໄຫຼ ຂອງດິນຕົມ ທີ່ອຸດົມສົມບູນ, ສີ່ງແວດລ້ອມ ແລະຄຸນນະພາບນ້ຳ, ຄວາມປອດພັຍ ຂອງເຂື່ອນ ການແລ່ນເຮືອ ແລະການອອກແບບ ຣະບົບ ການຂື້ນລົງ ຂອງປາ.