ໄຊຍະບູຣີເລີ້ມຕັນນໍ້າເພື່ອ ກໍ່ສ້າງ ໂຕເຂື່ອນ

ເຂື່ອນ ໄຊຍະບູຣີ ເປັນ ເຂື່ອນ ໄຟຟ້າ ນ້ຳຂອງ ແຫ່ງ ທຳອິດ ຂອງລາວ ໄດ້ ເລີ້ມ ສ້າງມາ ໄດ້ຊົ່ວ ຣະຍະນຶ່ງ ແລ້ວ ແລະ ໃນ ວັນທີ 26 ມົກຣາ 2015 ກໍໄດ້ເລີ້ມ ກໍ່ສ້າງ ຂັ້ນສອງ ຢ່າງ ເປັນ ທາງການ. ເຈົ້າຫນ້າທີ່ ກ່ຽວຂ້ອງ ທ່ານນຶ່ງ ເວົ້າວ່າ ການກໍ່ສ້າງ ຂອງ ພາກສ່ວນ ທີສອງ ນີ້ ຈະເປັນ ການກໍ່ສ້າງ ຕົວເຂື່ອນ ໂຮງ ໄຟຟ້າ ແລະ ທາງ ປາຜ່ານ. ທ່ານກ່າວວ່າ:

"ກຳລັງ ເລີ້ມຕັນ ນ້ຳ ແລ້ວ ເພີ່ນເປີດ ພິທີ ມື້ວານນີ້ ກຳລັງ ຕັນນ້ຳ ແລ້ວ ກໍເອົານ້ຳ ໃສ່ໄປ ເບື້ອງນັ້ນ ເພີ່ນເອົາ ເຮືອຂື້ນ ເຮືອລ່ອງ ວ່າ spillway ເພິ່ນອວ່າຍນ້ຳ ໄປພຸ້ນ ແລ້ວ ເຮືອໃຫຍ່ ຜ່ານ ບໍ່ໄດ້ ແລ້ວ. ພວກເຮົາ ຈະຍ້າຍອີກ ນີ້ຫວະ ກໍຍັງບໍ່ ທັນ ເພາະວ່າ ຂະເຈົ້າ ຈະບຸກເບີກ ຕື່ມອີກ ແລ້ວນະ".

ທ່ານກ່າວ ຕື່ມວ່າ ການກໍ່ສ້າງ ມີຄວາມ ຄືບຫນ້າ ຫລາຍ ປັດຈຸບັນ ສາມາດ ກັ້ນ ແມ່ນ້ຳຂອງ ໄດ້ແລ້ວ ກວ່າ 700 ແມັດ ຈາກ ຄວາມກວ້າງ ຂອງ ແມ່ນ້ຳຂອງ 820 ແມັດ ຈະເຮັດໃຫ້ ເຮືອ ສີນຄ້າ ຂນາດໃຫຍ່ ບໍ່ສາມາດ ຜ່ານໄດ້. ການ ໂຍກ ຍ້າຍ ຊາວບ້ານ ປັດຈຸບັນ ໄດ້ ສອງສ່ວນ ແລ້ວ ຄື ສ່ວນນື່ງ ໃນເຂດ ເມືອງ ນ່ານ ແຂວງ ຫລວງ  ພຣະບາງ ແລະ ອີກ ສ່ວນນື່ງ ໃນເຂດ ເມືອງ ໄຊຍະບູຣີ ແຂວງ ໄຊຍະບູຣີ ທີ່ ມີຊາວບ້ານ ທັງຫມົດ ປະມານ 2100 ຄົນ ຖືກ ໂຍກຍ້າຍ ໄປຢູ່ ທາງເທິງ ຂອງ ເຂື່ອນ ເພື່ອ ຫລີກລ້ຽງ ນ້ຳຖ້ວມ ຫລັງຈາກ ສ້າງເຂື່ອນ. ສ່ວນ ທີ່ເຫລືອ ປະມານ 6 ບ້ານ ຍັງ ບໍ່ຮູ້ວ່າ ຈະຖືກຍ້າຍ ເມື່ອໃດ ແລະ ຈະ ຍ້າຍ ໄປໃສ.

ຫລັງຈາກ ທາງການ ລາວ ໄດ້ຈັດ ພິທີເປີດ ການ ກໍ່ສ້າງ ຂັ້ນສອງ ຢ່າງເປັນ ທາງການ ທີ່ ປະເທດໄທ ເຄືອຂ່າຍ ປະຊາຊົນ 8 ແຂວງ ລຸ່ມ ແມ່ນ້ຳຂອງ ກໍໄດ້ ອອກ ຖແລງການ ທວງຖາມ ທາງການ ໄທ ໃນຂໍ້ສເນີ ໃຫ້ ໂຈະ ການກໍ່ສ້າງ ເຂື່ອນ ແຫ່ງນີ້ ຊຶ່ງ ໃນ ປັດຈຸບັນ ສານ ປົກຄອງ ໄທ ກຳລັງ ພິຈາຣະນາ ການຟ້ອງ ການໄຟຟ້າ ຝ່າຍຜລິດ ແຫ່ງ ປະເທດໄທ ຂອງ ຊາວບ້ານ ກ່ຽວກັບ ການຊື້ ໄຟຟ້າ ຈາກ ເຂື່ອນ ໄຊຍະບູຣີ ນັ້ນຢູ່.