ເສຖກິດໃນລາວ

ຫລາຍປີມານີ້ ເສຖກິດໃນລາວຂະຫຍາຍໂຕຢ່າງວ່ອງໄວ ແຕ່ການຄຸ້ມ ຄອງເສຖກິດໂດຍຣະບອບການປົກຄອງສັງຄົມນິຍົມໃນລະຍະຜ່ານມາ ບໍ່ໄດ້ ເຮັດໃຫ້ໝາກຜົນຂອງທຶນນິຍົມ ສ້າງຄວາມອຸດົມສົມບູນ ໃຫ້ແກ່ ສປປລາວ ໄດ້ທຸກພາກສ່ວນ. ນັ້ນຄືບົດຄວາມ ຂອງນັກຂ່າວ ຣອຍເຕີ້.

ບົດຄວາມວ່າ ຢູ່ໃນໂຕເມືອງສະຖານທີ່ເກົ່າແກ່ຖືກປ່ຽນ ເປັນບ່ອນຫລູ ຫລາຫຸ້ມລ້ອມດ້ວຍຮ້ານອາຫານຣາຄາແພງ ບັນດາຜູ້ນໍາເລືອກ ຊື້ຣົດ ຣາຄາແພງ. ນີ້ຄືຜົນຂອງການເຕີບໃຫ່ຽຂອງເສຖກິດ 8 ສ່ວນຮ້ອຍ ຕໍ່ ປີໃນຫລາຍປີມານີ້.

ການເຕີບໃຫ່ຽຂອງເສຖກິດໃນລາວ ແມ່ນມາຈາກການສົ່ງສິນຄ້າອອກ ປະເພດບໍ່ແຮ່ ພລັງງານ ແລະຖ້ວມລົ້ນດ້ວຍການລົງທຶນຈາກປະເທດ ຈີນ ໄທ ແລະ ວຽດນາມ ຕິດຕາມດ້ວຍການຕັ້ງຕລາດຫຼັກຊັບຂຶ້ນໃນ ຕົ້ນປີ 2011.

ການເຕີບໃຫ່ຽຂະຫຍາຍໂຕຂອງເສຖກິດໃນລາວ ຈະບໍ່ຢຸດຢູ່ເທົ່ານັ້ນ ແຕ່ຮອຍແຕກຫັກ ໄດ້ເລີ້ມສແດງອອກແລ້ວ. ນັກເສຖສາຕ ເຕືອນວ່າ ສປປລາວ ກໍາລັງປະເຊີນກັບດ້ານລົບຂອງ ແບບແຜນພັທນາທີ່ອິງຕໍ່ສິນເຊື່ອ ທີ່ບໍ່ມີເງື່ອນໄຂຜູກມັດຫລາຍ ການຂຸດຄົ້ນຊັພຍາກອນທັມຊາຕ ແລະໂຄງການພັທນາ ຂນາດໃຫ່ຽ.

ທ່ານ  Ashvin Ahuja ນັກເສຖສາຕຜູ້ທີ່ເປັນຫົວໜ້າຄນະຜູ້ແທນ ຈາກກອງທຶນການເງິນສາກົນ ຫລື IMF ທີ່ເດີນທາງໄປຢ້ຽມຢາມລາວ ເມື່ອເດືອນ ກັນຍາ ຜ່ານມາ ເວົ້າວ່າ ເສຖກິດຂອງລາວຢູ່ໃນສະພາບເຮັ່ງຮ້ອນ ຫລາຍແລ້ວ.

IMF ໄດ້ພົບເຫັນຫລາຍໆບັນຫາດັ່ງນີ້: ການເກັບຣາຍຮັບບໍ່ໄດ້ຕາມຈໍານວນທີ່ຕ້ອງການ ແຕ່ຣາຍຈ່າຍຊໍ້າພັດເກີນຂອບເຂດ ໂດຍສະເພາະ ການຂຶ້ນເງິນ ເດືອນໃຫ້ພນັກງານຣັຖ ເຮັດໃຫ້ງົບປະມານ ຂາດດຸນເພີ້ມຂຶ້ນ ຕື່ມ 6.5 ສ່ວນຮ້ອຍ ຂອງຜົນຜລິດລວມຍອດ ຫລື ຈີດີພີ.

ອັດຕຣາເງິນເຟີ້ຄາດວ່າຈະເພີ້ມຂຶ້ນເປັນ 7.5 ສ່ວນຮ້ອຍໃນທ້າຍປີ 2013 ນີ້ ແລະ ຈະເພີ້ມຂຶ້ນເປັນ 9.4 ສ່ວນຮ້ອຍ ໃນປີໜ້າ. ເງິນຕຣາຕ່າງ ປະເທດ ສໍາຮອງ ຈະກຸ້ມການນໍາເຂົ້າສິນຄ້າ ພຽງ 80 ສ່ວນຮ້ອຍ ຂອງການນໍາເຂົ້າສິນຄ້າ 1 ເດືອນ ເທົ່ານັ້ນ.

ໃນຂນະດຽວກັນ ນັກທະນາຄານໃນຕ່າງປະເທດ ທີ່ຂໍສງວນຊື່ບອກວ່າ ສປປລາວ ຂາດເງິນໂດລາ ມາໄດ້ຫລາຍເດືອນແລ້ວ.