ບໍລິສັດຜະລິດໄຟຟ້າລາວ ມະຫາຊົນ ບໍ່ສາມາດຈ່າຍເງິນປັນຜົນ ໃຫ້ຜູ້ຖືຮຸ້ນໄດ້

ບໍລິສັດຜະລິດໄຟຟ້າລາວ ມະຫາຊົນ (EDL-Gen) ປະກາດຈະບໍ່ຈ່າຍເງິນປັນຜົນ ໃຫ້ແກ່ຜູ້ຖືຮຸ້ນ ຂອງບໍລິສັດ ຍ້ອນທາງບໍລິສັດ ປະສົບບັນຫາຂາດທຶນ ໃນໄລຍະທີ່ຜ່ານມາ. ການປະກາດກ່ຽວກັບເລື່ອງທີ່ວ່ານີ້ ມີຂຶ້ນຢູ່ໃນກອງປະຊຸມຜູ້ຖືຮຸ້ນ ທີ່ຈັດຂຶ້ນເມື່ອວັນທີ 10 ພຶດສະພາ 2024 ທີ່ໄດ້ຕົກລົງວ່າ ຈະບໍ່ຈ່າຍເງິນປັນຜົນ ຈາກການດໍາເນີນທຸລະກິດ ຂອງບໍລິສັດ ປະຈໍາປີ 2023, ອີງຕາມການລາຍງານ ຜົນປະກອບການ ຂອງບໍລິສັດ ຜະລິດໄຟຟ້າລາວ ມະຫາຊົນ ທີ່ຕະຫຼາດຫຼັກຊັບລາວ ໄດ້ເຜີຍແຜ່ ເມື່ອວັນທີ 2 ກັນຍານີ້.

ກ່ຽວກັບເລື້ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງ ບໍລິສັດຜະລິດໄຟຟ້າລາວມະຫາຊົນ ເພື່ອຂໍຮູ້ຂໍ້ມູນເພີ້ມຕື່ມ ໃນມື້ວັນທີ 3 ກັນຍານີ້ ຊຶ່ງເຈົ້າໜ້າທີ່ນາງນຶ່ງ ກໍຢືນຢັນພຽງແຕ່ວ່າ ຈະບໍ່ມີການຈ່າຍເງິນປັນຜົນ ໃຫ້ແກ່ຜູ້ຖືຮຸ້ນແທ້ ແລະກໍບໍ່ສາມາດ ຊີ້ແຈງຫລາຍໄປກວ່ານີ້ໄດ້, ມີແຕ່ໃຫ້ເບິ່ງ ບົດລາຍງານ ທີ່ເຜີຍແຜ່ໂດຍຕະຫລາດຫລັກຊັບລາວ ດັ່ງທີ່ນາງເວົ້າວ່າ:

“ມີແຕ່ເບິ່ງຢູ່ນໍາເວັບໄຊ ຂອງຕະຫລາດຫລັກຊັບເດີ້ ເຈົ້າ ຕິດຕາມນໍາເພດຂອງຕະຫລາດຫລັກຊັບລາວ ເພິ່ນຈະເປີດເຜີຍໄປຕາມເອກກະສານຢູ່ນໍາແຫລະ.”

ແຕ່ເຖິງຢ່າງໃດກໍຕາມ ພາຍຫລັງທີ່ບົດລາຍງານ ຂອງຕະຫຼາດຫຼັກຊັບລາວນັ້ນ ໄດ້ຖືກເຜີຍແຜ່ ຕໍ່ສາທາລະນະຊົນແລ້ວ  ກໍຍັງບໍ່ທັນມີຜົນກະທົບ ຕໍ່ການຊື້-ຂາຍຮຸ້ນ ຂອງບໍລິສັດ ຜະລິດໄຟຟ້າລາວມະຫາຊົນ ເທື່ອ. ແລະລູກຄ້າ ທີ່ຖືຮຸ້ນຂອງບໍລິສັດ ສ່ວນຫລາຍ ກໍຍັງຖືຮຸ້ນຢູ່ຄືເກົ່າ ແລະບໍ່ໄດ້ຂາຍຮຸ້ນອອກ ຫລືບໍ່ມີຜົນກະ ທົບ ຕໍ່ຄວາມເຊື່ອໝັ້ນ ໃນຮຸ້ນຂອງບໍລິສັດດັ່ງກ່າວ ແຕ່ຢ່າງໃດ ດັ່ງເຈົ້າໜ້າທີ່ຕະຫຼາດຫຼັກຊັບລາວລາວ ທ່ານນຶ່ງກ່າວວ່າ:

“ຕາມຂໍ້ມູນເຮົານີ້ ກະຍັງບໍ່ໄດ້ມີຜົນກະທົບຫຍັງນ່າ ຍັງບໍ່ເຫັນມີຜູ້ຖືຮຸ້ນລາຍໃດ ຂາຍອອກຫັ້ນນ່າ ກໍເຫັນແຈ້ງການ EDL–Gen ເພິ່ນບໍ່ປັນຜົນກໍຍ້ອນເພິ່ນຂາດທຶນ ຈາກອັດຕາແລກ ປ່ຽນໂຕທີ່ເພິ່ນຕ້ອງໄດ້ຈ່າຍກູ້ຢູ່ໄທ ປັນຜົນນີ້ ດຽວຄັນເພິ່ນມີກໍາໄລຄືນ ມັນກະສິຈ່າຍຄືເກົ່າ.”

ພ້ອມດຽວກັນນີ້ ຊາວລາວທ່ານນຶ່ງ ທີ່ຢູ່ໃນວົງການຊື້-ຂາຍຮຸ້ນ ກໍເວົ້າວ່າ ຕົນເອງ ກໍບໍ່ໄດ້ຊື້ຮຸ້ນຂອງບໍລິສັດຜະລິດໄຟຟ້າລາວ ມະຫາຊົນ ແລະກໍຍັງບໍ່ສາ ມາດຕີລາຄາໄດ້ວ່າ ການທີ່ບໍລິສັດດັ່ງກ່າວ ໄດ້ອອກປະກາດ ຈະບໍ່ຈ່າຍເງິນປັນຜົນໃຫ້ແກ່ຜູ້ຖືຮຸ້ນນັ້ນ ຈະສົ່ງຜົນກະທົບ ຕໍ່ຄວາມເຊື່ອໝັ້ນ ຂອງຜູ້ຖືຮຸ້ນ ຫລືບໍ່ ກໍຍັງບໍ່ຮູ້, ຮູ້ພຽງແຕ່ວ່າ ທາງບໍລິສັດ ປະສົບບັນຫາຂາດທຶນຢ່າງໜັກເທົ່ານັ້ນ ດັ່ງທີ່ທ່ານກ່າວວ່າ:

“ອັນນີ້ນ້ອງກະຍັງບໍ່ຮູ້ເທື່ອຫັ້ນນ່າ ສ່ວນຫລາຍນ້ອງກະຫລີ້ນຮຸ້ນນອກຫລາຍກວ່າຫັ້ນນ່າ ໂຕນີ້ມັນກໍຂຶ້ນຢູ່ກັບເສດຖະກິດຢູ່ລາວເຮົານີ້ ະຄືວ່າ ສ່ວນຫລາຍຮຸ້ນໄຟຟ້າມັນກະຂາດທຶນ ມັນກະຍັງບໍ່ມີງົບພໍທີ່ວ່າເຂົ້າໄປຊື້ຫັ້ນນ່າ.”

ກ່ຽວກັບການປະກາດ ບໍ່ຈ່າຍເງິນປັນຜົນ ຂອງບໍລິສັດຜະລິດໄຟຟ້າລາວມະຫາ ຊົນໃນເທື່ອນີ້ ນັກວິຊາການ ທີ່ມີຄວາມຮູ້ທາງດ້ານຮຸ້ນ ແລະການລົງທຶນ ທ່ານນຶ່ງ ກໍກ່າວຕໍ່ວິທຍຸເອເຊັຽເສຣີໃນມື້ວັນທີ 3 ກັນຍານີ້ ຕົນເຊື່ອວ່າ ຈະບໍ່ສົ່ງຜົນກະທົບ ຈົນເຮັດໃຫ້ຜູ້ຖືຮຸ້ນ ພາກັນຂາຍຮຸ້ນອອກແຕ່ຢ່າງໃດ, ເນື່ອງຈາກເຊື່ອວ່າບໍລິສັດດັ່ງກ່າວ ມີທ່າແຮງພຽງພໍ ທີ່ຈະແກ້ໄຂບັນຫານີ້ໄດ້ ແລະດໍາເນີນການໃຫ້ບໍລິສັດ ກັບມາມີຜົນກໍາໄລອີກຄັ້ງນຶ່ງ ແລະກໍຈະກັບມາຈ່າຍເງິນປັນຜົນ ໃຫ້ແກ່ຜູ້ຖືຮຸ້ນໃນອະນາຄົດໄດ້ ດັ່ງທ່ານກ່າວນຶ່ງວ່າ:

“ແຕ່ວ່າຖ້າເຮົາບໍ່ຕ້ອງການໃຊ້ເງິນ ໃນໄລຍະຍາວມັນກະຍັງພໍມີທ່າແຮງຢູ່ ເລື້ອງທ່າແຮງຄວາມສາມາດຫຍັງ ເລື້ອງເງິນເຟີ້ເງິນຫຍັງ ມັນກະໜ້າຈະກັບມາສູ່ສະພາບປົກກະຕິ ເລື້ອງຂອງອີ່ຫຍັງເຂົາເຈົ້າກໍຂ້ອນຂ້າງມີຄວາມເຂັ້ມແຂງຢູ່ໄດ໋ ສັກກະຍະພາບເຂົາເຈົ້າກະຍັງພໍມີຢູ່ ໃນໄລຍະຍາວຫັ້ນນ່າ ເພາະວ່າຫລາຍໆເຂື່ອນ ກະເລີ້ມຜະລິດໄຟຟ້າ.”

ຢ່າງໃດກໍຕາມ ຜູ້ຕາງໜ້າຂອງບໍລິສັດ ເອີນ ແອນ ຍັງ ລາວ ຈໍາກັດ ທີ່ເຮັດໜ້າທີ່ກວດສອບບັນຊີ ກໍມີຄໍາເຫັນເຕືອນເລື້ອງການດໍາເນີນການຂອງກຸ່ມບໍລິສັດດັ່ງກ່າວ ທີ່ບໍ່ມີຄວາມແນ່ນອນ ຊຶ່ງອາດເຮັດໃຫ້ເກີດຂໍ້ສົງໄສອັນໃຫຍ່ຫລວງ ຕໍ່ຄວາມອາດສາມາດຂອງກຸ່ມບໍລິສັດ ໂດຍມີການລະບຸວ່າ ໄລຍະ 6 ເດືອນຕົ້ນປີ 2024 ນີ້ ທາງກຸ່ມບໍລິສັດ ຂາດທຶນ 13,028 ລ້ານກີບ ແລະມີໜີ້ສິນໝຸນວຽນ 5,065,826 ລ້ານກີບ, ບໍ່ຮວມໃສ່ການຂາດທຶນ ຈາກອັດຕາການແລກປ່ຽນ ທີ່ບໍ່ເກີດຂຶ້ນຈິງ ມູນຄ່າ 9,832,405 ລ້ານກີບ.

ແລະທາງກະຊວງພະລັງງານ ແລະບໍ່ແຮ່ ກໍກໍາລັງຫາລື ແລະພິຈາລະນາເລື່ອງ ການປັບປຸງໂຄງສ້າງລາຄາຈໍາໜ່າຍໄຟຟ້າໃໝ່ ແຕ່ປີ2024 ຫາປີ 2028 ໂດຍທາງຄະນະຄົ້ນຄວ້າ ແລະວິໄຈ ໄດ້ສະເໜີລາຄາຄ່າໄຟຟ້າ ເປັນລາຄາ ທີ່ມີຂັ້ນດຽວ ແລະໃຊ້ເປັນລາຄາດຽວ, ເປັນຕົ້ນ ສຳລັບຜູ້ທີ່ຊົມໃຊ້ໄຟຟ້າ ແຕ່ 0 ຫາ150 ກິໂລວັດໂມງຕໍ່ເດືອນ ໂດຍຄິດໄລ່ເປັນເງິນໂດລາສະຫະຣັດ ເລີ່ມຕົ້ນທີ່ 3,79 Us cent ຕໍ່ກິໂລວັດໂມງ ແລະ ສຳລັບຜູ້ທີ່ໃຊ້ໄຟເກີນ 150 ກິໂລວັດໂມງຕໍ່ເດືອນ ແມ່ນເລີ່ມຕົ້ນທີ່ 7.59 Us cent ຕໍ່ກິໂລວັດໂມງ ພ້ອມທັງກໍານົດລາຄາໄຟຟ້າ ທຽບໃສ່ເງິນໂດລາສະຫະລັດ ແລະຊໍາລະເປັນເງິນກີບຕາມອັດຕາ ແລກປ່ຽນ ໃນເວລາຈ່າຍຕົວຈິງ ແຕ່ກໍຍັງບໍ່ທັນລະບຸເທື່ອວ່າ ຈະເລີ້ມຈັດຕັ້ງປະ ຕິບັດເມື່ອໃດ.