ຂ.ຜົ້ງສາລີຂາດເຂີນ ອຸປກອນ ການຮຽນ

ສຸພັດຕາ
2019-05-30
ອີແມວລ໌
ຄໍາເຫັນ
Share
ພິມ
ໂຮງຮຽນຊັ້ນປະຖົມ ທີ່ຊຸດໂຊມ ຢູ່ໃນຫຼາຍເຂດຊົນນະບົດ ຂອງລາວ ຮວມທັງຂາດເຂີນ ອຸປກອນ ການຮຽນການສອນ ນໍາດ້ວຍ.
ໂຮງຮຽນຊັ້ນປະຖົມ ທີ່ຊຸດໂຊມ ຢູ່ໃນຫຼາຍເຂດຊົນນະບົດ ຂອງລາວ ຮວມທັງຂາດເຂີນ ອຸປກອນ ການຮຽນການສອນ ນໍາດ້ວຍ.
ຮູປຈາກ : ຄູບາສົມນຶກ ພັນທະວົງ

ເດັກນ້ອຍຊົນເຜົ່າ ຢູ່ໂຮງຮຽນປະຖົມ ແຂວງຜົ້ງສາລີ ປະມານ 700 ປາຍຄົນ ຍັງຂາດເຂີນ ປຶ້ມແບບຮຽນ, ໃນປັດຈຸບັນ ປື້ມແບບຮຽນ ນຶ່ງຫົວ ຕ້ອງໃຫ້ນັກຮຽນ 3 ຄົນ ເບິ່ງຮ່ວມກັນ ອີກທັງປື້ມນັ້ນ ກໍເກົ່າແລະຊຸດໂຊມຫຼາຍ ເບິ່ງຈົນບໍ່ເຫັນຮູບ, ດັ່ງ ເຈົ້າໜ້າທີ່ ຜແນກສຶກສາ ແຂວງຜົ້ງສາລີ ກ່າວຕໍ່ ວິທຍຸເອເຊັຽເສຣີ ໃນວັນທີ 30 ພຶສພາ ນີ້ວ່າ:

"ມີຢູ່ ແຕ່ວ່າມັນບໍ່ຄົບ ມັນເປັນໂຕເກົ່າ ເປັນອຸປະສັກ ເວລານາຍຄຣູເຂົ້າເຈົ້າແຕ່ງບົດສອນ ນາຍຄຣູ ເວລານາຍຄຣູສອນ ໃຫ້ເບິ່ງຮູບພາບ ລະແມ່ນຜູ້ທີ່ຢູ່ທາງຫຼັງ ມັນກໍບໍ່ສາມາດເຫັນຮູບພາບ ທີ່ວ່ານາຍຄຣູຈັບ ວ່າໃຫ້ເບິ່ງຢູ່ປື້ມນີ້ເດີ້, ແຕ່ວ່າ ເຂົາບໍ່ມີບ່ອນເບິ່ງ ບໍ່ເຂົ້າໃຈດີປານໃດ ໂດຍສະເພາະກັບເດັກຊົນເຜົ່າເຮົານິ່ແຫຼະ ຢູ່ເຂດຫ່າງໄກ.”

ທ່ານວ່າ ການທີ່ເດັກນ້ອຍຊົນບົດ ຂາດປື້ມແບບຮຽນ ກໍຍ້ອນວ່າ ທາງໂຮງຮຽນ ບໍ່ມີງົບປະມານ ທີ່ຈະຊື້ປຶ້ມແບບຮຽນໃຫ້ ສ່ວນເງິນຄ່າ ທໍານຽມ ທີ່ເກັບຈາກນັກຮຽນ 1 ແສນກີບ ຕໍ່ຄົນຕໍ່ປີນັ້ນ ກໍເອົາໄປ ໝຸນໃຊ້ໃນການ ສ້ອມແປງໂຮງຮຽນ ແລະໃຊ້ວຽກ ບໍຣິຫານແນວອື່ນ:

“ງົບປະມານນີ້ບໍ່ມີ ມີແຕ່ມັນຈະເປັນເງິນຂອງຣັຖບານ ທຸກໂຮງຮຽນຈະໄດ້ເປັນຫົວຄົນ 1 ແສນກີບຕໍ່ປີເພາະວ່າໂຕນີ້ ຈະເປັນເງິນບໍຣິຫານ ໂຮງຮຽນ ຈະຊື້ປຶ້ມແທ້ບໍ່ພຽງພໍ ເພາະບາງເທື່ອມີການ ສ້ອມແປງໂຮງຮຽນ ມີການບົວລະບັດອັນນີ້ ອັນນັ້ນແດ່ ເຮັດໃຫ້ເງິນບໍ່ພໍ.”

ເຈົ້າໜ້າທີ່ທ່ານນີ້ກ່າວເພີ້ມວ່າ ຫາກເປັນໄປໄດ້ແທ້ ຢາກສເນີໃຫ້ກະຊວງສຶກສາ ສນອງປຶ້ມແບບຮຽນ ໃຫ້ກັບນັກຮຽນຊົນບົດຢ່າງພຽງພໍ ເພື່ອໃຫ້ ເດັກນ້ອຍຊົນເຜົ່າ ໄດ້ມີການຮຽນ ທຽມເທົ່າກັບນັກຮຽນ ທີ່ຢູ່ໃນເມືອງ.

ເຕັມຫນ້າ