ທວງຖາມຄ່າຊົດເຊີຽ, ຈາກໂຄງການຣົດໄຟ ລາວ-ຈີນ

ໄຊຍາ
2021-10-01
Share
ທວງຖາມຄ່າຊົດເຊີຽ, ຈາກໂຄງການຣົດໄຟ ລາວ-ຈີນ ປັດຈຸບັນ ການກໍ່ສ້າງ ທາງຣົດໄຟ ລາວ-ຈີນ ຄືບໜ້າ ເກືອບ 94% ແລ້ວ
ພາບຈາກ: ວີດີໂອ ພົລເມືອງ

ຊາວບ້ານເກືອບ 100 ຄອບຄົວ ຢູ່ເຂດບ້ານ ດົງໂພສີ ແລະ ບານດົງໂພນແຮ່ ເມືອງ ຫາດຊາຍຟອງ ນະຄອນຫຼວງວຽງຈັນ ຍັງທວງຖາມຄ່າ ຊົດເຊີຽຈາກໂຄງການ ກໍ່ສ້າງທາງຣົດໄຟ ລາວ-ຈີນ ຍ້ອນເປັນ ໄລຍະເວລາ ເກືອບ 2 ປີ ແລ້ວ ຊາວບ້ານເລົ່ານັ້ນ ຍັງບໍ່ໄດ້ຮັບຄ່າຊົດເຊີຽໃດໆ ຈາກພາກສ່ວນ ກ່ຽວຂ້ອງ ເຖິງແມ່ນວ່າ ເຫຼືອ ເວລາອີກ 3 ເດືອນປາຍກໍຈະມີ ພິທີເປີດນຳໃຊ້ ໂຄງການນີ້ ກໍຕາມ. ດັ່ງຊາວບ້ານ ຜູ້ໄດ້ຮັບຜົລ ກະທົບນາງນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 1 ຕຸລາ ນີ້ິວ່າ:

ໂອ ມັນຊິເຂົ້າ ສອງປີແລ້ວເດ້ ຍັງບໍ່ທັນໄດ້ ເທື່ອ ເພິ່ນວ່າ ຊິເອົາໃຫ້ ເພິ່ນກໍບໍ່ທັນໄດ້ເອົາໃຫ້ ປານນີ້ປະຊາຊົນນີ້ ກໍເດືອດຮ້ອນຫຼາຍ ເພິ່ນເອົາໄປໝົດເຫຼືອກໍ ເຫຼືອນ້ອຍດຽວ ນໍ້າກໍຖ້ວມ ເຮັດນາກໍບໍ່ໄດ້.

ຍານາງ ໄດ້ກ່າວຕື່ມວ່າ ກ່ອນໜ້ານີ້ ອົງການປົກຄອງ ຂັ້ນບ້ານ ແລະ ຂັ້ນເມືອງຫາດຊາຍຟອງ ກໍວ່າຈະໃຫ້ຄ່າຊົດເຊີຽໃນທ້າຍ ເດືອນກັນຍາ ຜ່ານມາ ແຕ່ມາຮອດ ເດືອນຕຸລາ ແລ້ວກໍຍັງບໍ່ເຫັນວ່າ ຈະຈ່າຍຄ່າຊົດເຊີຽໃຫ້. ສຳລັບ ອັດຕຣາ ຄິດໄລ່ ຄ່າທີ່ດິນ ທີ່ທາງການ ຈະຊົດເຊີຽໃຫ້ນັ້ນ ລາຄາ 150,000 ກີບ ຕໍ່ແມັດກາເຣ້ ແຕ່ຊາວບ້ານ ຫຼາຍຄົນຢາກໄດ້ ລາຄາ 270,000 ກີບ ຕໍ່ແມັດກາເຣ້ ຍ້ອນທີ່ດິນ ທີ່ຖືກໂຄງການ ເອົາໄປນັ້ນ ເປັນດິນ ເສຖກິຈ ທີ່ຕັ້ງຢູ່ແຄມທາງ 450 ປີ.

ໃນຂນະທີ່ຊາວບ້ານ ອີກທ່ານນຶ່ງກ່າວວ່າ ຕົນເອັງ ແລະ ຊາວບ້ານອີກຫຼາຍຄົນ ໄປທວງຖາມເຣື່ອງຄວາມຄືບໜ້າຂອງ ຄ່າຊົດເຊີຽຈາກໂຄງການ ດັ່ງກ່າວຈາກ ພາກສ່ວນ ທີ່ກ່ຽວຂ້ອງ ແຕ່ກໍບໍ່ໄດ້ ຮັບຄຳຕອບວ່າຈະໄດ້ເມື່ອໃດ.
ຊາວບ້ານ ຫຼາຍຄົນຍັງບໍ່ ໄດ້ເງິນຄ່າ ເຊົ່າດິນໂຄງການ ຫັ້ນຊິແລ້ວໆ ຖາມຫາເງິນ ວ່າຊຸມເຈົ້າ ບໍ່ຕ້ອງມາເດີ້ ເພິ່ນວ່າ ບໍ່ຕ້ອງມາດອກ ຄັນຊິເວົ້າຄວາມເກົ່າ ບໍ່ຕ້ອງມາ ຄັນເຮົາເວົ້າຫຼາຍ ເພິ່ນກໍວ່າ ຢ່າເວົ້າຫຼາຍດຽວເພິ່ນ ຊິຈັບ ຫັ້ນຫວະ ຊິຈັບຂໍ້ຫາຫຍັງ ເຮົາເນາະ ແມ່ນບໍ່.

ສ່ວນຊາວບ້ານ ທີ່ຍັງລໍຖ້າ ຄ່າຊົດເຊີຽຈາກໂຄງການ ດັ່ງກ່າວອີກທ່ານນຶ່ງ ກ່າວວ່າ ໃນໄລຍະທີ່ຜ່ານມາເຈົ້າໜ້າທີ່ ທີ່ກ່ຽວຂ້ອງ ໄດ້ເອີ້ນຊາວບ້ານ ໄປໂອ້ລົມເຣື່ອງ ຄ່າຊົດເຊີຽແລ້ວ ຫຼາຍເທື່ອ ແຕ່ກໍຍັງບໍ່ມີທ່າທີ່ວ່າ ຈະໄດ້ເງິນຄ່າຊົດເຊີຽ ແລະ ເມື່ອທວງຖາມ ໄປກໍບໍ່ໄດ້ຄຳຕອບຫຍັງ.
ຄອງຄອຍມາ ນີ້ບັກຫຼາຍໆ ເດືອນແລ້ວ ແຕ່ເຣີ້ມບຸກເບີກ ພຸ້ນລະຊິຮອດປີແລ້ວ ພາກັນໄປ ປະຊຸມຫຼາຍເທື່ອ ແລ້ວກໍເອີ້ນໄປ ກໍໄປຊື່ໆ 5-6 ເທື່ອບໍ່ມີ ວີ່ແວ່ວ ອີ່ຫຍັງເລີຍນ່າ ໂທໄປລາງເທື່ອ ກໍບໍ່ຮັບຊໍ້າແລ້ວກໍໂຍນໃຫ້ຜູ້ນັ້ນ ໂຍນໃຫ້ຜູ້ນີ້ ຢູ່ນ່າ.

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາ ຄນະໄກ່ເກັ່ຽຄ່າຊົດເຊີຽ ຈາກໂຄງການ ກໍ່ສ້າງທາງຣົດໄຟລາວ-ຈີນ ປະຈຳເມືອງຫາດຊາຍຟອງ ເພື່ອສອບຖາມ ຄວາມຄືບໜ້າ ເພີ່ມຕື່ມຂອງ ແຜນການຊົດເຊີຽແກ່ຊາວບ້ານ ແຕ່ເຈົ້າໜ້າທີ່ ທີ່ກ່ຽວຂ້ອງ ຍັງບໍ່ສະດວກ ໃຫ້ສັມພາດ.

ເຖິງຢ່າງໃດ ກໍຕາມ ເຈົ້າໜ້າທີ່ ຫ້ອງການພາຍໃນ ເມືອງຫາດຊາຍຟອງ ທີ່ບໍ່ປະສົງອອກຊື່ ແລະ ສຽງກ່າວພຽງແຕ່ວ່າ. ປັຈຈຸບັນຍັງບໍ່ທັນມີ ແຈ້ງການກ່ຽວກັບ ການຊົດເຊີຽ ແກ່ຊາວບ້ານ ທີ່ຍັງເຫຼືອຢູ່ ແລະຍັງບໍ່ສາມາດ ໃຫ້ລາຍລະອຽດໄດ້ ວ່າຍັງເຫຼືອຢູ່ ຈັກຄອບຄົວ ທີ່ຍັງລໍຖ້າການ ຊົດເຊີຽ ຈາກໂຄງການ ກໍ່ສ້າງທາງຣົດໄຟ ລາວ-ຈີນ.

ໃນຂນະດຽວກັນ ກໍມີຊາວບ້ານ ຈຳນວນນຶ່ງ ຢູ່ເມືອງນາຊາຍທອງ ທີ່ຖືກຜົລກະທົບ ບາງສ່ວນຈາກໂຄງການ ກໍ່ສ້າງທາງຣົດໄຟ ລາວ-ຈີນ ກໍຍັງລໍຖ້າ ການດັດແກ້ໃບຕາດິນໃໝ່ ຈາກພາກ ສ່ວນທີ່ກ່ຽວຂ້ອງຊຶ່ງຜ່ານໄປ ເກືອບຮອດ 2 ປີ ແລ້ວ ຊາວບ້ານ ຍັງບໍ່ໄດ້ ໃບຕາດິນໃໝ່ເທື່ອ. ຊາວບ້ານ ຢູ່ເມືອງນາຊາຍທອງ ທ່ານນຶ່ງກ່າວວ່າ.
ການຊົດເຊີຽ ຫັ້ນໄດ້ໝົດແລ້ວ ຍັງແຕ່ໃບຕາດິນ ເພິ່ນເອົາໄປ ກໍເພິ່ນຊິໄປ ດັດແປງໃຫ້ ຫັ້ນມັນໄດ້ 2 ປີແລ້ວເດ້ ເພິ່ນເວົ້າວ່າ ໃບຕາດິນ ຜູ້ຖືກແຕະຕ້ອງ ຫັ້ນທາງຣັຖ ເພິ່ນຊິ ໄປເຮັດໃໝ່ ໃຫ້ໂດຍ ບໍ່ໃຫ້ໄດ້ເສັຽເງິນ ເສັຽຄຳຊັ້ນນ່າ ໄປເຮັດໃບໃໝ່ ອອກໃໝ່ ວ່າມັນເຫຼືອເທົ່າ ໃດກວ້າງເທົ່າໃດ ຍາວເທົ່າໃດ.

ທາງດ້ານເຈົ້າໜ້າທີ່ ຫ້ອງການປົກຄອງ ເມືອງນາຊາຍທອງ ກ່າວວ່າ ມາຮອດປັຈຈຸບັນ ການດັດ ແກ້ໃບຕາດິນໃໝ່ ໃຫ້ແກ່ຊາວບ້ານ ທີ່ຖືກຜົລກະທົບ ຈາກໂຄງການ ກໍ່ສ້າງທາງຣົດໄຟ ລາວ-ຈີນ ຢູ່ເມືອງນາຊາຍທອງ ຍັງບໍ່ທັນສຳເຣັດເທື່ອ.

ໂອ ໃບຕາດິນ ໂຕນິີ້ຫັ້ນນ່າ ບໍ່ທັນແລ້ວເດີ້ ໂທຖາມ ຄນະກັມການ ເພິ່ນລອງເບິ່ງເດີ້ ໂທຖາມເພິ່ນເບິ່ງເດີ້ ດີເດີ້.”

ວິທຍຸເອເຊັຽເສຣີ ໄດ້ຕິດຕໍ່ຫາ ຄນະໄກ່ເກັ່ຽ ຄ່າຊົດເຊີຽ ຈາກໂຄງການ ກໍ່ສ້າງທາງຣົດໄຟ ລາວ-ຈີນປະຈຳ ເມືອງນາຊາຍທອງ ເພື່ອສອບຖາມ ຄວາມຄືບໜ້າ ກ່ຽວກັບການ ດັດແກ້ໃບຕາ ດິນໃຫ້ ຊາວບ້ານ ແລະຖາມ ຕື່ມວ່າ ມີຊາວບ້ານ ຈັກຄອບຄົວ ທີ່ຍັງລໍຖ້າການ ດັດແກ້ໃບຕາດິນດັ່ງກ່າວ ແຕ່ເຈົ້າໜ້າທີ່ ຊີ້ແຈງພຽງ ແຕ່ວ່າ ກຳລັງດຳເນີນການຢູ່ ບໍ່ສາມາດ ໃຫ້ລາຍລະອຽດໄດ້ເທື່ອ.

ມາຮອດປັຈຈຸບັນ ໂຄງການກໍ່ສ້າງ ທາງຣົດໄຟ ລາວ-ຈີນ ຕັ້ງແຕ່ ນະຄອນຫຼວງວຽງຈັນ ຫາ ແຂວງຫຼວງນໍ້າທາ ມີຄວາມຍາວ ປະມານ 422 ກິໂລແມັດ ແລະ ມູນຄ່າການລົງທືນ ກໍ່ສ້າງເກືອບ 6 ຕື້ໂດລາຣ໌ສະຫະຣັຖ ມີຄວາມຄືບໜ້າ ປະມານ 94%, ຫຼ້າສຸດ ການກໍ່ສ້າງ ສະຖານີ ຣົດໄຟ ຫຼາຍແຫ່ງກໍສຳເຣັດ ເກືອບໝົດແລ້ວ ພ້ອມທັງຈະມີການ ທົດລອງແລ່ນ ຫົວຈັກແບບ ເປັນທາງການພາຍ ໃນເດືອນນີ້ກ່ອນຈະະເປີດ ໃຊ້ໃນວັນທີ 2 ທັນວາ ນີ້.

ສຸກ ຊານດິເອໂກ້
ສຸກ ຊານດິເອໂກ້ says:
Oct 03, 2021 11:46 AM

ຄິດວ່າຈີນມັນບໍ່ໃຫ້ແລ້ວຄັນມັນໃຫ້ມັນໃຫ້ແຕ່ດົນແລ້ວ ລືອາດຂະເປັນຍ້ອນເງິນນັ້ນຖືກຣັຖບາລສໍ້ໂກງໄປແລ້ວ. ຂໍໃຫ້ພີ່ນ້ອງໄປຮ້ອງຂໍນຳຜູ້ແທນເພື່ອໃຫ້ເພິ່ນຕິດຕາມໃຫ້ອີກແຮງ ບໍ່ຊັ້ນພວກເຈັກຈີນຫີນຫໍ້ມັນບໍ່ສົນພວກເຈົ້າດອກທ່ານ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ