ຄົນງານລາວ ໄດ້ຮັບເງິນໜ້ອຍນຳບໍລິສັດ ຕ່າງປະເທດໃນລາວ

ບໍລິສັດຕ່າງປະເທດໃນລາວ ຈໍານວນນຶ່ງ ເປັນຕົ້ນບໍລິສັດຈີນ ຍັງຈ່າຍຄ່າແຮງງານ ໃຫ້ຄົນງານລາວ ຕາມອັດຕາເງິນເດືອນຂັ້ນຕໍ່າຂອງທາງການລາວຢູ່ ເຖິງແມ່ນວ່າ ເງິນກີບອ່ອນຄ່າ ແລະເຟີ້ຫຼາຍ, ລາຄາສິນຄ້າແພງຂື້ນນໍາເລື້ອຍໆ, ຊີວິດການເປັນຢູ່ຂອງຄົນງານ ຫຍຸ້ງຍາກສັບສົນ ເຮັດໃຫ້ຄົນງານລາວ ບໍ່ສົນໃຈນໍາການເຮັດວຽກຢູ່ພາຍໃນປະເທດ, ພາກັນພະຍາຍາມຊອກຊ່ອງທາງ ໄປເຮັດວຽກຢູ່ຕ່າງປະເທດ ເປັນຕົ້ນປະເທດໄທ ແລະເກົາຫຼີໃຕ້ ດັ່ງເຈົ້າໜ້າທີ່ ທີ່ເຮັດວຽກດ້ານການຈັດສົ່ງຄົນງານລາວ ໄປເຮັດວຽກຢູ່ຕ່າງປະເທດ ນາງນຶ່ງເວົ້າຕໍ່ວິທຍຸເອເຊັຍເສຣີ ໃນມື້ວັນທີ 28 ສິງຫາ 2024 ນີ້ວ່າ:

“ຄັນເວົ້າຕາມເລດລາວເນາະ ຄ່າແຮງຂັ້ນຕໍ່າມັນກະມີແຕ່ 1,000,000 ປາຍນີ້ມັນກໍບໍ່ກຸ້ມກິນ ຂະເຈົ້າຄັນວ່າເລີ້ມຕົ້ນເງິນເດືອນ ຖ້າວ່າຢາກໃຫ້ສົນໃຈແທ້ ກໍປະມານລະດັບ 3,000,000 ຂຶ້ນໄປ ຄັນວ່າໄລ່ເລດເປັນເງິນກີບນີ້ ມັນຟັງສິດູດີກວ່າ ຖ້າບໍ່ກາຍກໍບໍ່ມີຄົນຫັ້ນແຫລະ ເວົ້າຄວາມຊື່ສາເນາະ ເພາະວ່າຕອນນີ້ໂຮງງານ ຂອງຈີນກໍມາເປີດຢູ່ກໍຫລາຍ ແມ່ນແຫລະມັນຂຶ້ນກັບໜ້າວຽກເດ້ ແລ້ວກໍນິໃສຄົນຈີນ ມັນກໍຕ່າງຈາກຄົນໄທຄົນລາວເຮົາຫັ້ນນ່າ ຊອກຄົນຍາກຢູ່ຊ້ວງນີ້.”

ໃນໄລຍະ 5 ປີ ທີ່ຜ່ານມານີ້ ມີນັກທຸລະກິດຈີນ ເຂົ້າມາລົງທຶນໃນຂະແໜງການຕ່າງໆ ຢູ່ປະເທດລາວ ເປັນຈໍານວນຫຼວງຫຼາຍ ຊຶ່ງສ່ວນນຶ່ງກໍເປັນຍ້ອນ ຄ່າເງິນກີບອ່ອນຄ່າລົງເລື້ອຍໆ ແລະເງິນກີບເຟີ້ຂື້ນຢ່າງຕໍ່ເນື່ອງ ເຮັດໃຫ້ຕົ້ນທຶນຄ່າຈ້າງແຮງງານຂອງຄົນງານລາວ ຖືກລົງ ແລະພວກເຂົາໄດ້ກໍາໄລຫຼາຍຂື້ນ.

ກ່ຽວກັບເລື່ອງທີ່ວ່ານີ້ ພະນັກງານ ທີ່ຊອກຫາຄົນງານລາວ ໄປເຮັດວຽກນໍາບໍລິ ສັດນໍາເຂົ້າ ແລະສົ່ງອອກສິນຄ້າ ຂອງນັກທຸລະກິດຈີນ ຜູ້ນຶ່ງເວົ້າຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ ກ່ອນຈະມາລົງທຶນ ຢູ່ປະເທດລາວ ນັກທຸກິດຕ່າງປະ ເທດ ຈະຕ້ອງໄດ້ຄິດໄລ່ ເລື່ອງອັດຕາຄ່າຈ້າງແຮງງານຂັ້ນຕໍ່າ ຂອງຄົນງານລາວ ທີ່ທາງການກໍານົດອອກນັ້ນກ່ອນ ແລະບໍລິສັດຕ່າງປະເທດຈໍານວນນຶ່ງ ກໍຄິດ ໄລ່ຄ່າຈ້າງແຮງງານ ໃຫ້ຄົນງານຄືທີ່ວ່ານັ້ນ ແລະອີງຕາມຄວາມສາມາດຂອງຄົນງານ ຊຶ່ງເປັນເງື່ຶອນໄຂທີ່ບໍ່ຄົງທີ່ ດັ່ງທີ່ທ່ານກ່າວວ່າ:

“ເຮັດນໍາຈີນ ແລ້ວແຕ່ຕົກລົງກັນນ່າ ເຈົ້າ ມັນມີເງິນຈີນກັບເງິນກີບ ເຈົ້າ ສັນຍາກໍຂຽນໃສ່ລະບຸໃນຫັ້ນເລີຍ ແຕ່ວ່າຄັນວ່າເປັນຄົນລາວແທ້ໆ ກໍໃຫ້ເປັນເງິນກີບ ໃຫ້ເພິ່ນຫັ້ນແຫລະ ບາງຄົນເຂົາກໍຢາກເອີ້ນເງິນໂດລ້າບໍ່ ຕອນເຂົາມາສໍາພາດຫັ້ນນ່າ ຕອນໂພສລົງໆ ກໍຂຶ້ນນໍາເຮົາເວົ້າວ່າໃຫ້ເປັນເງິນເທົ່າໃດໆ ເຮົາຕ້ອງຂຽນລະບຸໄວ້ ແມ່ນແຫລະ ຂຶ້ນນໍາບໍລິສັດວ່າ ເຮົາຈ່າຍແລ້ວກໍໄລ່ໄປຈັ່ງຊັ້ນເນາະ ເພາະວ່າອີງຕາມເລດທະນາຄານ ຄັນວ່າເຮົາສິໄປເອົາເລດນອກ ມັນຜິດກົດໝາຍ ແມ່ນ.”

ອີງຕາມກົດໝາຍແຮງງານ ແລະລະບຽບການຂອງທະນາຄານແຫ່ງ ສປປລາວ, ບໍລິສັດຕ່າງປະເທດ ທີ່ເຂົ້າມາລົງທຶນຢູ່ປະເທດລາວ ຈະຕ້ອງຈ່າຍຄ່າຈ້າງແຮງງານ ໃຫ້ຄົນງານລາວ ຕາມອັດຕາຄ່າຈ້າງແຮງງານຂອງລາວ ແລະຖ້າຫາກຕ້ອງການຈ່າຍຄ່າແຮງງານ ໃຫ້ຄົນງານລາວ ເປັນເງິນກີບ ກໍຈະຕ້ອງຄິດໄລ່ຕາມອັດຕາແລກປ່ຽນເງິນຕາ ທີ່ທະນາຄານຂອງ ສປປລາວ ກໍານົດ ດັ່ງທີ່ເຈົ້າໜ້າທີ່ພະແນກແຮງງານ ແລະສະຫວັດດິການສົງຄົມ ຢູ່ພາກເໜືອຂອງປະເທດລາວ ທ່ານນຶ່ງກ່າວຕໍ່ວິທຍຸເອເຊັຍເສຣີ ໃນມື້ວັນທີ 28 ສິງຫາ 2024 ນີ້ວ່າ:

“ເປັນຄົນຈ້າງງານຢູ່ລາວເນາະ ເຮົາເປັນບໍລິສັດໄທ ກໍຕ້ອງຈ່າຍເປັນແບບເງິນໄທ ແຕ່ກໍຕ້ອງຄິດໄລ່ເປັນເງິນລາວ ຖືກທໍ່ໃດແລ້ວກໍຈ່າຍເປັນເງິລາວ ແນວນັ້ນເນາະ ບໍລິສັດໄທຫັ້ນ ມາລົງທຶນຢູ່ລາວແລ້ວມາຈ້າງງານຢູ່ລາວ ກໍມາຄິດໄລ່ວ່າ ໂອ໋ ເດືອນນຶ່ງໄດ້ເທົ່ານີ້ 1,000 ບາດຫລືເທົ່ານີ້ 10,000 ບາດແລ້ວຈະຄູນເງິນກີບລາວ ແລ້ວມັນຖືກເທົ່າໃດກໍຈ່າຍເງິນລາວ ສົມມຸດວ່າຖືກ 5,000,000 ກໍຈ່າຍ 5,000,000 ຖືກ 10,000,000 ກໍຈ່າຍເງິນກີບ 10,000,000.”

ທ່ານກ່າວຕື່ມວ່າ ເຖິງຢ່າງໃດກໍຕາມ ກໍຍັງມີບໍລິສັດຕ່າງປະເທດ ຮວມທັງບໍລິ ສັດຈີນ ແລະບໍລິສັດໄທ ຍັງຈ່າຍຄ່າແຮງງານ ໃຫ້ຄົນງານຢູ່ປະເທດລາວ ຕາມອັດຕາຄ່າແຮງງານຂັ້ນຕໍ່າ ທີ່ທາງການລາວກໍານົດເອົາໄວ້ ຫຼືສູງກວ່ານັ້ນໜ່ອຍນຶ່ງ ຊຶ່ງກໍຍັງຖືວ່າ ເປັນຄ່າຈ້າງທີ່ໜ້ອຍຫຼາຍ ແລະບໍ່ສອດຄ່ອງກັບຄ່າຄອງຊີບ ທີ່ຖີບສູງຂື້ນນັບມື້ ດັ່ງນັ້ນ ຄົນງານລາວ ຈຶ່ງບໍ່ຕ້ອງການເຮັດວຽກນໍາ ແລະເຮັດໃຫ້ມີຜົນກະທົບ ຕໍ່ຫຼາຍບໍລິສັດຢູ່ປະເທດລາວ ຄືບໍລິສັດປະສົບກັບບັນຫາ ການຂາດແຄນຄົນງານ.

ແລະຄົນງານລາວ ທີ່ເຮັດວຽກນໍາບໍລິສັດຈີນ ຢູ່ໃນເຂດເສດຖະກິດພິເສດສາມ ຫຼ່ຽມຄໍາ ຢູ່ເມືອງຕົ້ນເຜິ້ງ ແຂວງບໍ່ແກ້ວ ຜູ້ນຶ່ງກໍເວົ້າໃນມື້ດຽວກັນນີ້ວ່າ ຖ້າຫາກບໍລິສັດໃດ ໃຫ້ຄ່າຈ້າງແຮງງານ ແກ່ຄົນງານລາວໃນແຕ່ລະເດືອນ ເປັນເງິນກີບ ຕາມທີ່ທາງການກໍານົດ ກໍຈະເຮັດໃຫ້ຄ່າແຮງງານໃນແຕ່ລະເດືອນ ບໍ່ເທົ່າກັນ ຍ້ອນອັດຕາແລກປ່ຽນເງິນຕາ ໃນແຕ່ລະໄລຍະແຕກຕ່າງກັນ ດັ່ງທີ່ທ່ານກ່າວໃນມື້ດຽວກັນນີ້ວ່າ:

“ແມ່ນ ຖືກຕ້ອງແລ້ວ ໄດ້ໆແບໃດກໍໄດ້ຫັ້ນນ່າ ກໍອີງຕາມແຕ່ລະມື້ ເຮົາມັນກໍສິຕ່າງກັນ ມັນຈະບໍ່ຄືກັນຊີ້ນ່າ ແຕ່ລະມື້ຫັ້ນນ່າ ມື້ນຶ່ງບາງທີກໍ 3,200 ບາງທີກໍ 3,150 ມັນກໍອີງຕາມແຕ່ລະມື້ຫັ້ນແຫລະ ມັນຄືກັບເງິນບາດຫັ້ນແຫລະ ມັນເລດແຕ່ລະມື້ມັນຈະບໍ່ຄືກັນ ເຂົ້າໃຈບໍ່ ເຮົາບໍ່ສາມາດກໍານົດໄດ້ວ່າ ມື້ນີ້ມັນຈະເລດຈັກພັນໆ.”

ອີງຕາມແຈ້ງການ ຂອງຄະນະກໍາມະການແຮງງານແຫ່ງຊາດ, ກະຊວງແຮງງານ ແລະສະຫວັດດິການສັງຄົມ ໃນມື້ວັນທີ 13 ສິງຫາ 2024 ນີ້, ຫົວໜ່ວຍແຮງງານໃດ ທີ່ກໍານົດການເບີກຈ່າຍເງິນເດືອນ ຫລືຄ່າແຮງງານ ແລະນະໂຍ ບາຍອື່ນ ໃຫ້ຜູ້ອອກແຮງງານຂອງຕົນ ເປັນສະກຸນເງິນຕາຕ່າງປະເທດ ແລ້ວຈ່າຍເປັນເງິນກີບ ແມ່ນໃຫ້ຄິດໄລ່ບໍ່ໃຫ້ຫຼຸດ ຕາມອັດຕາແລກປ່ຽນ ຂອງທະນາ ຄານທຸລະກິດໃດນຶ່ງ ທີ່ກໍານົດອອກຫຼ້າສຸດໃນວັນໃດນຶ່ງ ພາຍໃນ 3 ວັນລັດຖະການ ກ່ອນວັນຄິດໄລ່ເງິນເດືອນ ເປັນພື້ນຖານໃນການຄິດໄລ່ ໂດຍສອດຄ່ອງກັບກົດໝາຍ ແລະລະບຽບການ ຂອງທະນາຄານແຫ່ງ ສປປລາວ ກໍານົດໃນແຕ່ລະໄລຍະ.

ແຕ່ຢ່າງໃດກໍຕາມ ຖ້າຫົວໜ່ວຍທຸລະກິດໃດ ປະຕິບັດບໍ່ສອດຄ່ອງ ແມ່ນໃຫ້ປັບປຸງແກ້ໄຂສັນຍາແຮງງານ ແລະກົດລະບຽບພາຍໃນຂອງຕົນໃຫ້ສໍາເລັດ. ແລະຖ້າຫາກຫົວໜ່ວຍທຸລະກິດໃດ ເບີກຈ່າຍເງິນເດືອນ ຫຼືຄ່າແຮງງານ ແລະນະໂຍບາຍອື່ນ ໂດຍກໍານົດອັດຕາແລກປ່ຽນ ຕໍ່າກວ່າອັດຕາແລກປ່ຽນ ທີ່ທະ ນາຄານກໍານົດໄວ້ ແມ່ນຈະຖືກກ່າວຕືອນ, ປະຕິບັດຕາມກົດໝາຍ ແລະລະ ບຽບການທີ່ກ່ຽວຂ້ອງ ພ້ອມທັງຕ້ອງຄິດໄລ່ຄືນໃຫ້ແກ່ຜູ້ອອກແຮງງານ ເລີ້ມຕັ້ງແຕ່ວັນທີ 1 ຕຸລາ 2024 ເປັນຕົ້ນໄປ.