ການລົງທຶນ ຈາກຕ່າງປະເທດ ໃນເຂດເສຖກິຈ ພິເສດ ຢູ່ລາວຫຼຸດລົງຫຼາຍ

ສະຖາບັນຄົ້ນຄວ້າ ເສຖກິຈ ມະຫາພາກ ຂອງສະຖາບັນ ວິທະຍາສາດ ເສຖກິຈ ແລະສັງຄົມແຫ່ງຊາຕລາວ ຣາຍງານວ່າ ມູນຄ່າການລົງທຶນ ໃນເຂດເສຖກິຈພິເສດ ຢູ່ລາວຫຼຸດລົງ ຄືຈາກ 210.1 ລ້ານໂດລ້າຣ໌ ສະຫະຣັຖ ໃນປີ 2021 ມາເປັນ 65.7 ລ້ານໂດລ້າຣ໌ ສະຫະຣັຖ ໃນປີ 2022 ຄື ຫຼຸດລົງ 69%.
ສາເຫດທີ່ເຮັດໃຫ້ມູນຄ່າ ການລົງທຶນຫຼຸດລົງ ຫຼາຍຄືແນວນັ້ນ ແມ່ນຍ້ອນຫຼາຍປັດໄຈ ຊຶ່ງໃນນັ້ນສ່ວນນຶ່ງ ກໍແມ່ນໄດ້ຮັບຜົລກະທົບ ຈາກການຣະບາດ ຂອງໂຄວິດ-19, ມີການປິດປະເທດ, ບັນຫາເງິນເຟີ້, ເງິນກີບອ່ອນຄ່າ, ຣາຍຮັບຕໍ່າ, ຄ່າຄອງຊີບສູງ, ແຕ່ພາຍຫຼັງທີ່ມີການເປີດປະເທດ ໃນກາງປີ 2022 ມາ ກໍເຣີ່ມມີນັກທຸ ຣະກິຈຈີນເຂົ້າມາລົງທຶນຫຼາຍຂຶ້ນ ແລະນັກທຸຣະກິຈລາວ ກໍສເນີລົງທຶນຫຼາຍ.

ດັ່ງເຈົ້າໜ້າທີ່ ແຜນການລົງທຶນ ຜູ້ຂໍສງວນຊື່ ແລະຕໍາແໜ່ງທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນມື້ວັນທີ 2 ມິຖຸນານີ້ວ່າ:

“ໂຄວິດນີ້ມັນຕ້ອງຫຼຸດລົງ ຢູ່ແລ້ວນໍ ເປັນບັນຫາທີ່ການ ເຂົ້າ-ອອກ ການໄປມາຫາສູ່ກັນບໍ່ໄດ້ ມີສ່ວນກ່ຽວກັນ ເງິນເຟີ້ກໍມີ ເວົ້າເຣື່ອງອັດຕຣາແລກປ່ຽນ ກໍມີຜົລກະທົບ ແຕ່ຫຼັງຈາກເປີດ ປະເທດແລ້ວ ຈີນເຂົ້າມານີ້ກໍເຣີ່ມຫຼາຍກວ່າເກົ່າແລ້ວ ຄົນລາວເອງກໍເຣີ່ມສເນີ ລົງທຶນຫຼາຍ.”
ເຖິງແມ່ນນັກທຸຣະກິຈ ຕ່າງປະເທດ ຍັງບໍ່ເຂົ້າມາລົງທຶນຫຼາຍ ແຕ່ກໍມີຄົນລາວເຂົ້າຈົດທະບຽນ ເຮັດທຸຣະກິຈເພີ່ມຂຶ້ນເຖິງ 36% ຊຶ່ງສ່ວນໃຫຍ່ແມ່ນທະບຽນການຄ້າ. ອີງຕາມການຣາຍງານລ່າສຸດ ຂອງສະຖາບັນຄົ້ນຄວ້າເສຖກິຈ ມະຫາພາກ, ຈໍານວນທຸຣະກິຈໃໝ່ ທີ່ຄົນລາວຈົດທະບຽນ ໃນປີ 2022 ມີ 18,218 ແຫ່ງ ຊຶ່ງເມື່ອ ປີ 2021 ມີ13,392 ແຫ່ງ.
ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ທີ່ກ່ຽວຂ້ອງ ຢູ່ແຂວງສວັນນະເຂດ ຜູ້ຂໍສງວນຊື່ ແລະ ຕໍາແໜ່ງທ່ານນຶ່ງ ເວົ້າວ່າ ໃນໄລຍະທີ່ລາວຍັງບໍ່ເປີດປະເທດ ການລົງທຶນໃນເຂດເສຖກິຈ ພິເສດສວັນ-ເຊໂນກໍຫຼຸດລົງ ຍ້ອນຜົລກະທົບຈາກ ໂຄວິດ-19 ແລະ ໃນກາງປີ 2022 ພາຍຫລັງເປີດປະເທດ ກໍເຣີ່ມມີນັກທຸຣະກິຈຕ່າງປະເທດ ເຂົ້າມາລົງທຶນຢູ່ ແຕ່ຍັງບໍ່ຫຼາຍ.

“ຫລຸດແຫຼະ ຊ່ວງໂຄວິດນີ້ຫຼຸດລົງ ພວກທີ່ຈົດທະບຽນໃນເມື່ອກ່ອນນໍ ເຂົາເຈົ້າກະບໍ່ມີການເຄື່ອນໄຫວ ກະມາໂຈະກະຫຼາຍ ໃນໄລຍະນີ້ກະຊິວ່າເພີ່ມ ກໍບໍ່ເພີ່ມ ຕ່າງປະເທດກໍເພີ່ມເລັກນ້ອຍ ມັນກໍຊິມີຫຼາຍປັດໄຈນໍໂຕນີ້ຫັ້ນນະ.”
ເຈົ້າໜ້າທີ່ ທີ່ກ່ຽວຂ້ອງອີກທ່ານນຶ່ງ ກໍເວົ້າວ່າ ການເຂົ້າມາລົງທຶນ ໃນເຂດເສຖກິຈພິເສດ ທີ່ຜ່ານມາຫຼຸດລົງ ຍ້ອນຜົລກະທົບຈາກ ໂຄວິດ-19, ຂະນະນີ້ແມ່ນສຸມໃສ່ ເຣື່ອງການລົງທຶນ ດ້ານກະສິກັມ ແລະການທ່ອງທ່ຽວ.

“ຖ້າວ່າຫລຸດລົງ ມັນກະຫຼຸດລົງແດ່ນໍ ຊ່ວງຫັ້ນກໍນັກລົງທຶນເພິ່ນເຂົ້າ-ອອກ ຍາກເດ ພວກເຮົາກໍຍັງເປີດຢູ່ນໍການລົງທຶນ ຖືວ່າຍັງມີບັນຍາກາດຢູ່ ໂດຍລວມພວກເຮົາກໍສຸມໃສ່ ວຽກກະສິກັມ ກັບວຽກການທ່ອງທ່ຽວ.”
ຢູ່ເຂດເສຖກິຈ ພິເສດໃນນະຄອນຫຼວງວຽງຈັນ ປີ 2022 ມີ 32 ບໍຣິສັດເຂົ້າມາລົງທຶນ ແລະປີນີ້ກໍມີການລົງທຶນເພີ່ມຂຶ້ນ ແລະຕ້ອງການຄົນງານລາວຫຼາຍ ບໍ່ຫລຸດ 2,000 ຄົນ ຍ້ອນຄົນງານ ຈໍານວນນຶ່ງລາອອກ ເພາະບໍ່ສາມາດຢູ່ໃນກົດລະບຽບ ຂອງບໍຣິສັດໄດ້, ຈໍານວນນຶ່ງກໍບໍ່ມີປະສົບການ ໃນວຽກງານ ຍ້ອນວ່າ ພວກເຂົາເຈົ້າມາຈາກເຂດນອກ ເຄີຍແຕ່ເຮັດໄຮ່ ເຮັດສວນ ແລະຜູ້ທີ່ຮຽນຈົບປະຣິນຍາຕຣີ ຂຶ້ນໄປ ຫຼາຍຄົນກໍບໍ່ຢາກເຮັດ ຍ້ອນໄດ້ເງິນເດືອນໜ້ອຍ, ບໍ່ກຸ້ມຢູ່ບໍ່ກຸ້ມກິນ.

“ແມ່ນໆ ຂາດແຄນຢູ່ ເພາະວ່າຍັງຕ້ອງການຫຼາຍຫັ້ນນະ ທຸກໆບໍຣິສັດເລີຍ ສ່ວນຫຼາຍຄົນຈົບປະຣິນຍາຕຣີຂຶ້ນໄປ ເຂົາເຈົ້າກໍບໍ່ມັກວຽກແບບຊີ້ຫັ້ນນະ ສ່ວນຫຼາຍແມ່ນຄົນເຂດນອກ ເຂົາເຈົ້າມາສມັກ ບາງຄົນກໍເຮັດບໍ່ໄດ້ຊີ້ນະ ມັນວຽກແຕ່ລະຄົນມັນບໍ່ຖນັດ ຢູ່ໃນກົດລະບຽບຂອງບໍຣິສັດນ່າ.”
ຢູ່ເຂດເສຖກິຈ ພິເສດສາມຫລ່ຽມຄໍາ ທີ່ເມືອງຕົ້ນເຜິ້ງ ແຂວງບໍ່ແກ້ວ ເຈົ້າໜ້າທີ່ທີ່ກ່ຽວຂ້ອງ ຜູ້ຂໍສງວນຊື່ ແລະຕໍາແໜ່ງທ່ານນຶ່ງເວົ້າວ່າ ໃນໄລຍະເກີດໂຄວິດ-19 ແຮງ ເຂດເສຖກິຈນີ້ ກໍປະສົບບັນຫາບໍ່ຕ່າງຫຍັງກັບເຂດອື່ນ, ແຕ່ປັດຈຸບັນ ກໍມີນັກທຸຣະກິຈ ເຂົ້າມາລົງທຶນເພີ່ມຂຶ້ນ.

ເວົ້າເຖິງເຣື່ອງ ຄວາມຕ້ອງການຄົນງານ ນາງ ສີສະຫວັດ ໂຄດທະວົງສາ ປະທານສະຫະພັນ ກັມມະບານແຂວງສວັນນະເຂດ ໄດ້ຣາຍງານເມື່ອທ້າຍເດືອນເມສາ ທີ່ຜ່ານມາວ່າ ເຂດເສຖກິຈ ພິເສດ ສວັນ-ເຊໂນ ຍັງຕ້ອງການຄົນງານລາວ ຈໍານວນຫຼາຍ. ໃນນັ້ນມີບໍຣິສັດ ຕ້ອງການຄົນງານບໍ່ຕໍ່າກວ່າ 100 ຄົນ, ແຕ່ຄົນງານລາວພາກັນຫຼັ່ງໄຫຼ ໄປເຮັດວຽກຢູ່ປະເທດໄທຍ ຍ້ອນເຮັດວຽກຢູ່ລາວ ໄດ້ເງິນເດືອນໜ້ອຍ ຂະນະທີ່ຄ່າຄອງຊີບ ຢູ່ລາວເພີ່ມສູງຂຶ້ນ, ຍ້ອນບັນຫາເງິນກີບເຟີ້, ເງິນກີບອ່ອນຄ່າລົງເລື້ອຍໆ ແລະທາງການແຂວງສວັນນະເຂດ ບໍ່ສາມາດຕອບສນອງຄົນງານ ໃຫ້ໄດ້ຕາມທີ່ຕ້ອງການ.

ປັດຈຸບັນ ຢູ່ ສປປ ລາວ ມີເຂດເສຖກິຈພິເສດ ທັງໝົດ 22 ເຂດ ຢູ່ 8 ແຂວງ ຄືແຂວງຫຼວງນໍ້າທາ, ບໍ່ແກ້ວ, ອຸດົມໄຊ, ຫຼວງພຣະບາງ, ນະຄອນຫຼວງວຽງຈັນແຂວງຄໍາມ່ວນ, ສວັນນະເຂດ ແລະແຂວງຈໍາປາສັກ. ທັງໝົດມີ 1,184 ບໍຣິສັດລົງທຶນ, ມີຄົນງານທັງໝົດ 61,482 ຄົນ. ໃນນັ້ນເປັນຄົນງານລາວ 32,059 ຄົນ ສ່ວນທີ່ເຫລືອ 29,400 ປາຍຄົນເປັນຄົນຕ່າງປະເທດ, ເຂດເສຖກິຈພິເສດເຫຼົ່າ ນັ້ນໄດ້ມອບພັນທະເຂົ້າງົບປະມານ ຂອງຣັຖທັງໝົດ 809 ຕື້ປາຍກີບ. ໃນເຂດເສຖກິຈພິເສດ ສ່ວນໃຫຍ່ຈະແມ່ນນິຄົມ ອຸດສາຫະກັມ, ອຸດສາຫະກັມປຸງແຕ່ງ ເພື່ອສົ່ງອອກ, ມີເຂດກະສິກັມ, ການບໍຣິການ, ການຄ້າ, ການທ່ອງທ່ຽວ ແລະອື່ນໆ.