ຣົຖໄຟລາວ-ຈີນ ຍັງບໍ່ສົ່ງສິນຄ້າ ຂ້າມໄປຈີນໄດ້

ຈຳປາທອງ
2022.04.27
Share on WhatsApp
Share on WhatsApp
ຣົຖໄຟລາວ-ຈີນ ຍັງບໍ່ສົ່ງສິນຄ້າ ຂ້າມໄປຈີນໄດ້ ຣົຖຍົກກຳລັງ ຍົກຕູ້ຄອນເທນເນີ້ຣ໌ ສິນຄ້າທີ່ຈະສົ່ງໄປຈີນ ໂດຍເສັ້ນທາງຣົຖໄຟ ທີ່ສຖານີຣົຖໄຟ ແຂວງໜອງຄາຍ ປະເທດໄທຍ (TP), ວັນທີ 29, 2022.
RFA

ພວກສົ່ງໝາກໄມ້ ແລະພືດຜັກຂອງລາວ ອອກໄປຂາຍໃຫ້ຈີນ ຢາກຂົນສົ່ງສິນ ຄ້າຂອງຕົນໄປທາງຣົຖໄຟລາວ-ຈີນ ຍ້ອນມັນປະຢັດເວລາ ແລະຄ່າຂົນສົ່ງກໍຖືກກວ່າ ການຂົນໄປທາງຣົຖບັນທຸກ ທັມມະດາຄືໃນປັດຈຸບັນ.

ດັ່ງພະນັກງານບໍຣິສັດສົ່ງໝາກໄມ້ ແລະພຶດຜັກໄປຈີນແຫ່ງນຶ່ງໃນລາວ ກ່າວຕໍ່ວິທຍຸເອເຊັຽເສຣີໃນ ມື້ວັນທີ 27 ເມສານີວ່າ:

ຊ່ວງນີ້ແມ່ນຍັງບໍ່ທັນໄດ້ສົ່ງໄປເທື່ອ ຕໍ່ໜ້າກະໜ້າຈະມີແຫລະ ເພາະວ່າສິນຄ້າເຮົາຫັ້ນນ່າ ແລ້ວເຮົາກາສິໄດ້ສາງຫັ້ນແຫລະ ກະຄືວ່າເຮົາສົ່ງນີ້ແມ່ນທາງຣົຖແນ່ ເອົາຣົຖໄປທາງດ່ານຫັ້ນນ່າ ດ່ານບໍ່ເຕັນ.”

ແລະພະນັກງານບໍຣິສັດສົ່ງໝາກໄມ້ ແລະພຶດຜັກໄປຈີນອີກແຫ່ງນຶ່ງ ໃນລາວກໍເວົ້າໃນມື້ດຽວກັນນີ້ວ່າ ມາເຖິງປັດຈຸບັນ ລາວຍັງບໍ່ສາມາດຂົນໝາກໄມ້ ແລະພືດຜັກທາງຣົຖໄຟ ຂ້າມຊາຍແດນໄປຈີນໄດ້ເທື່ອ, ມີແຕ່ຂົນເຂົ້າສານເຂົ້າໄປຈີນໄດ້.

ດັ່ງທີ່ນາງເວົ້າວ່າ:

ຕອນນີ້ຫັ້ນຍັງເທື່ອ ເຈົ້າ ໂຕນີ້ຫັ້ນເຮົາກະຍັງບໍ່ອັນນັ້ນ ເພາະວ່າມີແຕ່ເຣື່ອງເຂົ້າຫັ້ນນ່າ ຕອນນີ້ຫັ້ນເຮົາກາຍັງນັ້ນຢູ່ໃນດໍາເນີນການຢູ່.”

ໃນຂະນະດຽວກັນ ຄົນງານສວນກ້ວຍຈີນຢູ່ລາວແຫ່ງນຶ່ງ ກໍເວົ້າວ່າ ການສົ່ງກ້ວຍໄປຈີນ ຍັງອາສັຍແຕ່ຣົຖບັນທຸກທັມມະດາຢູ່ ຍ້ອນຍັງບໍ່ສາມາດຂົນສົ່ງໄປທາງຣົຖໄຟຂ້າມຊາຍແດນ ເຂົ້າປະເທດຈີນໄດ້ເທື່ອ.

ດັ່ງທີ່ນາງເວົ້າວ່າ:

ມີແຕ່ກ້ວຍສົ່ງໄປຈີນຢູ່ ສ່ວນຫລາຍກ້ວຍເຮົາສົ່ງໄປກາບໍ່ດົນ ປະມານ 3-4 ມື້ ຢູ່ບໍຣິສັດແລ້ວກະແບບເຂົາມາເອົາເອງ... ສານນໍາຫັ້ນນ່າ ບໍ່ຮູ້ຄືກັນເຣື່ອງນີ້.”
ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ບໍຣິສັດທາງຣົຖໄຟ ລາວ-ຈີນຈໍາກັດ ຜູ້ນຶ່ງເວົ້າຕໍ່ວິທຍຸເອເຊັຽເສຣີ ໃນມື້ວັນທີ 27 ເມສານີ້ວ່າ ປັດຈຸບັນ ທາງບໍຣິສັດຮັບຂົນສົ່ງ ໝາກໄມ້ແລະສິນຄ້າ ການກະເສດອື່ນໆ ຢູ່ແຕ່ພາຍໃນລາວເທົ່ານັ້ນ ຄືຂົນໄປຮອດສະຖານີນາເຕີຍ ແຂວງຫລວງນໍ້າທາ, ຕໍ່ຈາກນັ້ນແມ່ນໃຊ້ຣົຖບັນທຸກທັມມະດາ ຂົນຜ່ານດ່ານສາກົນນາເຕີຍ ເຂົ້າໄປດ່ານສາກົນບໍ່ຫານຂອງຈີນ.

ດັ່ງທີ່ທ່ານກ່າວວ່າ:

ມັນມີຈໍານວນນຶ່ງເດ້ ຮັບຂົນສົ່ງໄດ້ແຕ່ວ່າໄປລົງນາເຕີຍ ລົງນາເຕີຍແລ້ວເພື່ອຂົນຕໍ່ຂ້າມໄປໃສ່ຣົຖບັນທຸກເຂົ້າໄປ ແມ່ນສົ່ງອອກຈາກວຽງຈັນ ແລ້ວໄປລົງນາເຕີຍ.”

ທ່ານກ່າວຕື່ມວ່າ ປັດຈຸບັນ ກໍາລັງມີການປຶກສາຫາລືກັນ ກ່ຽວກັບເຣື່ອງການຂົນສົ່ງໝາກໄມ້ ແລະສິນຄ້າການກະເສດອື່ນໆ ຈາກລາວເຂົ້າໄປຈີນ ທາງຣົຖໄຟນັ້ນຢູ່ ຊຶ່ງຄາດວ່າ ປະມານເດືອນກໍຣະກະດາ ທີ່ຈະມາເຖິງນີ້ ກໍຈະສາມາດຂົນສົ່ງສິນຄ້າ ປະເພດດັ່ງກ່າວທາງຣົຖໄຟ ຈາກລາວຜ່ານດ່ານຊາຍແດນ ເຂົ້າໄປຈີນໄດ້.

ນັກວິຊາການດ້ານທຸຣະກິຈລາວ ທ່ານນຶ່ງເວົ້າວ່າ ນັບຕັ້ງຣົຖໄຟລາວ-ຈີນ ໄດ້ເປີດໃຊ້ມານີ້ ສ່ວນໃຫຍ່ແມ່ນເນັ້ນໃສ່ຄວາມສະດວກ ໃຫ້ແກ່ການຂົນສົ່ງສິນຄ້າຂອງຈີນ ເຂົ້າມາລາວຫລາຍກວ່າ, ຂົນເຂົ້າມາຫລາຍ, ສ່ວນວ່າສິນຄ້າຈາກລາວ ເຂົ້າໄປຈີນໄດ້ແມ່ນສິນຄ້າປະເພດ ທີ່ຈີນຢາກໄດ້ ແລະຕ້ອງການຫລາຍເທົ່ານັ້ນ ເປັນຕົ້ນແຮ່ທາດ, ຢາງພາລາ, ສ່ວນວ່າສິນຄ້າປະເພດອື່ນໆ ແມ່ນຖືກຈໍາກັດ.

ດັ່ງທີ່ທ່ານກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

ຂອງຈີນເອົາເຂົ້າມານີ້ໄດ້ ໄດ້ຫລາຍ ຂອງລາວເຮົາໄປມີອັນຈໍາກັດ ເອົາແຕ່ແນວເຂົາຢາກໄດ້ ພວກບໍ່ແຮ່ພວກຫຍັງນ່າ ໂຕໃດຕ້ອງການເຂົາໃຫ້ຜ່ານ ໂຕໃດເຂົາບໍ່ຕ້ອງການຫັ້ນບໍ່ໄດ້.”

ເມື່ອກ່ອນໜ້ານີ້ ຄືໃນມື້ວັນທີ 22 ເມສາ ຣົຖໄຟໄດ້ຂົນໝາກຖົ່ວລຽນໄທຍ ໄປຈີນເພິ່ມຕື່ມອີກ 642 ຕັນ ຈາກສະຖານີວຽງຈັນໃຕ້ ໄປເຖິງສະຖານີນາເຕີຍ, ຫລັງຈາກນັ້ນກໍໃຊ້ຣົຖບັນທຸກ ທັມມະດາຂົນເຂົ້າໄປປະເທດຈີນ ແລະໃນເດືອນນີ້ ໄທຍກໍໄດ້ສົ່ງໝາກໄມ້ສົດ ແລະສິນຄ້າການກະເສດ ເຂົ້າໄປຈີນຕື່ມອີກປະມານ 3,000 ຕັນ, ອີງຕາມຂໍ້ມູນ ຂອງບໍຣິສັດທາງຣົຖໄຟ ລາວ-ຈີນຈໍາກັດ.

ໃນໄຕຣມາດທໍາອິດຂອງປີ 2022 ນີ້ ສິນຄ້າຈາກປະເທດລາວ ທັງໝົດທີ່ຂົນສົ່ງໄປຈີນ ທາງຣົຖໄຟລາວ-ຈີນ ມີປະມານ 185,000 ຕັນ. ໃນນັ້ນສ່ວນໃຫຍ່ແມ່ນຢາງພາລາ, ແຮ່ທາດຕ່າງໆ ແລະຜລິຕພັນການກະເສດ ທີ່ມາຈາກຫລາຍປະເທດ ໃນເອເຊັຽຕາເວັນອອກສ່ຽງໃຕ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ