ຄົນງານຕັດຫຍິບປະທ້ວງ ນາຍຈ້າງ ຄັ້ງທີ 2

ຈໍາປາທອງ
2020-04-23
Share
F-Garment ເຫດການປະທ້ວງ ຢູ່ໂຮງງານຕັດຫຍິບ ລາວຄອມຟອດ ກາເມັ້ນ ນະຄອນຫຼວງວຽງຈັນ
ຮູບຈາກ : ນັກຂ່າວພົລເມືອງ

ກໍາມະກອນໂຮງງານຕັດຫຍິບ ລາວຄອມຟອດ ກາເມັ້ນ ຢູ່ເມືອງນາຊາຍທອງ ນະຄອນ ຫຼວງວຽງຈັນ ປະທ້ວງນາຍຈ້າງ ໃນມື້ວັນທີ 10 ເມສາ ຍ້ອນເຈົ້າຂອງໂຮງງານ ທີ່ເປັນຄົນຈີນ ບໍ່ຍອມຈ່າຍເງິນເດືອນ ຕາມກໍານົດເວລາ ທີ່ໃຫ້ສັນຍາໄວ້ ແລະບໍ່ອະນຸຍາດ ໃຫ້ພວກເຂົາ ເຈົ້າຢຸດງານ ໃນໄລຍະເຊື້ອພຍາດໂຄວິດ-19 ຣະບາດ ຕາມມາຕການທີ່ກໍານົດໄວ້ຢູ່ໃນຂໍ້ທີ 9 ຂອງຄໍາສັ່ງ 18 ຂໍ້ຂອງນາຍົກຣັຖມົນຕຣີ ລາວ ເລກທີ 6 ລົງວັນທີ 29 ມິນາ 2020 ຕາມຄໍາເວົ້າຂອງປະຊາຊົນລາວ ທ່ານນຶ່ງທີ່ຢູ່ພາຍໃນປະເທດ ຜູ້ຂໍສງວນຊື່ແລະສຽງແລ້ວ ແມ່ນວ່າ ໂຮງງານຕັດຫຍິບແຕ່ລະແຫ່ງ ຕ້ອງໄດ້ປະຕິບັດຕາມ ຄືໃຫ້ປິດໂຮງ ງານນັ້ນ.

ຄໍາສັ່ງຂອງນາຍົກຣັຖມົນຕຣີ ສະບັບນີ້ ກໍານົດມາດຕະການຕ່າງໆ ເພື່ອເພີ່ມການສະກັດກັ້ນ, ກັນການແຜ່ລະບາດ, ຄວບຄຸມ ແລະກຽມ ຄວາມພ້ອມຮອບດ້ານ ຕ້ານການຣະບາດຂອງເຊື້ອພຍາດ ໂຄວິດ-19 ຊຶ່ງ ຖືກວາງອອກໃນໄລຍະທີ່ຄົນງານ ທັງຄົນງານກິນເງິນເດືອນ ແລະຄົນງານຣາຍວັນ ຈໍານວນຫລວງຫລາຍ ຫວ່າງງານ, ມີຄວາມຫຍຸ່ງຍາກໃນການດໍາລົງຊີວິດ ໄປແຕ່ລະມື້ ແລະຢູ່ໃນຣະຫວ່າງ ທີ່ ທຸກພາກສ່ວນ ໃນສັງຄົມເອົາໃຈໃສ່ປະຕິບັດຕາມຢ່າງເຄັ່ງຄັດ.

ແຕ່ໂຮງງານຕັດຫຍິບ ລາວຄອມຟອດ ກາເມັ້ນ ຂອງຈີນບໍ່ພຽງແຕ່ບໍ່ປະຕິບັດຕາມແຈ້ງການຂອງຣັຖບານ 18 ຂໍ້ ໂດຍສະເພາະຂໍ້ທີ 9 ທີ່ກໍານົດໄວ້ບາງຕອນວ່າ ໃຫ້ສືບຕໍ່ປິດກິຈການຮ້ານບັນເທີງ, ຮ້ານ ຄາຣາໂອເກະ, ຮ້ານເບັຍ ແລະ ຮ້ານບໍລິການອື່ນໆ. ພ້ອມກັນນີ້ກໍ່ ໃຫ້ປິດໂຮງງານຕັດຫຍິບ ແລະໂຮງງານອື່ນໆ. ທີ່ມີຄວາມສ່ຽງຕໍ່ການລະບາດ, ຍົກເວັ້ນໂຮງງານຜລິດສິນຄ້າບໍຣິໂພກ, ຢາປົວພຍາດ, ເຄື່ອງປ້ອງກັນການຣະບາດ ແລະ ອຸປກອນການແພດ. ໃຫ້ຜູ້ປະກອບການ ຂອງບັນດາໂຮງງານທີ່ປິດ ມີການຄຸ້ມຄອງແຮງງານ ໃຫ້ ພັກຢູ່ທີ່ພັກຂອງຕົນ ແລະປະຕິບັດນະໂຍບາຍສວັດດີການ ໃຫ້ແກ່ຄົນງານ ເຫຼົ່ານັ້ນ ໃນໄລຍະພັກວຽກນີ້.

ແຕ່ກໍາມະກອນໂຮງງານຕັດຫຍິບຈີນ ແຫ່ງນີ້ ບໍ່ໄດ້ຮັບເງິນເດືອນ ມາຕັ້ງແຕ່ເດືອນມິນາ ແຕ່ທາງເຈົ້າຂອງໂຮງງານ ແຈ້ງໃຫ້ພວກເຂົາເຈົ້າ ຮູ້ວ່າ ຈະຂໍຈ່າຍເງິນເດືອນ ຫລ້າຊ້າອອກໄປເປັນມື້ວັນທີ 10 ເມສາ, ກໍາມະກອນກໍບໍ່ວ່າຫຍັງ. ແຕ່ເມື່ອມາເຖິງມື້ນັດໝາຍແລ້ວ ທາງເຈົ້າ ຂອງໂຮງງານຊໍ້າພັດ ບໍ່ຈ່າຍເງິນໃຫ້ ແລະຂໍເລື່ອນອອກໄປຕື່ມອີກ ເຖິງມື້ວັນທີ 21 ເມສາ ເຮັດໃຫ້ພວກເຂົາເຈົ້າເກືອບ 300 ຄົນບໍ່ດີໃຈ, ພາກັນອອກມາປະທ້ວງ ເຈົ້າຂອງໂຮງງານ, ດັ່ງກໍາມະກອນ ທີ່ເຮັດວຽກໃນໂຮງງານນີ້ ເວົ້າຕໍ່ວິທຍຸເອເຊັຽເສຣີໃນມື້ວັນທີ 13 ເມສາ ນີ້ວ່າ:

“ຄັນເພິ່ນບໍ່ໃຫ້ແລ້ວ ເຣື່ອງເງິນກະເຊົາສະ ເຮັດແລ້ວບໍ່ຢາກໄລ່ໃຫ້ນະ 10 ມື້ນຶ່ງ ກະບໍ່ຢາກໄລ່ນະ ມັນບໍ່ໂປ່ງໃສຄືບໍຣິສັດ ອື່ນວ່າຊັ້ນຊະ ມັນບໍ່ສອດຄ່ອງ ກັບທິດທາງ ຂອງພັກຣັຖເຮົາລົງມາ.”

ບໍ່ພຽງເທົ່ານັ້ນ ເຈົ້າຂອງໂຮງງານຍັງບໍ່ປິດໂຮງງານ ແລະບໍ່ອະນຸຍາດໃຫ້ກໍາມະກອນຢຸດງານ ໃນໄລຍະເຊື້ອພຍາດໂຄວິດ-19 ຣະບາດຢູ່ນີ້ ເຮັດໃຫ້ພວກເຂົາເຈົ້າບໍ່ພໍໃຈ ແລ້ວພາກັນປະທ້ວງ, ດັ່ງກໍາມະກອນ ຜູ້ດຽວກັນນີ້ ເວົ້າຕື່ມອີກວ່າທາງໂຮງງານ ຍັງໃຫ້ຄົນງານເຮັດວຽກຕາມ ປົກກະຕິ ໂດຍບໍ່ຍອມໃຫ້ຢຸດເຮັດວຽກຊົ່ວຄາວ ຕາມມາຕການຄວບຄຸມ ແລະປ້ອງກັນການຣະບາດຂອງເຊື້ອພຍາດ ໂຄວິດ-19 ຕາມຄໍາ ສັ່ງຂອງຣັຖບານ ຊຶ່ງກໍານົດໃຫ້ຢຸດວຽກ ແຕ່ມື້ວັນທີ 30 ມິນາ ເຖິງວັນທີ 19 ເມສາ ນີ້ດັ່ງທີ່ທ່ານກ່າວວ່າ:

“ຣັຖບານເພິ່ນຢາກໃຫ້ພັກເນາະ ຍ້ອນໂຣຄໂຄວິດເນາະ ແຕ່ວ່າໂຮງງານນັ້ນຫັ້ນ ກະບໍ່ໄດ້ສົນອົກສົນໃຈນ່າ ເຂົາບໍ່ຟັງຄວາມຂອງຣັຖບານ ລາວເດີ້ ຜູ້ອື່ນພັກໝົດທີບໝົດແດນ ໝົດບ້ານໝົດເມືອງ ເພິ່ນບໍ່ໃຫ້ອອກ ບ້ານອອກເມືອງຊີ້ນະ ແຕ່ຈີນບໍ່ຢາກພັກ.”

ເພື່ອຂໍຮູ້ເຖິງສາເຫດການປະທ້ວງ ຂອງກໍາມະກອນໂຮງງານຕັດຫຍິບຈີນ ທີ່ວ່ານີ້ວ່າເປັນຍ້ອນຫຍັງກັນແທ້ ວິທຍຸເອເຊັຽເສຣີ ໄດ້ພຍາຍາມ ຖາມໄປຍັງເຈົ້າໜ້າທີ່ໂຮງງານ ດັ່ງກ່າວຫລາຍຄັ້ງ ແຕ່ບໍ່ສາມາດ ຕິດຕໍ່ໄດ້.

ເຖິງຢ່າງໃດກໍຕາມ ເຈົ້າໜ້າທີ່ສູນກາງສະຫະພັນກັມມະບານລາວ ທ່ານນຶ່ງກໍໄດ້ເວົ້າກ່ຽວກັບເຣຶ່ອງດັ່ງກ່າວ ຕໍ່ວິທຍຸເອເຊັຽເສຣີ ໃນມື້ດຽວກັນ ນັ້ນວ່າ ຍັງບໍ່ທັນຮູ້ບັນຫາ ທີ່ເກີດຂຶ້ນກັບຄົນງານລາວ ທີ່ອອກມາ ປະທ້ວງໂຮງງານຕິດຫຍິບ ຊຶ່ງວ່າຍ້ອນບໍ່ຈ່າຍເງິນເດືອນ ໃຫ້ນັ້ນເທື່ອ ແລະວ່າ ຄືວ່າມີຄໍາສັ່ງຂອງຣັຖບານລາວ ໃຫ້ໂຮງງານອຸດສະຫະກັມທຸກແຫ່ງ ໃນນະຄອນຫຼວງວຽງຈັນ ປິດຊົ່ວຄາວ ເພື່ອຄວບຄຸມ ແລະ ປ້ອງກັນການແຜ່ຣະບາດຂອງໄວຣັສ ໂຄວິດ-19 ນັ້ນໄປແລ້ວ:

“ບໍ່ໄດ້ຍິນຂ່າວວ່າແນວໃດ ຄືວ່່າເພິ່ນສັ່ງໃຫ້ປິດໝົດແລ້ວນາບັນດາໂຮງງານ ຕັ້ງແຕ່ວັນທີ 1 ພຸ້ນນາ ໂຮງງານຕັດຫຍິບແມ່ນຫຍັງຫັ້ນນາ ຢູ່ນະຄອນຫຼວງຮອດບໍ່ເຮັດເລີຍ ປິດຈົນຮອດແລ້ວປີໃໝ່ຈົນຮອດວັນທີ 19 ຕໍ່ໄປແລ້ວ ຖ້າເບິ່ງສະຖານະການແນວໃດ ແລ້ວເພິ່ນຊິສັ່ງຕື່ມ.”

ທ່ານກ່າວຕື່ມວ່າ ສະຫະພັນກັມມະບານລາວ ຈະຕິດຕາມກວດກາບັນຫາທີ່ເກີດຂຶ້ນນັ້ນກ່ອນ, ຫາກເປັນຄືທີ່ຄົນງານຂອງໂຮງງານຕັດຫຍິບ ລາວຄອມຟອດ ກາເມັ້ນ ຂອງຈີນ ເວົ້າມານັ້ນແທ້ ກໍຈະໃຫ້ ຄວາມຊ່ອຍເຫຼືອຢ່າງຮີບດ່ວນ.

ກ່ຽວກັບວ່າ ເປັນຫຍັງເຈົ້າຂອງໂຮງງານຕັດຫຍິບຈີນ ແຫ່ງນີ້ ຈຶ່ງບໍ່ປະຕິບັດຄໍາສັ່ງເລກທີ 6 ຂອງນາຍົກຣັຖມົນຕຣີລາວ ນັ້ນ ເຈົ້າໜ້າທີ່ ກະຊວງອຸດສາຫະກັມ ແລະການຄ້າ ທ່ານນຶ່ງເວົ້າວ່າ ເຖິງມີຄໍາສັ່ງໃຫ້ ໂຮງງານຕັດຫຍິບ ຢຸດເຮັດວຽກຊົ່ວຄາວ ແຕ່ກໍມີໂຮງງານຕັດຫຍິບ ຈໍານວນນຶ່ງ ຂໍເປີດເປັນປົກກະຕິ ເນື່ອງຈາກທາງໂຮງງານ ອ້າງວ່າ ຢຸດບໍ່ໄດ້ ເພາະຕ້ອງ ໄດ້ຜລິດສິນຄ້າ ໃຫ້ໄດ້ຕາມໂຄຕ້າ ທີ່ໄດ້ຕົກລົງ ກັບລູກຄ້າເອົາໄວ້ ຊຶ່ງທາງກະຊວງອຸດສາຫະກັມ ແລະການຄ້າ ກໍອະນຸຍາດໃຫ້ເປີດຕາມປົກກະຕິ ແຕ່ຂໍໃຫ້ທາງໂຮງງານປະຕິບັດຕາມ ມາຕການຄວບຄຸມ ແລະປ້ອງກັນເຊື້ອພຍາດ ໂຄວິດ-19 ຢ່າງເຂັ້ມງວດ ດັ່ງທີ່ທ່ານກ່າວຕໍ່ ວິທຍຸເອເຊັຍເສຣີ ໃນມື້ວັນທີ 13 ເມສານີ້ວ່າ:

“ໂຕນີ້ກະຍັງມີຈໍານວນນຶ່ງ ໂດຍສະເພາະຫຼະແມ່ນຕັດຫຍິບ, ຕັດຫຍິບຫຼະແມ່ນ ກໍາລັງສເນີສະພາອຸດສາຫະກັມການຄ້າ ສເນີຫາຣັຖບານ ຕ້ອງໄດ້ມາຕຖານ ຮັບຄວາມປອດໄພ ຄັນບໍ່ໄດ້ ກະຊິໃຫ້ຢຸດຄືກັນ.”

ແລະຕາມຄໍາເວົ້າຂອງຊາວລາວ ຢູ່ນະຄອນຫລວງວຽງຈັນ ທີ່ຮູ້ຈັກເຣຶ່ອງໂຮງງານຕັດຫຍິບ ຢູ່ປະເທດລາວ ຜູ້ຂໍສງວນຊື່ແລະສຽງແລ້ວ ແມ່ນວ່າ ມັນມີບັນຫາ ທີ່ຫລາຍໂຮງງານ ບໍ່ມີຜົລຜລິດສົ່ງອອກໄປໃຫ້ ລູກຄ້າທັນຕາມໂຄຕາ ດັ່ງນັ້ນທາງສະມາຄົມຕັດຫຍິບຈຶ່ງໃຫ້ແຕ່ ລະໂຮງງານ ຊຶ່ງມີທັງໝົດປະມານ 20 ບໍຣິສັດ ເຮັດໃບສເນີພ້ອມທັງມາຕການປ້ອງກັນໂຄວິດ-19 ມາແລ້ວທາງສະມາຄົມ ຈະເອົາໄປ ສເນີຕໍ່ຄະນະສະເພາະກິດ ຢູ່ກະຊວງອຸດສາຫະກັມ ແລະການຄ້າ ພິຈາຣະນາ ແຕ່ມີພຽງ 9 ໂຮງງານໄດ້ຮັບອະນຸຍາດ ໃຫ້ເປີດໄດ້ ສ່ວນທີ່ເຫລືອ ທາງໜ່ວຍງານສະເພາະກິດ ຈະລົງໄປກວດກາ ຖ້າໄດ້ມາຕຖານ ຈຶ່ງຈະໃຫ້ເປີດ.

ເຣຶ່ອງການຍົກເວັ້ນອາກອນ 3 ເດືອນມີຄື: ເດືອນ 4 ເດືອນ 5 ແລະເດືອນ 6 ທ່ານເວົ້າວ່າທາງການເພິ່ນມີຄໍາສັ່ງຍົກເວັ້ນໃຫ້ ແຕ່ຕ້ອງ ໄດ້ເຮັດໃບສເນີໄປຫາ ຫ້ອງການອາກອນ ແຕ່ເພິ່ນຈະໃຫ້ຕາມເວົ້າຫລືບໍ່ ທ່ານກໍຍັງບໍ່ຮູ້.

ສໍາລັບຄົນງານ ທີ່ໄດ້ຮັບອະນຸຍາດໃຫ້ເຮັດວຽກຢູ່ໂຮງງານ ກໍມີແຕ່ພວກທີ່ຍັງຢູ່ຫໍພັກ ຊຶ່ງທາງໂຮງງານບໍ່ໃຫ້ກັບບ້ານຖ້າພວກເຂົາເຈົ້າກັບ ບ້ານເວລາຄືນມາ ທາງໂຮງງານຈະບໍ່ຮັບເອົາເຂົ້າເຮັດວຽກ ແລະ ນັກວິຊາການ ທີ່ກັບຄືນປະເທດບໍ່ໄດ້ເທົ່ານັ້ນ.

ເຣຶ່ອງການຈ່າຍເງິນເດືອນໃຫ້ຄົນງານ ທີ່ບໍ່ໄດ້ເຮັດວຽກຊົ່ວຄາວນີ້ ທາງການໄດ້ອອກແຈ້ງການໃນມື້ວັນທີ 20 ເມສາ ໃຫ້ແຕ່ລະບໍຣິສັດຈ່າຍ ໃຫ້ເຕັມ 100% ແຕ່ຖ້າເຮັດບໍ່ໄດ້ແທ້ໆກໍໃຫ້ຈ່າຍ 50% ແຕ່ບໍ່ໃຫ້ຫຼຸດ ເງິນເດືອນພື້ນຖານ 1,100,000 ກີບ ຊຶ່ງທາງໂຮງງານຈະໄດ້ປຶກສາ ກັນກ່ອນ ແລະຕາມຄວາມຄິດຂອງທ່ານ ຄົງຈະແມ່ນ 50% ເພາະວ່າເບິດເດືອນ ບໍ່ໄດ້ສົ່ງຜົລຜລິດອອກ, ບໍ່ມີຣາຍຮັບ ແລະກໍຣະນີໄຟຟ້າ ບໍ່ມາ ຫລືວັດຖຸດິບປ້ອນໂຮງງານມາບໍ່ທັນ ທາງໂຮງງານໃຫ້ຄົນງານພັກ ແລະຈ່າຍເງິນເດືອນໃຫ້ 50%.

ສໍາລັບຄົນງານບໍ່ໄດ້ເຮັດວຽກ ທີ່ຢູ່ຫໍພັກຂອງໂຮງງານ ບໍ່ໄດ້ເສັຍຄ່າ, ພວກເຂົາເຈົ້າບໍ່ມີເງິນ ທາງໂຮງງານກໍໃຫ້ເງິນລ່ວງໜ້າ ຈໍານວນນຶ່ງ ພໍໃດ້ຊື້ກິນ. ການກິນຂອງພວກເຂົາເຈົ້າກໍແຕ່ງກິນເອງ ຢູ່ຫໍພັກມີບ່ອນ ແຕ່ງກິນ, ສ່ວນຫຼາຍພວກເຂົາເຈົ້າຈະຊື້ແຕ່ຄາບສວາຍ, ຕອນເຊົ້າ ແລະແລງແຕ່ງກິນເອງ.

ໂຮງງານຕັດຫຍິບ ລາວຄອມຟອດ ກາເມັ້ນ ຂອງຈີນທີ່ວ່ານັ້ນ ທີ່ຜ່ານມາ ໃນປີ 2017 ກໍາມະກອນ ກໍເຄີຍປະທ້ວງມາແລ້ວຄັ້ງນຶ່ງ ຍ້ອນ ເຈົ້າຂອງໂຮງງານ ບໍ່ຈ່າຍເງິນເດືອນຂັ້ນຕໍ່າ 1,100,000 ກີບ ໃຫ້ຕາມຄໍາ ສັ່ງຂອງຣັຖບານລາວ ແລະທັງຕັດເງິນດຸໝັ່ນອີກ 500,000 ກີບ ເຮັດໃຫ້ກໍາມະກອນ ບໍ່ພໍໃຈ ແລະລາອອກຈໍານວນນຶ່ງ. ແຕ່ຕໍ່ມາ ທາງໂຮງງານກໍຍອມຈ່າຍເງິນເດືອນຂັ້ນຕໍ່ານັ້ນໃຫ້ ຕາມຣະບຽບການ.

ໂຮງງານຕັດຫຍິບທີ່ວ່ານີ້ ເປັນຂອງບໍຣິສັດຈີນ ໄດ້ເປີດໂຮງງານມາຕັ້ງແຕ່ປີ 2015 ເພື່ອຕັດໂສ້ງເສື້ອສົ່ງອອກໄປປະເທດຈີນ. ບໍຣິສັດນີ້ມີ 2 ໂຮງງານ ຄືໂຮງງານນຶ່ງຕັ້ງຢູ່ເຂດເສຖກິຈພິເສດໂນນທອງ ແລະ ອີກໂຮງງານນຶ່ງ ຢູ່ເມືອງນາຊາຍທອງ ນະຄອນຫຼວງວຽງຈັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ