ລາຄານໍ້າມັນແພງຂຶ້ນ ສົ່ງຜົລກະທົບຕໍ່ຄ່າຄອງຊີບ ຂອງປະຊາຊົນ

ກະຊວງອຸດສາຫະກັມ ແລະການຄ້າ ອອກແຈ້ງການ ປັບຂຶ້ນລາຄານໍ້າມັນເຊື້ອເພີງ ໃນຂອບເຂດທົ່ວປະເທດ ໃນມື້ວັນທີ 10 ມົກກະຣາ 2024 ນີ້ ຄື ນໍ້າມັນແອັດຊັງພິເສດ ປັບຂຶ້ນລິດລະ 50 ກີບ, ນໍ້າມັນແອັດຊັງທັມມະດາ ປັບຂຶ້ນລິດລະ 10 ກີບ ແລະນໍ້າມັນກາຊວນ ປັບຂຶ້ນລິດລະ 170 ກີບ.

ການຂຶ້ນລາຄານໍ້າມັນເຊື້ອເພີງນີ້ ສົ່ງຜົລໃຫ້ລາຄານໍ້າມັນ ສະເພາະຢູ່ນະ ຄອນຫລວງວຽງຈັນ ຖືກປັບຂຶ້ນຄື ລາຄານໍ້າມັນແອັດຊັງພິເສດ ຈາກລິດລະ 28,360 ກີບ ຂຶ້ນເປັນ 28,410 ກີບ, ນໍ້າມັນແອັດຊັງທັມມະດາ ຈາກລິດລະ 21,990 ກີບຂຶ້ນເປັນ 22,000 ກີບ ແລະນໍ້າມັນກາຊວນ ຈາກລິດລະ 19,540 ກີບ ຂຶ້ນເປັນ 19,710 ກີບ.

ປັດຈຸບັນ ປະເທດລາວ ນໍານໍ້າມັນເຊື້ອເພີງທັງໝົດ ເຂົ້າມາຈາກຕ່າງປະເທດ ດັ່ງນັ້ນ ລາຄານໍ້າມັນ ຈຶ່ງຂຶ້ນຢູ່ກັບອັດຕຣາ ແລກປ່ຽນ ເງິນຕຣາຕ່າງປະເທດ ໃນຂະນະທີ່ ສະພາບເສຖກິຈຂອງລາວ ປະສົບກັບຄວາມຫຍຸ້ງຍາກ, ບັນຫາເງິນເຟີ້ ແລະເງິນກີບອ່ອນຄ່າ. ຕາມປົກກະຕິທົ່ວໄປ ລາຄານໍ້າມັນຈະຂຶ້ນ ຫລືລົງ ແມ່ນຂຶ້ນຢູ່ກັບລາຄານໍ້າມັນໃນຕລາດໂລກ, ແຕ່ສໍາລັບຢູ່ລາວ ບໍ່ເປັນຄືແນວນັ້ນ ຍ້ອນເງິນກີບອ່ອນຄ່າ ຊຶ່ງກະຊວງອຸດສາຫະກັມ ແລະການຄ້າ ເປັນຜູ້ກໍານົດ ລາຄາ ອີງຕາມຄໍາເວົ້າ ຂອງເຈົ້າໜ້າທີ່ ທີ່ກ່ຽວຂ້ອງ ຜແນກອຸດສາຫະກັມ ແລະການຄ້າ ທ່ານນຶ່ງຕໍ່ວິທຍຸເອເຊັຽເສຣີ ໃນມື້ວັນທີ 17 ມົກກະຣານີ້.

“ກະຊວງພານິດເປັນຜູ້ກໍານົດຫັ້ນນ່າ ເພະວ່າເຂົາຄິດໄລ່ເຣື່ອງອັດ ຕຣາການນໍານໍາເຂົ້າ ເຣື່ອງການຊື້ນໍາຕ່າງປະເທດ 2 ມາກໍເວົ້າເຣື່ອງອັດຕຣາແລກປ່ຽນເງິນໂດລ້າຣ໌ ແລ້ວກໍລາຄາຊື້ ຢູ່ຕ່າງປະເທດ. ເງິນກີບເຟີ້ ສົ່ງຜົລ. ເຈົ້າ ສົ່ງຜົລເດ້ ເພາະວ່າເຮົາມາກໍານົດຂາຍນີ້ ໃຫ້ເປັນເງິນກີບ. ເງິນລາວເນາະ ແລ້ວບາດນີ້ເວລາໄປຊື້ ມັນກໍຕ້ອງແລກປ່ຽນເງິນຕ່າງປະເທດ ໄປຊື້ເນາະ. ຊື້ນໍາຕ່າງປະເທດເດ້.”

ທ່ານກ່າວ ເຖິງລາຄານໍ້າມັນເຊື້ອເພີງ ຕື່ມວ່າ ໃນແຕ່ລະແຂວງວ່າ ຈະບໍ່ເທົ່າກັນ. ແຂວງໃດ ທີ່ຢູ່ໃກ້ດ່ານສາກົລ ທີ່ຂົນນໍ້າມັນເຂົ້າມາຜ່ານ ຈະມີລາຄາຖືກກວ່າແຂວງ ທີ່ຢູ່ຫ່າງໄກອອກໄປ ຍ້ອນແຂວງ ທີ່ຢູ່ໄກ ຕ້ອງໄດ້ບວກຄ່າຂົນສົ່ງນໍ້າມັນເຂົ້າໃສ່ຕື່ມອີກ.

ເຈົ້າຂອງປໍ້ານໍ້າມັນ ຢູ່ເມືອງໄຊເສດຖາ ນະຄອນຫລວງວຽງຈັນ ເວົ້າໃນມື້ດຽວກັນນີ້ວ່າ ສະເລັ່ຍແລ້ວ ລາຄານ້ຳມັນໃນປັດຈຸບັນ ຖືວ່າສູງຫລາຍ ແລະຄາດວ່າ ລາຄານໍ້າມັນ ອາດສູງຂຶ້ນອີກ ໃນອາທິດໜ້າ ໂດຍສະເພາະ ນໍ້າມັນກາຊວນ.

ດັ່ງທີ່ທ່ານກ່າວວ່າ:

“ລາຄາສູງ ລາຄານໍ້າມັນບໍ່ເຄີຍຂາຍສູງຢ່າງນີ້ຈັກເທື່ອ ຄາດວ່າຈະຂຶ້ນ ມື້ນີ້ອາດມີການຂຶ້ນອີກ ວັນພຸດ ເພາະວ່າ ຫລາຍປໍ້າພາຍໃນນະຄອຫລວງວຽງຈັນ ດຽວນີ້ນໍ້າມັນກາຊວນ ຫລື ນໍ້າມັນດີແຊວຫັ້ນ. ນໍ້າມັນຂາດຕລາດ ຕາມທີ່ເຮົາຮູ້ມາ ມີແຕ່ຂອງບໍຣິສັດນໍ້າມັນພລັສທີ່ວ່າ ເພິ່ນມີດີເຊລຂາຍ. ສ່ວນປໍ້າອື່ນຫັ້ນຂາດໝົດ ປຕທ ຢູ່ລາວກໍບໍ່ມີ.”

ກ່ຽວກັບເຣື່ອງທີ່ວ່ານີ້ ເຈົ້າຂອງປໍ້ານໍ້າມັນແຫ່ງນຶ່ງ ຢູ່ເມືອງສາມັກຄີໄຊ ແຂວງອັດຕະປື ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 17 ​ມົກກະຣານີ້ວ່າ ທີ່ຜ່ານມາ ກະຊວງອຸດສາຫະກັມ ແລະການຄ້າ ຈະອອກແຈ້ງການ ປັບລາຄານໍ້າມັນ ໃນວັນພຸດຕອນແລງ ຫລືຕອນກາງຄືນ ແລະປໍ້ານໍ້າມັນກໍຈະຂາຍລາຄາໃໝ່ໃນຕອນເຊົ້າຂອງວັນພະຫັດ. ການປັບລາຄານໍ້າມັນທຸກອາທິດ ເຣີ່ມຂຶ້ນ ມາແຕ່ປະມານ ປີ 2021 ຊຶ່ງກ່ອນໜ້ານັ້ນ ລາຄານໍ້າມັນຢູ່ລາວ ຈະປັບເດືອນລະເທື່ອ ຫລື 2 ເດືອນເທື່ອນຶ່ງ. ລາຄານໍ້າມັນ ທີ່ປ່ຽນແປງທຸກອາທິດ ເຮັດໃຫ້ປະຊາຊົນ ມີການຈົ່ມວ່າ ແຕ່ກໍບໍ່ສາມາດເຮັດຫຍັງໄດ້.

“ທິດນຶ່ງມັນຈະປ່ຽນລາຄາເທື່ອນຶ່ງຫັ້ນນ່າ ເພາະວ່າຕອນແລງວັນພຸດ ຈະມາແຈ້ງການ ຕອນເຊົ້າວັນພະຫັດລາຄາປ່ຽນ ວ່າຈັ່ງຊັ້ນສາ ແຕ່ກ່ອນກໍເປັນເດືອນຈຶ່ງຂຶ້ນເທື່ອນຶ່ງ ລົງເທື່ອນຶ່ງ. ມາບາດນີ້ເອົາທິດຕໍ່ອາທິດ ຈົ່ມກໍຈົ່ມຫັ້ນແຫລະ ຍອມຮັບກັບສະພາບ.”

ພ້ອມດຽວກັນນັ້ນ ພໍ່ຄ້າຂາຍເສື້ອຜ້າ ຢູ່ເມືອງຕົ້ນເຜິ້ງ ແຂວງບໍ່ແກ້ວ ຜູ້ນຶ່ງເວົ້າເຖິງຄ່າຄອງຊີບຢູ່ລາວວ່າ ສູງຂຶ້ນຫລາຍເຕີບ. ລາຄາເຄື່ອງຂອງ ກໍປ່ຽນທຸກມື້ຕາມອັດຕຣາແລກປ່ຽນເງິນຕຣາ. ຄ່ານໍ້າມັນ ໃນການຂົນສົ່ງເຄື່ອງຂອງ ຖືວ່າແພງຂຶ້ນຄືກັນ. ເຖິງແມ່ນວ່າ ຕົ້ນທຶນສູງຂຶ້ນ ແຕ່ບໍ່ສາມາດຂຶ້ນລາຄາເສື້ອຜ້າໄດ້ ຍ້ອນຢ້ານລູກຄ້າ ຈະສູ້ບໍ່ໄຫວ ແລະ ໄປຊື້ສິ່ງທີ່ຈໍາເປັນກວ່າເສື້ອຜ້ານັ້ນ.

“ກໍຍັງສູງ ເພາະວ່າເງິນຍັງເຟີ້. ຄ່າໃຊ້ຈ່າຍມັນກໍເຟີ້ ໄປນໍາເງິນນັ້ນແຫລະ. ເຈົ້າ ນໍ້າມັນຣົຖນີ້ເຮົາໃຊ້ເຮົາກໍໃຊ້ ແຕ່ວ່າຄ່າເດີນທາງ ສ່ວນຫລາຍສິນຄ້າເຮົາໄປຊື້ ເຮົາກໍຝາກບໍຣິສັດຂົນສົ່ງ ອິຫຍັງເດ້. ເຮົາບໍ່ໄດ້ທຽວໄປເອົາເອງ ຖ້ຽວນຶ່ງໄປເອົານີ້ ຖ້ຽວບໍ່ໄດ້ ນໍ້າມັນແພງຫລາຍດຽວນີ້.”

ໃນປີ 2024 ນີ້ ກະຊວງອຸດສາຫະກັມ ແລະການຄ້າ ໄດ້ອອກແຈ້ງການປັບລາຄານໍ້າມັນເຊື້ອເພີງ ມາແລ້ວ 2 ສະບັບ. ສະບັບທໍາອິດ ໃນມື້ວັນທີ 2 ມົກກະຣາ ຊຶ່ງເປັນການປັບລາຄານໍ້າມັນລົງ ທັງ 3 ຊະນິດ ຈາກລາຄາໃນເດືອນທັນວາ 2023 ແລະສະບັບທີ 2 ໃນວັນທີ 10 ມົກກະຣານີ້ ແລະໃນມື້ວັນທີ 17,​ ວັນທີ 24 ແລະວັນທີ 31 ມົກກະຣານີ້ ກໍຈະມີແຈ້ງການ ປັບປ່ຽນລາຄານໍ້າມັນອອກມາ ຕື່ມອີກ.