ພະນັກງານຣັຖ ມີສ່ວນ ຕັດໄມ້ເຖື່ອນ

ອຸ່ນເກ້ວ ສຸກສະຫວັນ
2021.02.05
Share on WhatsApp
Share on WhatsApp
ພະນັກງານຣັຖ ມີສ່ວນ ຕັດໄມ້ເຖື່ອນ ເຫດການເມື່ອປີ 2019; ຣົດທີ່ຂົນໄມ້ດູ່ ໄປຈີນ ທີ່ຖືກເຈົ້າໜ້າທີ່ຍຶດໄວ້ ແລະ ຄົນລາວ 5 ຄົນ ກໍຖືກສານຕັດສິນຈໍາຄຸກ
ຮູບພາບຈາກ ປີ 2019: ນັກຂ່າວພົລເມືອງ

ກອງປະຊຸມວຽກງານກວດກາທົ່ວປະເທດ ປະຈຳປີ 2020 ທີ່ຈັດຂຶ້ນຢູ່ ນະຄອນຫຼວງວຽງຈັນ ໃນວັນທີ 29 ມົກກະຣາ ຣາຍງານວ່າ ໄດ້ກວດພົບເຈົ້າໜ້າທີ່ຣັຖ ຈຳນວນ 127 ຄົນ ທີ່ເຂົ້າໄປພົວພັນ ເລື່ອງການຕັດໄມ້ເຖື່ອນ ຊຶ່ງເປັນການລະເມີດຄຳສັ່ງເລກທີ 15/ນຍ.

ພະນັກງານຣັຖຈຳນວນດັ່ງກ່າວ ມີສ່ວນພົວພັນກັບການລະເມີດເລກທີ 15/ນຍ ນັ້ນເປັນການສວຍໃຊ້ໂອກາດຫາເງິນເຂົ້າໂຕເອງ. ຊາວລາວຢູ່ແຂວງຫຼວງນ້ຳທາ ທ່ານນຶ່ງໄດ້ກ່າວຕໍ່ ເອເຊັຽເສຣີ ໃນວັນທີ 5 ກຸມພາ ວ່າມີການສົມຮູ້ຮ່ວມຄິດກັນຣະຫວ່າງເຈົ້າໜ້າທີ່ ກັບຜູ້ຕັດໄມ້:

“ພວກປະຊາຊົນສວຍໂອກາດໄປຕັດໄປເລື່ອຍເນາະ, ເຂດທີ່ມີໄມ້ດີ ວ່າຊັ້ນຊະ, ຄືຊິມີພວກສົມຮູ້ຮ່ວມຄິດ ເອົາໄມ້ອອກກະຊິມີນະ ພວກທີ່ເອົາອອກກະຫາອອກຢູ່, ໂຕນີ້ນິນະ ກໍບໍ່ຮູ້ວ່າແນວໃດນະ, ກໍຍັງເຮັດຢູ່."

ທ່ານເວົ້າວ່າ ສຳລັບພະນັກງານຣັຖ ທີ່ຖືກຈັບໄດ້ຈຳນວນດັ່ງກ່າວນັ້ນ, ກໍຢາກໃຫ້ພາກສ່ວນກ່ຽວຂ້ອງລົງໂທດ ຕາມກົດໝາຍຢ່າງ ເຂັ້ມງວດທີ່ສຸດ ເພື່ອບໍ່ໃຫ້ພະນັກງານຣັຖຄົນອື່ນໆ ເອົາເປັນແບບຢ່າງທີ່ບໍ່ດີ, ຊຶ່ງເປັນສ່ວນນຶ່ງຂອງບັນຫາ ສ້ຳຣາດບັງຫຼວງທີ່ເກີດຂຶ້ນ ໃນລາວ.

ໃນຂນະດຽວກັນ ຊາວນະຄອນຫຼວງວຽງຈັນ ອີກທ່ານນຶ່ງເວົ້າວ່າປັດຈຸບັນ ຍັງພົບເຫັນການຕັດໄມ້ແບບຊະຊາຍ ແລະ ຜິດກົດໝາຍ ຢູ່ບາງພື້ນທີ່ ຊຶ່ງເຊື່ອວ່າມີພະນັກງານຣັຖບາງຄົນ ມີສ່ວນສົມຮູ້ຮ່ວມຄິດນຳ ຍ້ອນບໍ່ເຄີຍເຫັນກຸ່ມລັກຕັດໄມ້ ດັ່ງກ່າວ ຖືກປາບປາມ ເທື່ອ.

"ມັນຍັງຢູ່ດຽວນີ້ ຕາມຂ້ອຍເຫັນນີ້ຢູ່ສີສະຫວາດເດ້, ປະຊາຊົນແຖວຫັ້ນ ຍັງເຮັດແບບເກົ່ານະ, ໄປຕັດເອົາໄມ້ ໄມ້ເລັກ ໄມ້ນ້ອຍ ມັນກະເອົາມາເຂົ້າເຟີນິເຈີ ສ່ວນຫຼາຍມັນກະໄປເອົາໄມ້ ຢູ່ປ່າສງວນຫັ້ນແຫຼະ, ເຂົາເຮັດເປັນຂະບວນນະຈຸດນິ້ີ້ນະ ມັນມີເສັ້ນມີສາຍ."

ຊາວລາວອີກທ່ານນຶ່ງເວົ້າວ່າ, ຈະຕ້ອງດຳເນີນຄະດີ ກັບຜູ້ທີ່ພົວພັນກັບການຕັດໄມ້ ຢູ່ປ່າສງວນຂອງລາວ.

"ໂອຄັນໄປຕັດຂອງລວມ ຂອງປ່າສງວນແຫ່ງຊາດ, ອັນນັ້ນເຂົາໄດ້ດຳເນີນຄະດີ ຕາມລະບຽບກົດໝາຍອັນນັ້ນ ບໍ່ສາມາດແກ້ໄດ້ວ່າ ຊັ້ນຊະ ໄປລັກຕັດຂອງບຸກຄົນຫັ້ນນະ ຣັຖບານ ໃໝ 250,000 ກີບ ສ່ວນວ່າ ການເສັຍຫາຍລະແມ່ນ ເຈົ້າຂອງຮຽກເອົາເທົ່າໃດ ກະໄດ້ເອົາໃຫ້ເທົ່ານັ້ນ."

ວິທຍຸເອເຊັຽເສຣີ ໄດ້ຕິດຕໍ່ຫາອົງການກວດກາຣັຖບານ ເພື່ອຖາມລາຍລະອຽດຄວາມຄືບໜ້າ ກ່ຽວກັບການລົງໂທດ ພະນັກງານຣັຖ ທີ່ເຮັດຜິດລະບຽບ ແຕ່ເຈົ້າໜ້າທີ່ກ່ຽວຂ້ອງ ບໍ່ສະດວກໃຫ້ສຳພາດ.

ເຖີງຢ່າງໃດກໍຕາມ, ເຈົ້າໜ້າທີ່ຜູ້ທີ່ເຮັດວຽກກວດກາປ່າໄມ້ ໃນລາວກ່າວວ່າ ສຳລັບພະນັກງານທີ່ກະທຳຜິດ,ໃນຂໍ້ຫາສົມຮູ້ຮ່ວມຄິດກັບ ການຕັດໄມ້ເຖື່ອນນັ້ນ ກໍຖືກກວດສອບຢູ່ວ່າ ຜິດໜ້ອຍ ຫຼື ຜິດຫຼາຍ.

"ກຳລັງສຳຫຼວດກວດກາຄືນ, ຜິດໜັກ ຫຼື ບໍ່ຜິດໜັກ ເນາະ, ກໍໄດ້ມີການສຳຣວດກວດກາຄືນກ່ອນ, ວ່າຜູ້ກ່ຽວເຮັດແນວໃດ ສົມຮູ້ ຮ່ວມຄິດຊ່ຳໃດຫັ້ນນະ ໜັກຫຼືເບົາ ກະອີງຕາມກໍຣະນີ ໜັກຫຼາຍກະປະຕິບັດ ວິນັຍໄລ່ອອກ."

ທ່ານ ສີໃນ ມຽງລາວັນ ຮອງປະທານອົງການກວດກາຣັຖບານ ໄດ້ກ່າວສະເໜີ ຕໍ່ກອງປະຊຸມວຽກງານ ກວດກາທົ່ວປະເທດປະຈຳປີ 2020 ແລະ ວຽກງານ 5 ປີ ຕັ້ງແຕ່ປີ 2016-2020 ວ່າ, ພົບເຫັນຜູ້ມີສ່ວນຮ່ວມ ລະເມີດຄຳສັ່ງເລກທີ 15/ນຍ ນັ້ນ, 1,000 ປາຍ ຄົນ ໃນນັ້ນມີພະນັກງານຣັຖ 127 ຄົນ, ຜູ້ປະກອບການ 200 ປາຍຄົນ ແລະ ປະຊາຊົນ 700 ປາຍຄົນ ແລະ ສາມາດຍຶດໄມ້ 11,000 ເມັດກ້ອນ. ນອກຈາກນີ້ ເຈົ້າໜ້າທີ່ຍັງປັບໃໝ ເປັນເງິນ 20 ຕ໋ື້ກີບ.

ໃນປີ 2020 ເຈົ້າໜ້າທີ່ສາມາດຢຶດໄມ້ໄດ້ 2,600 ແມັດກ້ອນ, ກວດພົບໂຮງເລື່ອຍ ສ້າງຂຶ້ນແບບບໍ່ຖືກຕ້ອງ 2,700 ແຫ່ງ ແລະ ສັ່ງຍຸບໂຮງເລື່ອຍ 1,600 ແຫ່ງ ອີງຕາມ ທ່ານ ສີໃນ ມຽງລາວັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ