ໂຄງການພັດທະນາຂອງລັດ ຢູ່ອັດຕະປື ຍັງບໍ່ໄດ້ໃຫ້ປະໂຫຍດ ກັບຊາວບ້ານ

ໂຄງການພັດທະນາ ຂອງລັດ ຢູ່ແຂວງອັດຕະປື ຍັງບໍ່ໄດ້ສ້າງລາຍຮັບ ແລະປະໂຫຍດໃຫ້ຊາວບ້ານ ຈໍານວນນຶ່ງ ຫລາຍປານໃດ ຍ້ອນໂຄງການສ່ວນນຶ່ງ ຍັງມີຂໍ້ຄົງຄ້າງ ທີ່ຕ້ອງໄດ້ແກ້ໄຂ ເນື່ອງຈາກງົບປະມານ ບໍ່ພຽງພໍ ຂະນະທີ່ໂຄງການ ທີ່ດໍາເນີນຢູ່ ເປັນຕົ້ນ ໂຄງການສໍາປະທານ ເນື້ອທີ່ດິນປູກກ້ວຍ ແລະ ປູກອ້ອຍ ກໍບໍ່ໄດ້ສ້າງລາຍຮັບ ທີ່ຢືນຍົງ ໃຫ້ຊາວບ້ານ ເຮັດໃຫ້ຊາວບ້ານ ຍັງທຸກຍາກ ຄືເກົ່າ. ດັ່ງ ຊາວບ້ານຢູ່ເມືອງ ໄຊເສດຖາ ແຂວງອັດຕະປື ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນມື້ວັນທີ 8 ສິງຫາ 2024 ນີ້ວ່າ:
“ສວນກ້ວຍ ສວນອ້ອຍຫັ້ນແຫລະ ຜູ້ໄປກໍ ບາງເທື່ອກໍໄດ້ ບາງເທື່ອກໍບໍ່ ພໍບໍ່ສິໄດ້ກຸ້ມກິນຫັ້ນນ່າ ມີແຕ່ວ່າ ພໍໄດ້ແກ້ຄອບຄົວທໍາມະດາ ຊື່ໆ ຄ່າແຮງງານ ຄ່າຈ້າງຫັ້ນ ກໍບໍ່ໄດ້ຫລາຍ ມື້ນຶ່ງກໍ 40,000-50,000 ນີ້ແຫລະ ມື້ໃດເພິ່ນເອົາຫັ້ນ ກໍເອົາ ມື້ໃດເພິ່ນບໍ່ເອົາ ກໍບໍ່ເອົາ ມັນກໍເລືອກເອົາຄືກັນ ແຕ່ລະບ່ອນ ເປັນແບບດຽວກັນເລີຍ ແບບວ່າ ມື້ໃດຝົນຕົກ ເພິ່ນກໍບໍ່ຮັບເອົາຄົນງານປານໃດ.”
ຢູ່ເມືອງຊານໄຊ ແຂວງອັດຕະປື ກໍມີໂຄງການສຳປະທານ ປູກອ້ອຍ ຂອງນັກລົງທຶນຫວຽດນາມ ເຂົ້າມາລົງທຶນ ຊຶ່ງບໍຣິສັດ ຈະເຂົ້າມາ ໃຫ້ທຶນຊາວບ້ານ ປູກອ້ອຍ ກ່ອນຈະຊື້ ຜົລຜລິດ ຈາກປະຊາຊົນ. ເຖິງຢ່າງໃດກໍຕາມ ລາຍຮັບຈາກການເຮັດສວນອ້ອຍ ກໍບໍ່ຫລາຍ ແລະ ບໍ່ໜັ້ນຄົງປານໃດ ອີກທັງ ໂຄງການ ອາດບໍ່ເຂົ້າເຖິງ ປະຊາຊົນທຸກຄອບຄົວ ນໍາແດ່ ຍ້ອນບາງຄອບຄົວ ກໍບໍ່ມີເນື້ອທີ່ດິນເທື່ອ. ດັ່ງ ຊາວບ້ານ ຢູ່ເມືອງຊານໄຊ ແຂວງອັດຕະປື ນາງນຶ່ງກ່າວວ່າ:
“ຄັນວ່າຢູ່ເມືອງນີ້ ກໍຊິມີແຕ່ແບບໂຄງການສວນອ້ອຍ ປູກອ້ອຍກໍຊິເປັນສ່ວນຫລາຍ ເປັນໂຄງການ ຂອງຫວຽດເຂົ້າມາ ໃຫ້ປະຊາຊົນເຮັດ ແລະ ກໍຊື້ນໍາປະຊາຊົນ ອອກທຶນໃຫ້ກ່ອນ ສໍາລັບລາຍຮັບ ກໍບໍ່ທັນມີບໍ່ ເພາະວ່າ ພໍແຕ່ວ່າແລ້ວ ແລ້ວແລງ ແລ້ວອີ່ຫຍັງແລ້ວ ພໍໄດ້ຊື້ອີ່ຫຍັງໃຊ້ ກໍບໍ່ທັນໄດ້ວ່າ ມີລາຍຮັບເປັນຄົງທີ່ ມັນກໍເຮັດໄດ້ບໍ່ເບີດທຸກຄົນ ຫັ້ນນ່າ.”
ຢູ່ເມືອງສະໜາມໄຊ ແຂວງອັດຕະປື ກໍມີໂຄງການສຳປະທານ ເຂົ້າມາຫລາຍ. ໃນນັ້ນມີໂຄງການ ບາງສ່ວນ ທີ່ບໍ່ໄດ້ຜົນຕອບແທນ ທີ່ເໝາະສົມ ກັບຊາວບ້ານ. ດັ່ງ ຊາວບ້ານ ຢູ່ບ້ານປິ່ນດົງ ເມືອງສະໜາມໄຊ ແຂວງອັດຕະປື ທ່ານນຶ່ງ ກ່າວວ່າ:
“ກໍມີໂຄງການເຂົ້າມາ ທີ່ວ່າມາຮັບຊື້ຮັບຫຍັງ ມາປູກໃຫ້ບໍຣິສັດປູກຫຍັງ ແບບເພິ່ນ ພັດໄລ່ອັດຕາ ມັນບໍ່ໄດ້ອີກ ຕົວຢ່າງຄື ເພິ່ນມີໂຄງການເຂົ້າມາ ທີ່ມາໄຖສວນໃຫ້ເນາະ ແຕ່ວ່າມັນຕ້ອງໄດ້ຂາຍໃຫ້ເພິ່ນ ຂາຍໃຫ້ເພິ່ນແລ້ວ ເພິ່ນພັດຊື້ໃນລາຄາ ທີ່ວ່າມັນບໍ່ໄດ້ຫັ້ນນ່າ ເພິ່ນກະມາຕັດນໍາເຂົາ ຕັດຫລາຍ ຫັ້ນນ່າ ຕັດຄ່າບຸກເບີກ ຄ່າໄຖຫັ້ນນ່າ ມັນບໍ່ຕາມຄວາມຈິງ ເຂົາກະບໍ່ເອົາ.”
ກ່ອນໜ້ານີ້ ໃນວັນທີ 30 ກໍລະກົດ 2024 ທ່ານ ພົນໂທ ຕໍາຫລວດ ວັນທອງ ກອງມະນີ ເຈົ້າແຂວງ ແຂວງອັດຕະປື ລາຍງານວ່າ ໂຄງການພັດທະນາ ຂອງລັດ ຢູ່ແຂວງອັດຕະປື ນີ້ ຍັງມີຂໍ້ຄົງຄ້າງ ທີ່ຕ້ອງໄດ້ແກ້ໄຂຫລາຍ. ສ່ວນນຶ່ງ ຍ້ອນວ່າ ການສະໜອງງົບປະມານ ເຂົ້າໃຈການລົງທຶນຂອງລັດ ບໍ່ພຽງພໍກັບຄວາມຕ້ອງການ ຂອງການພັດທະນາ ເຮັດໃຫ້ໂຄງການ ຈໍານວນນຶ່ງ ບໍ່ສາມາດຈັດຕັ້ງປະຕິບັດໄດ້ ແລະ ຕ້ອງຍົກເລີກໂຄງການ.
ກ່ຽວກັບເລື້ອງນີ້ ເຈົ້າໜ້າທີ່ ທີ່ຮູ້ຈັກເຮັດວຽກງານ ການພັດທະນາ ໃນແຂວງອັດຕະປື ທ່ານນຶ່ງ ກ່າວວ່າ ໂຄງການທີ່ກ່າວເຖິງ ແມ່ນສ່ວນຫລາຍ ເປັນໂຄງການດ້ານກະສິກັມ ທີ່ຈະມາຈັບຈອງ ແຕ່ເມື່ອຮອດເວລາ ນັກລົງທຶນ ຈໍານວນນຶ່ງ ກໍບໍ່ມານໍາໃຊ້ ເນື້ອທີ່ດິນດັ່ງກ່າວ ພັດທະນາໂຄງການ ລວມທັງໂຄງການ ຂຸດຂົ້ນບໍ່ແຮ່. ດັ່ງ ທ່ານກ່າວ ໃນມື້ດຽວກັນນີ້ວ່າ:
“ສ່ວນຫລາຍມີແຕ່ໂຄງການ ກໍມີແຕ່ປະເພດພືດ ແມ່ນ ປູກຝັງລ້ຽງສັດ ປະເພດວຽກກະສິກັມບໍ່ ຊິນ່າ ກໍຂຸດຄົ້ນຄໍາເພິ່ນກໍຢຸດຕິ ຢຸດ ແລ່ນມາແຕ່ເທິງ ຈັ່ງວ່າ ແມ່ນ ເພາະວ່າຂັ້ນເທິງ ເພິ່ນສັ່ງຢຸດເດ້ ຢຸດກ່ອນ ສັ່ງໂຈະຫັ້ນນ່າ.”
ກ່ອນໜ້ານີ້ ໃນເດືອນ ມີຖຸນາ ຍານາງ ມີນາພອນ ໄຊຊົມພູ ສະມາຊິກ ສະພາແຫ່ງຊາດ ເຂດເລືອກຕັ້ງທີ 17 ແຂວງອັດຕະປື ໄດ້ຣາຍງານ ຕໍ່ກອງປະຊຸມ ສະມັຍສາມັນ ເທື່ອທີ 7 ຂອງ ສະພາແຫ່ງຊາດລາວ ວ່າ ທີ່ຜ່ານມາ ແຂວງອັດຕະປື ໄດ້ກວດກາ ໂຄງການລົງທຶນ ຂອງລັດ ແລະ ພົບວ່າ ມີໂຄງການ ດໍາເນີນການເຄື່ອນໄຫວ ບໍ່ຖືກລະບຽບ. ດັ່ງນັ້ນ ເຈົ້າແຂວງ ແຂວງອັດຕະປື ຈຶ່ງໄດ້ອອກຂໍ້ຕົກລົງ ສັ່ງໂຈະ 33 ໂຄງການ ໂດຍໂຄງການເຫລົ່ານັ້ນ ແມ່ນເປັນໂຄງການ ທີ່ບໍ່ປະຕິບັດ ຕາມສັນຍາ ຫລື MOU ທີ່ເຊັນໄວ້ ກັບຂັ້ນແຂວງ ຫລື ກະຊວງ.
ຍານາງ ມີນາພອນ ໄດ້ສະເໜີ ຕື່ມວ່າ ໂຄງການລົງທຶນຕ່າງໆ ມີການອະນຸມັດ ຈາກທັງຂັ້ນສູງກາງ ຮອດຂັ້ນທ້ອງຖິ່ນ ແຕ່ການຕິດຕາມ-ກວດກາ ຍັງບໍ່ເຂັ້ມແຂງ ຍ້ອນການປະສານງານ ລະຫວ່າງ ຂັ້ນສູນກາງ ແລະ ທ້ອງຖິ່ນ ເຮັດໃຫ້ມີໂຄງການ ທີ່ບໍ່ເປັນໄປ ຕາມຂັ້ນຕອນ ແລະ ລະບຽບການ. ສ່ວນ ການຂຸດຄົ້ນແຮ່ທາດ ບາງກິດຈະການ ລາຍງານບໍ່ສອດຄ່ອງ ກັບຕົວຈິງ ເປັນຕົ້ນວ່າ ຂຸດຄົ້ນໄດ້ຫຼາຍ ແຕ່ລາຍງານໜ້ອຍ. ສະນັ້ນ,ຕ້ອງມີການຕິດຕາມ-ກວດກາ ທີ່ດີ ແລະ ເຂັ້ມງວດຂຶ້ນຕື່ມ.