ລັດຮຽກຮ້ອງໃຫ້ປະຊາຊົນໃຊ້ເງິນກີບ ແຕ່ທຸລະກິດຂະໜາດໃຫຍ່ ຍັງປະຕິບັດບໍ່ໄດ້

ທີ່ຜ່ານມາ ແລະໃນປັດຈຸບັນ ຜູ້ປະກອບການທຸລະກິດໃນລາວ ຈໍານວນໜຶ່ງ ປະກາດບໍ່ຂາຍສິນຄ້າ ແລະບໍລິການ ເປັນເງິນຕາຕ່າງປະເທດ ໂດຍສະເພາະເງິນບາດ ແລະເງິນໂດລ້າສະຫະລັດ ແລະທະນາຄານແຫ່ງ ສປປ ລາວ ກໍໄດ້ພະຍາຍາມ ເລັ່ງແກ້ໄຂບັນຫາເງິນກີບອ່ອນຄ່າ, ເງິນກີບເຟີ້ ດ້ວຍການສົ່ງເສີມປະຊາຊົນ ຫັນມາໃຊ້ສິນຄ້າ ອຸປະໂພກ-ບໍລິໂພກ ທີ່ຜະລິດໄດ້ຢູ່ພາຍໃນລາວ ເພື່ອຫຼຸດຜ່ອນການໄຫຼຂອງເງິນຕາຕ່າງປະເທດ ອອກໄປນອກປະເທດ.

ໃນຂະນະດຽວກັນ ປະຊາຊົນລາວຈໍານວນໜຶ່ງ ກໍໄດ້ພະຍາຍາມສົ່ງເສີມຜ່ານສື່ສັງຄົມອອນລາຍ ໃຫ້ຜູ້ຄົນຫັນມາໃຊ້ເງິນກີບຫຼາຍຂຶ້ນ. ແຕ່ກໍມີຜູ້ປະກອບການທຸລະກິດ ຈໍານວນໜຶ່ງ ເປັນຕົ້ນ ໂຮງແຮມ, ຮ້ານອາຫານ, ໂຮງຮຽນນາໆຊາດ ແລະຮ້ານຂາຍລົດໃຫຍ່ ຮັບ ແລະຊື້-ຂາຍກັນເປັນເງິນຕາຕ່າງປະເທດຢູ່.

ກ່ຽວກັບເລື່ອງທີ່ວ່ານີ້ ເຈົ້າຂອງທຸລະກິດນໍາເຂົ້າເຄື່ອງຜະລິດນໍ້າກ້ອນ ຢູ່ນະຄອນ ຫຼວງວຽງຜູ້ໜຶ່ງ ເວົ້າວ່າ ເຖິງແມ່ນຈະມີການລະດົມ ແລະລົງກວດກາການໃຊ້ເງິນກີບ ໃນການຊື້-ຂາຍສິນຄ້າ ແລະການບໍລິການ ແຕ່ກໍຍັງເຫັນວ່າ ທຸລະກິດຈໍານວນໜຶ່ງ ໂດຍສະເພາະທຸລະກິດ ຂະໜາດໃຫຍ່ ທີ່ຍັງລັກໃຊ້ຊື້-ຂາຍກັນ ເປັນເງິນຕາຕ່າງປະເທດຢູ່ ແລະວ່າ ມາດຕະການ ທີ່ທາງການອອກມານັ້ນ ແມ່ນຖືກນໍາໃຊ້ກັບຜູ້ປະກອບການທຸລະກິດຂະໜາດນ້ອຍເທົ່ານັ້ນ, ປັດຈຸບັນ ຍັງມີການລັກໃຊ້ເງິນຕາຕ່າງປະເທດຢູ່ ດັ່ງທີ່ທ່ານກ່າວຕໍ່ວິທະຍຸເອເຊັຽເສຣີ ໃນມື້ວັນທີ 22 ກໍລະກົດນີ້ວ່າ:

“ແມ່ນໆ ກໍຍັງຢູ່ແຕ່ວ່າ ລັກລອບ ຄັນເຂົາເຫັນສ່ວນຫລາຍເຂົາກໍຈັບ ເພາະເຂົາວ່າວາງມາດຕາອອກມາແລ້ວ ເດ້ ເພາະລະບຽບມັນເພິ່ນວາງອອກມາ ຈັ່ງຊັ້ນຫັ້ນນ່າ ແຕ່ວ່າສ່ວນຫລາຍກໍແມ່ນພວກນາຍທຶນໃຫຍ່ ມັນກໍຊິມີການລັກລອບກັນແນວນັ້ນ. ໄປເຮັດເຂົາບໍ່ໄດ້ ມີແຕ່ພາກສ່ວນນ້ອຍໆ.”

ແລະຜູ້ປະກອບການທຸລະກິດ ຂາຍລົດໃຫຍ່ ຢູ່ນະຄອນຫຼວງວຽງຈັນຜູ້ໜຶ່ງ ກໍເວົ້າວ່າ ລົດທີ່ຂາຍໃນປະເທດລາວ ຕ້ອງຂາຍເປັນເງິນບາດ ຍ້ອນເປັນລົດທີ່ນໍາເຂົ້າມາຈາກປະເທດໄທທັງໝົດ, ເງິນທໍາອິດທີ່ໃຊ້ຊື້ ຄືເງິນບາດ ແລະວ່າ ເປັນໄປບໍ່ໄດ້ ທີ່ຈະນໍາມາຂາຍເປັນເງິນກີບ ຍ້ອນວ່າ ຜູ້ປະກອບການທຸລະກິດຂາຍລົດເຈົ້າອື່ນໆ ຍັງຂາຍເປັນເງິນບາດຄືເກົ່າຢູ່ ດັ່ງທີ່ທ່ານກ່າວໃນມື້ດຽວກັນນີ້ວ່າ:

“ບໍ່ໄດ້ດອກ ລັດຖະານເຮັດບໍ່ໄດ້ ບັດນີ້ເງິນໄທຫັ້ນນ່າ ເຮົາຊື້ນໍາເພິ່ນເຮົາຕ້ອງໄດ້ຈ່າຍເປັນເງິນໄທ ເຮົາບໍ່ໃຊ້ເງິນກີບ ເຮົາຕ້ອງໃຊ້ເລດສູງໄວ້ ຖາເຮົາໄດ້ແລກເປັນເງິນບາດ ແມ່ນ ຄົນອື່ນກໍເຮັດ ຊິເຮັດບໍ່ໄດ້ດອກ ເຮົາເຮັດຜູ້ດຽວ ຄົນອື່ນບໍ່ເຮັດນໍາເຮົາກໍຄືເກົ່າ.”

ແລະຢູ່ນະຄອນໄກສອນ ພົມວິຫານ ແຂວງສະຫວັນນະເຂດ ຕາມຕະຫຼາດ ກໍຍັງມີການໃຊ້ ທັງເງິນກີບ ແລະເງິນບາດ ກັນຢູ່ ໃນການຊື້-ຂາຍສິນຄ້າທົ່ວໄປ, ຍັງບໍ່ທັນຫັນມາໃຊ້ແຕ່ເງິນກີບຢ່າງດຽວ ຕາມມາດຕະການຂອງທາງການ ແລະການເຊີນຊວນຂອງປະຊາຊົນ ຈໍານວນໜຶ່ງນັ້ນເທື່ອ.

ສ່ວນວ່າ ການຊື້-ຂາຍໃຫຍ່ ເປັນຕົ້ນ ລົດ ບາງບໍລິສັດ ກໍຍັງຮັບເງິນຕາຕ່າງປະເທດ ທັງເງິນບາດ ແລະເງິນໂດລ້າຢູ່ ດັ່ງຜູ້ປະກອບການນໍາເຂົ້າເຄື່ອງຈັກການກະເສດ ຢູ່ແຂວງສະຫວັນນະເຂດ ທ່ານໜຶ່ງເວົ້າວ່າ:

“ສ່ວນຫລາຍຄົນລາວ ກໍຍັງລັກໃຊ້ເງິນບາດຄືເກົ່າ ທາງລັດຖະບານພວກເຂົາລະລົນນະລົງໃຫ້ໃຊ້ເງິນກີບ ໃຊ້ເງິນກີບມັນກະບໍ່ຄືເກົ່າແຫລະ ຢູ່ໃນຕະຫລາດກະຍັງໃຊ້ກັນຄືເກົ່າຫັ້ນແຫລະ ຊື້ເຄື່ອງຂາຍເຄື່ອງ ປະເພດຊື້ເຄື່ອງນຸ່ງກໍຍັງເປັນເງິນບາດຄືເກົ່າ ເປັນເງະນບາດເບິດແຫລະ ບໍ່ມີໄຄເອົາເງິນກີບດອກ. ເງິນກີບແທບຈະບໍ່ຢາກຂາຍແລ້ວ. ສິນຄ້າແພງໆ ກໍລົດ ກໍຮູ້ແຫລະລົດ ຍັງຂາຍເປັນເງິນໂດລ້າ, ເປັນເງິນບາດ ກັນໝົດ ຂະຫຍາດສູນໃຫຍ່ໆຫັ້ນນ່າ.”

ເມື່ອກ່ອນໜ້ານີ້  ທະນາຄານແຫ່ງ ສປປ ລາວ ໄດ້ແຕ່ງຕັ້ງຄະນະຕິດຕາມກວດກາ ການຕິດລາຄາສິນຄ້າ ແລະການແລກປ່ຽນເງິນຕາ ຢູ່ສໍານັກງານຄະນະກໍາມະການຄຸ້ມຄອງ ຕະຫລາດຫຼັກຊັບ. ຄະນະທີ່ວ່ານີ້ ໄດ້ລິເລີ່ມປະຕິບັດຢູ່ນະຄອນຫຼວງວຽງຈັນ ໃນວັນທີ 18 ກໍລະກົດນີ້ ເພື່ອຄຸ້ມຄອງເງິນຕາຕ່າງປະເທດ ແລະສະເຖຍລະພາບ ຂອງຄ່າເງິນກີບ ແລ້ວຈຶ່ງຈະຂະຫຍາຍໄປແຂວງອື່ນໆ.

ຢູ່ແຂວງບໍລິຄໍາໄຊ ເຈົ້າໜ້າທີ່ ພະແນກອຸດສາຫະກໍາ ແລະການຄ້າແຂວງນີ້ ນາງໜຶ່ງ ກ່າວຕໍ່ວິທະຍຸເອເຊັຽເສຣີ ວ່າ ທາງການເພິ່ນໃຫ້ໃຊ້ເງິນກີບ, ປັດຈຸບັນການຕິດປ້າຍຂາຍສິນຄ້າຕ່າງໆ ຕ້ອງເປັນເງິນກີບທັງໝົດ, ຫາກບໍ່ປະຕິບັດຕາມມາດຕະການ ຂອງທາງການ ກໍອາດຈະຖືກຕັກເຕືອນ ຫຼືປັບໃໝນໍາດ້ວຍ.

“ໂອ້ ດຽວນີ້ເພິ່ນໃຫ້ໃຊ້ ບໍ່ໄດ້ເດ້ ເພິ່ນຕ້ອງໃຫ້ຕິດປ້າຍລາຄາເປັນສິນຄ້າເປັນເງິນກີບໝົດເລີຍເນາະ ດຽວນີ້ເນາະ. ແມ່ນໆ ເພິ່ນກໍມີມາດຕາການຂອງເພິ່ນ.”

ບັນຫາທີ່ວ່ານີ້ເກີດຂຶ້ນຢູ່ລາວ ກໍຍ້ອນເສດຖະກິດລາວຕົກຕໍ່າຫຼາຍ, ເງິນກີບເຟີ້ ແລະອ່ອນຄ່າຮຸນແຮງ ຈົນທ່ານ ທອງລຸນ ສີສຸລິດ ປະທານປະເທດ ໄດ້ສະເໜີໃຫ້ລັດຖະບານ ແກ້ໄຂບັນຫາເງິນກີບອ່ອນຄ່າ ໃຫ້ໄດ້ພາຍໃນ 1 ເດືອນ ຄຽງຄູ່ໄປກັບການແກ້ໄຂບັນຫາອື່ນໆ ນັບແຕ່ວັນທີ 15 ກໍລະກົດນີ້ເປັນຕົ້ນໄປ, ບໍ່ໃຫ້ມີຄໍາວ່າ ເຮັດບໍ່ໄດ້ ເພາະໄລຍະທີ່ຜ່ານມາ ກໍໄດ້ມີການປັບປຸງ ບັນດາກົນໄກດ້ານຕ່າງໆ ແຕ່ກໍບໍ່ມີແນວໂນ້ມດີຂຶ້ນ.