ຮຽກຮ້ອງ ແກ້ໄຂບັນຫາເສດຖະກິດ ໃນວາລະ ກອງປະຊຸມສະພາແຫ່ງຊາດ

ກອງປະຊຸມສະໄໝສາມັນ ເທື່ອທີ່ 8 ຂອງສະພາແຫ່ງຊາດ ຊຸດທີ່ 9 ຂອງ ສປປລາວ ຈະຈັດຂຶ້ນ ແຕ່ກາງເດືອນພະຈິກ ຫາຕົ້ນເດືອນທັນວາ 2024 ທ່າມກາງ ທີ່ປະຊາຊົນ ຮຽກຮ້ອງໃຫ້ ລັດຖະບານແກ້ໄຂບັນຫາຄ່າຄອງຊີບ ທີ່ຫຍຸ້ງຍາກ ຍ້ອນເສດຖະກິດ ຕົກຕໍ່າໜັກໜ່ວງ, ບັນຫາເງິນກີບເຟີ້, ເງິນກີບອ່ອນຄ່າຫຼາຍ, ລາຄາສິນຄ້າທຸກຢ່າງ ທີ່ແພງຢູ່ນີ້ ໃຫ້ດີຂຶ້ນ, ດັ່ງປະຊາຊົນທ່ານໜຶ່ງ ກ່າວຕໍ່ ວິທຍຸ ເອເຊັຽ ເສຣີ ໃນວັນທີ່ 1 ພະຈິກ ນີ້ວ່າ:

“ບັນຫາຫຼັກໆ ລະບົບເສດຖະກິດນີ້ແຫຼະ ເງິນເຟີ້ນີ້ແຫຼະ ແຮ່ງສິນຄ້າແພງນໍ ເງິນກີບອ່ອນຄ່າ ນີ້ແຫລະ ແກ້ໄຂ ໃຫ້ເງິນກີບແຂງຄ່າ ຄືເກົ່າ ຄ່າຄອງຊີບມັນກໍສູງ ບັດນີ້ເງິນເດືອນນໍ ພະນັກງານ ມັນກະບໍ່ພໍໃຊ້ ບໍ່ພໍຈ່າຍ ປະຊາຊົນ ຜູ້ເຂົາຫາເຊົ້າກິນຄໍ່າ ຫັ້ນຕິໜັກ, ປະຊຸມຊຸດກ່ອນ ຊຸດກ່ອນ ກໍເລັ່ງໃສ່ ວາລະແຫ່ງຊາດ ແກ້ໄຂເສດຖະກິດ ກັບຢາເສບຕິດ ກະຄືເກົ່າ ແພງເພີ່ມຫຼາຍກວ່າເກົ່າ ຢາກະດາຍ.”

ແລະ ປະຊາຊົນ ອີກນາງໜຶ່ງ ກໍເວົ້າວ່າ ຢາກໃຫ້ ທາງສະພາ ຊ່ອຍຫາວິທີແກ້ໄຂ ບັນຫາເງິນເຟີ້ ແລະຢາກໃຫ້ເຈົ້າໜ້າທີ່ ທີ່ກ່ຽວຂ້ອງ ໄປກວດກາລາຄາສິນຄ້າ ຢູ່ຕະຫຼາດ ທີ່ແພງເກີນໄປ, ໄດ້ຮັບຜົນກະທົບຫຼາຍ:

“ຢາກສະເໜີ ເງິນມັນເຟີ້ຫຼາຍ ດຽວນີ້ຫັ້ນວ່າ ລົງໜ້ອຍໜຶ່ງ ແຕ່ວ່າ ເຄື່ອງມັນຂຶ້ນຈັ່ງຊີ້ນະ ເສດຖະກິດ ຕາມຕະຫຼາດນະ ຢາກໃຫ້ເພິ່ນລົງກວດກາແດ່ ເປັນຫຍັງ ມັນຄືຂຶ້ນ ມັນຂຶ້ນແພງຫຼາຍ ລະບໍ່ເຂົ້າໃຈ ເປັນຍ້ອນເງິນເຟີ້ນີ້ບໍ ໂອຍ… ກະທົບແດ່ ກະທົບຫັ້ນແຫຼະ.”

ພ້ອມດຽວກັນນັ້ນ, ນາງກໍເວົ້າຕື່ມວ່າ ຢາກໃຫ້ມີການສ້ອງແປງຖະໜົນຫົນທາງ ທີ່ເປ່ເພ ເປັນຂຸມເລິກ ເພື່ອໃຫ້ປະຊາຊົນ ເດີນທາງໄປ-ມາ ສະດວກ ເປັນຕົ້ນ ຖະໜົນທ່າເດື່ອ ເມືອງຫາດຊາຍຟອງ ນະຄອນຫຼວງວຽງຈັນ ທີ່ເຊື່ອມຕໍ່ໃສ່ ເສັ້ນທາງ 450 ປີ.

ໃນຂະນະດຽວກັນ, ເຈົ້າໜ້າທີ່ ອໍານາດການປົກຄອງບ້ານ ທ່ານໜຶ່ງ ເວົ້າວ່າ: ນອກຈາກ ບັນຫາເງິນກີບເຟີ້ ແລະ ເງິນກີບອ່ອນຄ່າ ໜັກໜ່ວງຫຼາຍແລ້ວ ກໍຢາກໃຫ້ ກອງປະຊຸມສະພາແຫ່ງຊາດ ທີ່ຈະມີຂຶ້ນນີ້ ແກ້ໄຂບັນຫາ ການປະຕິບັດກົດໝາຍ ບໍ່ຍຸຕິທໍາ ຕໍ່ປະຊາຊົນ:

“ກະແມ່ນ ເວົ້າເລື່ອງ ການຈັດຕັ້ງປະຕິບັດກົດໝາຍ ຄັນວ່າ ປະຊາຊົນເຮັດ ສໍ້ລາດບັງຫຼວງ ໜ້ອຍໜຶ່ງ ກໍເປັນໂທດແລ້ວ ພະນັກງານເຮັດຜິດນໍ ເຈົ້ານາຍເຮັດຜິດ ລັກ ຂອງພັກ-ຂອງລັດ ຂອງບ້ານ-ຂອງເມືອງ ໂທດບໍ່ມີ ບໍ່ມີອັນດໍາເນີນ ອັນນີ້ແຫຼະ ຍົກໂຕຢ່າງ ຄືແນວນັ້ນ ເລື່ອງກົດໝາຍ ກໍຢາກໃຫ້ມັນ ເປັນອັນເລິກຊຶ້ງ.”

ທ່ານກ່າວຕື່ມວ່າ: ນອກຈາກນັ້ນ ກໍຢາກໃຫ້ ລັດຖະບານ ມີນະໂຍບາຍ ໃຫ້ເງິນເດືອນນາຍບ້ານ ຕາມອັດຕາ ເງິນເດືອນຂັ້ນຕໍ່າ ຂອງລັດຖະກອນ, ຊຶ່ງປັດຈຸບັນ ໄດ້ພຽງເງິນອຸດໜູນ 350,000 ກີບຕໍ່ເດືອນເທົ່ານັ້ນ.

ກ່ຽວກັບ ກອງປະຊຸມສະພາແຫ່ງຊາດ ເທື່ອນີ້ ເຈົ້າໜ້າທີ່ ທາງການລາວ ທ່ານໜຶ່ງ ເວົ້າວ່າ ກອງປະຊຸມຈະປະເມີນ ຜົນການປະຕິບັດ ພາລະກິດຕ່າງໆ ຂອງລັດຖະບານ, ຮັບຟັງ ບັນຫາຂອງປະຊາຊົນ ແລະວາງແຜນ ແກ້ໄຂບັນຫາ ທີ່ຍັງຄົງຄ້າງ ເປັນຕົ້ນ ບັນຫາເສດຖະກິດ:

“ຕາມວາລະ ຂອງເພີ່ນ ສ່ວນຫຼາຍ ແມ່ນໜຶ່ງ ແມ່ນປະເມີນ ການປະຕິບັດຜ່ານມາ ຂອງສະພາ ກະມະຕິຫາງສຽງ ຂອງປະຊາຊົນ ຮ້ອງຮຽນ ຜ່ານມາ ແຕ່ລະທ້ອງຖິ່ນນໍ ເງິນເຟີ້ ເລື່ອງເສດຖະກິດ ນີ້ແຫຼະ ແລ້ວກະເງິນເດືອນ ຂອງພະນັກງານ ແກ້ໄຂບັນຫາ ທີ່ວ່າ ຄົງຄ້າງ ແລ້ວວາງແຜນ ຕໍ່ໜ້າວ່າ ຈະເຮັດແນວໃດ ຜ່ານກອງປະຊຸມ ສະພາເພິ່ນ.”

ກອງປະຊຸມສະໄໝສາມັນ ເທື່ອທີ່ 8 ຂອງສະພາແຫ່ງຊາດ ຊຸດທີ່ 9 ທີ່ຈະມີຂຶ້ນນີ້ ຈະຄົ້ນຄວ້າ ພິຈາລະນາ ແລະ ຮັບຮອງ ເອົາ 4 ຂົງເຂດວຽກງານ ຄື ວຽກງານ ລັດຖະບານ, ວຽກງານອົງການກວດສອບແຫ່ງລັດ ແລະ ອົງການກວດກາແຫ່ງລັດ, ວຽກງານ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ແລະ ວຽກງານສະພາແຫ່ງຊາດ ຈະພິຈາລະນາ ແລະ ຮັບຮອງ ເອົາກົດໝາຍໃໝ່ 2 ສະບັບ ແລະ ກົດໝາຍ ສະບັບປັບປຸງ 7 ສະບັບ.