ຜູ້ປະກອບການລ້ຽງໝູ ໄດ້ຮັບຜົລກະທົບໜັກ ຍ້ອນຕົ້ນທຶນສູງ

ຜູ້ປະກອບການລ້ຽງໝູຫລາຍຄົນ ຢູ່ຫລາຍແຂວງ ເຣີ່ມໄດ້ຮັບຜົລກະທົບ ແລະ ເດືອດຮ້ອນ ຍ້ອນຕົ້ນທຶນລ້ຽງໝູສູງເກີນໄປ, ແບກຫາບພາຣະຕົ້ນທຶນບໍ່ໄຫວ ໂດຍສະເພາະ ຫົວອາຫານແພງຂຶ້ນຫລາຍ, ອີງຕາມຄໍາເວົ້າ ຂອງຜູ້ປະອບການລ້ຽງໝູ ຢູ່ເມືອງພິນ ແຂວງສວັນນະເຂດ ຜູ້ນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 17 ຕຸລານີ້.

ທ່ານເວົ້າວ່າ ຈະຂາຍໝູອອກໃຫ້ໝົດ, ຈະເຊົາລ້ຽງໝູຂາຍແລ້ວ ຍ້ອນຫົວອາຫານແພງເກີນໄປ, ລາຄາຫົວອາຫານ ຂອງລາວ ຢູ່ເມືອງພິນ 320,000 ກີບຕໍ່ເປົ໋າ ຄືຂຶ້ນຈາກ 250,000 ກີບ, ຖ້າເປັນຫົວອາຫານຂອງໄທຍ ຍິ່ງບໍ່ໄຫວ ແລະລາຄານັ້ນ ກໍແພງຂຶ້ນຕໍ່ເນື່ອງ ແຕ່ຜູ້ທີ່ມາຊື້ໝູ ຢູ່ໜ້າຟາມ ຢາກຊື້ໃນລາຄາຖືກ.

“ເປັນຕົ້ນຄືຂ້ອຍນີ້ ຂາຍອອກໝົດຊິເຊົາ. ລາຄາຫົວອາຫານຫັ້ນຫົວອາຫານລາວຫັ້ນ ຂຶ້ນເທື່ອລະ 5000 ເທື່ອລະ 8000 ເປົ໋ານຶ່ງນີ້ນ່າ. ເມືອງພິນພີ້ຫັ້ນຢູ່ 320,000 ແລ້ວ ແຕ່ເກົ່າຫັ້ນ 250,000 260,000. ມັນຂຶ້ນຂຶ້ນເລີຍໆ ບາດໝູພັນຫັ້ນຢາກຂາຍ...39 ບໍ່ມີຮອດຄົນຢາກຊື້. ຄົນມາຊື້ເຂົາກໍຢາກຊື້ຖືກໆ.”

ທ່ານກ່າວຕື່ມວ່າ ຖ້າເປັນໄປໄດ້ ກໍຢາກໃຫ້ທາງການ ຊ່ອຍແກ້ໄຂເຣື່ອງຫົວອາຫານ ໃຫ້ມີລາຄາຫລຸດລົງ, ບໍ່ແພງເກີນໄປ ເພື່ອໝູຈະບໍ່ໄດ້ຂາດຕລາດໃນຂັ້ນຕໍ່ໄປ.

ທີ່ນະຄອນຫລວງວຽງຈັນ ຜູ້ປະກອບການລ້ຽງໝູຜູ້ນຶ່ງ ເວົ້າວ່າ ຕົນເອງກໍປະສົບບັນຫາແບກຫາບຕົ້ນທຶນສູງໃນການລ້ຽງໝູ ບໍ່ໄຫວຄືກັນ ບໍ່ຢາກລ້ຽງ ແລະຢາກຂາຍໝູອອກໝົດ ຍ້ອນດຽວນີ້ ຫົວອາຫານແພງຂຶ້ນຫລາຍ ເປົ໋ານຶ່ງ 315,000 ກີບ, ເດືອນກ່ອນໆມີແຕ່ 200,000-290,000 ກີບຕໍ່ເປົ໋າ.

“ຂ້ອຍລ້ຽງບໍ່ໄຫວ ຄ່າຮໍາກໍແພງ ຄ່າຫົວອາຫານກໍຂຶ້ນເນາະ ແລ້ວຂ້ອຍຢາກຂາຍອອກ. ຂ້ອຍລ້ຽງບໍ່ໄຫວຊີ້ນ່າ.  ໃຊ້ຂອງລາວດຽວນີ້ 315,000 ຕໍ່ເປົ໋າ. ຊ່ວງຫວ່າງເດືອນກ່ອນໆ 200,000-290,000 ມັນເພີ່ມຂຶ້ນຫລາຍ ຮໍາເປົ໋າລະ 100,000 ກະເປັນເປົ໋າ 140,000 ດຽວນີ້.”

ຢູ່ແຂວງໄຊຍະບູຣີ ຜູ້ປະກອບການລ້ຽງໝູ ເວົ້າວ່າໄດ້ຮັບຜົລກະທົບ ບໍ່ແຕກຕ່າງກັນ ໃນເຣື່ອງຫົວອາຫານແພງ, ຕົນໃຊ້ຫົວອາຫານໄທຍ ເປົ໋ານຶ່ງ 30 ກິໂລ ລາຄາ 850 ບາດ ຫລືປະມານ 500,000 ປາຍກີບ ເມື່ອປີກາຍ ລາຄາປະ ມານ 770 ບາທ, ບໍ່ຢາກໃຊ້ຫົວອາຫານ ຂອງລາວ ເພາະໝູມັນໃຫຍ່ຊ້າ ແລະຄຸນນະພາບຕ່າງກັນ. ລາຄາຫົວອາຫານ ຂຶ້ນຕໍ່ເນື່ອງ, ທາງການ ບໍ່ໄດ້ຊ່ອຍເຫລືອຫຍັງ, ຢາກຂາຍໝູອອກໝົດ ແລ້ວເຊົາກິຈການນີ້.

ດັ່ງທີ່ທ່ານກ່າວວ່າ:

“ແມ່ນແລ້ວອັນຫົວອາຫານແພງຫລາຍ ດຽວນີ້ຫລຸບທຶນ. ໃຊ້ຂອງໄທຍ ບາດນີ້ຂ້ອຍໃຊ້ນັ້ນ ລຸ້ນ 850 ບາດເປົ໋ານຶ່ງ 30 ກິໂລເປັນເງິນລາວກໍ 5 ແສນປາຍ ປີກາຍ 770 ບາທ. ມັນຂຶ້ນມາໆ ຜູ້ໃດກະຈົ່ມຊິເຊົາ ຫລາຍເດ໋. ປະຊາຊົນກະດາຍ ບໍ່ຮູ້ຈະເຮັດແນວໃດ. ທາງການເຂົາກໍບໍ່ແກ້ໄຂ. ຂາຍອອກຍາກ ກໍາໄລໜ້ອຍເດ້.”

ກ່ຽວກັບບັນຫາທີ່ວ່ານີ້ ເຈົ້າໜ້າທີ່ກະສິກັມ ແລະປ່າໄມ້ ນະຄອນຫລວງວຽງຈັນ ທ່ານນຶ່ງ ຜູ້ຂໍສງວນຊື່ ແລະຕໍາແໜ່ງ ກ່າວວ່າ ຍັງບໍ່ຮູ້ຣາຍລະອຽດຄັກແນ່,​ ຕ້ອງໃຫ້ທາງຜູ້ປະກອບການລ້ຽງໝູ ສເນີເຣື່ອງມາຫາຂັ້ນເທິງກ່ອນ ຈຶ່ງຈະມີແນວທາງຊ່ອຍເຫລືອ.

“ເອົ້າ. ບໍ່ເຫັນເຂົາເຈົ້າເວົ້າຫຍັງເດ້ລະ. ບໍ່ຮູ້ເຫດຜົລເຂົາ ບັນຫາເຂົາ ຄັນເຂົາມີບັນຫາເຂົາສເນີມາ. ໄທເຮົາກໍມີວິທີການນໍາສເນີແກ້ໄຂ ກະຕວງບໍ່ໄດ້ ມີແຕ່ວ່າ ຖ້າຮູ້ບັນຫາມັນກ່ອນ.”

ຢູ່ແຂວງພາກໃຕ້ ເຈົ້າໜ້າທີ່ກະສິກັມ ແລະປ່າໄມ້ ທ່ານນຶ່ງ ເວົ້າຕໍ່ວິທຍຸ ເອເຊັຽເສຣີ ເຖິງບັນຫາດັ່ງກ່າວ ໃນມື້ວັນທີ 17 ຕຸລານີ້ວ່າ ກໍມີແນວທາງແກ້ໄຂຢູ່ ໂດຍສະເພາະ ຈະໃຫ້ຫລຸດລາຄາຫົວອາຫານ, ຫລຸດພາສີ-ອາກອນ, ທາງຂັ້ນເມືອງ ຂັ້ນແຂວງ ແມ່ນບໍ່ສາມາດທີ່ຈະແກ້ໄຂບັນຫານັ້ນເອງໄດ້, ເຣື່ອງນີ້ ແມ່ນ ຣັຖບານ ຈະເປັນຜູ້ແກ້ໄຂ ເພາະມີຫລາຍກະຊວງ ກ່ຽວຂ້ອງ ໂດຍສະເພາະ ກະຊວງອຸດສາຫະກັມ ແລະການຄ້າ ເພາະຈະຕ້ອງເວົ້າເຣື່ອງ ການຄວບຄຸມລາຄາສິນຄ້າ ແລະ ກະຊວງການເງິນນໍາດ້ວຍ.

“ມັນຈະກ່ຽວພັນຫລາຍພາກສ່ວນເດ້ ໂຕນີ້ເນາະ. ມັນກໍບໍ່ແມ່ນມີສ່ວນອໍານາດ ແຕ່ຝ່າຍກະສິກັມມັນກໍມີຝ່າຍການຄ້າ ເຣື່ອງການຄວບຄຸມເຣື່ອງສິນຄ້າ ກໍຈະກ່ຽວພັນກັບການເງິນພ້ອມເດ້. ຄັນນໍາເຂົ້ານີ້ກໍໍຊິແມ່ນຍົກເວັ້ນ ພາສີນໍາເຂົ້າບໍ່ ຫລືວ່າອາກອນນໍາເຂົ້າ ຫລືວ່າອິສັງ ມູນຄ່າເພີ່ມບໍ່. ບາງເທື່ອມັນກໍມີຫລາຍອັນເດ້ ອໍານາດຂັ້ນໄທເຮົາ ອະນຸຍາດເຮັດບໍ່ໄດ້.”

ເຈົ້າໜ້າທີ່ກະສິກັມ ແລະປ່າໄມ້ ທ່ານນີ້ ເວົ້າຕໍ່ໄປວ່າ ບັນຫາດັ່ງກ່າວ ຄິດວ່າເປັນເຣື່ອງຫຍຸ້ງຍາກ ລະດັບນຶ່ງ ສໍາລັບເຈົ້າໜ້າທີ່ຂັ້ນເມືອງ ຂັ້ນແຂວງ ແລະປັດຈຸບັນ ບັນຫາເງິນເຟີ້ ແລະເງິນກີບອ່ອນຄ່າ ຍັງຢູ່, ​ຍັງບໍ່ສາມາດແກ້ໄຂໄດ້ເທື່ອ, ແຕ່ເຖິງຢ່າງໃດກໍຕາມ ຢູ່ ສປປ ລາວ ບໍ່ແມ່ນແຕ່ຫົວອາຫານ ຫລືຮໍາເທົ່ານັ້ນ ທີ່ລາຄາສູງ, ເຄື່ອອງອຸປະໂພກ ແລະບໍຣິໂພກ ຫລາຍຊະນິດ ທີ່ຈໍາເປັນ ໃນຊີວິດປະຈໍາວັນ ຂອງປະຊາຊົນ ຍັງມີລາຄາສູງຂຶ້ນ ຢ່າງຕໍ່ເນື່ອງ.