ທາງການຈະກວດກາການພະນັນ ຕູ້ເກມ

ເຈົ້າຫນ້າທີ່ ຜແນກ ວັທນະທັມ ແຂວງ ຄຳມ່ວນ ເວົ້າວ່າ ທາງການ ແຂວງ ຈະ ຄວບຄຸມ ການຫລິ້ນ ຕູ້ເກມ ພະນັນ ປ່ອນຫລຽນ ຢູ່ໃນ ບໍຣິເວນ ເຂດ ເສຖກິດ ພິເສດ ສົ້ນຂົວ ມີຕພາບ ລາວ-ໄທ ແຫ່ງ ທີ 3 ທີ່ ເມືອງ ທ່າແຂກ ເພື່ອໃຫ້ ເປັນໄປ ຕາມ ກົດ ຣະບຽບ ບໍ່ໃຫ້ ເດັກນ້ອຍ ນັກຮຽນ ຫລິ້ນ ຢ່າງ ເສຣີ ນາງ ກ່າວວ່າ:

"ການ ຈັດຕັ້ງ ປະຕິບັດ ກໍວຽກງານ ສະໂມສອນ ເກມ ພວກ ກະໄດ້ ປະຕິບັດ ຕາມ ແຈ້ງການ ຂອງ ກະຊວງ ຫັ້ນແຫລະ ເນາະ ອັນນີ້ນະ ຂອງ ວັທນະທັມ ມະຫາຊົນ ກ່ຽວກັບ ການຕ້ານ ແລະ ສະກັດກັ້ນ ການ ຫລິ້ນ ເກມ ການຢອດ ຫລຽນ ຫັ້ນນະ ເພີ່ນ ກໍຕັ້ງ ຫ້າມ ຫັ້ນນະ ແຕ່ວ່າ ຜູ້ ປະກອບການ ນີ້ ຈະເປີດ ບໍຣິການ ແນວໃດ ຫັ້ນ ພວກເຮົາ ກະບໍ່ໄດ້ ລົງກວດ ດ້ານ ຕົວຈີງ".

ນາງ ກ່າວ ຕື່ມວ່າ ຫາກ ຕູ້ຫລິ້ນ ການພະນັນ ຖືກ ເປີດໃຊ້ ບໍຣິການ ແນ່ນອນ ວ່າ ຈະເປັນ ການ ຊັກຊວນ ປະຊາຊົນ ແລະ ກຸ່ມ ນັກຮຽນ ເຂົ້າໄປ ຫລິ້ນ ຫາກ ບໍ່ມີການ ວາງ ກົດ ຣະບຽບ ຢ້ານ ມີບັນຫາ ເກີດຂຶ້ນ ດັ່ງ ຕົວຢ່າງ ເດັກນ້ອຍ ນັກຮຽນ ຈະເອົາ ເງິນ ນຳ ພໍ່ແມ່ ໄປ ມົ້ວສູມ ໃນ ສະຖານທີ່ ດັ່ງກ່າວ ແທນທີ່ ຈະ ໄປ ໂຮງຮຽນ ເປັນ ແບບດຽວ ກັບ ທີ່ ເກີດຂຶ້ນ ໃນ ນະຄອນ ຫລວງ ວຽງຈັນ ໃນ ຣະຍະ ທີ່ ຜ່ານມາ.

ເຈົ້າຫນ້າທີ່ ອີກ ທ່ານນຶ່ງ ເວົ້າວ່າ ການເປີດ ຫລິ້ນ ຕູ້ເກມ ພະນັນ ທີ່ ຂົວ ມິຕພາບ ຫລາຍຄົນ ກໍບໍ່ ເຫັນພ້ອມ ຍ້ອນ ຈະພາໃຫ້ ເກີດ ບັນຫາ ໃນ ສັງຄົມ ປະຊາຊົນ ຜູ້ ທີ່ ຫາເຊົ້າ ກິນຄ່ຳ ອາດຕົກ ເປັນເຫຍື່ອ ຂອງ ຕູ້ເກມ ດັ່ງກ່າວ. ປັດຈຸບັນ ຕູ້ ເກມ ພະນັນ ຍັງບໍ່ທັນ ໄດ້ເປີດ ບໍຣິການ ເທື່ອ ແຕ່ ຕາມການ ບອກເລົ່າ ຂອງ ເຈົ້າຫນ້າທີ່ ຂົວ ມິຕພາບ ລາວ-ໄທ ນັກ ທຸຣະກິດ ບາງຄົນ ໄດ້ ຕິດຕັ້ງ ຕູ້ຫລິ້ນ ພະນັນ ແລະ ຕົບແຕ່ງ ສະຖານທີ່ ແລ້ວ ຊື່ງ ຄາດວ່າ ຈະເປີດ ບໍຣິການ ໃນ ໄວໆ ນີ້.