ໃຜໄດ້ປໂຍດ ຈາກສນາມບິນສາກົລ ບໍ່ແກ້ວ ແຫ່ງໃໝ່

ເຖິງວ່າ ສນາມບິນສາກົລບໍ່ແກ້ວ ທີ່ສ້າງຢູ່ເຂດເສຖກິຈພິເສດ ຄິງສ໌ໂຣມັນສ໌ ໃກ້ຈະສໍາເລັດແລ້ວ, ແຕ່ ສາຍການບິນ ພາຍໃນປະເທດລາວ ຍັງບໍ່ມີແຜນທີ່ຈະເປີດຖ້ຽວບິນ ໄປສນາມບິນດັ່ງກ່າວ. ສນາມບິນສາກົລບໍ່ແກ້ວ ມີແຜນກໍານົດເປີດໃຊ້ໃນທ້າຍປີ 2023 ແລະ ປັດຈຸບັນ ມີແຕ່ເຮືອບິນເຊົ່າເໝົາລໍາ ທີ່ບິນແຕ່ສນາມບິນສາກົລວັດໄຕ ນະຄອນຫລວງວຽງຈັນ ມາລົງສນາມບິນດັ່ງກ່າວ.

ພະນັກງານ ສາຍການບິນລາວ ນາງນຶ່ງ ໄດ້ກ່າວຕໍ່ວິທຍຸ ເອເຊັຽ ເສຣີ ໃນວັນທີ 28 ມິຖຸນາ ວ່າ:

“ໂອ! ຕອນນີ້ ເຮົາຍັງບໍ່ທັນມີແຜນເທື່ອນ່າເຈົ້າ ຕອນນີ້ ຈະເປັນຍົນເໝົາເຈົ້າ ຈະມີເປັນບໍຣິສັດລ້ານຊ້າງ ເພິ່ນເໝົາຢູ່ ແມ່ນຕິດຕໍ່ບໍຣິສັດເພິ່ນເລີຍ.”

ສາຍການບິນລາວ ສະກາຍເວ ກໍເປັນອີກສາຍການບິນນຶ່ງ ໃນລາວ ທີ່ຍັງບໍ່ມີແຜນຈະເປີດຖ້ຽວບິນ ລະຫວ່າງ ສນາມບິນສາກົລ ແຂວງບໍ່ແກ້ວ ກັບ ສນາມບິນຕ່າງໆໃນລາວ ແລະ ບໍ່ທັນມີຂໍ້ຕົກລົງຫຍັງເກີດຂຶ້ນເທື່ອ.

ພະນັກງານ ສາຍການບິນລາວ ສະກາຍເວ ກ່າວວ່າ:

“ໂຕອັນນັ້ນບໍ ເດີນບິນແຂວງບໍ່ແກ້ວ ເຮົາຍັງບໍ່ທັນໄດ້ຂຶ້ນແຜນຫຍັງເທື່ອເດີ, ແຕ່ວ່າອາດຈະມີບິນໄປພຸ້ນ ເພາະວ່າ ຍັງບໍ່ທັນໄດ້ມີຂໍ້ຕົກລົງຫຍັງກັນ ອອກມາເທື່ອ.”​

ປັດຈຸບັນ ສນາມບິນສາກົລ ບໍ່ແກ້ວ ຍັງບໍ່ເປີດຖ້ຽວບິນແບບປົກກະຕິເທື່ອ, ແຕ່ຈະມີແຕ່ຖ້ຽວບິນ ເໝົາລໍາຈາກນະຄອນຫລວງວຽງຈັນ ມາລົງບາງມື້.

ເຈົ້າໜ້າທີ່ ເມືອງຕົ້ນເຜິ້ງ ແຂວງບໍ່ແກ້ວ ໄດ້ກ່າວວ່າ: 

“ສນາມບິນໂຕຢູ່ບໍ່ແກ້ວນີ້ ​ຍັງບໍ່ເປີດເທື່ອເຈົ້າ ກະບໍ່ຮູ້ຄືກັນເດີເຈົ້າ ເພາະວ່າ ມັນຂຶ້ນກັບເຂດເຈົ້າ.”

ໃນຂະນະດຽວກັນ ເຈົ້າໜ້າທີ່ ປະຈໍາເຂດເສຖກິຈ ພິເສດສາມຫລ່ຽມຄໍາ ທ່ານນຶ່ງ ທີ່ຂໍສງວນຊື່ ແລະ ສຽງ ໄດ້ກ່າວຕໍ່ ວິທຍຸ ເອເຊັຽ ເສຣີ ວ່າ ກ່ຽວກັບແຜນການ ເປີດສນາມບິນ ສາກົລບໍ່ແກ້ວ ແລະ ແຜນການການເປີດຖ້ຽວບິນຕ່າງໆນັ້ນ ທ່ານເອງຍັງບໍ່ສາມາດໃຫ້ຂໍ້ມູນໄດ້ເທື່ອ ເຊິ່ງເຈົ້າໜ້າທີ່ກ່ຽວຂ້ອງ ຂອງສະພາບໍຣິຫານເຂດເສຖກິພິເສດ ສາມຫລ່ຽມຄໍາ ກໍາລັງຫາລື ແລະ ຄົ້ນຄວ້າຢູ່ ແລະ ຍັງບໍ່ທັນໃຫ້ອອກຂ່າວເທື່ອ.​

ສ່ວນວ່າ ຖ້ຽວບິນເຊົ່າເໝົາລໍາ ທີ່ິບິນຈາກສນາມບິນສາກົລ ວັດໄຕ ມາລົງສນາມບິນສາກົລ ແຂວງບໍ່ແກ້ວ ແບບຖ້ຽວພິເສດ ນັ້ນ ກໍຍັງເປີດໃຫ້ບໍຣິການ ເປັນປົກກະຕິ ແຕ່ບໍ່ໃຫ້ບໍຣິການ ທຸກມື້ ໂດຍມີອັດຕຣາຄ່າໂດຍສານ ຢູ່ທີ່ 250 ໂດລ້າຣ໌ ຕໍ່ຄົນ.​

ພະນັກງານຂາຍປີ້ຍົນ ໄດ້ກ່າວວ່າ:

“250 ໂດລ້າຣ໌ ຕໍ່ຄົນ ຄັນມີແລ້ວ ເຂົາເຈົ້າ ຈະແຈ້ງມາໃຫ້ເຮົາຂາຍ ໃຫ້ພວກເຮົາຂາຍໃຫ້ເພິ່ນບໍ່ມີທຸກມື້ ຖ້າເພິ່ນມີວຽກ ແລ້ວເພິ່ນບິນມາ ແລ້ວເພິ່ນເອົາບ່ອນວ່າງເນາະ ຂອງພະນັກງານເຂົາເຈົ້າມີທີ່ວ່າງ ແລ້ວເຂົາເຈົ້າໃຫ້ຂາຍຊ່ວຍຫັ້ນນ່າ ຢາກໄດ້ບິນປົກກະຕິ ກະຊິແມ່ນເພິ່ນເປີດປະມານທ້າຍປີນີ້.”​

ມີການຄາດການວ່າ ຜູ້ໂດຍສານສ່ວນຫຼາຍ ທີ່ຈະບິນມາສນາມບິນດັ່ງກ່າວ ຈະເປັນຄົນຈີນ ມາຈາກປະເທດປະເທດຈີນ ແລະ ຄົນຕ່າງປະເທດ ຫຼາຍກວ່າຄົນລາວ.

ຜູ້ປະກອບການ ດ້ານການທ່ອງທ່ຽວ ນາງນຶ່ງ ໄດ້ກ່າວວ່າ: 

“ຖ້າວ່າເປີດນີ້ ສນາມບິນໂຕນີ້ ຄົນກະໄປໃຊ້ຫຼາຍ ຖ້າວ່າ ອີງໃສ່ລາຄາຄົນລາວ ກະສູງເກີນໄປຫັ້ນເດ້. ບໍ່ຄ່ອຍໄດ້ນໍາໃຊ້ ສ່ວນຫຼາຍກະຊິເປັນແຂກຄົນຈີນ ຫຼືວ່າ ແຕກຕ່າງປະເທດ ທີ່ເພິ່ນບິນເປັນຍົນເໝົາລໍາ ຂາຍເປັນແບບລາຄາເໝົາລໍາ.​”

ກ່ອນໜ້ານີ້ ໃນວັນທີ 25 ມິຖຸນາ ທີ່ຜ່ານມາ ທ່ານ ຈ້າວ ເຫວີ່ຍ ປະທານສະພາບໍຣິຫານ ເຂດເຂຖກິພິເສດ ສາມຫລ່ຽມຄໍາ ໃຫ້ສໍາພາດຕໍ່ສື່ມວນຊົນລາວ ວ່າ ປັດຈຸບັນການກໍ່ສ້າງສນາມບິນ ສາກົລ ບໍ່ແກ້ວ ມີຄວາມຄືບໜ້າ ຫຼາຍກວ່າ 90% ແຕ່ ເຫຼືອແຕ່ວຽກຕົບແຕ່ງອາຄານ ຜູ້ໂດຍສານ ແລະ ຕິດຕັ້ງອຸປະກອນຮັກສາຄວາມປອດໄພ ແລະ ສິ່ງອໍານວຍຄວາມສະດວກຕ່າງໆ ເຊິ່ງຄາດວ່່າຈະເປີດໃຊ້ຢ່າງເປັນທາງການ ໃນທ້າຍປີ 2023 ນີ້.​

ການກໍ່ສ້າງ ສນາມບິນບໍ່ແກ້ວ ເຣີ່ມແຕ່ເດືອນກັນຍາ 2020 ມີມູນຄ່າ 175 ລ້ານໂດລ້າຣ໌​, ຕັ້ງຢູ່ບ້ານສີເມືອງງາມ ເມືອງຕົ້ນເຜິ້ງ ແຂວງບໍ່ແກ້ວ, ມີເນື້ອທີ່ 300 ເຮັກຕ້າຣ໌ ຫ່າງຈາກເຂດເສຖກິຈພິເສດສາມຫລ່ຽມຄໍາ ປະມານ 5 ກິໂລແມັດ, ສາມາດຮອງຮັບເຮືອບິນ ຂນາດໂບອິ້ງ 737, ແອບາສ ຫຼື ເຮືອບິນ ຂນາດຕ່າງໆ ທີ່ຮອງຮັບຜູ້ໂດຍສານ ໄດ້ບໍ່ເກີນ 200 ບ່ອນນັ່ງ.​

ນອກຈາກນີ້ ຍັງມີສນາມບິນຫ້ວຍຊາຍ ຢູ່ເມືອງຫ້ວຍຊາຍ ແຂວງບໍ່ແກ້ວ ເຊິ່ງເປັນສນາມບິນດັ່ງເດີມຂອງແຂວງບໍ່ແກ້ວ ໄດ້ມີການປິດປັບປຸງມາແຕ່ 2018 ແລະ ໄດ້ມິດງຽບໄປ ໃນໄລຍະການແຜ່ຣະບາດ ຂອງໂຄວິດ-19. ປັດຈຸບັນ ສນາມບິນເມືອງຫ້ວຍຊາຍ ຢູ່ລະຫວ່າງການປັບປຸງ ແລະ ບໍ່ທັນມີກໍານົດວ່າ ຈະເປີດໃຫ້ບໍຣິການເມື່ອໃດ, ແຕ່ສນາມບິນດັ່ງກ່າວ ກໍຍັງຢູ່ໃນແຜນການ ຂອງແຂວງບໍ່ແກ້ວ ເພື່ອເປັນສນາມບິນ ສໍາລັບຜູ້ໂດຍສານ ພາຍໃນປະເທດ.​