ນັກທ່ອງທ່ຽວຈີນ ເຣີ່ມໃຊ້ບໍຣິການ ຣົຖໄຟລາວ-ຈີນ ຫຼາຍຂຶ້ນ

ໃນໄລຍະ 2-3 ສັປດາ ທີ່ຜ່ານມາຣົຖໄຟລາວຈີນ ມີຜູ້ໂດຍສານທາງພາຍໃນ ແລະຕ່າງປະເທດຂ້ອນຂ້າງແອອັດ ໂດຍສະເພາະ ສະຖານີບໍ່ເຕັນ, ຫລວງພຣະບາງ ແລະ ນະຄອນຫລວງວຽງຈັນ ພາຍຫລັງຈີນປະກາດເປີດປະເທດ ເປັນທາງການ ເມື່ອວັນທີ 8 ມົກຣາ ທີ່ຜ່ານມາ ຂະນະທີ່ ຊາວລາວກໍຢາກໃຫ້ທາງດ້ານບໍຣິສັດທາງຣົຖໄຟ ລາວ-ຈີນ ຈໍາກັດ ດໍາເນີນການເພີ່ມຖ້ຽວຣົຖໄຟ ໃຫ້ພຽງພໍ ແລະ ເໝາະສົມຕໍ່ຄວາມຕ້ອງການຂອງຜູ້ໂດຍສານ.

ດັ່ງ ຊາວລາວ ຜູ້ຮັບຈອງປີ້ ຣົຖໄຟ ລາວ-ຈີນ ຢູ່ນະຄອນຫລວງວຽງຈັນ ທ່ານນຶ່ງ ກ່າວຕໍ່ວິທຍຸເອເຊັຽ ເສຣີ ໃນມື້ວັນທີ 22 ກຸມພາ 2023 ນີ້ວ່າ:                     

“ຄົນຫລາຍ ສະເພາະປັດຈຸບັນຫັ້ນ ຄົນລາວມີປະມານ 60% ຄົນໄທຍກໍປະມານ 15% ຄົນຈີນກໍປະມານ 15% ແລ້ວກໍ ຄົນຢູໂຣປ ຖ້ຽວບໍ່ພໍ ເພາະວ່າຄົນຫລາຍກ່າວຣົຖໄຟ (ນັກທ່ອງທ່ຽວຈີນ) ເຂົ້າມາຂ້ອນຂ້າງຫລາຍແລ້ວ ປະມານ 2 ທິດ 3 ທິດນີ້, ອໍ້ ເພິ່ນກໍໃຊ້ການບິນ ຣົຖເມຫັ້ນແຫລະ ຣົຖເໝົາອີ່ຫຍັງນີ້ ກໍເພີ່ມອີກ 2 ຖ້ຽວ ກໍນ່າຈະໂອເຄ.”

ເຖິງແມ່ນວ່າ ບໍຣິສັດທາງຣົຖໄຟ ລາວ-ຈີນ ຈໍາກັດ ຈະເປີດໃຫ້ຜູ້ໂດຍສານ ດໍາເນີນການຈອງປີ້ຣົຖໄຟ ໃຫ້ລ່ວງໜ້າໄດ້ ໃນໄລຍະ 3 ມື້ ແຕ່ຢ່າງໃດກໍຕາມ ບ່ອນນັ່ງທຸກປະເພດພັດເຕັມ ນັບແຕ່ມື້ທໍາອິດທີ່ເປີດຈອງ ເຊິ່ງຄົນລາວກໍຢາກໃຫ້ທາງບໍຣິສັດ ແລະ ພາກສ່ວນທີ່ກ່ຽວຂ້ອງ ດໍາເນີນການເປີດຖ້ຽວຣົຖໄຟອີກປະມານ 2 ຖ້ຽວຕໍ່ມື້ ເພື່ອຮອງຮັບຈໍານວນຜູ້ໂດຍສານ.

ດັ່ງ ພນັກງານບໍຣິສັດນໍາທ່ຽວ ຢູ່ນະຄອນຫລວງວຽງຈັນ ທ່ານນຶ່ງ ກ່າວຕໍ່ວິທຍຸເອເຊັຽ ເສຣີ ໃນມື້ດຽວກັນນີ້ວ່າ:

“ແມ່ນແຫລະ ຄວນຈອງກ່ອນ 2-3 ມື້ ບໍ່ແມ່ນບໍ່ມີແລ້ວ ອໍ້ ເຂົາເປີດດ່ານເດ້ ຄົນຈີນອອກມາຫລາຍ ມາຫລາຍແລ້ວໆ ອອກມາຫລາຍ ສະຖານີບໍ່ເຕັນ ກໍເຕັມ ມື້ອື່ນກໍໝົດແລ້ວເດ້ ເປັນມາດົນໄດ້ ດົນລະໂອເນາະ ດົນແລ້ວ 2-3 ທິດລະກໍ ຄົນເຕັມຕະຫລອດ ແມ່ນແລະຄົນຈີນມາຫລາຍ ທຸກສະຖານີ (ຢາກໃຫ້ເພີ່ມຖ້ຽວ) ຕ້ອງ 2 ຖ້ຽວ ມີແຕ່ 2 ຖ້ຽວໃນມື້ນຶ່ງ.”

ທີ່ຜ່ານມາ ບໍຣິສັດທາງຣົຖໄຟ ລາວ-ຈີນ ຈໍາກັດ ຈະດໍາເນີນການເພີ່ມຖ້ຽວຣົຖໄຟ ແຕ່ສະເພາະໄລຍະເທສການ ເນື່ອງຈາກມີຜູ້ໂດຍສານເປັນຈໍານວນຫລາຍ ແຕ່ຢ່າງໃດກໍຕາມ ເຖິງແມ່ນວ່າ ໃນໄລຍະນີ້ ປີ້ຣົຖໄຟຈະເຕັມ ທຸກສະຖານີ ແລະ ບໍ່ພຽງພໍກັບຄວາມຕ້ອງການ ແຕ່ພາກສ່ວນກ່ຽວຂ້ອງ ພັດບໍ່ຍັງບໍ່ມີ ນໂຍບາຍແນວໃດ ໃນການເພີ່ມຖ້ຽວຣົຖໄຟດັ່ງກ່າວນີ້ເທື່ອ.

ດັ່ງ ຜູ້ໂດຍສານຣົຖໄຟ ລາວ-ຈີນ ເປັນປະຈໍາ ນາງນຶ່ງກ່າວວ່າ:

“ໂດຍ ຊ່ວງນີ້ຄົນຈະຫລາຍ ຕ້ອງໄດ້ໄປຕໍ່ຄິວຍາວເລີຍ ຖ້າຊິໄປ ຖ້າຊິໄປຕ້ອງໄດ້ຈອງລ່ວງໜ້າ 2 ມື້ ຫລື 3 ມື້ ອ່າ ສ່ວນຫລາຍ ຈະເປັນຫລວງພຣະບາງ ສ່ວນຫລາຍກໍນັກທ່ອງທ່ຽວກໍມີ ສ່ວນຫລາຍກໍຄົນໃນເມືອງ ໂດຍຄົນລາວ ຄົນຕ່າງປະເທດກໍມີ (ກ່ຽວກັບຣະບົບການຈອງປີ້ຣົຖໄຟ) ຂະເຈົ້າກໍາລັງປັບປຸງ (ສ່ວນເຣຶ່ອງການເພີ່ມຖ້ຽວຣົຖໄຟ) ໂດຍ ເພາະວ່າມັນເປັນບາງຊ່ວງ ຂະເຈົ້າເປີດເປັນບາງຊ່ວງ.”

ກ່ອນໜ້ານີ້ ທາງດ້ານບໍຣິສັດລາວ-ຈີນ ໄດ້ດໍາເນີນການເພີ່ມຖ້ຽວຣົຖໄຟ ຈາກ 3 ຖ້ຽວຕໍ່ມື້ ເປັນ 4 ຖ້ຽວຕໍ່ມື້ ແລ້ວ ໃນປັດຈຸບັນ ແຕ່ເຖິງຢ່າງໃດກໍຕາມ ການໃຊ້ບໍຣິການດັ່ງກ່າວນີ້ ພັດຍັງບໍ່ທັນພຽງພໍເທື່ອ ຍ້ອນພາຍຫລັງການແຜ່ຣະບາດໂຄວິດ-19 ຫລຸດຜ່ອນລົງເຮັດໃຫ້ມີຜູ້ໂດຍສານ ທັງພາຍໃນແລະຕ່າງປະເທດ ເພີ່ມຈໍານວນສູງຂຶ້ນ ຂະນະທີ່ ການເດີນທາງດ້ວຍ ຣົຖໂດຍສານ ທາງເສັ້ນທາງພາກເໜືອຍັງຄົງປະສົບຄວາມຫຍຸ້ງຍາກ.

ດັ່ງ ຄົນຂັບຣົຖໂດຍສານ ເສັ້ນທາງນະຄອນຫລວງວຽງຈັນ ຫາ ນະຄອນຫລວງພຣະບາງ ທ່ານນຶ່ງກ່າວວ່າ:

“ມັນເດີນທາງໄປທາງພາກເໜືອ ມັນໃຊ້ຣົຖໄຟ ມັນຈະສະດວກ ທາງຣົຖໄຟຂະເຈົ້າກໍເພີ່ມຢູ່ ເພີ່ມຊ່ວງເທສການເນາະ ເພີ່ມໆ ແຕ່ກໍຍັງບໍ່ພໍ ຍັງເຕັມຢູ່ຄືເກົ່າ ປົກກະຕິມັນມີ 3 ຖ້ຽວເນາະ 7 ໂມງເຄິ່ງ ອອກຈາກວຽງຈັນ, 8ໂມງເຄິ່ງ, 9ໂມງ 20ໂມງ ແລ້ວກໍ 15ໂມງນ່າ ເປັນ 4 ຖ້ຽວນ່າ.”

ເຖິງແມ່ນວ່າ ຈໍານວນຖ້ຽວຣົຖໄຟ ລາວ-ຈີນ ຍັງບໍ່ທັນພຽງພໍ ຕໍ່ຄວາມຕ້ອງການ ຂອງຜູ້ໂດຍສານ ເຮັດໃຫ້ຜູ້ໂດຍສານແອອັດ ໃນຫລາຍສະຖານີ ແຕ່ຢ່າງໃດກໍຕາມ ທາງດ້ານບໍຣິສັດຣົຖໄຟ ລາວ-ຈີນ ຈໍາກັດ ຍັງບໍ່ທັນມີແຜນເພີ່ມ ການໃຫ້ບໍຣິການຖ້ຽວຣົຖໄຟເທື່ອ ພ້ອມແນະນໍາ ໃຫ້ຜູ້ໂດຍສານ ດໍາເນີນການຈອງປີ້ກ່ອນ ການເດີນທາງປະມານ 3 ມື້.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ຜູ້ບໍ່ປະສົງອອກຊື່ ແລະຕໍາແໜ່ງ ທ່ານນຶ່ງກ່າວວ່າ:

“ອໍ່ ປົກກະຕິ ເຮົາເພີ່ມຖ້ຽວແລ້ວ ເພາະວ່າປົກກະຕິເຮົາກໍແລ່ນແຕ່ 4 ຖ້ຽວຫັ້ນນ່າ ແມ່ນແຫລະ ມີແຕ່ຊ່ວງເທສການບໍ່ ຫລືວ່າ ງານບຸນບໍ່ ຈະເພີ່ມຖ້ຽວເປັນພິເສດ ປົກກະຕິ ກໍປົກກະຕິເຮົາກໍແລ່ນເປັນຫລາຍຖ້ຽວຢູ່ແລ້ວ ແລ່ນຢູ່ 4 ຖ້ຽວ ລູກຄ້າຕ້ອງຊື້ປີ້ປະມານ 3 ມື້ລ່ວງໜ້າ ລູກຄ້າຈັ່ງຊີ້ປີ້ ສະດວກສະບາຍໜ້ອຍນຶ່ງເດ້.”

ອີງຕາມປະກາດ ຂອງບໍຣິສັດ ທາງຣົຖໄຟລາວ-ຈີນ ຈໍາກັດ ສະຖານີ ນະຄອນຫລວງວຽງຈັນ ລົງວັນທີ 29 ພຶສພາ 2022 ທີ່ຜ່ານມາ  ກ່ຽວກັບລາຄາປີ້ຂະບວນຣົຖໄຟ EMU (ເປັນຕົ້ນ ບ່ອນນັ່ງຊັ້ນທຸຣກິຈ, ບ່ອນນັ່ງຊັ້ນນຶ່ງ ແລະ ບ່ອນນັ່ງຊັ້ນ 2) ແລະ ລາຄາປີ້ຂະບວນຣົຖໄຟທັມມະດາ (ເປັນຕົ້ນ ບ່ອນນັ່ງຊັ້ນຕຽງນອນນຸ່ມ ແລະ ບ່ອນນັ່ງທັມມະດາ) ຈາກ ສະຖານີຕົ້ນທາງ ນະຄອນຫລວງວຽງຈັນ ຫາ ສະຖານີບໍ່ເຕັນ ແລະ ຈາກສະຖານີບໍ່ເຕັນ ຫາ ສະຖານີ ນະຄອນຫລວງວຽງຈັນ ວ່າ ມີການປັບຂຶ້ນລາຄາບ່ອນນັ່ງ ທຸກປະເພດ ເປັນເງິນ 2,200 ກີບ/ຢວນ ນັບແຕ່ມື້ວັນທີ 1 ມີຖຸນາ 2022 ມາຈົນຮອດປັດຈຸບັນ.