ເສຖກິດສັງຄົມລາວຕລອດ 40 ປີ

ການ ພັທນາ ເສຖກິດ ສັງຄົມ ຂອງ ສປປ ລາວ ຕລອດ 40 ປີ ພາຍໃຕ້ ການ ຊີ້ນໍາ ຂອງ ພັກ ປະຊາຊົນ ປະຕິວັດ ລາວ ເພື່ອ ກ້າວຂຶ້ນ ສູ່ ສັງຄົມ ນິຍົມ ຫລົ້ມເຫລວ ເສຖກິດ ຍັງ ອ່ອນແອ ປະຊາຊົນ ລາວ ກໍຍັງ ທຸກຍາກ ຢູ່.

ຕລອດ ຣະຍະ 40 ປີ ນັບຕັ້ງແຕ່ ໄດ້ມີ ການ ສະຖາປະນາ ສາທາຣະນະຣັຖ ປະຊາທິປະຕັຍ ປະຊາຊົນ ລາວ ມານີ້ ຫົວໜ້າ ພັກ ປະຊາຊົນ ປະຕິວັດ ລາວ 3 ຄົນ ທີ່ ໄດ້ ກໍາ ອໍານາດ ແລະ ຜູກຂາດ ອໍານາດ ແບບ ຜະເດັດການ ຊຶ່ງ ເບື້ອງ ຕົ້ນ ກໍ ແມ່ນ ທ່ານ ໄກສອນ ພົມວິຫານ ເປັນ ເລຂາທິການ ໃຫຍ່ ຄນະ ບໍຣິຫານ ງານ ສູນກາງ ພັກ ເປັນ ຜູ້ ຈັດຕັ້ງ, ຊີ້ນໍາ, ນໍາພາ ທຸກ ການ ເຄື່ອນໄຫວ ຂອງ ຣະບົບ ການເມືອງ ຢູ່ ສປປລາວ ເປັນຕົ້ນ ກໍແມ່ນ ວາງ ແນວທາງ ນະໂຍບາຍ ແລະ ແຜນ ພັທນາ ເສຖກິດ ສັງຄົມ ຕາມ ທິດ ສັງຄົມ ນິຍົມ ແບບ ກະໂດດ ຂັ້ນ ໂດຍ ບໍ່ຜ່ານ ການ ຂຍາຍ ຂອງ ທຶນ ນິຍົມ. ຫຼາຍຄົນ ເວົ້າວ່າ ຜົລ ໄດ້ຮັບ ຄື ຄວາມ ຫລົ້ມແຫຼວ ເຮັດ ໃຫ້ລາວ ບໍ່ພຽງແຕ່ ຍັງບໍ່ ມົ້ມຈາກ ການເປັນ ປະເທສ ດ້ອຍ ພັທນາ ແລະ ປວງຊົນ ລາວ ຍັງທຸກ ຍາກ ຂາດເຂີນ ຊໍ້າ ບໍ່ໜໍາ ຍັງຕິດໜີ້ ຕິດສິນ ຕ່າງ ປະເທສ ເປັນ ຈໍານວນ ມະຫາສານ ຊຶ່ງ ຜູ້ນໍາ ພັກຄົນ ທີ່ ຜ່ານໆ ມາ ແລະ ກໍາ ອໍານາດ ໃນ ປັດຈຸບັນ ບໍ່ ສາມາດ ທີ່ ຈະ ແກ້ໄຂ ໄດ້ ແລ້ວ ປະໃຫ້ ປະຊາຊົນ ລາວ ລຸ້ນ ຕໍ່ໆໄປ ເປັນ ຜູ້ ຫາບແບກ ພາລະ ອັນ ໜັກໜ່ວງ ທີ່ ຜູ້ນໍາ ລາວ ປະໜີ້ ນັ້ນ ໄວ້ໃຫ້.

ຜ່ານ ພຶດຕິກັມ ຕົວຈິງ ໃນ 40 ປີ ທີ່ ຜ່ານມາ ນີ້ ພິສູດ ໃຫ້ ເຫັນວ່າ ການ ພັທນາ ເສຖກິດ ແມ່ນ ອີງໃສ່ ການ ຂຸດຄົ້ນ ຊັພຍາກອນ ທັມຊາດ ເປັນ ສ່ວນໃຫຍ່ ແມ່ນ ແຕ່ ທ່ານ ຈູມມະລີ ໄຊຍະສອນ ຜູ້ເປັນ ຫົວໜ້າ ພັກ ຄົນ ປັດຈຸບັນ ກໍ ຍອມຮັບ ຢູ່ ໃນ ກອງປະຊຸມໃຫຍ່ ຄັ້ງທີ 9 ຂອງ ພັກ ວ່າ ການ ເຕີບໂຕ ທາງ ເສຖກິດ ຍັງ ອີງໃສ່ ແຕ່ ການ ຂຸດຄົ້ນ ແລະ ສົ່ງອອກ ຊັພຍາກອນ ທັມຊາດ ເປັນ ສ່ວນໃຫຍ່ ແລະ ດຣ.ຄໍາລຽນ ພົນເສນາ ຮອງ ຣັຖມົນຕຣີ ກະຊວງ ແຜນການ ແລະ ການ ລົງທຶນ ກໍໄດ້ ເວົ້າ ຢູ່ ກອງ ປະຊຸມ ສໍາມະນາ ຣະດັບ ສູງ ກ່ຽວກັບ ການ ວາງແຜນ ພັທນາ ແລະ ເຕີບໂຕ ສີຂຽວ ທີ່ ນະຄອນ ຫຼວງ ວຽງຈັນ ໃນ ຕົ້ນ ເດືອນ ເມສາ 2015 ນີ້ວ່າ:

“ການ ຂຍາຍຕົວ ຂອງ ເສຖກິດ ຍັງ ອີງໃສ່ ການ ຂຸດຄົ້ນ ແຫລ່ງ ຊັພຍາກອນ ທັມຊາດ ຫລາຍ ແຕ່ ການ ຄຸ້ມຄອງ ແລະ ການ ນໍາໃຊ້ ຊັພຍາກອນ ທັມຊາດ ໃນ ຫລາຍ ກໍຣະນີ ຍັງ ມີ ລັກສນະ ບໍ່ ຍືນຍົງ ຊຶ່ງ ບັນຫາ ດັ່ງກ່າວ ໄດ້ ສ້າງ ຜົລ ກະທົບ ຕໍ່ ປະຊາຊົນ ແລະ ສິ່ງ ແວດລ້ອມ ຂອງ ປະເທສ ເພາະ ປັດຈຸບັນ ໂຄງ ປະກອບ ເສຖກິດ ຂອງລາວ ຂແນງ ອຸດສາຫະກັມ ກວມພຽງ 28%, ແຕ່ ບໍ່ແຮ່ ແລະ ພລັງງານ ໄຟຟ້າ ກວມເຖິງ 42% ຂອງ ຂແນງ ອຸດສາຫະກັມ ທັງໝົດ ຊຶ່ງ ສ້າງ ຄວາມສ່ຽງ ຕໍ່ ການ ຂຍາຍຕົວ ຂອງ ເສຖກິດ ໃນ ຣະຍະ ຍາວ”.

ຊຶ່ງ ທ່ານ ມາຕາມນັດ ທີ່ ຣັຖ ມິນນິໂຊຕາ ສະຫະຣັຖ ອະເມຣິກາ ກ່າວ ແບບ ສັງລວມ ໃນ ວັນທີ 23 ເມສາ 2015 ນີ້ວ່າ ມີ ຄວາມສ່ຽງ ຫລາຍ ທີ່ສຸດ:

"ເປັນການ ສ່ຽງ ຫລາຍ ທີ່ສຸດ ເພາະວ່າ ມີຕັ້ງແຕ່ ຫລົ້ມແຫລວ ຫັ້ນຕິ ຍັງ ຊິເຮັດ ໃຫ້ ປະຊາຊົນ ທຸກ ໄປດົນ ຢູ່ໃດ".

ເວົ້າເຖິງ ການ ພັທນາ ຢູ່ ປະເທສ ລາວ ຍານາງ ແຊນດຣາ ນິໂຄ ຜູ້ຕາງໜ້າ ທະນາຄານ ພັທນາ ເອເຊັຽ ປະຈໍາ ລາວ ໄດ້ກ່າວ ຢູ່ ກອງ ປະຊຸມ ເຣຶ່ອງ: “ການ ຄາດຄະເນ ກ່ຽວກັບ ການພັທນາ ຢູ່ ເອເຊັຽ ປີ 2015” ຂອງ ທະນາຄານ ພັທນາ ເອເຊັຽ ໃນ ວັນທີ 24 ມິນາ ວ່າ:

“ສິ່ງ ທ້າທາຍ ອັນຕົ້ນຕໍ ຂອງລາວ ຍັງແມ່ນ ການ ຂາດດຸນ ງົບປະມານ ໃຫ້ ຢູ່ ໃນ ຣະດັບ 3% ຂອງ ລວມຍອດ ມູນຄ່າ ຜລິຕພັນ ພາຍໃນ ແລະ ເພິ່ມ ການ ສະສົມ ຄັງ ສໍາຮອງ ເງິນຕຣາ ຕ່າງ ປະເທສ ຊຶ່ງ ປັດຈຸບັນ ຍັງຕໍ່າ ແລະ ອາຈ ເຮັດໃຫ້ ເສຖກິດ ມີ ຄວາມສ່ຽງ ຕໍ່ການ ປ່ຽນແປງ ກະທັນຫັນ’’.

ເວົ້າເຖິງ ການ ເຕີບໂຕ ທາງ ດ້ານ ເສຖກິດ ໃນ ຫລາຍປີ ຫລັງ ມານີ້ ກໍ ຫລຸດລົງ ນໍາ ເລື້ອຍໆ ແລະ ໃນປີ 2015 ນີ້ ກໍຄາດວ່າ ຈະ ຫລຸດລົງ. ດັ່ງ ທີ່ ທ່ານ ສຸລິນທອນ ເລືອງຄໍາສິນ ວິຊາການ ອາວຸໂສ ດ້ານ ເສຖກິດ ໄດ້ ເວົ້າວ່າ:

“ແນວໂນ້ມ ທາງ ເສຖກິດ ຂອງລາວ ຄາດວ່າ ຍັງຄົງ ຫລຸດລົງ ໃນ ປີນີ້ ເນື່ອງຈາກ ປະຣິມານ ຄວາມ ຕ້ອງການ ແຮ່ທາດ ທີ່ ມີ ປະຣິມານ ຫລຸດລົງ ໄປພ້ອມໆ ກັບ ຄວາມ ຫຍຸ້ງຍາກ ດ້ານ ຣາຍຈ່າຍ ຂອງ ການລົງທຶນ ຂອງ ພາກຣັຖ, ລວມຍອດ ມູນຄ່າ ຜລິຕພັນ ພາຍໃນ ຄາດວ່າ ຈະ ຂຍາຍຕົວ ປະມານ 7% ໃນ ປີນີ້ ແລະ 7.2% ໃນ ປີໜ້າ, ສ່ວນການ ລົງທຶນ ເຂົ້າ ໃນ ໂຄງການ ພລັງງານ ຍັງ ຈະ ປະກອບສ່ວນ ເຂົ້າໃນ ການ ຂຍາຍຕົວ ເປັນ ສ່ວນໃຫຍ່".

ເບິ່ງລວມ ແລ້ວ ຫລາຍໆຄົນ ເວົ້າວ່າ ການ ສ້າງ ສັງຄົມ ນິຍົມ ຢູ່ ສປປລາວ ໃນ 40 ປີ ມານີ້ ຜູ້ນໍາ ພັກ ນໍາພາ ການ ພັທນາ ເສຖກິດ ສັງຄົມ ຂອງ ປະເທສ ໂດຍ ຈະ ແບ່ງອອກ ໄດ້ ເປັນ 2 ຣະຍະ ທີ່ ບໍ່ ເວົ້າເຖິງ ຣະຍະ ສັ້ນ ທີ່ ຜູ້ນໍາ ພັກ ໄດ້ ນໍາພາ ພັທນາ ຕາມ ທິດ ທຶນ ນິຍົມ ແຫ່ງຣັຖ, ຂນະທີ່ ຍັງໃຫ້ ປະຊາຊົນ ທຳການ ຜລິດ ແບບ ລວມໝູ່ ແລະ ໂຍະຍານ ໃຫ້ ທັງ ພະນັກງານ ພັກ-ຣັຖ ເຮັດ ທຸຣະກິດ ນ້ອຍ ໄດ້ ຈໍານວນ ໃດ ຈໍານວນ ນຶ່ງ.

ຣະຍະ ທໍາອິດ ແມ່ນ ປະຕິບັດ ນະໂຍບາຍ ເສຖກິດ ສອງ ພາກສ່ວນ ຄື: ເສຖກິດ ຂອງ ຣັຖ ແລະ ຂອງ ລວມໝູ່, ຈໍາກັດ ຮັດແຄບ ເພື່ອ ບໍ່ໃຫ້ ມີຮອດ ທຸຣະກິດ ຂນາດ ນ້ອຍໆ ແມ່ນແຕ່ ຕໍາໝາກຮຸ່ງ ຂາຍ ທາງການ ກໍ ກ່າວຫາ ວ່າ ເປັນ ໜໍ່ແໜງ ຂອງ ຣະບອບ ທຶນ ນິຍົມ, ເປັນ ພິດໄພ ຕໍ່ການ ສ້າງ ສັງຄົມ ນິຍົມ ຢູ່ ສປປ ລາວ. ຣະຍະນີ້ ແມ່ນໄດ້ ປະຕິບັດ ມາແຕ່ ປີ 1975 ພາຍຫລັງ ທີ່ ໄດ້ ສະຖາປະນາ ປະເທດ ລາວ ເປັນ ສປປ ລາວ ຈົນມາເຖິງ ທ້າຍ ຊຸມປີ 1980 ຊຶ່ງ ເປັນ ຣະຍະ ເອື່ອຍອີງ ໃສ່ ການ ສນັບສນູນ ແລະ ການ ຊ່ວຍເຫລືອ ຢ່າງ ຮອບດ້ານ ຂອງ ຄ້າຍ ສັງຄົມ ນິຍົມ ອັນມີ ສະຫະພາບ ໂຊວຽດ ເປັນ ກໍາແພງ ເພັດ ຫລື ເວົ້າສັ້ນໆ ແບບ ເຂົ້າໃຈ ໄດ້ງ່າຍ ກໍແມ່ນ “ອີງໃສ່ຄ້າຍ ສັງຄົມ ນິຍົມ ຢ່າງ ຂາດຂັ້ນ” ໃຊ້ ຣະບົບ ພັກດຽວ ຜູກຂາດ ອໍານາດ ແບບ ຜະເດັດການ ທີ່ ເຮັດໃຫ້ ປະເທສ ບໍ່ພຽງແຕ່ ບໍ່ໄດ້ ຮັບການ ພັທນາ ເທົ່າ ທີ່ຄວນ ແລະ ປະຊາຊົນ ບໍ່ມີ ຊີວິດ ການ ເປັນຢູ່ ດີຂຶ້ນ ເທົ່ານັ້ນ ແຕ່ ຫາກຍັງ ເຮັດໃຫ້ ປະເທສ ຕົກເຂົ້າ ຢູ່ໃນ ຫລຸມ ເລີກ ຂອງ ຄວາມ ຫຍຸ້ງຍາກ ສົບສົນ, ຂາດຄວາມ ເປັນ ເອກກະຣາດ ແລະ ບໍ່ມີ ອະທິປະຕັຍ, ປະຊາຊົນ ຂາດ ສິດ ເສຣີພາບ ແລະ ປະຊາທິປະຕັຍ, ຖືກ ຈໍາກັດ ຮັດແຄບ ແລະ ບີບບັງຄັບ ໃນ ທຸກດ້ານ ຂອງ ຊີວິດ, ເຮັດໃຫ້ ການ ທໍາມາ ຫາກິນ ແລະ ຊີວິດ ການເປັນຢູ່ ລໍາບາກ ຍາກແຄ້ນ ແບບ ບໍ່ເຄີຍມີ ມາກ່ອນ ຈັກເທື່ອ ໃນ ປວັດສາດ ຂອງ ຊາດລາວ.

ມີການ ວິພາກ ວິຈານ ກັນວ່າ ອັນນັ້ນ ເປັນການ ບັງຄັບ ໃຫ້ ປວງຊົນ ລາວ ທີ່ ຄັບແຄ້ນ ແໜ້ນໃຈ ບໍ່ ສາມາດ ອົດທົນ ທີ່ ຈະມີ ຊີວິດ ຢູ່ ໃນ ແອກ ຄອບຄອງ ແບບ ໄຮ້ ມະນຸສທັມ ຄືທີ່ວ່າ ນັ້ນໄດ້ ຕໍ່ໄປ ຈັດຕັ້ງ ຂະບວນ ຕໍ່ຕ້ານ ເພື່ອ ປະຊາ ທິປະຕັຍ ຕັ້ງແຕ່ ເໜືອ ຕລອດ ໃຕ້, ປະຊາຊົນ ລາວ ຫລາຍ ແສນຄົນ ຈໍາຕ້ອງ ໄດ້ ອົພຍົບ ຫລົບໜີ ໄປ ຂໍລີ້ພັຍ ຢູ່ ຕ່່າງ ປະເທສ ຫລາຍ ທີ່ສຸດ ກໍແມ່ນ ຢູ່ ປະເທສ ໄທ, ສະຫະຣັຖ ອະເມຣິກາ ແລະ ປະເທສ ເສຣີ ອື່ນໆ ໃນໂລກ.

ທ່ານ ຖາວອນ ອຳນາດວົງ ຜູ້ຕາງໜ້າ ອົງການ ພັນທະມິດ ເພື່ອ ປະຊາ ທິປະຕັຍ ໃນລາວ ປະຈຳ ຣັຖ ເວິຈິເນັຍ ສະຫະຣັຖ ອະເມຣິກາ ໄດ້ກ່າວ ໃນ ວັນທີ 23 ເມສາ 2015 ເຖິງ ສາເຫດ ຕົ້ນຕໍ່ ທີ່ ເຮັດໃຫ້ ປະຊາຊົນ ລາວ ທັງຫລາຍ ລັກລອບ ຫຼົບໜີ ອອກ ຈາກ ລາວ ນັ້ນວ່າ ເປັນຍ້ອນ ການນໍາ ເອົາ ຣະບອບ ຄອມມິວນິສ ເຂົ້າມາ ລາວ, ປະຊາຊົນ ຖືກ ບີບ ບັງຄັບ ທຸກດ້ານ:

"ຕົ້ນຕໍ ແຫລະ ແມ່ນ ເອົາ ຣະບົບ ຄອມມິວນິສ ເຂົ້າມາ ປົກຄອງ ປະເທສ ລາວ ຂອງ ພວກເຮົາ ອັນນີ້ ເປັນ ສາເຫດ ຕົ້ນຕໍ ທີ່ສຸດ ທີ່ວ່າ ພໍ່ແມ່ ປະຊາຊົນ ພາກັນ ຫລົບໜີ ໂຕນໜີ ຈາກ ປະເທສ ຊາດ ບ້ານເມືອງ ຄັນ ບໍ່ໂຕນໜີ ກະ ບໍ່ໄດ້ ເພາະວ່າ ເພີ່ນ ຊິເອົາໄປ ຂ້າ ເອົາໄປ ສໍາມະນາ ເອົາໄປ ທໍຣະມານ ຕ່າງໆ ຕົວຢ່າງ ຂ້າພະເຈົ້າ ເອງນີ້ ເຄີຍເປັນ ຫົວໜ້າ ໝວດ ໂຮງຮຽນ ຫລາຍໆ ແຫ່ງ ຢູ່ ແຂວງ ຈໍາປະສັກ ເປັນຕົ້ນ ຫົວໜ້າ ໝວດ ໂຮງຮຽນ ສັກເມືອງ, ເວີນໄຊ, ເມືອງ ເກົ່າ ຄັນ ຂ້າພະເຈົ້າ ບໍ່ ຫລົບໜີ ນີ້ ຂ້າພະເຈົ້າ ກໍ ຈະຖືກ ເຂົາ ເອົາໄປ ສັງຫານ ອໍານາດ ການ ປົກຄອງ ນັ້ນ ແຕ່ຂັ້ນ ບ້ານ ຂຶ້ນໄປ ບີບ ບັງຄັບ ພໍ່ແມ່ ປະຊາຊົນ ທຸກສິ່ງ ທຸກຢ່າງ ແມ່ນ ອັດຕະຄັດ ເໝິດ".

ຫລັງຈາກ ການ ສ້າງຕັ້ງ ສປປລາວ 11 ປີ ຕໍ່ມາ ຄື ປີ 1986 ພາຍຫລັງ ທີ່ ຄວາມ ບໍ່ພໍໃຈ ຂອງ ປວງຊົນ ລາວ ຕໍ່ ແນວທາງ ນະໂຍບາຍ ທີ່ ບໍ່ ແທດເໝາະ ກັບ ຈຸດ ພິເສດ ຂອງ ປະເທສ ຄື ທີ່ວ່ານັ້ນ ຂຶ້ນສູ່ ຣະດັບ ສູງ, ເກີດມີ ຄວາມ ບໍ່ພໍໃຈ ແລະ ມີການ ຂັດແຍ່ງ ຢູ່ ພາຍໃນ ຄນະນໍາ ຂອງ ພັກ ແລະໃນ ຄນະ ຣັຖບາລ ຂອງ ສປປ ລາວ ເອງ ຈົນ ເຮັດໃຫ້ ຜູ້ນໍາ ພັກ ຊຶ່ງ ຂນະນັ້ນ ກໍຍັງ ແມ່ນ ທ່ານ ໄກສອນ ເປັນ ຫົວໜ້າ ຈໍາຕ້ອງ ໄດ້ ປ່ຽນແປງ ນະໂຍບາຍ ຂອງ ຕົນໃໝ່ ໂດຍ ໃຫ້ ຊື່ວ່າ: “ແນວທາງ ປ່ຽນແປງໃໝ່” ທີ່ ໄດ້ ວາງອອກ ຢູ່ ໃນ ກອງປະຊຸມໃຫຍ່ ຄັ້ງທີ 4 ຂອງ ພັກ ຊຶ່ງ ຜູ້ນຳລາວ ເວົ້າວ່າ ເປັນ ແນວທາງ ປ່ຽນແປງ ໃໝ່ ຮອບດ້ານ ແລະ ມີ ຫລັກການ ໂດຍ ປ່ຽນຈາກ ການ ກ້າວຂຶ້ນ ສັງຄົມ ນິຍົມ ໂດຍ ກົງ ມາເປັນ ການສືບຕໍ່ ສ້າງ ແລະ ບູຣະນະ ຣະບອບ ປະຊາ ທິປະຕັຍ ປະຊາຊົນ ສ້າງ ປະຖົມ ປັດໃຈ ເພື່ອ ກ້າວຂຶ້ນ ສັງຄົມ ນິຍົມ ເທື່ອ ລະ ກ້າວ, ມີການ ເປີດກວ້າງ ທາງ ດ້ານ ເສຖກິດ ສູ່ ໂລກ ພາຍນອກ ຄື ໂລກ ທຶນ ນິຍົມ ທີ່ ມີ ປະຊາ ທິປະຕັຍ.

ແຕ່ ກໍຍັງ ມີການ ຂັດແຍ່ງ ແລະ ການ ຕໍ່ສູ້ ທັງ ຢູ່ພາຍ ໃນ ພັກ ແລະ ຣັຖບາລ ຢູ່ ຕໍ່ໆມາ ຈົນວ່າ ມີການ ຈັບກຸມ ເຈົ້າໜ້າທີ່ ຂັ້ນສູງ ໃນ ຄນະ ຣັຖບາລ ທີ່ ເຄື່ອນໄຫວ ຮຽກຮ້ອງ ເພື່ອ ຄວາມ ເປັນທັມ ໃນການ ຄຸ້ມຄອງ ຣັຖ, ຄຸ້ມຄອງ ສັງຄົມ, ມີການ ກະກຽມ ການ ປະທ້ວງ, ຮວມທັງ ການ ປະທ້ວງ ຢ່າງ ສັນຕິ ຮຽກຮ້ອງ ໃຫ້ ມີ ການ ປະຕິຮູບ ຣະບອບ ການ ປົກຄອງ ປະເທສ ເພື່ອ ການ ພັທນາ ຂອງ ຂະບວນ ນັກ ສຶກສາ 26 ຕຸລາ 1999 ຢູ່ ນະຄອນ ຫລວງ ວຽງຈັນ, ການລຸກ ຮື້ ຂຶ້ນຕໍ່ສູ້ ດ້ວຍ ກໍາລັງ ອາວຸດ ຂອງ ຂະບວນ ປະຊາ ທິປະຕັຍ ຢູ່ ດ່ານ ຊາຍແດນ ວັງເຕົ່າ ເມືອງ ໂພນທອງ ແຂວງ ຈໍາປາສັກ ທີ່ ຕິດກັບ ຊາຍແດນ ໄທ ໃນ ເດືອນ ກັນຍາ ປີ 2000 ແລະ ການ ເຄື່ອນໄຫວ ເພື່ອ ປະຊາ ທິປະຕັຍ ຂອງ ປະຊາຊົນ ລາວ ທັງ ຢູ່ ພາຍໃນ ແລະ ຕ່າງ ປະເທສ ໃນ ເວລາ ຕໍ່ໆ ມາ ຈົນເຖິງ ປັດຈຸບັນ.

ໃນ ຣະຍະ ທີ ສອງ ນີ້ ຜູ້ນໍາ ລາວ ປະຕິບັດ ນະໂຍບາຍ ເສຖກິດ ຫຼາຍ ພາກສ່ວນ, ທັງ ຂອງ ຣັຖ, ລວມໝູ່, ຂອງ ບໍຣິສັດ ເອກກະຊົນ ແລະ ເອກກະເທດ, ມີການ ພົວພັນ ກັບ ເສຖກິດ ພາກພື້ນ ແລະ ຂອງໂລກ ພາຍໃຕ້ ການ ດັດສົມ ຂອງ ຣັຖ ຕາມ ທິດ ສັງຄົມ ນິຍົມ ດັ່ງ ທີ່ ກໍານົດ ເອົາໄວ້ ໃນ ມາດຕຣາ 13 ຂອງ ຣັຖທັມນູນ ລາວ ຂນະທີ່ ມີການ ວິພາກ ວິຈານ ກັນຢ່າງ ກວ້າງຂວາງ ວ່າ ຣັຖ ອັນ ໝາຍເຖິງ ທັງ ສະພາ ແຫ່ງຊາດ ແລະ ຣັຖບາລ ລາວ ນັ້ນ ຈະເອົາ ອັນໃດ ມາ ດັດສົມ ໃນ ເມື່ອ ກົດໝາຍ 108 ສະບັບ ທີ່ມີຢູ່ ນັ້ນ ບໍ່ໄດ້ ຮັບການ ຈັດຕັ້ງ ປະຕິບັດ ພໍ ເທົ່າໃດ ແມ່ນແຕ່ ທ່ານ ຈູມມະລີ ໄຊຍະສອນ ຜູ້ເປັນ ຫົວໜ້າ ພັກ ເອງ ກໍຍັງ ກ່າວ ຍອມຮັບ ຢູ່ ໃນ ກອງ ປະຊຸມ ໃຫຍ່ ຄັ້ງທີ 9 ຂອງພັກ ວ່າ:

"ການ ຄຸ້ມຄອງ ຣັຖ, ຄຸ້ມຄອງ ສັງຄົມ ມີ ຫຼາຍດ້ານ ບໍ່ທັນ ສັກສິດ, ເຂັ້ມງວດ ຕາມ ທີ່ ໄດ້ ຣະບຸ ໄວ້ ໃນ ກົດໝາຍ".

ເມື່ອເປັນ ຄື ແນວນັ້ນ ຫຼາຍໆຄົນ ຈຶ່ງ ເວົ້າວ່າ ເຮັດ ແນວໃດ ຈະໃຫ້ ການ ພັທນາ ເສຖກິດ ສັງຄົມ ຢູ່ ສປປ ລາວ ຕາມ ທິດ ສັງຄົມ ນິຍົມ ພາຍໃຕ້ ການ ຈັດຕັ້ງ ຊີ້ນຳ ນຳພາ ຂອງ ຜູ້ນຳ ພັກ ປະຊາຊົນ ປະຕິວັດ ລາວ ປະສົບ ຜົລ ສຳເຣັດ ໄດ້.
ຍັງ ມີຕໍ່ ພາກທີ 2 ທີ່ ຈະນຳມາ ສເນີ ທ່ານ.