ຊາວກະສິກອນ ປະເຊີນຕົ້ນທຶນ ການຜະລິດທີ່ສູງຂຶ້ນ

ເພື່ອແກ້ໄຂບັນຫາເສດຖະກິດ-ການເງິນ ທີ່ປະເທດແລະປະຊາຊົນລາວ ກຳລັງປະສົບຢູ່ໃນປັດຈຸບັນ, ລັດຖະບານລາວ ໄດ້ມີນະໂຍບາຍສົ່ງເສີມໃຫ້ມີການຜະຫຼິດພາຍໃນໃຫ້ຫຼາຍຂຶ້ນ ໂດຍສະເພາະການຜະຫຼິດທາງດ້ານກະສິກຳ. ແຕ່ເພື່ອປະຕິບັດໃຫ້ໄດ້ຕາມນະໂຍບາຍນັ້ນ ຊາວກະສິກອນລາວ ໂດຍສະເພາະຊາວກະສິກອນໃນເຂດນະຄອນຫຼວງວຽງຈັນ ກຳລັງປະສົບກັບບັນຫາທ້າທາຍຫຼາຍຢ່າງ ເປັນຕົ້ນບັນຫາຕົ້ນທຶນສູງ ປຸຍແລະຫົວອາຫານສັດແພງ, ອີງຕາມຄໍາເວົ້າຂອງຊາວສິກອນຫຼາຍໆຄົນ.

ຕົວຢ່າງ ຊາວກະສິກອນຜູ້ນຶ່ງໃນເຂດນະຄອນຫຼວງວຽງຈັນ ທີ່ບໍ່ປະສົງບອກຊື່ ໄດ້ກ່າວກ່ຽວກັບເລື່ອງນີ້ກັບວິທະຍຸເອເຊັຍເສຣີໃນວັນທີ່ 22 ກໍລະກົດ 2024 ນີ້ວ່າ:

“ແມ່ນໆ ຄ່າອາຫານຄ່າຫຍັງກະແພງ ອາຫານສັດທຸກຢ່າງເລີຍ ທັງປຸຍທັງອາຫານ ຍ້ອນອັດຕາເງິນມັນຂຶ້ນ ແລ້ວເຮົານຳເຂົ້າເດ່ ເຂົ້າມາແຕ່ໄທ ເພາະວ່າຢູ່ລາວມັນມີໂຮງງານຜະຫຼິດອາຫານນັນໜຶ່ງ ມັນກະຊິບໍຄົບຕາມຈຳນວນ ສົມມຸດວ່າ ມີສັດນ້ອຍສັດໃຫຍ່ ມີແຕ່ບາງຈຳພວກຊື່ໆ ທີ່ວ່າເຮົາຜະຫຼິດໄດ້.”

ຊາວກະສິກອນຜູ້ນີ້ ກ່າວອີກວ່າ ປັດຈຸບັນ ຊາວກະສິກອນທັງຊາວນາແລະຊາວສວນ ໃຊ້ປຸຍສຳຫລັບຫານຜະຫຼິດຫຼາຍຂຶ້ນ ແຕ່ລາຄາປຸຍຊ້ຳພັດແພງຂຶ້ນເລື້ອຍໆ; ຫຼາຍຄົນ ຈຶ່ງຮຽກຮ້ອງໃຫ້ທາງການລາວຊ່ວຍແກ້ໄຂບັນຫາທ້າຍທາຍຕ່າງໆ ເປັນຕົ້ນບັນຫາເງິນເຟີ້ ແລະເງິນກີບອ່ອນຄ່າ ຊຶ່ງເປັນສາເຫດໃຫຍ່ທີ່ເຮັດໃຫ້ປຸຍແລະຫົວອາຫານແພງ ເພື່ອຊາວກະສິກອນ ຈະໄດ້ເພິ້ມພູນຜະຫຼິດຜົນໃຫ້ຫຼາຍຂຶ້ນ ຕາມນະໂຍບານຂອງພັກແລະລັດຖະບານລາວ.

ສ່ວນຊາວກະສິກອນປູກຜັກຂາຍໃນນະຄອນຫຼວງວຽງຈັນຜູ້ນຶ່ງ ກໍຢາກຮຽກຮ້ອງໃຫ້ທາງການລາວຊ່ວຍຝຶກອົບຮົມວິທີຫຼືວິຊາການຕ່າງໆໃຫ້ແກ່ຊາວກະສິກອນ.

“ຖ້າມີການຊ່ວຍເຫຼືອໄດ້ກະແຮງດີ ແຕ່ວ່າກະຕ້ອງເບິ່ງວ່າ ຊ່ວຍແນວໃດ ເລື່ອງໃດຫັ້ນໜ່າ ແຕ່ວ່າເລື່ອງຊ່ວຍເຫຼືອນີ້ ຄັນໄດ້ແຮງດີ ເພາະວ່າບາງເທື່ອຄວາມຮູ້ຂອງການປູກຝັງບໍ່ ການເປັນພີ່ລ້ຽງໃຫ້ ຫຼືວ່າຊ່ວຍແນະນຳແນວທາງບາງຢ່າງຫັ້ນໜ່າ ເຮົາກໍຮູ້ຢູ່ລະດັບໜຶ່ງ ແຕ່ວ່າກະຍັງບໍ່ໄດ້ເກັ່ງຫັ້ນໜ່າ.”

ໃນຂະນະດຽວກັນ ຊາວກະສິກອນອີກຜູ້ໜຶ່ງຈາກນະຄອນຫຼວງວຽງຈັນ ກໍຢືນຢັນວ່າ ຊາວກະສິກອນລາວໃນທົ່ວປະເທດ ກໍຄືຊາວກະສິກອນໃນເຂດນະຄອນຫຼວງວຽງຈັນ ລ້ວນແລ້ວແຕ່ປະສົບກັບບັນຫາຕົ້ນທຶນສູງ ແລະບັນຫານ້ຳມັນ ປຸຍແລະຫົວອາຫານສັດແພງຂຶ້ນທຸກໆມື້ ດັ່ງຊາວກະສິກອນຜູ້ນີ້ ໄດ້ກ່າວວ່າ:

“ໂອ່ຢູ່ນະຄອນຫຼວງວຽງຈັນເຮົາ ມັນມີຫຼາຍແນວຢູ່ໃດ໋ ມັນຂຶ້ນກັບວ່າ ມັນຂຶ້ນກັບການລ້ຽງສັດບໍ່ ຫຼືຕໍ່ການປູກຝັງບໍ່ ບັນຫາເງິນເຟີ້ກໍມີສ່ວນໜຶ່ງເນາະ ເລື່ອງປັດໃຈນຳເຂົ້ານຳກະເປັນສ່ວນໜຶ່ງ. ສະນັ້ນຄືວ່າຢູ່ບ້ານເຮົານີ້ ເຮົາກໍຕ້ອງເລັ່ງເລື່ອງການຜະຫຼິດພາຍນີ້ແຫຼະ.”

ຕໍ່ຄຳຮຽກຮ້ອງເຫຼົ່ານັ້ນ ເຈົ້າໜ້າທີ່ດ້ານກະສິກຳທ່ານໜຶ່ງ ກ່າວວ່າ ທາງເຈົ້າໜ້າທີ່ທີ່ກ່ຽວຂ້ອງ ໄດ້ພະຍາຍາມຊ່ວຍເຫຼືອຊາວກະສິກອນຕະຫຼອດມາ ເຊັ່ນໄດ້ໃຫ້ຄວາມຮູ້ກ່ຽວກັບການໃຊ້ປຸຍ ການສີດຢາ ແລະແທກນິກໃນການຜະຫຼິດໃໝ່ໆ.

“ເຮົາເຮັດໂຕຈິງໃດ໋ ເຮົາໄປແນະນຳເຂົາ ແລ້ວເຮົາກໍໄປສີດໃຫ້ເຂົານຳ ເຮົາລົງສີດໃຫ້ເພິ່ນ ແລ້ວກໍລົງແນະນຳໃຫ້ເພິ່່ນ ແລ້ວກໍໄປເບິ່ງສີດຈົນແລ້ວ ຈົນເຫັນໝາກເຫັນຜົນ ແລ້ວເຮົາຈຶ່ງປະເພິ່ນ ບາງຄົນເຂົາເຈົ້າຂາຍ ບໍ່ລົງໄປເບິ່ງນຳ ຊື້ໄປແລ້ວ ເພິ່ນບໍ່ຮູ້ການນຳໃຊ້ຫຼືວ່າບໍ່ບອກສູດ ກະບໍ່ຮູ້ໃຊ້.”

ສ່ວນບັນຫາຕົ້ນທຶນສູງ ວິທີແກ້ໄຂກໍຄື ທາງທະນາຄານ ກໍມີນະໂຍບານໃຫ້ເງິນກູ້ຢືມແກ່ຊາວກະສິກອນຢູ່.

“ຕາມເງື່ອນໄຂຂອງທະນາຄານເຮົາມີຫັ້ນແຫຼະ ກະປົກກະຕິ ກະບໍ່ໄດ້ຮັດກຸມຂຶ້ນ ແລ້ວກະບໍ່ໄດ້ຜ່ອນຄາຍ ເລື່ອງນີ້ແຫຼະ ກໍອີງຕາມສະພາບໂຕຈິງຂອງການດຳເນີນທຸລະກິດຂອງລູກຄ້າ ຈະວ່າໄປ ກະປົກກະຕິວ່າຊັ່ນສະ.”

ທ່ານຮອງເຈົ້າຄອງນະຄອນຫຼວງວຽງຈັນເຄີຍກ່າວເມື່ອບໍ່ດົນຜ່ານມາວ່າ ນອກຈາກບັນຫາປຸຍແລະຫົວອາຫານສັດແລ້ວ ຊາວກະສິກອນນະຄອນຫຼວງວຽງຈັນ ຍັງປະສົບກັບບັນຫາຂາດເຂີນຄົນງານ ເພາະຄົນງານລາວໜີໄປເຮັດວຽກຢູ່ໄທແລະປະເທດອື່ນໆຫຼາຍເກີນໄປ; ອີກຢ່າງໜຶ່ງ ທ່ານກໍຢາກສະເໜີໃຫ້ລັດຖະບານຫຼຸດຜ່ອນການນຳເຂົ້າ ແລ້ວໃຫ້ສົ່ງເສີມການຜະຫຼິດພາຍໃນໃຫ້ຫຼາຍຂຶ້ນ.

ໃນມື້ວັນທີ 20 ມິຖຸນາ 2024 ທີ່ຜ່ານມາ, ກະຊວງກະສິກຳ ແລະ ປ່າໄມ້ຂອງລາວ ໄດ້ອອກແຈ້ງການ ໃຫ້ທົດລອງໃຊ້ມາດຕະການ ຫ້າມນຳເອົາສິນຄ້າ ດ້ານການກະເສດ ທີ່ສາມາດຜະລິດໄດ້ ຢູ່ພາຍໃນ ເຂົ້າມາຈຳໜ່າຍ ຢູ່ຕະຫຼາດພາຍໃນປະເທດ, ໃຫ້ເລີ່ມປະຕິບັດ ຢູ່ຕາມດ່ານທ້ອງຖິ່ນ ແລະ ດ່ານປະເພນີ, ແລະອະນຸຍາດ ໃຫ້ນຳສິນຄ້າທີ່ຈຳເປັນບາງປະເພດເທົ່ານັ້ນ ແຕ່ພວກພໍ່ຄ້າແມ່ຄ້າລາວ ຍັງນຳເຂົ້າສິນຄ້າທຸກປະເພດຜ່ານດ່ານສາກົນໄດ້ຕາມປົກກະຕິ ໃນນັ້ນ ລວມທັງສິນຄ້າກະສິກຳ ເພາະວ່າ ດ່ານສາກົນ ມີລະບົບກວດກາສິນຄ້າຢ່າງຄັກແນ່. ແນ່ນອນວ່າ ທາງການລາວ ອອກແຈ້ງການດັ່ງກ່າວ ກໍເພື່ອສົ່ງເສີມ ການຜະລິດພາຍໃນ ທົດແທນການນຳເຂົ້າ ຕາມຈຸດປະສົງຂອງຄະນະສະເພາະກິດ ວ່າດ້ວຍການແກ້ໄຂບັນຫາຮີີບຮ້ອນ ນັ້ນກໍຄືບັນຫາເສດຖະກິດ-ການເງິນ, ເປັນຕົ້ນໄພເງິນເຟີ້, ເງິນກີບອ່ອນຄ່າ, ລາຄາສິນຄ້າແພງ ແລະ ໜີ້ສິນຕ່າງປະເທດທີ່ມະຫາສານ.