ຄົນງານລາວຖືກຈັບຢູ່ ມາເລເຊັຽ ຖືກປ່ອຍແລ້ວ

ສຸພັດຕາ
2021-05-14
Share
ຄົນງານລາວຖືກຈັບຢູ່ ມາເລເຊັຽ ຖືກປ່ອຍແລ້ວ (ຮູບຊ້າຍ) 1 ໃນ 11 ຄົນງານລາວ ທີ່ຖືກກັກຕົວ ຢູ່ສນາມບິນ (ຮູບຂວາ) 11 ຄົນໃນມື້ທີ່ຖືກກັກຢູ່ ຕມ ສນາມບິນ ກຸລາລໍາເປີ ມາເລເຊັຽ
ນັກຂ່າວພົລເມືອງ

ໃນກໍຣະນີ ຂອງຄົນງານປະມົງລາວ ຈໍານວນ 11 ຄົນ ທີ່ຖືກເຈົ້າໜ້າທີ່ຕໍາຣວດ ຕ.ມ ຢູ່ສນາມບິນ ມາເລເຊັຽ ຈັບໃນວັນທີ 24 ເດືອນ ກຸມພາ 2021 ແລະ ຖືກສານມາເລເຊັຽ ຕັດສິນຈໍາຄຸກ ເປັນເວລາ 2 ເດືອນ ຍ້ອນເອກກະສານ ບໍ່ຖືກຕ້ອງຕາມກົດໝາຍ.

ປັດຈຸບັນ ທັງ 11 ຄົນ ດັ່ງກ່າວນັ້ນໄດ້ອອກຈາກຄຸກແລ້ວ ໃນວັນທີ 16 ເດືອນ ເມສາ 2021 ແລະ ດຽວນີ້ຄົນງານລາວທັງ 11 ຄົນນັ້ນ ໄດ້ຖືກຍ້າຍໄປຢູ່ສະຖານທີ່ໃໝ່ແລ້ວ ຕາມການບອກເລົ່າ ຂອງຜູ້ເປັນເອື້ອຍ ຂອງຄົນງານລາວຜູ້ນຶ່ງ ຕໍ່ວິທຍຸເອເຊັຽເສຣີ ເມື່ອວັນທີ 16 ເມສາ ຜ່ານມາວ່າ:

“ຕອນທີ່ວ່າ ນ້ອງຊາຍອອກມາ ນ້ອງຊາຍກະເວົ້າວ່າ ເອື້ອຍນ້ອຍ; ດຽວນີ້ເຮົາພົ້ນໂທດລະເດີ້ວ່າຊັ້ນ ລະດຽວນັ້ນກໍາລັງເດີນທາງໄປ ເຂົາຊິເອົາໄປກັກໂຕ ຢູ່ຄ້າຍທະຫານວ່າຊັ້ນ ໄປແຍກກັນ ມື້ວັນທີ 16 ວັນສຸກ ມື້ທີ່ເຂົາໄດ້ປົດປ່ອຍອອກໄປຫັ້ນນ່າ.”

ຄົນງານປະມົງລາວ ທີ່ຕົກຄ້າງຢູ່ປະເທດມາເລເຊັຽ 11 ຄົນ ດັ່ງກ່າວນັ້ນ ປັດຈຸບັນແມ່ນຖືກຂັງຢູ່ແຄ້ມ ທີ່ລໍຖ້າສົ່ງຄົນອອກນອກ ປະເທດ ສໍາລັບວັນທີ່ ທີ່ຈະໄດ້ກັບລາວ ທີ່ຄາດວ່າ ໃນວັນທີ 24 ເມສາ 2021 ຕາມທີ່ທາງການ ເຄີຍເວົ້າກ່ອນໜ້ານີ້ ນັ້ນແມ່ນ ເປັນໄປບໍ່ໄດ້ແລ້ວ, ດັ່ງເຈົ້າໜ້າທີ່ສະຖານທູດລາວ ປະຈໍາມາເລເຊັຽ ທ່ານນຶ່ງ ໄດ້ອະທິບາຍ ຕໍ່ວິທຍຸເອເຊັຽ ເສຣີ ເມື່ອວັນທີ 22 ເມສາ ຜ່ານມາ ນີ້ວ່າ:

“ພວກອ້າຍປະສານຕິດຕາມຕລອດເດີ້ ດຽວນີ້ຂະເຈົ້າ ອອກຈາກເຂດຄຸມຂັງແລ້ວ ແລ້ວມາຢູ່ບ່ອນ ເຂົາເອີ້ນວ່າບ່ອນ ກັກລໍຖ້າ, ເຂົາເອີ້ນ Deport camp ນ່າ ເພາະວ່າບັນຫາ ພວກອ້າຍກະມີແຜນຈະເອົາເມືອຢູ່ເນາະ, ບາດນີ້ມັນຂຶ້ນກັບຖ້ຽວບິນ, ພວກເຮົາ ຕ້ອງໄດ້ເຮັດໜັງສືແຈ້ງເຂົ້າ ຫັ້ນນ່າ, ບາດນີ້ຖ້າວບິນບ້ານເຮົາຫັ້ນ ທ້າຍເດືອນນີ້ ມັນກະເຕັມແລ້ວ, ຕົ້ນເດືອນໜ້ານີ້ ມັນກະຕົກ ເປັນຖ້ຽວບິນ ຄອມເມີໂຊ ມັນກະເປັນ ວັນທີ 20 ປາຍ ຂຶ້ນກັບບໍຣິສັດ ເຂົາຈັດເນາະ ກະຊິແມ່ນທ້າຍເດືອນ 5 ພຸ້ນແຫຼະ ຢາກ ເອົາເມືອໄວ ມັນກະເມືອບໍ່ໄດ້ ແຫຼະ ມັນຂຶ້ນກັບຖ້ຽວບິນ ເຊື່ອມຍົງກັບສະພາບບ້ານເຮົາ ດຽວນີ້ກະແຫ່ງພຍາດຕິດຕື່ມ ເພາະວ່າ ຂັ້ນຕອນໃນການສົ່ງກັບ ກະໄດ້ກວດໂຄວິດ ກວດສັງຕື່ມຕ່າງໆເດ້.”

ກ່ຽວກັບກໍຣະນີ ທີ່ຈະກັບເມືອລາວ ໃນທ້າຍເດືອນພຶສພາ 2021 ນີ້ ກໍຍັງເປັນທີ່ບໍ່ແນ່ນອນ ເພາະຕາມຄໍາອະທິບາຍ ຂອງເຈົ້າໜ້າທີ່ ສະຖານທູດ ທ່ານນີ້ຕື່ມອີກ ແລ້ວແມ່ນວ່າ:

“ອັນ ໃນເດືອນ 5 ນີ້ ກະຄືວ່າ ມັນເປັນແຜນເນາະ ຕ້ອງເຂົ້າໃຈວ່າ ເດືອນນີ້ເປັນໄປບໍ່ໄດ້ແລ້ວ ເດືອນ 5 ນີ້ ເປັນແຜນມັນຂຶ້ນກັບ ຝ່າຍ ມາເລ ເຣື່ອງເອກກະສອກ ເອກກະສານ ຂັ້ນຕອນຂອງເຮົາ ກະຕ້ອງຂໍອະນຸມັດ ຈາກຄະນະສະເພາະກິຈ, ເພື່ອຂໍເຂົ້າກ່ອນ, ກ່ອນຈະໄດ້ ເຮົາກະຕ້ອງໄດ້ເຮັດບົດຣາຍງານ ເມືອກ່ອນເນາະ ລະກະຣາຍງານທາງຣັຖບານ ຈໍາພວກຂໍ້ເຂົ້າ ສະນັ້ນແລ້ວເຮົາຕ້ອງ ໄດ້ເບິ່ງເງື່ອນໄຂ ທາງດ້ານ ມາເລ ອີກ ຂະເຈົ້າຈະພ້ອມຊໍ່າໃດບໍ່, ຄັນເຮົາພ້ອມທາງດ້ານເອກກະສານ, ທາງດ້ານຂໍອະນຸຍາດ ເມືອ ລາວ ແນວໃດ, ມີຍົນເມືອລາວແນວໃດ ກະແມ່ນວ່າຂະເຈົ້າກະປ່ອຍອອກ ຂະເຈົ້າໄປສົ່ງເອງຢູ່ເດີ່ນບິນເລີຍເນາະ ອ້າຍໄດ້ອະທິບາຍ ໃຫ້ຄອບຄົວ ຂະເຈົ້າຮູ້ເບິດລະບັນຫານີ້, ແຕ່ວ່າບໍ່ເຂົ້າໃຈ ວ່າຂະເຈົ້າຈະເຂົ້າໃຈໃນຂັ້ນຕອນບໍ່ ມັນກະຕ້ອງໄດ້ເບິ່ງທາງບ້ານເຮົາ ທາງບ້ານເຂົາແດ່ ພວກເຮົາຕ້ອງເຂົ້າໃຈນໍາກັນເນາະ, ແຕ່ວ່າບາງຄັ້ງມັນ ຖຽວບິນມັນກະຕ້ອງ ໄດ້ເບ່ິງ ຂັ້ນຕອນດ້ານເອກກະສານ ຖືວ່າຂະເຈົ້າບໍ່ໄດ້ຢູ່ໃນຄຸກລະ ຢູ່ໃນເຂດກັກຂັງ ບໍຣິເວນທີ່ວ່າຂະເຈົ້າຈະເມືອ.”

ສໍາລັບພໍ່ແມ່ ແລະຄອບຄົວຂອງຄົນງານລາວ ທີ່ວ່າຍັງຕົກຄ້າງໃນມາເລເຊັຽນັ້ນ ກໍມີຄວາມເຫັນແຕກຕ່າງໄປຈາກນັ້ນ ຍ້ອນວ່າ ຂາດການຕິດຕໍ່ກັບລູກ ແລະກໍໄດ້ບໍ່ມີອະນຸຍາດ ໃຫ້ໄດ້ຕິດຕໍ່ກັນໄດ້ເລີຍ, ດັ່ງຜູ້ເປັນພໍ່ ຂອງຄົນງານປະມົງລາວຄົນນຶ່ງ ເວົ້າວ່າ:

“ໂອ້! ຄັນມັນເປັນຈັ່ງຊີ້ນີ້ເນາະ ຢາກຂໍຖາມຄືນຢູ່ບ່ອນນີ້ເນາະ ຖ້າວ່າ ຫວິດໂທດແລ້ວ ຍົກຕົວຢ່າງ ເອົາໄປກັກຂັງ ລະເອົາໄປບ່ອນ ຕຽມສິສົ່ງ ຂ້າມໄປຕ່າງປະເທດເນາະ ກັບຄືນບ້ານຄືນເມືອງເນາະ, ແຕ່ວ່າ ຄັນວ່າ ຄັນວ່າຫວິດໂທດແລ້ວ ເປັນຫຍັງຈຶ່ງບໍ່ເອົາ ໂທຣະສັບ ໃຫ້ຂະເຈົ້າ.”

ແຕ່ໃນກໍຣະນີ ທີ່ວ່າຄົນງານລາວ ຂາດການຕິດຕໍ່ກັບຄອບຄົວ ນີ້ມັນອາຈເປັນຂໍ້ກໍານົດ ຫຼື ຣະບຽບຂອງທາງການມາເລເຊັຽ, ແຕ່ ພໍ່ແມ່ ຂອງຄົນງານລາວ ມີຄໍາເຫັນດັ່ງຕໍ່ໄປນີ້ວ່າ:

“ຄັນວ່າເນາະ ຍັງຢູ່ດີມີແຮງໝົດທຸກຄົນເນາະ ກະແມ່ນ ກະບໍ່ແມ່ນປະມາດທ່ານທູດ ບໍ່ແມ່ນຢາກຮູ້ເຫັນວ່າ ຢູ່ດີມີແຮງຢູ່ພໍ່ເອີ້ຍເບາະ, ເມັຽເອີ້ຍບໍ່ໃຫ້ເປັນຫ່ວງເດີ້ ເຮົາກະອອກມາຈາກຄຸກ ຈາກຄາແລ້ວນ່າ ດຽວນີ້ນິ່ເຮົາກະຢູ່ນໍາສູນກັກຂັງ ກະຄືກັບແບບ ຫຼັກ 27 ຫັ້ນ ເພື່ອບໍ່ໃຫ້ມັນຕິດພຍາດບາດເຍົາຫັ່ນຊື່ໆ ຕຽມຈະໄດ້ອອກຢູ່ ບໍ່ໃຫ້ເປັນຫ່ວງ ໄດ້ຍິນສຽງປາກ ລູກຄືແນວນີ້ ຍິ່ງຈະດີ ໃຈຫຼາຍ.”

ເຖິງຢ່າງໃດກໍຕາມ ອີງຕາມຄໍາເວົ້າ ຂອງທາງເຈົ້າໜ້າທີ່ ສະຖານທູດລາວ ປະຈໍາມາເລເຊັຽ ທ່ານດຽວກັນນີ້ ບອກກັບເອເຊັຽເສຣີ ວ່າຄົນງານປະມົງລາວທັງ 11 ຄົນດັ່ງກ່າວນັ້ນ ແມ່ນໄດ້ໄປຢູ່ບ່ອນດຽວກັນ ຄືຢູ່ໃນແຄ້ມ ທີ່ລໍຖ້າສົ່ງຄົນອອກນອກປະເທດ, ແຕ່ວ່າ ຄົນງານລາວ 1 ໃນ 11 ຄົນນັ້ນ ໄດ້ບັງເອີນໂທມາຫາຄອບຄົວທາງບ້ານ ແລ້ວບອກວ່າ ບໍ່ໄດ້ຢູ່ນໍາກັນ. 5 ຄົນໄປທາງນຶ່ງ 6 ຄົນ ໄປທາງນຶ່ງ, ດັ່ງຜູ້ເປັນເມັຽ ຂອງຄົນງານລາວ ຜູ້ນຶ່ງເວົ້າວ່າ:

“ມື້ເພິ່ນໂທມາກະດີໃຈຫັ້ນແຫຼະ ຄິດວ່າໄດ້ອອກ ບາດນີ້ໄດ້ຍິນຂ່າວເພ່ິນວ່າ ມັນແຍກອອກຈາກກັນຫັ່ນນ່າ ຜົວນ້ອງນິ່ແຍກອອກຈາກ ພວກພໍ່ລຸງ ໝວດອ້າຍອິຫຍັງເຂົາຫັ່ນແຫຼະ ແຍກກັນໝວດນັ້ນຂະເຈົ້າລະສົ່ງຂ່າວມາເບິດ, ໝວດຜົວນ້ອງຖືກແຍກກັນຫັ່ນ ລະບໍ່ໄດ້ ຍິນຂ່າວອິຫຍັງເລີຍ, ບາດນີ້ຄຶດແຫ່ງກັນວົນໃຈ ກ່ອນເກົ່າບາດນີ້ ແບບວ່າມິດເລີຍນ່າ ພວກທີ່ວ່າແຍກໄປນໍາກັນ 6 ຄົນຫັ່ນນ່າ.”

ເຖິງຢ່າງໃດກໍດີ ກໍານົດວັນ ແລະເວລາ ທີ່ທາງການໄດ້ກໍານົດໃຫ້ ວ່າຈະໄດ້ມາໃນທ້າຍເດືອນ ພຶສພານີ້ ຄົງຈະມາບໍ່ໄດ້ແລ້ວຍ້ອນວ່າ ສະພາບການ ຂອງເຊື້ອໂຄວິດ-19 ຣະບາດໜັກ, ດັ່ງຜູ້ເປັນແມ່ ທີ່ມີຄວາມເປັນຫ່ວງ ຕໍ່ລູກຊາຍໄດ້ເວົ້າວ່າ:

“ສະບາຍໃຈຂຶ້ນໜ້ອຍນຶ່ງ, ແຕ່ວ່າຫາກມາໄດ້ຍິນບາດທ້າຍ ວ່າເດືອນ 5 ຊິໄດ້ມາ ນິ່ຍັງບໍ່ຄອນເຟີມນິ່ ກະຄິດໜ້ອຍນຶ່ງຫັ່ນແຫຼະ ອິຕົນລູກຫັ່ນ ເພາະວ່າຊ້ວງນີ້ ມັນຕິດໂຄວິດ ອິຫຍັງ ຫຼາຍຊິເນາະ ມັນກະຊິມາຍາກແດ່, ເພາະວ່າທາງລາວເຮົາ ມັນກະຕິດ ໂຄວິດຫຼາຍເດ້.”

ອີງຕາມຂໍ້ມູລຕ່າງໆ ທີ່ໄດ້ກ່າວມານີ້ ກໍໝາຍຄວາມວ່າ ຄົນງານປະມົງລາວ ທັງ 11 ຄົນນີ້ ກໍຍັງຈະບໍ່ຮູ້ ກໍານົດວັນເວລາທີ່ແນ່ນອນ ວ່າຈະໄດ້ກັບມາບ້ານເມື່ອໃດແທ້ ຍ້ອນການຣະບາດ ຂອງເຊື້ອໂຄວິດ-19 ໃນເຂດເອເຊັຽຕາເວັນອອກສຽງໃຕ້.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ