ລັດຖະບານ ໃຫ້ກວດຄືນໂຄງການຢູ່ແຂວງຈໍາປາສັກ ທີ່ບໍ່ມີການພັດທະນາ

ລັດຖະບານ ໃຫ້ທາງການ ແຂວງຈໍາປາສັກ ກວດຄືນໂຄງການ ລົງທຶນຕ່າງໆທີ່ອະນຸມັດໄປ ຫຼັງຈາກ 6 ເດືອນ ຕົ້ນປີ 2024 ໄດ້ມີການກວດພົບບາງໂຄງການ ບໍ່ມີປະສິດທິພາບ, ຂາດການພັດທະນາ, ມີການລະເມີດກົດໝາຍ.

ລັດຖະບານ ໄດ້ຍົກເລີກໃບອະນຸຍາດຈໍານວນ 10 ໂຄງການ ແລະ ຍຶດເອົາເນື້ອທີ່ດິນຄືນມາເປັນຂອງລັດ ປະມານ 1,800 ເຮັກຕ້າຣ໌.

ເຈົ້າໜ້າທີ່ພະແນກແຜນການ ແລະ ການລົງທຶນ ແຂວງຈໍາປາສັກ ໄດ້ກ່າວຕໍ່ເອເຊັຽເສຣີ ໃນວັນທີ 10 ກັນຍາ ວ່າ:

“ມັນດົນຫຼາຍຫັ້ນນ່າ ຖືວ່າ ເຮົາກະຍັງຈັດຕັ້ງປະຕິບັດ ບໍ່ໄດ້ ເຂົາກະແຈ້ງໂຈະຊົ່ວຄາວ ເພາະວ່າ ເຮົາຍັງຂັດຂ້ອງ ນຶ່ງທາງດ້ານການເງິນ ຫຼື ວ່າ ອີ່ຫຍັງນີ້ນ່າ ລັດກະເອົາຄືນໄປໃຫ້ບໍລິສັດອື່ນແລ້ວລະເວີຍ ຕາມລະບຽບຫຼັກການ ມັນຫັ້ນແຫຼະ ບໍ່ມີບັນຫາດອກ ຕົວນີ້ ມັນຄວາມສະໝັກໃຈຂອງບໍລິສັດເດ້.”

ທ່ານ ກ່າວອີກວ່າ ໃນໄລຍະ 2-3 ປີມານີ້ ມີຫຼາຍບໍລິສັດ ຫຼາຍໂຄງການ ທີ່ໄດ້ຮັບອະນຸມັດໂຄງການລົງທຶນໄປແລ້ວ ແຕ່ບໍ່ສາມາດຈັດຕັ້ງປະຕິບັດໂຄງການໄດ້ຕາມສັນຍາ, ບາງໂຄງການ ກໍແຈ້ງຊະລໍການພັດທະນາອອກໄປກ່ອນ ເນື່ອງຈາກຂາດເງິນລົງທຶນ ແລະ ຕ້ອງປະເຊີນກັບຕົ້ນທຶນທີ່ສູງຂຶ້ນ ຈາກພາວະເງິນເຟີ້ ແລະ ເງິນກີບອ່ອນຄ່າ.

ສ່ວນໂຄງການລົງທຶນໃດໆ ທີ່ບໍ່ສາມາດຈັດຕັ້ງປະຕິບັດໄດ້ ຕາມສັນຍາແທ້ໆ ທາງການແຂວງ ຈໍາປາສັກ ກໍຈະມີການຍົກເລີກໂຄງການແບບຖາວອນ ເພາະວ່າ ທາງການລາວ ບໍ່ສາມາດເກັບເງິນຄ່າສໍາປະທານ ແລະ ພາສີ-ອາກອນ ໄດ້ ຕາມສັນຍາ ເປັນຕົ້ນ ໂຄງການປູກພືດເສດຖະກິດ, ໂຄງການລ້ຽງສັດ ແລະ ໂຄງການຂຸດຄົ້ນແຮ່ທາດ.

ບໍລິສັດໃດ ທີ່ໄດ້ຮັບອະນຸມັດໄປແລ້ວ ແຕ່ບໍ່ສາມາດດໍາເນີນການໄດ້ ທາງການແຂວງ ກໍຈະຍົກເລິີກ ແລ້ວ ເອົາສໍາປະທານນັ້ນໃຫ້ບໍລິສັດໃໝ່ເຂົ້າມາເຮັດແທນ.

ເຈົ້າໜ້າທີ່ພະແນກກະສິກໍາ ແລະ ປ່າໄມ້ ແຂວງຈໍາປາສັກ ໄດ້ກາວຕໍ່ເອເຊັຽເສຣີ ໃນວັນທີ 10 ກັນຍາ ວ່າ:

“ຂັ້ນລັດເຮົາຕ້ອງໄດ້ ປຶກສານໍາບໍລິສັດວ່າ ບໍລິລັດທີ່ເຄີຍ ສໍາປະທານມາແລ້ວ ແລ້ວເຂົ້າບໍ່ມີການພັດທະນາຫັ້ນກະ ເຂົາຊິຍົກເລີກສັນຍາບໍ່ແນວໃດ ຖ້າຍົກເລີກສັນຍາແລ້ວ ກະມີແຕ່ວ່າ ໃຫ້ບໍລິສັດໃໝ່ເຂົ້າມາສໍາປະທານຕໍ່ໄດ້.”

ເຖິງວ່າ ຫຼາຍໂຄງການໄດ້ອະນຸມັດໄປແລ້ວ ແຕ່ ກໍບໍ່ມີການເປີດເຜີຍຂໍ້ມູນລະອຽດ ກ່ຽວກັບການສໍາປະທານທີ່ດິນເປັນຈໍານວນຫຼາຍເຮັກຕ້າຣ໌.

ຊາວແຂວງຈໍາປາສັກ ກໍເຫັນດີ ຖ້າມີການລົງກວດກາຢ່າງຈິງຈັງ:

“ກະຫຼາຍໆ ໂຄງການທີ່ວ່າ ມັນຍັງວ່າ ບໍ່ຊັດເຈນ ຈະແຈ້ງ ຫັ້ນນ່າ ຖ້າເພິ່ນມີການກວດສອບຕົວນີ້ຄືນ ກະຖືວ່າ ດີຫຼາຍ.”

ຢູ່ແຂວງຈໍາສັກ ມີຫຼາຍໂຄງການລົງທຶນທັງພາຍໃນ ແລະ ຕ່າງປະເທດ ເຂົ້າມາສໍາປະທານທີ່ດິນ ຈົນເຮັດໃຫ້ຊາວບ້ານ ຢູ່ຫຼາຍພື້ນທີ່ມີເນື້ອທີ່ດິນກະສິກໍາບໍ່ພຽງພໍ ໂດຍສະເພາະ ຢູ່ເມືອງໂຂງ ແຂວງຈໍາປາສັກ ອີງຕາມຂໍ້ມູນຈາກຊາວບ້ານ.

ຊາວບ້ານແຂວງຈໍາປາສັກ ອີກທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 10 ກັນຍາ ວ່າ:

“ມັນຫຼາຍບໍລິສັດນ່າ ຈົນວ່າດິນບໍ່ມີນ່າ ພວກບໍລິສັດ ສໍາປະທານ ເພາະວ່າ ທາງເທິງ ນັ້ນ ເຂົາຈະບໍ່ເບິ່ງເລື່ອງຂອງປະຊາຊົນ ບໍ່... ຄັນເຮັດຫັ້ນ ເຮັດໃຫ້ມັນຖືກຕ້ອງ ກົດໝາຍມີ ເຮົາຕ້ອງປະຕິບັດຕາມລະບຽບກົດໝາຍ ຄັນເຂົາສໍາປະທານດິນນີ້ ມັນຕ້ອງໄດ້ແລ້ວເງິນ.”

ທ່ານ ຍັງສັງເກດເຫັນອີກວ່າ ມີຫຼາຍໂຄງການທີ່ໄດ້ຮັບອະນຸມັດໄປແລ້ວ ແຕ່ໄລຍະເວລາຜ່ານໄປຫຼາຍປີ ກໍຍັງບໍ່ເຫັນມີການພັດທະນາເກີດຂຶ້ນ ແທນທີ່ທາງການລາວ ຈະຈັດສັນດິນໃຫ້ຊາວບ້ານໃນພື້ນທີ່ ເອົາໄວ້ທໍາມາຫາກິນແບບຍືນຍົງ ພັດເອົານັກລົງທຶນມາເຊົ່າ ສໍາປະທານຈົນໝົດ ແຕ່ປະເທດຊາດ ແລະ ຊາວບ້ານ ບໍ່ໄດ້ຮັບຜົນປະໂຫຍດ.

ສໍາລັບວຽກງານການກວດກາໂຄງການເຊົ່າ ສໍາປະທານດິນລັດ ໄດ້ຕິດພັນກັບ ການຄຸ້ມຄອງສິ່ງແວດລ້ອມ ແລະ ປະຕິບັດໃຫ້ສໍາເລັດພາຍໃນປີ 2024 ລວມທັງການຊຸກຍູ້ ຕິດຕາມກວດກາ ຄວາມຄືບໜ້າການແກ້ໄຂບັນດາໂຄງການເຊົ່າ ສໍາປະທານດິນລັດ ທີ່ນອນຢູ່ໃນບັນຊີເປົ້າໝາຍຍົກເລີກ ປະມານ 400 ໂຄງການ ໃນທົ່ວປະເທດ ແລະ ສະເພາະຢູ່ແຂວງຈໍາປາສັກມີປະມານ 50 ໂຄງການ ອີງຕາມຂໍ້ມູນຈາກທາງການລາວ.