ລັດຖະບານ ສັ່ງປາບປາມ ກຸ່ມແອບອ້າງ ປ່ອຍສິນເຊື່ອ

ບັນຫາອາດຊະຍາກໍາ ທາງໄຊເບີ້ ແລະ ການຕົວະຍົວະ ຫລອກລວງ ໃນປະເທດລາວ ນັບມື້ຈະເພີ່ມຂຶ້ນ ເຖິງແມ່ນວ່າ ລັດຖະບານລາວ ຈະສັ່ງຕິດຕາມ ກວດກາ ແລະ ປາບປາມຢ່າງຕໍ່ເນື່ອງ ແຕ່ກະບໍ່ໄດ້ໝົດໄປຈາກສັງຄົມລາວເທື່ອ ເພາະ ບັນດາອົງການທີ່ກ່ຽວຂ້ອງ ຍັງຂາດການເອົາໃຈໃສ່ ຕໍ່ວຽກງານດັ່ງກ່າວນີ້. 

ຫລ້າສຸດນີ້ ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ເນັ້ນຢໍ້າ ໃຫ້ບັນດາກະຊວງ ແລະ ອົງການທີ່ກ່ຽວຂ້ອງ ເອົາໃຈໃສ່ຕິດຕາມ ກວດກາ ແລະ ຄຸ້ມຄອງບັນດາ ສະຖາບັນການເງິນ ທີ່ບໍ່ແມ່ນທະນາຄານ ໃນການປ່ອຍສິນເຊື່ອ ທີ່ຈະເຮັດໃຫ້ ປະຊາຊົນອັບປະໂຫຍດ ແລະ ສູນເສັຍຊັບສິນ ເພາະປັດຈຸບັນ ເກີດການຕົວະຍົວະ ຫລອກລວງ ຜ່ານສື່ສັງຄົມອອນລາຍ ນັບມື້ຈະເພີ່ມຂຶ້ນ. 

ດັ່ງ ເຈົ້າໜ້າທີ່ ກະຊວງການເງິນ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 25 ກັນຍາ ນີ້ວ່າ:

“ພວກນີ້ແມ່ນ ຫລັກການຂະເຈົ້າປ່ອຍສິນເຊື່ອ ແມ່ນຈະເປັນປ່ອຍສິນເຊື່ອ ໄລຍະສັ້ນເນາະ ແລ້ວກະຈະເກັບສິນເຊື່ອ ເປັນລາຍເດືອນ ບໍ່ແມ່ນເປັນລາຍປີ ຄືແບບທະນາຄານ, ສິນເຊື່ອເງິນດ່ວນ ຢູ່ຕາມອ່ອນລ່າຍນີ້ ມັນກະບໍ່ໜ້າເຊື່ອປານໃດ ເນັ້ນເລື້ອງການໂຄສະນາ ຜົນຕອບແທນຫລາຍກ່ວາ ຕັ້ງໃຈຕົວະມັນມີຫລາຍເຈົ້າ ໄປຮ່ວມລົງທຶນ ໄປລົງທຶນອີ່ຫຍັງ ຕ້ອໄດ້ຖາມຄືນຂະເຈົ້າ ມັນບໍ່ຄ່ອຍມີປານໃດ ທີ່ວ່າຈະໄປເອົາຜົນຕອບແທນ ໃຫ້ເຮົາ 20-30%.”

ທ່ານກ່າວອີກວ່າ ສໍາລັບກຸ່ມປະຊາຊົນລາວ ທີ່ມີການສ່ຽງສູງ ໃນການຖືກຕົວະຍົວະຫລອກລວງ ຫລື ອາດຊະຍາກໍາທາງໄຊເບີ້ ໃນຮູບແບບອື່ນໆ ຈະແມ່ນປະຊາຊົນລາວ ຜູ້ຂາດຄວາມຮູ້, ຂາດສະຕິ ຮູ້ເທົ່າບໍ່ເຖິງການ, ບໍ່ຮູ້ໜັງສື ແລະ ຄາດຫວັງ ທີ່ຈະໄດ້ຮັບຜົນປະໂຫຍດ ຈາກການໂຄສະນາ ເຫລົ່ານັ້ນ. 

ເພື່ອຫລຸດຜ່ອນຜົນກະທົບ ແລະ ການສູນເສັຍຊັບສິນຂອງປະຊາຊົນລາວ ລັດຖະບານລາວ ຈໍາເປັນຕ້ອງຕິດຕາມ, ກວດກາ ແລະ ປາບປາມ ກຸ່ມແອບອ້າງ ເປັນສະຖາບັນການເງິນ ທີ່ບໍ່ແມ່ນທະນາຄານ ໃນການປ່ອຍສິນເຊື່ອ ຢ່າງເຂັ້ມງວດ ແລະ ເດັດຂາດ ບໍ່ໃຫ້ກາຍເປັນ ປະກົດການ ຍໍ້ທໍ້ຂອງສັງຄົມລາວ. 

ກ່ຽວກັບບັນຫານີ້ ຜູ້ປະກອບການ ຂາຍສິນຄ້າທ່ານນຶ່ງ ໃນແຂວງຈໍາປາສັກ ກ່າວວ່າ ບັນຫາ ອາດຊະຍາກໍາທາງໄຊເບີ້ ແລະ ການຕົວະຍົວະຫລອກລວງ ເລື້ອງການປ່ອຍເງິນກູ້ ດອກເບັ້ຍຕ່ໍາ ຫລື ການຮ່ວມມືລົງທຶນ ເພື່ອຮັບເງິນປັນຜົນ ໃນອັດຕາສູງ ແມ່ນເກີດຂຶ້ນຫລາຍໃນປັດຈຸບັນ ໂດຍສະເພາະ ຜ່ານສື່ສັງຄົມອ່ອນລ່າຍ ເຊັ່ນ ເຟສບຸກ ແລະ ຕິກຕ໊ອກ ເຊິ່ງການໂຄສະນາ ໃນຮູບແບບນັ້ນ ແມ່ນເປັນການຫລອກລວງ ທັງໝົດ.

ແຕ່ເພື່ອປ້ອງກັນຄວາມເສັຍຫາຍ ທີ່ອາດເກີດຂຶ້ນ ແລະຮຽກຮ້ອງລັດຖະບານລາວ ແລະ ອົງການທີ່ກ່ຽວຂ້ອງ ເອົາໃຈໃສ່ໃນການຕິດຕາມ, ກວດກາ ແລະ ປາບປາມ ບັນຫາດັ່ງກ່າວນີ້ຢ່າງເຂັ້ມງວດ ເພື່ອບໍ່ເຮັດໃຫ້ປະຊາຊົນ ອັບປະໂຫຍດ ແລະ ສູນເສັຍຊັບສິນ ໃຫ້ກັບກຸ່ມ ສະຖາບັນການເງິນ ເຫລົ່ານັ້ນ. 

ດັ່ງ ຜູ້ປະກອບການທ່ານນີ້ ກ່າວຕໍ່ວິທຍຸ ເອເຊັຍເສຣີ ໃນມື້ດຽວກັນນີ້ວ່າ:

“ທາງເຟສຫັ້ນ ເຫັນຢູ່ດອກເຂົາໂຄສະນາ ຄືທະນາຄານ JDB ນີ້ວ່າ ວ່າມີເງິນດອກເບັ້ຍ ປ່ອຍກູ້ແນວໃດ ສາມາດເອົາເງິນກູ້ໄດ້ ຜ່ານອ່ອນລ່າຍຫັ້ນເດ້ ເພິ່ນເຮັດຫັ້ນນ່າ ຄົນເຂົາສົນໃຈ ເຂົາເຮັດໃນເຟສ ໃນລ່າຍ ເຂົາກະແຊດຖາມເນາະ ພວກປ່ອຍສິນເຊື່ອ ໂທມາຫາ ແລ້ວກະຖາມ ອ້າຍບໍ່ສະດວກ ອ້າຍສະດວກຍືມ ກູ້ເງິນກະມີຢູ່ ຫລາຍຄົນເຂົາກະເວົ້າຢູ່ ເຂົາຮູ້ເບີເຮົາ ໃນໃສ ເຂົາໂທຫາເຮົາ.”

ຊາວລາວນາງນຶ່ງ ໃນແຂວງບໍລິຄໍາໄຊ ກ່າວວ່າ ຍັງພົບເຫັນບັນຫາ ອາດຊະຍາກໍາທາງໄຊເບີ້ ແລະ ການຕົວະຍົວະຫລອກລວງ ໃນຫລາຍຮູບແບບ ໂດຍສະເພາະ ການປ່ອຍເງິນກູ້ ນອກລະບົບ ທີ່ມີດອກເບັ້ຍສູງເກີນທະນາຄານ ແຫ່ງຊາດລາວ ກໍານົດໄວ້ ຄື 20% ຕໍ່ປີ, ແຕ່ສໍາລັບເງິນກູ້ ນອກລະບົບ ຈະມີອັດຕາດອກເບັ້ຍສູງເຖິງ 30-50% ຕໍ່ເດືອນ ແລະ ບາງເທື່ອ ຍັງມີການໂທລະສັບເຂົ້າມາ ເພື່ອໂຄສະນາປ່ອຍສິນເຊື່ອ, ຫາກບໍ່ມີເອົາໃຈໃສ່ຈາກລັດຖະບານເທົ່າທີ່ຄວນ ຈະເຮັດໃຫ້ປະຊາຊົນລາວ ຖືກຕົວະຍົວະ ຫລອກລວງ ຫລາຍຂຶ້ນກວ່າເກົ່າ ໂດຍສະເພາະ ກຸ່ມປະຊາຊົນລາວ ຜູ້ທີ່ຂາດສະຕິ, ຮູ້ເທົ່າບໍ່ເຖິງການ. ດັ່ງ ຊາວລາວນາງນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ສ່ວນຫລາຍຂະເຈົ້າຈະລົງຕົວຈິງເລີຍ ບາງເທື່ອກະໂທມາຫັ້ນແຫລະ ຄືສິນເຊື່ອຫັ້ນນ່າ ແຕ່ວ່າ ສ່ວນຫລາຍເຂົາກະບໍ່ເຊື່ອປານໃດຫັ້ນນ່າ ທີ່ເຂົາເຈົ້າໂທມາຫັ້ນນ່າ ຕົວະຫັ້ນຕົວະນີ້ ສ່ວນຫລາຍ ລັກສະນະໂທສິນເຊື່ອຢູ່ພີ້ນ່າ.”

ຊາວລາວອີກທ່ານນຶ່ງ ໃນແຂວງບໍ່ແກ້ວ ກ່າວວ່າ ຫລາຍປີມານີ້ ປະເທດລາວ ມີເຫດ ອາດຊະຍາກໍາທາງໄຊເບີ້ ແລະ ການຕົວະຍົວະຫລອກລວງ ໃນຫລາຍຮູບແບບ ເກີດຂຶິ້ນຫລາຍ ແລະຈະເພີ່ມຂຶ້ນເລື້ອຍໆ ສະນັ້ນແລ້ວ ຢາກໃຫ້ທາງການລາວ ປະຕິບັດຕາມມາດຕະການຕ່າງໆ ໃຫ້ທັນການ ແລະ ຮູ້ເທົ່າທັນກຸ່ມກໍ່ເຫດ ອາດຊະຍາກໍາທາງໄຊເບີ້ ແລະ ການຕົວະຍົວະ ຫລອກລວງ . ດັ່ງ ຊາວລາວທ່ານນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ: 

“ຫລອກຄົນນ່າ ມື້ນີ້ເວົ້າແບບນີ້ ເວົ້າຈູງໃຈ ມື້ອື່ນມານັດເຈີ ຢາກຮ່ວມລົງທຶນນ່າ ກູ້ຍືມເງິນ ມັນປອມ ໂທມາ ອ້າຍບໍ່ເອົາເງິນບໍ່ ເງິນດອກເບັ້ຍຕ່ໍາໄດ໋ ລັດຖະບານລາວ ກະສູ້ເຂົາບໍ່ໄດ້ດອກໄປ.” 

ສໍາລັບສະຖາບັນການເງິນ ທີ່ບໍ່ແມ່ນທະນາຄານ ຫລື Non-Bank Financial Institutions ແມ່ນໝາຍເຖິງ ຜູ້ໃຫ້ ບໍລິການທາງການເງິນ ທີ່ຄ້າຍກັບທະນາຄານ ທຸລະກິດ ແຕ່ຫລາກຫລາຍຜລິດຕະພັນ ແລະ ການບໍລິການ ເຊັ່ນ ການເງິນຈຸລະພາກ ທີ່ຮັບເງິນຝາກ ແລະບໍ່ຮັບເງິນຝາກ (Microfinance) ບໍລິສັດເຊົ່າສິນເຊື່ອ (Leasing) ໂຮງຊວດຈໍາ, ສະຫະກອນສິນເຊື່ອ ຫລື ສະຖານບັນການເງິນອື່ນໆ ເຊິ່ງໃນໄລຍະຫລາຍປີມານີ້ ເກີດການຂະຫຍາຍຕົວສູງ ໃນປະເທດລາວ ປັດຈຸບັນ ທະນາຄານແຫ່ງປະເທດລາວ ໄດ້ປະກາດໃຫ້ ສະຖາບັນການເງິນ ທີ່ບໍ່ແມ່ນທະນາຄານ ໄດ້ຮັບການອະນຸຍາດ ໃຫ້ດໍາເນີນກິດຈະການ ທັງໝົດ 191 ແຫ່ງໃນທົ່ວປະເທດ.

ຂະນະທີ່ ລັດຖະບານລາວ ກະພະຍາຍາມທີ່ຈະຕິດຕາມ ກວດກາ ແລະ ປາບປາມ ກຸ່ທແບບອ້າງເປັນ ສະຖາບັນການເງິນ ທີ່ບໍ່ແມ່ນທະນາຄານ ໃນການປ່ອຍສິນເຊື່ອ ຢ່າງເຂັ້ມງວດ ແລະ ເດັດຂາດ ເພື່ອຮັບປະກັນ ການປະຕິບັດ ຫລັກການບັນຊີ ໃຫ້ມີຄວາມຖືກຕ້ອງ ສອດຄ່ອງກັບລະບຽບກົດໝາຍ ແລະ ມາດຕະຖານ ບັນຊີສາກົນ.

ສປປ ລາວ ຄືເປັນນຶ່ງໃນປະເທດ ທີ່ມີການກໍ່ເຫດອາດຊະຍາກໍາ ໃນຫລາຍຮູບແບບ ເຊິ່ງປັດຈຸບັນ ສປປ ລາວ ກະຍັງຕົກຢູ່ ໃນບັນຊີຕິດຕາມ ແບບໃກ້ຊິດ ແລະເຂັ້ມງວດ ຫລື Enhance Expedited Follow-up Reports ຂອງ ອົງການ ຕ້ານການຟອກເງິນສາກົນ ໃນກຸ່ມປະເທດ ອາຊີ-ແຟຊີຟິກ ຫລື Asia Pacific on Anti-Money Laundering (APG) ທີ່ມີການປະເມີນ ເປັນຄັ້ງທີ່ 2 ໃນລະຫວ່າງວັນທີ 12-23 ກັນຍາ 2022 ທີ່ຜ່ານມາ ແຕ່ບໍ່ສາມາດ ປະຕິບັດ ຕາມມາດຕະຖານ ການປະເມີນຄວາມສ່ຽງ  ລະດັບຊາດ ດ້ານການຟອກເງິນ ຕິດພັນກັບໄພຂົ່ມຂູ່ ຫລື ການກະທໍາຜິດທາງອາຍາ ທີ່ມີຄວາມສ່ຽງ ຕໍ່ການຟອກເງິນ.