ລັດຖະບານລົ້ມແຫຼວ ໃນການແກ້ໄຂບັນຫາລາຄາສິນຄ້າ, ອັດຕາແລກປ່ຽນ

ທາງການລາວ ຍັງບໍ່ສາມາດແກ້ໄຂບັນຫາ ລາຄາສິນຄ້າ ແລະອັດຕາແລກປ່ຽນລະຫວ່າງເງິນກີບ ແລະເງິນຕາຕ່າງປະເທດໄດ້ ເນື່ອງຈາກການຜະລິດສິນຄ້າ ຢູ່ພາຍໃນປະເທດບໍ່ເຂັ້ມແຂງ ແລະບໍ່ໄດ້ຫຼາກຫຼາຍເທົ່າທີ່ຄວນ ແລະສິນຄ້າສ່ວນໃຫຍ່ ຍັງອາໄສແຕ່ການນໍາເຂົ້າມາຈາກຕ່າງປະເທດ ເຮັດໃຫ້ລາວຂາດດຸນການຄ້າຢ່າງຕໍ່ເນື່ອງ. ສິ່ງດັ່ງກ່າວ ກະທົບໂດຍກົງໃສ່ຄັງສໍາລອງເງິນຕາຕ່າງປະເທດ ທີ່ມີໜ້ອຍຢູ່ແລ້ວນັ້ນຕື່ມອີກ ແລະທັງກະທົບຕໍ່ການຊາລະໜີ້ສິນຕ່າງປະເທດນໍາດ້ວຍ, ອີງຕາມຄໍາເວົ້າຂອງທ່ານ ກອງແກ້ວ ໄຊສົງຄາມ ປະທານສະຖາບັນ ວິທະຍາສາດເສດຖະກິດ ແລະສັງຄົມແຫ່ງຊາດ ໃນມື້ວັນທີ 2 ສິງຫານີ້.

ແລະເຈົ້າຂອງຮ້ານຂາຍເຄື່ອງທາງອອນລາຍ ຢູ່ນະຄອນຫຼວງວຽງຈັນ ຜູ້ນຶ່ງ ກໍເວົ້າຕໍ່ວິທຍຸເອເຊັຍເສຣີ ໃນມື້ວັນທີ 7 ສິງຫານີ້ວ່າ ປະເທດລາວ ຍັງບໍ່ທັນມີໂຄງຮ່າງພື້ນຖານ, ເຕັກໂນໂລຊີ, ເງິນທຶນ ແລະຄວາມຮູ້ ພໍເທົ່າໃດ ດັ່ງນັ້ນຈຶ່ງເຮັດໃຫ້ມີຄວາມຈໍາເປັນ ທີ່ຈະຕ້ອງໄດ້ນໍາສິນຄ້າຕ່າງປະເທດເຂົ້າມາ ຢ່າງຕໍ່ເນື່ອງ ເປັນຕົ້ນຈາກປະເທດຈີນ ແລະໄທ.

“ເປັນອັນຂອງເຮົານໍາເຂົ້າມາຈາກຈີນເອື້ອຍ ກໍມີຂອງໄທຢູ່ ຂອງໄທແມ່ນໜ້ອຍກ່ອນ ຕາມລາຄາ ແມ່ນລາຄານຶ່ງເອື້ອຍ ສ່ວນເປີຫັ້ນແມ່ນບໍ່ໄດ້ປັບ ເປີທີ່ເຮົານໍາເຂົ້າມາແຕ່ຈີນຫັ້ນນະ ເປີອື່ນໆ ເຮົາກໍໄດ້ປັບລາຄາຕາມເລດເງິນຫັ້ນນະ ຢູ່ລາວຫັ້ນ ຂະເຈົ້າຍັງບໍ່ທັນຜະລິດເອື້ອຍ ກໍເລີຍຕ້ອງນໍາເຂົ້າມາຈາກຕ່າງປະເທດ ຄຸນນະພາບກໍດີໃດ໋ ຄຸນນະພາບດີ ບາງອັນ ບາງຢ່າງກໍຜະລິດຢູ່ລາວ.”

ເພື່ອແກ້ໄຂບັນຫາດັ່ງກ່າວ ເຈົ້າໜ້າທີ່ພະແນກອຸດສາຫະກໍາ ແລະການຄ້າທ່ານນຶ່ງ ໄດ້ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ທາງການ ແລະພາກສ່ວນທີ່ກ່ຽວຂ້ອງ ຈະສະໜັບສະໜູນ ໃຫ້ປະຊາຊົນ ນໍາໃຊ້ສິນຄ້າ ທີ່ຜະລິດໄດ້ຢູ່ພາຍໃນປະເທດ ເປັນຕົ້ນ ສິນຄ້ານຶ່ງເມືອງ ນຶ່ງຜະລິດຕະພັນ (ODOP) ແລະນໍາໃຊ້ສິນຄ້າອຸປະໂພກ-ບໍລິໂພກຕ່າງໆ ທີ່ຜະລິດໄດ້ຢູ່ພາຍໃນປະເທດ. ແຕ່ສໍາລັບສິນຄ້າທີ່ຈໍາເປັນຈໍານວນນຶ່ງ ແມ່ນຕ້ອງໄດ້ນໍາມາຈາກຕ່າງປະເທດ ເປັນຕົ້ນແມ່ນໄທ, ຫວຽດນາມ ດັ່ງນັ້ນຈຶ່ງເຮັດໃຫ້ລາຄາສິນຄ້າແພງ ແລະວ່າ ສິນຄ້າທີ່ຜະລິດຢູ່ພາຍໃນກໍພໍມີ ແຕ່ບໍ່ຫຼາຍປານໃດ ດັ່ງທີ່ທ່ານກ່າວວ່າ:

“ພໍໄດ້ຢູ່ ແຕ່ກໍບໍ່ໄດ້ຫຼາຍປານໃດ ຄົນລາວກໍຍັງບໍ່ໄດ້ມັກ...ປານໃດຫັ້ນນະ ຄົນລາວມັນກໍມັກທົ່ວໄປເລີຍຫັ້ນນະເຈົ້າ ຄົນລາວມັນແບບ ມັນຢູ່ແບບທໍາມະຊາດໄປນີ້ນະ ຍັງບໍ່ເຂົ້າກົງໂຕນຄືແບບຄືໄທ ຄືຫວຽດນີ້ນະ ຄົນລາວເຮົາມັນຍັງແບບຄືໃຊ້ງ່າຍຫັ້ນນະ ຍັງບໍ່ທັນສະໄໝຫັ້ນນະ ເຈົ້າ ແມ່ນແຫຼະ ມັນຍັງນໍາເຂົ້າມາຫຼາຍຫັ້ນນະເຈົ້າ ຊ່ວງນີ້ລັດຖະບານກໍຍັງຕ້ອງຫ້າມນໍາເຂົ້າຫັ້ນນະ ເພື່ອໄດ້ໃຫ້ປະຊາຊົນປູກຝັງຫັ້ນນະ.”

ໃນຂະນະດຽວກັນ ຄົນລ້ຽງໝູ ແລະໄກ ຢູ່ເມືອງປາກຊັນ ແຂວງບໍລິຄໍາໄຊ ກໍເວົ້າວ່າ ສິນຄ້າການກະເສດ ເປັນຕົ້ນ ຊີ້ນໝູ, ຊີ້ນງົວ, ໄກ່ ແລະອື່ນໆ ກໍຍັງມີຄວາມຈໍາເປັນ ທີ່ຈະຕ້ອງໄດ້ນໍາເຂົ້າມາຈາກຕ່າງປະເທດຢູ່ ຍ້ອນບໍ່ສາມາດຜະລິດໄດ້ຢ່າງພຽງພໍ ຕາມຄວາມຕ້ອງການ ຍ້ອນຊາວກະສິກອນ ສ່ວນຫຼາຍໂຈະກິດຈະການລ້ຽງສັດ ແລະຫັນໄປປະກອບອາຊີບອື່ນ ຍ້ອນຕົ້ນທຶນສູງ,ຫົວອາຫານສັດແພງ ແຕ່ຂາຍສັດອອກຕະຫຼາດ ໄດ້ລາຄາຕໍ່າ ດັ່ງທີ່ທ່ານກ່າວວ່າ:

“ສ່ວນຫຼາຍມັນບໍ່ຢາກພຽງພໍປານໃດ ເພາະວ່າຕ້ອງໄດ້ນໍາເຂ%ົ້າຫຼາຍ ສ່ວນຫຼາຍຫັ້ນນະ ຂະເຈົ້າແບບວ່າ ທີ່ວ່າຂະເຈົ້າລ້ຽງຫັ້ນ ລາຄາມັນຖືກຫຼາຍ ຂະເຈົ້າເຊົາລ້ຽງຫຼາຍ ບາງເທື່ອຫັ້ນນະ ແມ່ນໆ ບໍ່ໄດ້ລ້ຽງແລ້ວຊ່ວງນີ້ ເພາະວ່າຕອນນີ້ ເຮົາໄປຊື້ເປັດ ຊື້ໄກ່ ແລ້ວເຮົາມີເປັດ ມີໝູ ແລ້ວເຮົາຊື້ໝູມາຂາຍ ກໍໂຕສອງໂຕນຶ່ງ ແມ່ນ ຕົ້ນທຶນສູງໂພດ ຫົວອາຫານແພງ.”

ແລະຜັກສົດ, ໝາກໄມ້ ກໍຈໍາເປັນຕ້ອງໄດ້ນໍາເຂົ້າມາຈາກຕ່າງປະເທດເຊັ່ນກັນ ຍ້ອນໃນຫຼາຍປີທີ່ຜ່ານມານີ້ ດິນຟ້າອາກາດ ມີການປ່ຽນແປງ ເຮັດໃຫ້ການປູກຝັງ ໄດ້ຮັບຜົນຜະລິດບໍ່ດີ ເຮັດໃຫ້ຊາວກະສິກອນ ຈໍາເປັນຕ້ອງໄດ້ຫັນໄປປະກອບອາຊີບອື່ນ ດັ່ງແມ່ຄ້າຂາຍເຄື່ອງ ຢູ່ຕະຫຼາດແຫ່ງນຶ່ງ ໃນນະຄອນຫຼວງວຽງຈັນ ເວົ້າວ່າ:

“ສະພາບແວດລ້ອມມັນບໍ່ເໝາະສົມແດ່ ອຸນນະພູມຂຶ້ນສູງ ອ່າ ສະພາບອາກາດໆ ແລ້ວກໍສອງມາ ກໍດິນມັນບໍ່ເໝາະສົມແດ່ ສະພາບອາກາດ ເປັນນໍ້າແດ່ ຮ້ອນກໍຮ້ອນຫຼາຍຂຶ້ນຊີ່ນະ ອາກາດຮ້ອນ ປູກໝາກຖົ່ວລຽນບໍ ປູກໝາກເງາະ ໝາກ...ດິນມັນກໍບໍ່ເໝາະສົມແດ່ ຄືວ່າຖ້າເປັນໝາກ ມາຊັ່ງເປັນໂລນີ້ ໂລນຶ່ງປະມານ 120,000 (ກີບ).”

ເພື່ອແກ້ໄຂບັນຫາທີ່ວ່ານີ້ ທາງການລາວ ໄດ້ແຕ່ງຕັ້ງຄະນະສະເພາະກິດ ເພື່ອຄົ້ນຄວ້າ ບັນຫາລາຄາສິນຄ້າ ແລະອັດຕາເງິນເຟີ້ ທີ່ເພີ້ມສູງຂຶ້ນ. ຄະນະດັ່ງກ່າວປະກອບດ້ວຍ ສະຖາບັນວິທະຍາສາດເສດຖະກິດ ແລະສັງຄົມ ແຫ່ງຊາດ, ກະຊວງແຜນການແລະການລົງທຶນ, ກະຊວງອຸດສາຫະກໍາ ແລະການຄ້າ, ກະຊວງກະສິກໍາ ແລະປ່າໄມ້, ທະນາຄານແຫ່ງ ສປປລາວ, ກະຊວງການເງິນ ແລະພາກສ່ວນອື່ນໆ ທີ່ກ່ຽວຂ້ອງ ດັ່ງເຈົ້າໜ້າທີ່ສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ ທ່ານນຶ່ງກ່າວວ່າ:

“ເບື້ອງລັດຖະບານຄົ້ນຄວ້າ ໜ້າຈະທີ່ວ່າອາທິດແລ້ວ ຫຼືວ່າວັນຈັນນີ້ ມີການປະຊຸມຮ່ວມກັບບັນດາທຸລະກິດຫັ້ນນະ ທີ່ເຮັດວຽກກ່ຽວກັບເສດຖະກິດໂຕນີ້ ຂະເຈົ້າເຂົ້າຮ່ວມນໍາ ແລ້ກໍເປັນປະທານຂອງພວກເຮົາເຂົ້າຮ່ວມນໍາ.”

ກ່ຽວກັບເລື່ອງທີ່ວ່ານີ້ ທ່ານ ກອງແກ້ວ ໄຊສົງຄາມ ປະທານ ສະຖາບັນວິທຍາສາດເສດຖະກິດ ແລະສັງຄົມແຫ່ງຊາດ ກ່າວຕໍ່ກອງປະຊຸມ ລະດົມຄວາມຄິດເຫັນ ຈາກພາກທຸລະກິດ ໃນມື້ວັນທີ 2 ສິງຫານີ້ວ່າ ປັດຈຸບັນ ປະເທດລາວ ພວມປະເຊີນກັບບັນຫາຂາດສະຖຽນລະພາບ ທາງດ້ານເສດຖະກິດມະຫາພາກ ໂດຍສະເພາະ ການເພີ້ມຂຶ້ນຂອງລາຄາສິນຄ້າ ຫລືອັດຕາແລກປ່ຽນເງິນຕາ ທີ່ບໍ່ຄົງທີ່ , ເງິນເຟີ້, ສະພາບເງິນກີບອ່ອນຄ່າ ເຮັດໃຫ້ຄ່າຄອງຊີບສູງຂຶ້ນ ສົ່ງຜົນກະທົບໂດຍກົງໃສ່ສະພາບຄວາມເປັນຢູ່ ຂອງພະນັກງານ ແລະປະຊາຊົນ ຮວມເຖິງພາກລັດ ແລະພາກທຸລະກິດ ນໍາດ້ວຍ.