ລັດຖະບານ ຂາດງົບປະມານ ແກ້ໄຂຄວາມທຸກຍາກ

ການແກ້ໄຂບັນຫາຄວາມທຸກຍາກໃນປະເທດລາວໃຫ້ໄດ້ທົ່ວທຸກແຂວງຍັງເປັນເລື່ອງທີ່ປະຕິບັດໄດ້ຍາກຍ້ອນວ່າລັດຖະບານຂາດແຄນງົບປະມານທີ່ຈະພັດທະນາ. ຂະນະທີ່ປັດຈຸບັນເສດຖະກິດໃນລາວກໍ່ຍັງມີບັນຫາເງິນເຟີ້ ເງິນກີບອ່ອນຄ່າສົ່ງຜົນເຮັດໃຫ້ຄ່າຄອງຊີບສູງ ແລະ ຍັງເກີດໄພພິບັດນໍ້າຖ້ວມຕໍ່ເນື່ອງທຸກປີເຊິ່ງເປັນເປົ້າໝາຍທີ່ຈະຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2026 ຍັງບໍ່ບັນລຸຕາມເປົ້າໝາຍແນ່ນອນ.

ເຊິ່ງຈາກການເກັບກໍາຂໍ້ມູນຂອງພາກລັດໃນເບື້ອງຕົ້ນພົບວ່າທົ່ວປະເທດມີຄອບຄົວທັງໝົດ 1,399,904 ຄອບຄົວ. ມີຄອບຄົວບໍ່ພົ້ນທຸກຈໍານວນ 257,670 ຄອບຄົວຄິດເປັນ 20,88% ມີ 8 ແຂວງຍັງບໍ່ພົ້ນທຸກກວມອັດຕາສ່ວນຕໍ່າມີ 2 ແຂວງຄື ນະຄອນຫຼວງວຽງຈັນ ແລະ ແຂວງວຽງຈັນ ທຸກເມືອງ ແລະ ທຸກບ້ານໄດ້ພົ້ນທຸກ ແລະ ມີ 10 ແຂວງທີ່ມີຫຼາຍຄອບຄົວຍັງບໍ່ພົ້ນຈາກຄວາມທຸກຍາກກວມເອົາອັດຕາສ່ວນຫຼາຍແມ່ນ 2 ແຂວງຄື ຫົວພັນ ກັບຜົ້ງສາລີ ຫຼາຍກ່ວາໝູ່ກວມເອົາ 50% ຂຶ້ນໄປເຊິ່ງລວມແລ້ວຍັງເຫັນວ່າຍັງກວມອັດຕາຄວາມທຸກຍາກຫຼາຍຢູ່ຫຍີ່ງແຖວພູດອຍໄຟຟ້າ ສາທາລະນະສຸກ ນໍ້າສະອາດ ແລະ ອື່ນໆ ກໍ່ຍັງເຂົ້າບໍ່ເຖີງ. ດັ່ງເຈົ້າໜ້າທີ່ກ່ຽວຂ້ອງກ່າວຕໍ່ວິທຍຸເອເຊັຽເສຣີໃນວັນທີ 13 ກັນຍາ ນີ້ວ່າ:

“ແນ່ນອນແລ້ວໂຕນີ້ເລື່ອງທ້າທາຍມັນຍາກຍ້ອນວ່າລັດຖະບານເຮົາກໍ່ບໍ່ມີງົບປະມານນ່າເລື່ອງທືນເປັນປັດໃຈໜຶ່ງເນາະເຮັດຫຍັງໄດ້ອາໃສແຕ່ຕ່າງປະເທດມາລົງທືນມາເບິ່ງສະພາບເສດຖະກິດເນາະມັນກໍ່ລຸມເລົ້າແລ້ວບາດສະພາບໄພທຳມະຊາດກໍ່ມາກະທົບໃສ່ອີກເທື່ອນີ້ເຂດແຖວພູດອຍສາຍໄຟຟ້ານໍ້າອີ່ຫຍັງກໍ່ຍັງບໍ່ເຖີງຫັ້ນນ່າ.”

ທ່ານກ່າວຕື່ມວ່າລັດຖະບານລາວອາໃສແຕ່ໃຫ້ນັກລົງທືນຕ່າງປະເທດເຂົ້າມາລົງທືນພາຍໃນ. ຂະນະທີ່ຍັງມີການ ຂາດດຸນການຄ້າຫຼາຍເພາະປະເທດລາວນໍາເຂົ້າສິນຄ້າຫຼາຍກ່ວາສົ່ງອອກ. ເງິນຕາຕ່າງປະເທດກໍ່ຂາດເຂີນ, ພື້ນຖານໂຄງລ່າງກໍ່ບໍ່ໄດ້ມາດຕະຖານຄືເສັ້ນທາງກໍ່ເຮັດພໍທຽວໄດ້ ແລະ ຍັງເປັນໜີ້ຕ່າງປະເທດຈຳນວນຫຼາຍ. ລັດບໍ່ສາມາດສຳລະໜີ້ສີນໄດ້ຕາມກຳນົດແຕ່ທາງລັດຖະບານກໍ່ມີການເຈລະຈາຢູ່ບໍ່ໄດ້ເຖີງຂັ້ນວ່າປະເທດລາວຈະຫຼົ້ມຈົມແຕ່ບໍ່ມີເງິນຈະພັດທະນາປະເທດ.

“ວິຊາການທາງດ້ານເສດຖະກິດເຂົາເຈົ້າມາເບິ່ງເຂົາກາຊິພໍອັນນັ້ນຢູ່ລາວເຮົາຊິບໍ່ບໍ່ທີ່ວ່າລົ້ມເຫຼວຫັ້ນນ່າລັດຖະບານລາວເພິ່ນກໍ່ໄດ້ໄປເຈລະຈາກັບຕ່າງປະເທດໜັກແມ່ນບ່ອນທີ່ວ່າເປັນເຈົ້າໜີ້ຫັ້ນແຫຼະເນາະເພິ່ນກໍ່ຢາກໃຫ້ຜ່ອນຍາວລົງດຽວນີ້ລາວເຮົາມັນກໍ່ເລື່ອງດຸນການຄ້າສະພາບເງິນຕາກໍ່ຂາດເຂີນນ່າທາງພື້ນຖານໂຄງລ່າງການສັນຈອນກໍ່ເຮັດພໍທີ່ທຽວໄດ້.”

ຂະນະທີ່ປະຊາຊົນໃນແຂວງຫຼວງພະບາງກ່າວວ່າແຜນການລົບລ້າງຄວາມທຸກຍາກຂອງລັດຖະບານລາວທີ່ວ່າສ້າງບ້ານນ້ອຍ ເປັນບ້ານໃຫຍ່ ສ້າງບ້ານໃຫຍ່ເປັນຕົວເມືອງນ້ອຍ ບໍ່ເຫັນຈະມາສ້າງຫຍັງໃນເຂດຊົນນະບົດເຊິ່ງໂຄງຮ່າງພື້ນຖານຂອງປະເທດກໍ່ຍັງບໍ່ໄດ້ຮັບການພັດທະນາໃຫ້ດີຂຶ້ນມີພຽງແຕ່ຄຳເວົ້າເທົ່ານັ້ນໂດຍສະເພາະເລື່ອງເສັ້ນທາງ ນໍ້າສະອາດ ຊີວິດການເປັນຢູ່ ການສ້າງລາຍຮັບ ອາຊີບໝັ້ນຄົງ ແລະ ອື່ນໆ ເປັນໄປໄດ້ຍາກຫຼາຍທີ່ລາວຈະຫຼຸດພົ້ນຈາກປະເທດດ້ອຍພັດທະນາໃນອີກ 2 ປີຂ້າງໜ້າປະຊາຊົນກໍ່ຍັງໃຊ້ຊີວິດທຸກຍາກຄືເກົ່າ.

“ກໍ່ທຸກຍາກຫຼາຍຄອບຄົວຍັງບໍ່ດີເພິ່ນເວົ້າຈະສ້າງບ້ານນ້ອຍໃຫ້ເປັນບ້ານໃຫຍ່ ບ້ານໃຫຍ່ກໍແຮງຈະໃຫ້ໃຫຍ່ຂຶ້ນຕື່ມ ແລະ ມັນກໍ່ບໍ່ເປັນຄືຄຳເວົ້າຫຼາຍຄົນກໍ່ບໍ່ມີດິນມີດອນຢູ່ການຢູ່ການໄປຊອກມາຫາກິນເພິ່ນກໍ່ບໍ່ເຫັນມາຊ່ວຍເຮົາເດ້ດຽວນີ້ແຮງທຸກຍາກໄປ.”

ພ້ອມດຽວກັນນີ້ປະຊາຊົນໃນນະຄອນຫຼວງວຽງຈັນກ່າວວ່າປັດຈຸບັນເສດຖະກິດໃນລາວຕົກຕໍ່າລາຄາສິນຄ້າແພງຂຶ້ນແຕ່ລາຍຮັບຂອງປະຊາຊົນຍັງເທົ່າເກົ່າ ປະຊາຊົນມີຊິວດິທີ່ທຸກຍາກຄືເກົ່າ ສ່ວນຖະໜົນຫົນທາງກໍແມ່ນວ່າຈະດີຂຶ້ນບາງຈຸດໃນນະຄອນຫຼວງວຽງຈັນເພາະມີລົດແກ່ຫີນແກ່ດິນຫຼາຍເວລາຝົນຕົກກໍ່ເປື້ອນ.

“ເລື່ອງທຸກຍາກໍ່ທຸກຍາກຫັ້ນແຫຼະມັນບໍ່ມີອັນເຮັດອັນທໍາຫັ້ນນ່າມັນຍາກເດ້ຫັ້ນແຫຼະດຽວນີ້ເຂົ້າຍາກໝາກແພງຫັ້ນນ່າເສດຖະກິດແມ່ນຍັງກາບໍ່ອັນນັ້ນຫັ້ນນ່າມັນບໍ່ອຸດົມສົມບູນຜູ້ທຸກກໍ່ທຸກກໍ່ຫາກິນໄປຕາມພື້ນບ້ານເຮົານີ້ແຫຼະຖະໜົນຫົນທາງຍາມຝົນກໍ່ຍັງເປື້ອນຢູ່ຫັ້ນແຫຼະລົດແກ່ຫີນແກ່ດິນມັນກໍເປື້ອນຄືເກົ່າຫັ້ນແຫຼະ”

ທາງດ້ານປະຊາຊົນແຂວງຫົວພັນກ່າວວ່າປັດຈຸບັນກໍ່ຍັງມີຄົນທຸກຍາກຫຼາຍຢູ່ບາງຄອບຄົວບໍ່ມີເງິນຈະຊື້ເຄື່ອງໜຸ່ງ ອຸປະກອນການຮຽນໃຫ້ລູກໄປຮຽນ ແລະ ປັດຈຸບັນບັນຫາລາຄາສິນຄ້າກໍ່ເພີ່ມຂຶ້ນຕໍ່ເນື່ອງ ຊີວິດການເປັນຢູ່ບໍ່ໄດ້ດີຂຶ້ນ.

“ຊີວິດການເປັນຢູ່ຂອງປະຊາຊົນນີ້ແລ້ວມີຄອບຄົວກໍ່ຍັງທຸກຍັງຍາກເງິນຊິຊື້ເຄື່ອງໜຸ່ງໃຫ້ລູກໄປໂຮງຮຽນກໍ່ບໍ່ມີດິນສໍຊຸດນັກຮຽນກໍ່ຍັງຂາດເຂີນຫັ້ນນ່າເນາະມັນລະເປັນແນວນັ້ນລາຄາສິນຄ້າບ່ອນວ່າໃນຫຼືນອກມັນເພີ່ມຂຶ້ນຕະຫຼອດ.”

ນອກຈາກນີ້ປະເທດລາວຍັງມີບັນຫາເລື່ອງການສຶກສາກໍາລັງເຂົ້າສູ່ວິກິດຕ້ອງໄດ້ແກ້ໄຂຍ້ອນວ່າບໍ່ມີນັກຮຽນເຂົ້າຮຽນຕໍ່ມະຫາວິທະຍາໄລເນື່ອງຈາກຈົບມາບໍ່ມີວຽກຮອງຮັບ ແລະ ຍັງມີບັນຫາຄູຈຳນວນຫຼາຍລາອອກຍ້ອນເງິນເດືອນບໍ່ກຸ້ມກິນ.

ທີ່ຜ່ານມາລັດຖະບານລາວກໍ່ມີການປະຊຸມປຶກສາຫາທາງແກ້ໄຂມາຕະຫຼອດເພື່ອໃຫ້ທຸກພາກສ່ວນຊ່ວຍກັນແຕ່ກໍ່ຍັງບໍ່ທັນຈະສາມາດແກ້ໄຂໄດ້ເທື່ອ. ເຖີງແມ່ນວ່າມີເປົ້າໝາຍການພັດທະນາແບບຍືນຍົງປີ 20230 ຂອງປະເທດກໍ່ຕາມແຕ່ທຸກຢ່າງຕ້ອງໃຊ້ງົບປະມານຈຳນວນຫຼາຍເຊິ່ງລັດຖະບານລາວບໍ່ມີພຽງພໍໃນຂະນະທີ່ໜີ້ສິນຂອງປະເທດກໍ່ຍັງບໍ່ສາມາດສຳລະໄດ້ຕາມກຳນົດ.